(ເນື່ອງ​ໃນ​ໂອກາດ​ວັນຊາດ ໂຮ​ນ​ລັງ 29 ເມສາ 2021)

ຮຽບຮຽງ : ລຸ້ງ​ດາວ ບຸນ​ມີ

ໂຮ​ນ​ລັງ ຫຼື ມີ​ຊື່​ທາງ​ການ​ແມ່ນ ຣາ​ຊະ​ອານາຈັກ ໂຮນ​ລັງ ຕັ້ງ​ຢູ່​ເຂດ​ທະວີບ​ເອີ​ຣົບ ປະ ກອບ​ດ້ວຍ 12 ແຂວງ ແລະ ມີ​ອີກ 3 ເກາະ ຢູ່​ເຂດ​ກາລີ​ບຽນ. ປະເທດ​ນີ້ ມີ​ເນື້ອທີ່​ທັງ​ໝົດ​ປະມານ 41.543 ກິໂລ​ຕາ​ແມັດ. ພາກສ່ວນ​ທີ່ຢູ່​ເອີ​ຣົບ​ຂອງ​ໂຮ​ນ​ລັງ ມີ​ຊາຍ​ແດນ​ທາງ​ດ້ານ​ເໜືອ ແລະ ດ້ານ​ຕາເວັນຕົກ​ຕິດ​ກັບ​ທະເລ​ເໜືອ, ທາງ​ດ້ານ​ໃຕ້​ແມ່ນ​ຕິດ​ກັບ ປະເທດ​ແບນ​ຊິກ, ຕິດ​ກັບ​ປະເທດ​ເຢຍ​ລະ​ມັນ​ທາງ​ດ້ານ​ຕາເວັນ​ອອກ. ນະຄອນຫຼວງ​ແມ່ນ ອາມ​ສະ​ເຕີ​ດຳ.

ສະພາບ​ພູມ​ປະເທດ​ຮາບ​ພຽງ​ກວ້າງ​ໃຫຍ່, ພື້ນ​ທີ່​ສ່ວນ​ໃຫຍ່​ເຄີຍ​ເປັນ​ນ້ຳ​ທະເລ​ມາ​ກ່ອນ. ດັ່ງນັ້ນ, ປະເທດ​ນີ້ ຈຶ່ງ​ຢູ່​ຕໍ່າ​ກວ່າ​ລະດັບ​ໜ້ານ້ຳ​ທະເລ ມີ​ພຽງ​ທາງ​ຕາເວັນ​ອອກ​ສ່ຽງ​ໃຕ້ ໃນ​ເຂດ​ລິ​ມ​ເບ​ຣີກ​ເທົ່າ​ນັ້ນ​ສາມາດ​ພົບ​ເຫັນ​ເນີນ​ພູ​ໄດ້. ແມ່​ນໍ້າ​ໄຣ ທີ່​ໄຫຼ​ມາ​ຈາກ​ປະເທດ​ເຢຍ​ລະ​ມັນ ເປັນ​ແມ່ນ້ຳ​ສາຍ​ສຳຄັນ​ຂອງ​ປະ​ເທດ. ເນື່ອງ​ຈາກ​ເປັນ​ປະ​ເທດ​ຕໍ່າ​ກວ່າ​ລະດັບ​ໜ້ານ້ຳ​ທະເລ ຈຶ່ງ​ເຮັດ​ໃຫ້​ຕ້ອງ​ສ້າງ​ເຂື່ອນ​ເພື່ອ​ບໍ່​ໃຫ້​ນ້ຳ​ທະເລ​ໄຫຼ​ຖ້ວມ. ຍ້ອນ​ວ່າ ໂຮ​ນ​ລັງ ມີ​ທີ່​ຕັ້ງ​ຢູ່​ແຄມ​ຝັ່ງ​ທະເລ​ເໜືອ ຈຶ່ງ​ໄດ້​ຮັບ​ອິດ​ທິ​ພົນ​ຂອງ​ກະແສນ້ຳ​ອຸ່ນ, ເຮັດ​ໃຫ້​ພູມ​ອາກາດ​ຂອງ​ປະເທດ​ອົບ​ອຸ່ນ​ກວ່າ​ປະເທດ​ອື່ນໆ​ໃນ​ເອີ​ຣົບ ແລະ ມີ​ຝົນຕົກ​ຫຼາຍ​ໃນ​ລະດູ​ໃບ​ໄມ້​ປົ່ງ ແລະ ລະດູ​ໃບ​ໄມ້​ຫຼົ່ນ​ຫຼາຍ​ເຖິງ 700 ມິນ​ລີ​ແມັດ​ຕໍ່​ປີ. ນອກຈາກ​ນັ້ນ, ປະເທດ​ໂຮ​ນ​ລັງ ຍັງ​ເປັນ​ສູນ​ກາງ​ການ​ຄ້າ, ການ​ຂົນສົ່ງ ແລະ ເປັນ​ປະຕູ​ຜ່ານ​​ໄປ​ສູ່​ເອີ​ຣົບ. ໂຮນ​ລັງ ມີ​ຄວາມ​ຊ່ຽວຊານ​ດ້ານ​ເຕັກ​ໂນ​ໂລ​ຊີ​ການ​ບໍ​ລິ ການ​ຈັດການ​ນ້ຳ ແລະ ການ​ຟື້ນ​ຟູ​ສະພາບ​ດິນ ເພື່ອ​ໃຊ້​ປະໂຫຍດ, ໂລ​ຈິສ​ຕິກ, ເຕັກ​ໂນ​ໂລ​ຊີ​ລະດັບ​ສູງ​ໃນ​ສາຂາ​ອຸດສາຫະກຳ​ການ​ກະເສດ, ເຄື່ອງ​ກົນ​ຈັກ ແລະ ການ​ຂົນສົ່ງ​ສິນ​ຄ້າ.

ຊັບພະຍາກອນ​ທຳ​ມະ​ຊາດ ທີ່​ເປັນ​ທ່າແຮງ​ໃຫ້​ກັບ​ປະເທດ ແມ່ນ​ແ​ກັສ​ທຳ​ມະ​ຊາດ, ປີ​ໂຕ​ຣ​ລຽມ ແລະ ຖ່ານ​ຫີນ. ອຸດສາຫະກຳ​ທີ່​ເປັນ​ທ່າແຮງ​ຕົ້ນຕໍ​ຂອງ​ປະເທດ ແມ່ນ​ອຸດສາຫະກຳ​ການ​ບໍລິການ, ຜະລິດ ຕະ​ພັນ​ໂລຫະ ແລະ ວິສະວະກຳ, ອຸດ​ສາ​ຫະ​ກໍາ​ການ​ກະ​ເສດ. ຕະຫຼາດ​ສົ່ງ​ອອກ​ທີ່​ສຳຄັນ ແມ່ນ​ເຢຍ​ລະ​ມັນ, ແບນ​ຊິກ, ອັງກິດ ແລະ ອາ​ເມ​ຣິ​ກາ. ຕະຫຼາດ​ນຳ​ເຂົ້າ ແມ່ນ​ເຢຍ​ລະ​ມັນ, ແບນ​ຊິກ, ອາ​ເມ​ຣິ​ກາ, ອັງກິດ ແລະ ຈີນ. ສິນຄ້າ​ສົ່ງ​ອອກ​ຂອງ​ປະເທດ ແມ່ນ​ເຄື່ອງ​ຈັກ ແລະ ອຸປະກອນ​ການ​ຂົນສົ່ງ​ຄົມມະນາຄົມ, ເຄ​ມີ, ເຊື້ອ​ໄຟ, ອາຫານ, ເຄື່ອງ​ດື່ມ ແລະ ຢາ​ສູບ. ສິນຄ້າ​ນຳ​ເຂົ້າ ແມ່ນ​ເຄື່ອງ​ຈັກ ແລະ ອຸປະກອນ​ການ​ຂົນສົ່ງ​ຄົມມະນາຄົມ, ເຄ​ມີ, ອາຫານ, ເຄື່ອງ​ດື່ມ, ຢາສູບ ແລະ ເຊື້ອ​ໄຟ.

ປະເທດ​ໂຮ​ນ​ລັງ ໃຊ້​ກັງ​ຫັນ​ລົມ​ເພື່ອ​ຜະລິດ​ພະລັງງານ​ໃຊ້​ໃນ​ອຸດ​ສາ​ຫະ​ກໍາ​ຫຼາຍ​ຢ່າງ​ເຊັ່ນ: ການ​ຕໍ່​ເຮືອ, ການ​ຜະລິດ​ເຈ້ຍ, ການ​ຜະລິດ​ສີ​ທາ​ໄມ້, ການ​ຜະ​ລິດ​ນໍ້າ​ມັນ, ການ​ຜະລິດ​ມັສ​ຕາດ (ສານ​ເຄ​ມີ​ຊະນິດ​ໜຶ່ງ​ລັກ​ສະ​ນະ​ເປັນ​ຂອງ​ແຫຼວ​ຄ້າຍ​ຄື​ນໍ້າ​ມັນ) ຊຶ່ງ​ມີ​ມາ​ຕັ້ງແຕ່​ດົນ​ນານ ໃນ​ຍຸກ​ປະຕິວັດ​ອຸດ​ສາ​ຫະ​ກຳ. ຖ້າ​ໃຜ​ມາ​ທ່ຽວ ໂຮ​ນ​ລັງ ແລະ ຢາກ​ມາ​ເບິ່ງ​ກັງ​ຫັນ​ລົມ​ບູຮານ (original) ຕ້ອງ​ມາ​ທີ່​ໝູ່​ບ້ານ​ກັງ​ຫັນ​ລົມ​ບູຮານ Zaanse Schans ເມືອງ ຊານ​ດໍາ. ຍ້ອນ​ວ່າ​ທີ່​ນີ້​ຢູ່​ໃກ້​ກັບ​ອາມ​ສະ​ເຕີ​ດໍາ ແລະ ທີ່​ນີ້​ຕ້ອນຮັບ​ນັກ​ທ່ອງ​ທ່ຽວ​ຈາກ​ທົ່ວ​ໂລກ ສະເລ່ຍ​ປະມານ 1 ລ້ານ​ຄົນ​ໃນ​ແຕ່​ລະ​ປີ ແລະ ຕິດ​ອັນ​ດັບ​ຕົ້ນໆ​ຂອງ​ສະຖານທີ່​ທ່ອງ​ທ່ຽວ.ຖ້າ​ມາ​ທ່ຽວ​ປະເທດ​ໂຮ​ນ​ລັງ ເຮົາ​ສາມາດ​ເຊົ່າ​ລົດຖີບ​ເພື່ອ​ທ່ຽວ​ຊົມ​ພາຍ​ໃນ​ໝູ່​ບ້ານ​ກັງ​ຫັນ​ລົມ​ບູຮານ ຫຼື ຈະ​ຂີ່​ເຮືອ​ຊົມ​ບັນຍາກາດ​ຂອງ​ໝູ່​ບ້ານ​ກໍ​ໄດ້. ພາຍ​ໃນ​ໝູ່​ບ້ານ​ກັງ​ຫັນ​ລົມ​ບູຮານ ມີ​ສິ່ງ​ທີ່​ໜ້າ​ສົນໃຈ​ຫຼາຍ​ຢ່າງ​ເຊັ່ນ: ພິ​ພິ​ທະ​ພັນ, ສູນ​ຝຶກ​ອົບຮົມ, ໂຮງງານ​ຜະລິດ​ຊີດ, ໂຮງງານ​ຜະລິດ​ເກີບ. ມີ​ຮ້ານ​ຂາຍເຄື່ອງ​ທີ່​ລະ​ນຶກ ແລະ ອື່ນໆ​ອີກ​ຫຼາຍ​ຢ່າງ.

ອາມ​ສະ​ເຕີ​ດໍາ ເປັນ​ເມືອງ​ຫຼວງ​ຂອງ​ປະເທດ​ໂຮ​ນ​ລັງ ຕັ້ງ​ຢູ່​ແຄມ​ແມ່​ນ້ຳ​ອໍາ​ສະ​ເຕິນ ແຂວງ​ນໍ​ຮອນ​ແລນ, ປັດຈຸບັນ ເປັນ​ເມືອງ​ໃຫຍ່​ທີ່​ສຸດ​ໃນ​ປະເທດ ມີ​ປະຊາກອນ​ປະມານ 872.680 ຄົນ, ແຕ່​ຖ້າ​ນັບ​ລວມ​ປະຊາກອນ​ໃນ​ເມືອງ​ອ້ອມ​ຂ້າງ​ທັງ​ໝົດ​ຈະ​ມີ​ປະມານ 1.380.872 ລ້ານ​ຄົນ (ຂໍ້​ມູນ​ປີ 2019). ຊື່ ອາມ​ສະ​ເຕີ​ດໍາ ແມ່ນ​ມາ​ຈາກ​ຄໍາ​ວ່າ “ອໍາສ​ເຕີ​ຣີ​ດໍາ​ມີ” ໝາຍ​ເຖິງ​ເມືອງ​ທີ່​ຕັ້ງ​ຢູ່​ແຄມ​ເຂື່ອນ​ຂອງ​ແມ່​ນ້ຳ​ອໍາ​ສະ​ເຕິນ ມີ​ປະຫວັດສາດ​ເລີ່ມ​ຕົ້ນ​ຈາກ​ການ​ເປັນ​ໝູ່​ບ້ານ​ຫາ​ປາ (ບ້ານ​ປະມົງ) ໃນ​ສະຕະວັດ​ທີ 12 ກ່ອນ​ທີ່​ຈະ​ກາຍເປັນ​ສູນ​ກາງ​ການ​ຄ້າ, ການ​ເງິນ ແລະ ການ​ເດີນ​ທະເລ (ເຮືອ) ທີ່​ສຳຄັນ​ໃນ​ລະຫວ່າງ ສະຕະວັດ​ທີ 17 ຊຶ່ງ​ເປັນ​ຍຸກ​ຄໍາ​ຂອງ​ໂຮ​ນ​ລັງ ແລະ ຂະຫຍາຍຕົວ​ອອກ​ໄປ​ອີກ​ໃນ​ສະຕະວັດ​ທີ 19 ແລະ 20, ແຕ່​ລະບົບ​ຄອງ​ນໍ້າ ສ້າງ​ຂຶ້ນ​ໃນ​ສະຕະວັດ​ທີ 17 ແລະ ຍັງ​ຮັກສາ​ໄວ້​ເປັນ​ຢ່າງ​ດີ ຈົນ​ກາຍເປັນ​ສ່ວນ​ໜຶ່ງ​ຂອງ​ມໍລະດົກ​ໂລກ ທີ່​ໄດ້​ຮັບ​ການ​ຂຶ້ນ​ທະບຽນ​ກັບ​ອົງການ​ອຸຍ​ແ​ນັສ​ໂກ (UNESCO).

ປັດຈຸບັນ, ອາມ​ສະ​ເຕີ​ດໍາ ເປັນ​ສູນ​ການ​ຄ້າ, ການ​ເງິນ ແລະ ນະຄອນຫຼວງ​ທາງ​ວັດທະນະທຳ ຂອງ​ປະເທດ, ແຕ່​ສູນ​ກາງຂອງ​ລັດຖະບານ ແມ່ນ​ຢູ່​ໃນ​ນະຄອນ​ເຮັກ. ບັນດາ​ບໍລິສັດ​ໃຫຍ່​ຫຼາຍ​ແຫ່ງ​ຂອງ​ໂຮ​ນ​ລັງ ມີ​ສຳນັກງານ​ໃຫຍ່​ຕັ້ງ​ຢູ່​ອາມ​ສະ​ເຕີ​ດໍາ​ເຊັ່ນ: ຟີ​ລິບ, ອັກ​ໂຊ​ໂນ​ເບິນ, ໂຕ​ມ​ໂຕມ ແລະ ໄອ​ເອັນ​ຈີ. ສ່ວນ​ບໍລິສັດ​ຂ້າມ​ຊາດ​ຍັກ​ໃຫຍ່​ຫຼາຍ​ແຫ່ງ ມີ​ສຳນັກງານ​ໃຫຍ່​ສາຂາ​ເອີ​ຣົບ ຕັ້ງ​ຢູ່​ອາມ​ສະ​ເຕີ​ດໍາ​ເຊັ່ນ: ອູ​ເບີ ເນັ​ດຟ​ລິກ ແລະ ເທ​ສ​ລາ​ມໍ​ເຕີ. ອາມ​ສະ​ເຕີ​ດໍາ ເປັນ​ທີ່​ຕັ້ງ​ຂອງ​ສະໜາມ ບິນ​ອາມ​ສະ​ເຕີ​ດໍາ ສ​ຄິບ​ໂຮນ ຊຶ່ງ​ແມ່ນ​ສະໜາມ​ບິນ​ທີ່​ມີ​ຜູ້ໂດຍສານ​ມາ​ໃຊ້​ບໍລິການ​ຫຼາຍ​ເປັນ​ອັນ​ດັບ 3 ຂອງ​ເອີ​ຣົບ ແລະ ທີ່​ຕັ້ງ​ຂອງ​ສະຖານທີ່​ທ່ອງ​ທ່ຽວ​ສຳຄັນ​ຄື: ພິ​ພິ​ທະ​ພັນ​ເຣ, ພິພິ​ທະ​ພັນ​ຟັນ​ໂຄດ, ພິພິທະ​ພັນ​ສະ​ຕາ​ເດ​ລິກ, ເຮືອນ ອັນ​ເນີ​ຟຣັ່ງ ແລະ ຍັງ​ເປັນ​ເຮືອນ​ຂອງ​ຜູ້​ທີ່​ມີ​ຊື່​ສຽງ​ຫຼາຍ​ທ່ານ​ເຊັ່ນ: ແຮັມ​ບຣັນ, ຟິນ​ເຊນ ຟັນ ໂຄດ ບາ​ຣຸດ ສ​ປີ​ໂນ​ຊາ ແລະ ອັນ​ເນີ ຟຣັງ ຈຶ່ງ​ມີ​ນັກ​ທ່ອງ​ທ່ຽວ​ມາ​ຢ້ຽມ​ຊົມ​ຫຼາຍ​ກວ່າ 5 ລ້ານ​ຄົນ​ຕໍ່​ປີ.

ສາທາລະນະ​ລັດ ປະຊາ ທິປະໄຕ ປະຊາຊົນ​ລາວ ແລະ ຣາ​ຊະ​ອານາຈັກ ໂຮ​ນ​ລັງ ສ້າງ ຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ, ໃນ​ວັນ​ທີ 17 ພະຈິກ ປີ 1975.