ຂ່າວຕ່າງປະເທດລາຍງານ ວັນທີ 20 ເມສາທີ່ຜ່ານມານີ້, ອົງການອະນາໄມໂລກ (WHO) ໄດ້ເຜີຍແຜ່ບົດລາຍງານວ່າ ໃນຕະຫຼອດອາທິດທີ່ຜ່ານມາມີການສີດວັກຊີນປ້ອງກັນພະຍາດໂຄວິດ-19 ໃນກຸ່ມປະເທດທີ່ມີລາຍໄດ້ຕ່ຳສຸດຄິດເປັນອັດຕາສ່ວນພຽງ 1% ຂອງວັກຊີນຈຳນວນ 100 ລ້ານໂດສ ຂະນະທີ່ WHO ຍັງຄົງສືບຕໍ່ດໍາເນີນການເຮັດວຽກຮ່ວມກັບກຸ່ມຜູ້ຜະລິດວັກຊີນເພື່ອຂະຫຍາຍການຜະລິດທົ່ວໂລກ.

ທ່ານ ບຼູຊ ໄອວາດ ທີ່ປຶກສາອາວຸໂສຂອງ WHO ໄດ້ອອກຖະແຫຼງການວ່າ ສຳລັບກຸ່ມປະເທດລາຍໄດ້ສູງ ລາຍໄດ້ປານກາງເຖິງສູງ ແລະ ປະເທດລາຍໄດ້ຕ່ຳເຖິງປານກາງບາງປະເທດສາມາດສີດວັກຊີນໄປໄດ້ແລ້ວເກືອບ 99 ລ້ານໂດສ ແຕ່ກຸ່ມປະເທດລາຍໄດ້ຕ່ຳທີ່ສຸດສາມາດສີດວັກຊີນໄດ້ພຽງ 1% ຂອງຈຳນວນດັ່ງກ່າວ. ສຳລັບບັນຫາການເພີ່ມກຳລັງການຜະລິດວັກຊີນນັ້ນທ່ານ ໄອວາດ ກ່າວວ່າ ການເພີ່ມການຜະລິດວັກຊີນສາມາດເຮັດໄດ້ງ່າຍ ແຕ່ວັກຊີນທີ່ຖືກຜະລິດຂຶ້ນມາພັດຖືກນຳໄປຈັດສັນຢ່າງຜິດທີ່ຜິດທາງ. ປັດຈຸບັນ, WHO ໄດ້ປະສານງານກັບບັນດາຜູ້ຜະລິດເພື່ອຊ່ວຍເພີ່ມຄວາມສາມາດໃນການຜະລິດວັກຊີນໃຫ້ແກ່ໂຄງການໂຄແວັກເພື່ອແຈກຢາຍໃຫ້ແກ່ກຸ່ມປະເທດທີ່ມີລາຍໄດ້ຕ່ຳເຖິງປານກາງ. ທ່ານ ໄອວາດ ກ່າວຕື່ມວ່າ ຂະບວນການດັ່ງກ່າວອາດຈະໃຊ້ເວລາຫຼາຍອາທິດ ຫຼື ຫຼາຍເດືອນ ໂດຍໃນຂະນະນີ້, WHO ຕ້ອງຕັດສິນໃຈເຖິງການຈັດສັນວັກຊີນທີ່ມີຢູ່ໃນປັດຈຸບັນຢ່າງຮີບດ່ວນ.

ທາງດ້ານທ່ານ ໂສມຢາ ສະວາມິນາຖານ ຫົວໜ້າຄະນະນັກວິທະຍາສາດຂອງ WHO ກ່າວວ່າ ຄວາມຈຳເປັນຮີບດ່ວນຂອງໂຄງການໂຄແວັກຄື ການຮ່ວມມືກັບບັນດາຜູ້ຜະລິດ ແລະ ຜູ້ຈັດຫາເພື່ອເພີ່ມປະລິມານວັກຊີນ ແລະ ກຳຈັດອຸປະສັກຕ່າງໆລວມເຖິງການສ້າງຫຼັກປະກັນວ່າ ຄຳສັ່ງຫ້າມສົ່ງອອກວັກຊີນຈະບໍ່ກີດຂວາງຂະບວນການຜະລິດ.