ວິທະຍຸກະຈາຍສຽງຫວຽດນາມລາຍງານວ່າ: ອາເມຣິກາ ຈະສະໜອງບັນດາວັດຖຸດິບ ເພື່ອຜະລິດວັກຊິນປ້ອງກັນພະຍາດໂຄວິດ - 19 ກໍຄືບັນດາມາດຕະການປິ່ນປົວ, ຊຸດກວດຫາເຊື້ອ, ເຄື່ອງຊ່ວຍຫາຍໃຈ ແລະ ເຄື່ອງອຸປະກອນປ້ອງກັນທີ່ພວມມີຢູ່ໃຫ້ແກ່ ອິນເດຍ.

ຂ່າວລະບຸວ່າ: ຕໍ່ໜ້າສະພາບທີ່ມີຈຳນວນຜູ້ຕິດເຊື້ອ ແລະ ຜູ້ເສຍຊີວິດ ຍ້ອນໂຣກລະບາດໂຄວິດ - 19 ຢູ່ ອິນເດຍ ເພີ່ມຂຶ້ນລະດັບສຸກເສີນ ໃນຫຼາຍມື້ຜ່ານມາ, ເຮັດໃຫ້ລະບົບສາທາລະນະສຸກຂອງປະເທດນີ້ຕົກເຂົ້າສູ່ສະພາບຂາດແຄນອົກຊີ ແລະ ຢຸກຢາ. ວັນທີ 25 ເມສາຜ່ານມາ, ທຳນຽບຂາວ ໃຫ້ຮູ້ວ່າ: ອາເມຣິກາ ຈະສະໜອງບັນດາວັດຖຸດິບໃນທັນທີ ເພື່ອຜະລິດວັກຊິນປ້ອງກັນພະຍາດໂຄວິດ - 19 ກໍຄືບັນດາມາດຕະການປິ່ນປົວ, ຊຸດກວດຫາເຊື້ອ, ເຄື່ອງຊ່ວຍຫາຍໃຈ ແລະ ເຄື່ອງອຸປະກອນປ້ອງກັນທີ່ພວມມີຢູ່ໃຫ້ແກ່ ອິນເດຍ.

ໃນວັນດຽວກັນ, ຫ້ອງວ່າການປະທານາທິບໍດີ ຝຣັ່ງ ກໍໄດ້ອອກແຈ້ງການ ໂດຍໃຫ້ຮູ້ວ່າ: ປະເທດນີ້ ຈະສະເໜີການໜູນຊ່ວຍ ອິນເດຍ ເພີ່ມທະວີກຳລັງຂອງລະບົບເຄື່ອງຊ່ວຍຫາຍໃຈທີ່ສຳຄັນ ເພື່ອຊ່ວຍໃຫ້ ອິນເດຍ ສາມາດຮັບມືກັບໂຣກລະບາດໂຄວິດ - 19.

ກ່ອນໜ້ານັ້ນ, ລັດຖະບານ ອັງກິດ ໃຫ້ຮູ້ວ່າ: ຈະສົ່ງອຸປະກອນການແພດກວ່າ 600 ເຄື່ອງ ໄປຍັງ ອິນເດຍ ເພື່ອຊ່ວຍປະເທດນີ້ ຮັບມືກັບສະພາບການທີ່ມີຈຳນວນຜູ້ຕິດເຊື້ອໂຄວິດ - 19 ພວມເພີ່ມຂຶ້ນຢ່າງແຮງ.