ຂ່າວສານຫວຽດນາມລາຍງານວ່າ: ວັນທີ 26 ເມສາຜ່ານມາ, ຢູ່ນະຄອນຫຼວງປຣາກ, ຄະນະກຳມະການອາຊຽນ (ACP) ຢູ່ສາທາລະນະລັດເຊັກ ໄດ້ຈັດຕັ້ງການບໍລິຈາກສະບຽງອາຫານໃຫ້ທະນາຄານສະຫະພັນອາຫານເຊັກ ເພື່ອສະແດງຄວາມສາມັກຄີຂອງບັນດາປະເທດອາຊຽນ ຕໍ່ສາທາລະນະລັດເຊັກ ໃນການຊ່ວຍເຫຼືອປະຊາຊົນໃນສະພາບການທີ່ຫຍຸ້ງຍາກທີ່ສຸດ ຈາກຜົນກະທົບຂອງການລະບາດພະຍາດ ໂຄວິດ-19.

ຂ່າວລະບຸວ່າ: ການຈັດຕັ້ງບໍລິຈາກສະບຽງອາຫານ ໄດ້ຈັດຂຶ້ນຢູ່ສູນການຂົນສົ່ງຂອງທະນາຄານສະຫະພັນອາຫານເຊັກ ໃນນະຄອນຫຼວງປຣາກ ໂດຍການເຂົ້າຮ່ວມຂອງບັນດາເອກອັກຄະລັດຖະທູດແລະ ຜູ້ຕາງໜ້າສະຖານທູດຂອງ 6 ປະເທດສະມາຊິກອາຊຽນ ປະຈໍາ ສ.ເຊັກ ເຊັ່ນ: ອິນໂດເນເຊຍ, ມາເລເຊຍ, ມຽນມາ, ຟີລິບປິນ, ໄທ ແລະ ຫວຽດນາມ.

ກ່າວຄຳເຫັນໃນນາມຜູ້ຕາງໜ້າບັນດາສະຖານທູດອາຊຽນ ປະຈຳ ສາທາລະນະລັດເຊັກ, ທ່ານນາງ ເຄນຊີ ດີ ອິການິງຊີ ເອກອັກຄະລັດຖະທູດ ອິນໂດເນເຊຍ ຊຶ່ງດຳລົງຕຳແໜ່ງເປັນປະທານໝູນວຽນຂອງ ACP ໃຫ້ຮູ້ວ່າ: ການຈັດຕັ້ງການບໍລິຈາກສະບຽງອາຫານໃຫ້ທະນາຄານສະຫະພັນອາຫານເຊັກ ເພື່ອສະແດງໃຫ້ເຫັນຄວາມສາມັກຄີຂອງບັນດາປະເທດອາຊຽນ ຕໍ່ສາທາລະນະລັດເຊັກ. ທ່ານ ນາງ ເຄນຊີ ເນັ້ນໜັກວ່າ: ນີ້ແມ່ນໜຶ່ງໃນບັນດາການເຄື່ອນໄຫວຮ່ວມກັນຂອງ 6 ປະເທດອາຊຽນ ປະຈຳສາທາລະນະລັດເຊັກ ດ້ວຍຄວາມຫວັງຢາກຊ່ວຍເຫຼືອປະຊາຊົນທ້ອງຖິ່ນ ໃນສະພາບການທີ່ຫຍຸ້ງຍາກໃນການເອົາຊະນະການແຜ່ລະບາດຂອງພະຍາດໂຄວິດ-19.