ຫົວ​ຂໍ້ : ຣັດເຊຍ ມີບົດບາດແກ້ໄຂບັນຫາສຳຄັນໃນໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 20/01/2020 11:10:45 ຈຳ​ນວນ​ຜູ້​ເຂົ້າ​ຢ້ຽມ​ຊົມ 328 ຄັ້ງ

    ໃນ​ສະພາບ​​ການ ເມືອງ​​ໂລກ ສືບຕໍ່​ມີ​ການ​ຜັນ​ແປ​ຢ່າງ​ສັບສົນ ແລະ ປະເທດ ມະຫາ​ອຳ ນາດ ຄ່ອຍໆ​ສູນ​ເສຍ​ ບົດບາດ​ໄປ​ເທື່ອ​ລະ​ໜ້ອຍ ກໍ​ຄື​ການ​ສົ່ງ​ຜົນ​ກະທົບ​ຢູ່​ບັນດາ​ຈຸດ​ເຄັ່ງຮ້ອນ​ຕ່າງໆໃນໂລກ. ປະເທດ​ຣັດ​ເຊຍ ພາຍ​ໃຕ້​ການ​ຊີ້​ນຳ​-​ນຳພາ​ຂອງ​ທ່ານ ວະ​ລາ​ດີ​ເມຍ ປູ​ຕິນ ປະທານາທິບໍດີ​ຣັດ​ເຊຍ ຊຶ່ງ​ພົ້ນ​ເດັ່ນ​ຂຶ້ນ​ດ້ວຍ​ທີ່​ຕັ້ງ​ເປັນກາງ​ທີ່​ມີ​ຄວາມ​ໄວ້​ເນື້ອ ເຊື່ອ​ໃຈ​ໃນ​ບັນດາ​ບັນຫາ​ເຄັ່ງຮ້ອນ​ທົ່ວ​ໂລກ.
    ໜຶ່ງ​ໃນ​ບັນດາ​ການເຄື່ອນ ໄຫວ​ທາງ​ການ​ທູດ ຊຶ່ງ​ດຶງ​ດູດ​ຄວາມ​ສົນໃຈ​ຈາກ​ຫາງ​ສຽງ​ ໃນ​ທົ່ວ​ໂລກ ໄດ້​ເອົາໃຈໃສ່​ເປັນ​ພິເສດ​ໃນ​ຫຼາຍ​ມື້​ຜ່ານ​ມາ, ແມ່ນ​ການ​ພົບ​ປະ​ສຸດ​ຍອດ ລະຫວ່າງ ຣັດ​ເຊຍ ແລະ ເຢຍລະ​ມັນ ຢູ່​ນະຄອນຫຼວງ​ມົ​ສ​ກູ, ເນື່ອງ​ໃນ​ໂອກາດ​ທີ່ ທ່ານ ນາງ ແອ​ງ​ເຈ​ລາ ເມີ​ແຄວ ນາ​ຍົກ​ລັດຖະມົນຕີ  ເຢຍ​ລະ​ມັນ ທີ່​ພວມ​ຢ້ຽມຢາມ ຣັດ​ເຊຍ ຢ່າງ​ເປັນ​ທາ​ງການ. 
ການພົບ​ປະລະ​ຫວ່າງ ທ່ານ ປູ​ຕິນ ກັບ ທ່ານ ນາງ ເມີ​ແຄວ, ໃນ​ວັນ​ທີ 11 ມັງກອນ​ຜ່ານ​ມາ, ການນຳເຢຍ​ລະ​ມັນ ຕາງ ໜ້າໃຫ້​ສະຫະພາບ​ເອີ​ຣົບປາ ຖະໜາ​ຢາກ​ຊອກ​ຫາ​ການ​ສະ ໜັບສະໜູນ​ຂອງຣັດເຊຍ ໃນ​ບັນດາ​ບັນຫາ​ທົ່ວ​ໂລກ ລວມທັງ ການ​ຮັກສາ​ຂໍ້​ຕົກລົງ​ນິວ​ເຄ​ລຍ ອີ​ຣານ, ແກ້​ໄຂ​ບັນຫາ ຊີ​ຣີ, ວິ​ກິດການລີ​ບີ, ການ​ປະ​ທະ​ກັນ​ຢູ່ ອູ​ແກ​ຣນ ແລະ ໂຄງການ​ລະບົບ​ທໍ່​ສົ່ງ​ອາຍ​ແ​ກັສ​ທາງ​ທິດເໜືອ ລ້ວນ​ແຕ່ ແມ່ນ​ຈຸດ​ເຄັ່ງຮ້ອນ​ຂອງ​ໂລກ​ໃນ​ໄລຍະ​ຜ່ານ​ມາ.
    ຄວາມ​ມຸ້ງ​ຫວັງ​ກ່ຽວ​ກັບ​ການ​ຮັກສາ​ຂໍ້​ຕົກລົງ​ນິວ​ເຄ​ລຍ ອີ​ຣານ. ພາຍຫຼັງ ອາ​ເມ​ຣິ​ກາ ຖອນ​ຕົວອອກ​ຈາກຂໍ້​ຕົກລົງ​ນິວ​ເຄ​ລຍ ອີ​ຣານ  ທີ່​ໄດ້​ລົງນາມ​  ໃນ​ປີ 2015 ລະຫວ່າງເຕ​ເຮ​ ຣານ ແລະ ກຸ່ມ P5+1 (ລວມ​ ມີ 5 ປະເທດ​ສະມາຊິກ​ຖາວອນສະພາ​ຄວາມ​ໝັ້ນຄົງ​ສະຫະ​ປະຊາຊາດ ແລະ ເຢຍ​ລະ​ມັນ) ຫຼື ເອີ້ນ​ວ່າ: ແຜນການ​ດຳເນີນ​ງານ​ຮ່ວມ​ຮອບດ້ານ (JCPOA) ພຽງ​ລຳພັງ​ຝ່າຍ​ດຽວ ໃນ​ເດືອນພຶດສະພາ 2018 ແລະ ຈັດ​ວາງ​ບັນດາ​ມາດ​ຕະ ການ​ລົງໂທດ ອີ​ຣານ ຄືນໃໝ່, ເຕ​ເຮ​ຣານ ໄດ້​ຖະແຫຼງ​ຫຼາຍ​ຄັ້ງ ແລະ ຕາມ​ສະພາບ​ຕົວ​ຈິງ​ແລ້ວ   ອີ​ຣານ  ໄດ້​ປະຕິບັດບັນດາ​ບາດກ້າວ​ຫຼຸດຜ່ອນ​ຄຳ​ໝັ້ນ​ສັນ ຍາ, ເຮັດ​ໃຫ້ JCPOA ເກືອບ​ຈະ​ຖືກ​ຍົກເລີກ​ຢ່າງ​ຮ້າຍ​ແຮງ. ບັນດາ​ປະເທດ​ເອີ​ຣົບ ຊຶ່ງ​ນໍາ​ໂດຍ ອັງກິດ, ຝຣັ່ງ ແລະ ເຢຍ​ລະ​ມັນ ໄດ້​ປະຕິບັດ​ຄວາມ​ພະ ຍາຍາມ​ຫຼາຍ​ຢ່າງ ເພື່ອ​ກອບກູ້​ເອົາ​ສັນຍາ​ທີ່​ພວມ​ຈະ​ຫຼົ້ມ​ເຫຼວ, ແຕ່​ຍັງບໍ່​ທັນ​ນຳ​ມາ​ຊຶ່ງ​ໝາກຜົນ​ທີ່​ພໍ​ໃຈ.
    ປັດຈຸບັນ, ຣັດ​ເຊຍ ແມ່ນ​ໜຶ່ງ​ໃນ​ຈຳນວນ​ປະເທດ ທີ່​ມີ​ການ​ພົວພັນ​ອັນ​ດີງາມ​ໃນ​ຫຼາຍ​ຂົງເຂດ ແລະ ບັນຫາ​ສາກົນ​ກັບອີ​ຣານ. ຍິ່ງ​ໄປ​ກວ່າ​ນັ້ນ, ມົ​ສ​ກູ ຍັງ​ມີ​ການ​ພົວພັນ​ເປັນ​ປົກກະຕິ​ກັບບັນດາ​ປະເທດ ອື່ນ​ໃນ​ພາກ​ພື້ນ, ລວມ​ມີ​ທັງ​ຄູ່​ຮ່ວມ​ມື ແລະ ຄູ່​ແຂ່ງ​ຂອງ ອີ​ຣານ. ຄວາມ​ຈິງ​ໄດ້​ຊ່ວຍ​ໃຫ້ ຣັດ​ເຊຍ ກາຍເປັນ​ປະເທດທີ່​ມີ​ສຽງ​ເວົ້າ​ໜັກ​ແໜ້ນ​ກັບອີ​ຣານ ໃນ​ສະພາບ​ປັດ​ຈຸ​ບັນ. ນັ້ນ​ກໍ່​ແມ່ນ​ເຫດຜົນ​ທີ່​ເຮັດ ໃຫ້ ບັນດາ ປະເທດ​ເອີ​ຣົບ ຫັນ​ໜ້າ​ໄປ​ຫາ ຣັດ​ເຊຍ. 
     ແຫຼ່ງ​ຂ່າວ​ຈາກ​ຕ່າງປະ ເທດ​ລາຍ​ງານ​ວ່າ: ຄຽງ​ຄູ່​ກັບ​ຈຸດ​ເຄັ່ງຮ້ອນ​ຂອງ​ບັນຫາ​ນິວ​ເຄ​ລຍ ອີ​ຣານ ແລ້ວ, ຣັດ​ເຊຍ ຍັງ​ນັບ​ມື້​ນັບ​ຢັ້ງຢືນ​ບົດບາດ​ໃນ​ບັນດາ​ບັນຫາ​ໃຫຍ່​ຢູ່​ຕາເວັນ​ອອກ​ກາງ ເປັນຕົ້ນ​ແມ່ນ​ວິ​ກິດການຊີ​ຣີ. ເດືອນ​ກັນຍາ ປີ 2015, ຣັດ​ເຊຍ ໄດ້​ຊ່ວຍ​ລັດຖະບານ​ຊີ​ຣີ ຢ່າງ​ຖືກຕ້ອງ​ຕາມ​ລັດ​ຖະທຳ​ມະນູນ ຂອງ ຊີ​ຣີ ທີ່​ໄດ້​ຮັບ​ການ​ສະໜັບສະໜູນ​ຈາກ​ພາຍ​ນອກ, ໃນ​ການ​ຍູ້​ຖອຍ​ການ​ແຜ່​ຂະຫຍາຍ ຂອງ​ອົງ ການ ກໍ່​ການ​ຮ້າຍ​ອິ​ສ​ລາມ (IS). ໃນ​ຂະນະ​ດຽວ​ກັນ, ບົດບາດ​ຂອງ ອາ​ເມ​ຣິ​ກາ ຢູ່ ຊີ​ຣີ ນັບ​ມື້​ນັບ​ຫຼຸດ​ລົງ, ພິເສດ​ແມ່ນ​ພາຍຫຼັງ​ທີ່ ວໍ​ຊິງ​ຕັນ ຕັດສິນ​ໃຈ​ຖອນ​ທະຫານ​ອອກ​ຈາກ​ພາກ​ເໜືອ ຊີ​ຣີ ໃນ​ເດືອນ​ຕຸລາ ປີ 2019. ຫວ່າງ​ມໍ່ໆ​ມາ​ນີ້, ຣັດ​ເຊຍ ແລະ ຕວັກ​ກີ ບັນລຸ​ໄດ້​ຂໍ້​ຕົກລົງ​ຢຸດ​ຍິງ​ສຳຄັນ​ຢູ່​ທາງ​ທິດ​ຕາເວັນ ຕົກ ສ່ຽງ​ເໜືອ ຊີ​ຣີ ຊຶ່ງ​ມີ​ຜົນ​ສັກສິດ​ນັບ​ແຕ່​ວັນ​ທີ 9 ມັງກອນ ເປັນຕົ້ນ​ມາ.
ສຳລັບ​ວິ​ກິດ​ການ ລີ​ບີ, ຣັດ​ເຊຍ ແລະ ຕວັກ​ກີ ພວມ​ພະຍາຍາມ​ຊຸກຍູ້​ຄຳ​ສັ່ງ​ຢຸດ​ຍິງ ລະຫວ່າງ ບັນດາຝ່າຍ, ເປີດ​ແງ່​ຫວັງ​ຢຸດຕິ​ບັນດາ​ການ​ປະ​ທະ​ກັນ ທີ່​ເກີດ​ຂຶ້ນ​ຢ່າງ​ຮ້າຍ​ແຮງ​ນັບແຕ່​ຕົ້ນ​ເດືອນ​ເມສາ ປີ 2019 ເປັນຕົ້ນ​ມາ ແລະ ເຮັດ​ໃຫ້​ສາມັນ​ຊົນ​ຫຼາຍ​ພັນ​ຄົນ​ເສຍ​ຊີວິດ, 300.000 ຄົນ ຕ້ອງ​ປະລະ​ເຮືອນຊານ​ບ້ານ​ຊ່ອງ. ໃນ​ວິ​ກິດ​ການ ລີ​ບີ, ຣັດ​ເຊຍ ແລະ ຕວັກ​ກີ ​ມີ​ບົດບາດ​ທີ່​ແຕກ​ຕ່າງ​ກັນ ຊຶ່ງ​ລ້ວນ​ແຕ່​ມີ​ຜົນ​ສະທ້ອນ​ຢ່າງ​ໃຫຍ່​ຫຼວງ. ນອກຈາກ​ບັນດາ​ຈຸດ​ເຄັ່ງຮ້ອນ​ຢູ່​ຕາເວັນ​ອອກ​ກາງ​ແລ້ວ, ປະເທດ ຣັດ​ເຊຍ ຍັງ​​ມີ​ບົດບາດ​ສຳຄັນ​ໃນ​ການ​ສ້າງ​ສະພາບ​ໃຫ້​ເປັນ​ປົກກະຕິ, ຢຸດຕິ​ການ​ປະ​ທະ​ກັນ​ຢູ່​ເຂດ​ຕາເວັນ ອອກ​ຂອງ ອູ​ແກ​ຣນ ໃນ​ເດືອນ​ທັນວາ ປີ 2019, ທ່ານ ປູ​ຕິນ ໄດ້ປະກອບສ່ວນ​​ໃຫຍ່​ຫຼວງ ເຂົ້າ​ໃນ​ຜົນສຳເລັດ​ຂອງ​ກອງ​ປະຊຸມ​ສຸດ​ຍອດ​ກຸ່ມ 4 ປະເທດ Normandy ກ່ຽວ​ກັບ ອູ​ແກ​ຣນ ຢູ່​ນະ ຄອນ ຫຼວງ​ປາ​ຣີ ປະເທດ​ຝຣັ່ງ ສຳລັບ​ບັນດາ​ຂໍ້​ຕົກລົງ​ທີ່​ໄດ້​ຮັບ​ຄວາມ​ເຫັນ​ດີ​ເຫັນ​ພ້ອມ.
    ໃນ​ການ​ຢ້ຽມຢາມ ຣັດ ເຊຍ ຂອງ​ທ່ານ ນາງ​ເມີ​ແຄວ, ບັນດາ​ນັກ​ການເມືອງ ເຢຍ​ລະ​ມັນ ໄດ້​ຕີລາຄາ​ວ່າ: ມົສ​ກູ ມີ​ບົດ​ບາດ​ສໍາ​ຄັນ​ໃນ​ການຊອກ ​ຫາ​ມາດ​ຕະການ​ໃຫ້​ແກ່​ບັນດາ​ວິ​ກິດ​ການ​ໃນ​ໂລກ. ທ່ານ ໂອ​ມິດ ນູປົວ ນັກ​ການເມືອງ​ຮັບ ຜິດຊອບ​ນະໂຍບາຍ​ການ​ພົວ ພັນ​ຕ່າງປະເທດ​ເຢຍ​ລະ​ມັນ ຢັ້ງ ຢືນ​ວ່າ: ທ່ານ ປູ​ຕິນ ແມ່ນ​ການ​ນຳ​ທີ່​ມີ​ຜົນ​ສະທ້ອນ​ໃຫຍ່​ທີ່​ສຸດ ໃນ​ບັນຫາ​ຕາເວັນ​ອອກ​ກາງ, ລີ​ບີ ຫຼື ວິ​ກິດ​ການ​ຢູ່ ອູ​ແກ​ຣນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110