ວິທະຍຸກະຈາຍສຽງຫວຽດນາມລາຍງານວ່າ: ທ່ານ ຟ້າມບິ່ງມິງ ໄດ້ຢັ້ງຢືນວ່າ: ໄລຍະທີ່ຜ່ານມາ, ບັນດາຄວາມພະຍາຍາມພາຍໃນປະເທດ ແລະ ການຮ່ວມມື, ໜູນຊ່ວຍອັນລ້ຳຄ່າຂອງປະຊາຄົມສາກົນ ໄດ້ຊ່ວຍໃຫ້ ຫວຽດນາມ ສາມາດຄວບຄຸມໄດ້ໂຣກລະບາດໂຄວິດ - 19 ໂດຍພື້ນຖານ, ປະຕິບັດໄດ້ “ເປົ້າໝາຍຄວບຄູ່” ທັງປ້ອງກັນ, ສະກັດກັ້ນໂຣກລະບາດໂຄວິດ - 19 ທັງພັດທະນາເສດຖະກິດ - ສັງຄົມ.

ຂ່າວລະບຸວ່າ: ວັນທີ 27 ເມສາ 2021, ທ່ານ ຟ້າມບິ່ງມິງ ຮອງນາຍົກລັດຖະມົນຕີ ຫວຽດນາມ ໄດ້ສົ່ງສານ ໄປຍັງກອງປະຊຸມຄັ້ງທີ 77 ຂອງຄະນະກຳມະການເສດຖະກິດສັງຄົມ ອາຊີ - ປາຊີຟິກ (UNESCAP) ທີ່ດໍາເນີນທາງອອນລາຍດ້ວຍຫົວຂໍ້; “ກໍ່ສ້າງດີກວ່າເກົ່າ ພາຍຫຼັງວິກິດການຜ່ານການຮ່ວມມືໃນພາກພື້ນ ອາຊີ - ປາຊີຟິກ.”

ທ່ານ ຟ້າມບິ່ງມິງ ໄດ້ຢັ້ງຢືນວ່າ: ໄລຍະທີ່ຜ່ານມາ, ບັນດາຄວາມພະຍາຍາມພາຍໃນປະເທດ ແລະ ການຮ່ວມມື, ໜູນຊ່ວຍອັນລ້ຳຄ່າຂອງປະຊາຄົມສາກົນ ໄດ້ຊ່ວຍໃຫ້ ຫວຽດນາມ ສາມາດຄວບຄຸມໄດ້ໂຣກລະບາດໂຄວິດ - 19 ໂດຍພື້ນຖານ, ປະຕິບັດໄດ້ “ເປົ້າໝາຍຄວບຄູ່” ທັງປ້ອງກັນ, ສະກັດກັ້ນໂຣກລະບາດໂຄວິດ - 19, ທັງພັດທະນາເສດຖະກິດ - ສັງຄົມ. ຫວຽດນາມ ກໍ່ໄດ້ປັບປຸງນະໂຍບາຍເພື່ອຫັນປ່ຽນຮູບແບບການເຕີບໂຕຕາມທິດອີງໃສ່ເຕັກໂນໂລຊີ, ປ່ຽນແປງໃໝ່ປະດິດຄິດສ້າງ, ເພີ່ມທະວີຄຸນນະພາບການເຕີບໂຕ ເພື່ອຮັກສາການຜະລິດ, ຟື້ນຟູ ພາຍຫຼັງໂຣກລະບາດໂຄວິດ - 19 ໂດຍໄວ ແລະ ມຸ່ງໄປສູ່ການພັດທະນາແບບຍືນຍົງ.

ໃນບົດບາດເປັນປະທານອາຊຽນ 2020, ຫວຽດນາມ ໄດ້ເຂົ້າຮ່ວມຊຸກຍູ້ຫຼາຍຂໍ້ລິເລີ່ມສຳຄັນ ທັງຢູ່ພາຍໃນ ແລະ ນອກອາຊຽນ ກ່ຽວກັບການຮັບມືກັບໂຣກລະບາດໂຄວິດ - 19, ຟື້ນຟູລະບົບສະໜອງໃນພາກພື້ນ, ເຊັນສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ (RCEP), ຍູ້ແຮງບັນດາຂອບເຂດການຮ່ວມມືແມ່ນ້ຳຂອງ ແລະ ຮັບຮອງເອົາ ວິໄສທັດ APEC ຮອດປີ 2040.

ທ່ານ ຮອງນາຍົກລັດຖະມົນຕີ ຫວຽດນາມ ກ່າວຕື່ມວ່າ: ສປຊ ຕ້ອງສືບຕໍ່ສວມບົດບາດເປັນໃຈກາງ ໃນການສົມທົບທາງດ້ານນະໂຍບາຍ ແລະ ການຮ່ວມມື ເພື່ອຜັນຂະຫຍາຍຍຸດທະສາດສັງລວມ ໃນການຮັບມືກັບໂຣກລະບາດໂຄວິດ - 19 ຢ່າງມີປະສິດທິຜົນ, ຮັບປະກັນການເຂົ້າເຖິງວັນຊິນ ທີ່ມີຄວາມຍຸຕິທຳ, ທັນການ, ສະເໝີພາບ ແລະ ການປິ່ນປົວໃຫ້ຜູ້ຕິດເຊື້ອ ໂຄວິດ - 19.