( ເນື່ອງ​ໃນ​ໂອກາດ​ວັນ​ປົດ​ປ່ອຍ​ພາກ​ໃຕ້​ຫວຽດນາມ ຄົບຮອບ 46 ປີ 30/4/1975 - 30/4/2021 )

ໂດຍ: ສີ​ວັນ

ເຫດການ​ປະຫວັດສາດ ​ກ່ອນ​ນີ້ 46 ປີ ໄດ້​ເປີດ​ໜ້າ​ປະຫວັດສາດ​ໃໝ່​ຂອງ​ຊາດ​ຫວຽດນາມ. ນັບ​ແຕ່​ນັ້ນ​ມາ, ແມ່​ນໍ້າ​ລຳເຊ, ພູຜາ​ປ່າດົງ ໄດ້​ໂຮມ​ເຂົ້າກັນ​ເປັນ​ໜຶ່ງ​ດຽວ, ປະຊາຊົນ​ຫວຽດນາມ ສາມັກຄີ​ກັນ​ເປັນ​ຈິດ​ໜຶ່ງ​ໃຈ​ດຽວ ພ້ອມ​ກັນ​ສ້າງສາ​ປະເທດ​ຊາດ​ໃຫ້​ນັບ​ມື້​ນັບ​ຮຸ່ງເຮືອງ​ສີວິໄລ ແລະ ສວຍ​ງາມ​ກວ່າ​ເກົ່າ. ວັນ​ທີ 30 ເມສາ ທົ່ວ​ປວງ​ຊົນ​ທັງ​ຊາດ​ຫວຽດນາມ ມີ​ຄວາມ​ເບີກບານ​ມ່ວນຊື່ນ​ສະເຫຼີມສະຫຼອງ​ຄົບຮອບ 46 ປີ ແຫ່ງ​ວັນ​ປົດ​ປ່ອຍ​ພາກ​ໃຕ້​ຫວຽດນາມ, ທ້ອນໂຮມ​ປະເທດ​ຊາດ​ເປັນ​ເອກະ​ພາບ (30/4/1975 - 30/4/2020).

ມະຫາ​ໄຊ​ລະດູບານໃໝ່ ປີ 1975 ແມ່ນ​ໜ້າ​ປະຫວັດສາດ​ອັນ​ສະຫງ່າ​ອົງອາດ​ໃນ​ປະຫວັດ ສາດ​ແຫ່ງ​ການ​ສ້າງສາ ແລະ ປົກ​ປັກ​ຮັກສາ​ປະເທດ​ຊາດ​ອັນ​ຍິ່ງ​ໃຫຍ່​ຂອງ​ຊາດ​ຫວຽດນາມ ເມື່ອ​ໄດ້​ເຮັດ​ສຳເລັດ​ພາລະ​ກຳ​ປະຫວັດ​ສາດ​ອັນ​ສະຫງ່າ​ງາມ​ນັ້ນ ແມ່ນ​ການ​ປົດ​ປ່ອຍ​ພາກ​ໃຕ້​ຫວຽດນາມ​ຢ່າງ​ສົມບູນ, ທ້ອນໂຮມ​ປະເທດ​ຊາດ​ເປັນ​ເອກະ​ພາບ, ນຳ​ປະເທດ​ຊາດ​ກ້າວ​ເຂົ້າ​ສູ່​ສັງກາດ​ໃໝ່ - ສັງ ກາດ​ແຫ່ງ​ເອກະລາດ, ເອກະ​ພາບ.

ຕາມ​ແຫຼ່ງ​ຂ່າວສານ​ຫວຽດນາມ, ເວລາ 11 ໂມງ 30 ນາທີ ຂອງ​ວັນ​ທີ 30 ເມ ສາ 1975, ທຸງ ແນວ​ໂຮມ​ປະ ເທດ​ຊາດ​ປົດ​ປ່ອຍ​ພາກ​ໃຕ້​ຫວຽດນາມ ໄດ້​ປິວ​ສະ​ບັດ​ຢູ່​ຈອມ​ທຳ​ນຽບ​ເອກະລາດ (ໄຊ​ງ່ອນ), ອັນ​ໄດ້​ສ້າງ​ຂີດ​ໝາຍ​ຈຸດ​ເວລາ​ປະຫວັດສາດ​ສິ້ນ​ສຸດ​ລົງ ດ້ວຍ​ໄຊຊະນະ​ອັນ​ຍິ່ງ​ໃຫຍ່ ຂອງ​ຊຸມ​ເດືອນ​ປີ​ແຫ່ງ​ການ​ຕໍ່ສູ້​ທີ່​ຍືດ​ເຍື້ອ​ຍາວ​ນານ, ລຳບາກ​ກາກ​ກຳ​ໃນ​ການ​ຕໍ່ສູ້​ປົດ​ປ່ອຍ​ພາກ​ໃຕ້, ທ້ອນໂຮມ​ປະເທດ​ຊາດ​ເປັນ​ເອກະ​ພາບ.

ການ​ຍາດ​ໄດ້​ໄຊຊະນະ​ດັ່ງກ່າວ ແມ່ນ​ຍ້ອນ​ມີ​ມູນເຊື້ອ​ຮັກ​ຊາດ, ຄວາມ​ໄຝ່​ຝັນ​ຢາກ​ມີ​ເອກະລາດ, ເສລີພາບ, ສັນຕິພາບ, ທ້ອນໂຮມ​ປະ ເທດ​ຊາດ​ເປັນ​ເອກະ​ພາບ. ພິເສດ ແມ່ນ​ຄວາມ​ສາມັກຄີ​ຂອງ​ປະຊາຊົນ​ຫວຽດນາມ. ໄຊຊະນະ ໃນ​ວັນ​ທີ 30 ເມສາ 1975 ໄດ້​ຕອບ​ສະໜອງ​ຄວາມ​ລໍຄອຍ​ມາ​ແຕ່​ດົນ​ນານ​ຂອງ​ປະຊາຊົນ​ຫວຽດນາມ ທີ່​ຢາກ​ມີ​ສັນຕິພາບ, ເອກະລາດ ແລະ ເສລີ​ພາບ.

ໄຊຊະນະ​ອັນ​ຍິ່ງ​ໃຫຍ່​ນີ້ ແມ່ນ​ສົງຄາມ​ຂອງ​ປະຊາຊົນ​ຢ່າງ​ແທ້​ຈິງ. ໃນ​ຈຸດ​ເວລາ​ທີ່​ຕັດສິນ​ຊີ້​ຂາດ​ນີ້​ປະຊາຊົນ​ຫວຽດນາມ ໄດ້​ລຸກຂຶ້ນ​ພ້ອມ​ກັບ​ທະຫານ​ຢູ່​ທຸກ​ທິດ ບຸກ​ເຂົ້າ​ໄຊ​ງ່ອນ (ນະຄອນ​ໂຮ່​ຈິ​ມິນ ປັດ​ຈຸ​ບັນ). ນີ້​ກໍ​ແມ່ນ​ຜົນງານ​ອັນ​ຍິ່ງ​ໃຫຍ່ ໃນ​ພາລະກິດ​ແຫ່ງ​ການ​ປົດ​ປ່ອຍປະ​ເທດ​ຊາດ ໂດຍ​ພັກ​ກອມ​ມູ​ນິດ​ຫວຽດນາມ ແລະ ປະທານ​ໂຮ່​ຈິ​ມິນ ນໍາ​ພາ. ໄຊຊະນະ​ອັນ​ຍິ່ງ​ໃຫຍ່​ຂອງ​ປະຊາຊົນ​ຫວຽດນາມ ແມ່ນ​ໄຊຊະນະ​ຂອງ​ແນວທາງ​ການເມືອງ, ແນວທາງ​ການ​ທະຫານ​ເອກະລາດ, ເປັນ​ເຈົ້າ​ຕົນ​ເອງ ແລະ ຖືກຕ້ອງ, ມີ​ຫົວຄິດ​ປະດິດ​ສ້າງ​ຂອງ​ພັກ. ຍ້ອນ​ມີ​ການ​ລະດົມ​ໄດ້​ກຳລັງ​ແຮງ​ຂອງ​ທົ່ວ​ປວງ​ຊົນ ເຂົ້າ​ຮ່ວມ​ການ​ຕີ​ສັດຕູ, ສົມທົບ​ການ​ຕໍ່ສູ້​ດ້ວຍ​ອາວຸດ ກັບ​ການ​ຕໍ່ສູ້​ດ້ານ​ການເມືອງ, ມີ​ເງື່ອນໄຂ ສົມທົບ​ກັນ​ລະຫວ່າງ​ການ​ຕໍ່ສູ້​ດ້ານ​ການ​ທະຫານ ກັບ​ການ​ລຸກ​ຮື້​ຂຶ້ນ​ຂອງ​ປະຊາຊົນ ດ້ວຍ​ທິດ​ນຳ​ທີ່​ວ່າ; “ທົ່ວ​ປວງ​ຊົນ​ຕໍ່ຕ້ານ, ຕໍ່ຕ້ານ​ຢ່າງຮອບດ້ານ”.

ໄຊຊະນະ ໃນ​ວັນ​ທີ 30 ເມສາ 1975 ປະຫວັດສາດ​ໄດ້​ກ້າວ​ເຂົ້າ​ສູ່​ໂສມ​ໜ້າ​ໃໝ່. ໃນ​ຕະຫຼອດ 46 ປີຜ່ານມາ, ປະຊາຊົນ​ຫວຽດນາມ ໄດ້​ພະຍາຍາມ ແກ້​ໄຂ​ຜົນ​ຮ້າຍ​ຢ້ອນ​ຫຼັງ​ຈາກ​ສົງຄາມ ແລະ ບືນ​ຕົວ​ຂຶ້ນ​ບັນລຸ​ໄດ້ຜົນ​ງານ​ຫຼາຍ​ຢ່າງ ໃນ​ຂະບວນ​ວິວັດ​ແຫ່ງ​ການ​ພັດທະນາ​ເສດຖະກິດ - ສັງ​ຄົມ. ຜົນງານ​ບຸກ​ທະລຸ​ຂອງ​ຫວຽດນາມ ໄດ້​ສະແດງ​ໃຫ້​ເຫັນ​ຢ່າງ​ຈະ​ແຈ້ງ.

ພາຍຫຼັງ​ທ້ອນໂຮມ​ປະ ເທດ​ຊາດ​ເປັນ​ເອກະ​ພາບ, ແມ່​ນໍ້າ​ລຳເຊ, ພູຜາ​ປ່າດົງ ໄດ້​ໂຮມ​ເຂົ້າກັນ​ເປັນ​ໜຶ່ງ​ດຽວ, ປະຊາຊົນ​ຫວຽດນາມ ໄດ້​ສຸມ​ກຳລັງ​ເຫື່ອແຮງ​ເພື່ອ​ຟື້ນ​ຟູ​ເສດຖະກິດ, ສ້າງ​ປະເທດ​ຊາດ​ຄືນ​ໃໝ່. ໃນ​ຕະຫຼອດ​ໄລຍະ 30 ກວ່າ​ປີ ແຫ່ງ​ການ​ປ່ຽນແປງ​ໃໝ່ (ນັບ​ແຕ່​ປີ 1986), ພື້ນຖານ​ເສດຖະກິດ​ຫວຽດນາມ ໄດ້​ເຕີບ​ໂຕ​ຢ່າງ​ກະໂດດ​ຂັ້ນ. ລາຍ​ຮັບ​ສະເລ່ຍ​ຕໍ່​ຫົວ​ຄົນ​ເພີ່ມ​ຂຶ້ນ​ທົບ​ສິບ​ເທົ່າ ເມື່ອ​ທຽບໃສ່​ກ່ອນ​ນີ້. ການ​ເຕີບ​ໂຕ​ຂອງ​ຫວຽດນາມ ມີ​ລັກສະນະ​ກວມ​ລວມ, ດ້ວຍ​ອັດຕາ​ຄອບຄົວ​ທຸກ​ຍາກ​ຫຼຸດ​ລົງ​ຕ່ຳ​ກວ່າ 4% ເມື່ອ​ທຽບໃສ່​ລະດັບ​ກວ່າ 60% ໃນ​ທ້າຍ​ຊຸມ​ປີ 1980. ຫວຽດນາມ ກໍ​ແມ່ນ​ປະເທດ​ສົ່ງ​ອອກ​ທີ່​ມີ​ການ​ພັດທະນາ​ຢ່າງ​ແຮງ ແລະ ພວມ​ຫັນ​ຈາກ​ປະເທດ​ສົ່ງ​ອອກ​ພຽງ​ແຕ່​ນ້ຳມັນ​ດິບ, ກາເຟ ແລະ ເກີບ ກາຍ​ມາ​ເປັນ​ສູນ​ຜະລິດ ທີ່​ມີ​ຄວາມ​ດູດດື່ມ​ສຳລັບ​ບັນດາ​ກຸ່ມ​ບໍລິສັດ​ໃຫຍ່​ທົ່ວ​ໂລກ. ພ້ອມ​ກັນ​ນີ້, ຫວຽດນາມ ມີ​ສະຖຽນ​ລະ​ພາບ​ທາງ​ດ້ານ​ການເມືອງ ແລະ ມີ​ປະຊາກອນ​ຫຼາຍ​ພໍ​ສົມຄວນ, ລະດັບ​ການ​ເຕີບ​ໂຕ GDP ມີ​ການ​ພັດທະນາ​ດີ​ພໍ​ສົມ​ຄວນ.

ກ່ຽວ​ກັບ​ການ​ພົວພັນ​ກັບ​ສາກົນ, ຫວຽດນາມ ມີ​ສາຍ​ພົວພັນ​ເປັນ​ປົກກະຕິ​ກັບ​ບັນດາ​ປະເທດ​ໃຫຍ່, ມີ​ການ​ພົວພັນ​ດ້ານ​ເສດຖະກິດ - ການ​ຄ້າ ກັບ​ຫຼາຍ​ກວ່າ 200 ປະເທດ ແລະ ເຂດ​ແຄວ້ນ. ພິເສດ, ຫວຽດນາມ ມີ​ການ​ປະກອບສ່ວນ​ຢ່າງ​ຕັ້ງໜ້າ, ມີ​ປະສິດ​ທິ​ຜົນ ແລະ ດຳລົງ​ຫຼາຍ​ຕຳແໜ່ງ​ຫຼັກ​ແຫຼ່ງ​ສຳເລັດ​ຜົນ ຢູ່​ບັນດາ​ເວທີ​ປາ​ໄສ​ຫຼາຍ​ຝ່າຍ​ໃນ​ທຸກ​ລະດັບ ແລະ ຂົງເຂດ ເປັນຕົ້ນ​ແມ່ນ ເປັນ​ສະມາຊິກ​ມີ​ຄວາມ​ຮັບຜິດຊອບ​ຂອງ ສປຊ, ສະມາຄົມ​ປະຊາ ຊາດ​ອາຊີ​ຕາເວັນ​ອອກ​ສ່ຽງ​ໃຕ້ (ອາ​ຊຽນ), ເວທີ​ປາ​ໄສ​ຮ່ວມ​ມື​ດ້ານ​ເສດຖະກິດ​ໃນ​ພາກ​ພື້ນ ອາຊີ - ປາ​ຊີ​ຟິກ (APEC), ເວທີ​ປາ​ໄສ​ຮ່ວມ​ມື ອາຊີ - ເອີ​ຣົບ (ASEM).

ສິ່ງ​ທີ່​ໜ້າ​ສົນໃຈ, ປີ 2020, ເປັນ​ຄັ້ງ​ທຳອິດ​ໃນ​ປະຫວັດສາດ, ຫວຽດນາມ ດຳລົງ 2 ຕຳ​ແໜ່​ງສໍາ​ຄັນ​ໄປ​ພ້ອມໆ​ກັນ​ເຊັ່ນ: ເປັນ​ປະທານ ອາ​ຊຽນ 2020 ແລະ ກຳມະການ​ບໍ່​ຖາວອນ​ສະພາ​ຄວາມ​ໝັ້ນຄົງ ສປຊ ສົກ​ປີ 2020 - 2021. ນັ້ນ​ແມ່ນ​ໜ້າທີ່​ຮັບຜິດຊອບ​ສຳຄັນ​ຂອງ​ພາກ​ພື້ນ ແລະ ສາກົນ ທີ່​ມີ​ຄວາມ​ໝາຍ​ສຳຄັນ, ອັນ​ໄດ້​ສະແດງ​ໃຫ້​ເຫັນ​ຄວາມ​ໄວ້​ເນື້ອ​ເຊື່ອ​ໃຈ ແລະ ຄວາມ​ຫວັງ​ອັນ​ໃຫຍ່​ຫຼວງ ຈາກ​ເພີື່ອນ​ມິດສາ​ກົນ​ທີ່​ມີ​ຕໍ່​ຫວຽດນາມ.

ອາດ​ເວົ້າ​ໄດ້​ວ່າ: ຫວຽດ ນາມ ບໍ່​ພຽງ​ແຕ່​ແມ່ນ​ປະເທດ ທີ່​ເປັນ​ແບບຢ່າງ​ໃນ​ຂະບວນ​ວິວັດ​ແຫ່ງ​ການ​ພັດທະນາ, ບືນ​ຕົວ​ຂຶ້ນ​ຈາກ​ສົງຄາມ​ເທົ່າ​ນັ້ນ, ແຕ່ ຫວຽດນາມ ຍັງ​ໄດ້​ຮັບ​ການ​ຮັບ​ຮູ້​ຈາກ​ໂລກ​ວ່າ: ແມ່ນ​ສັນຍາ​ລັກ​ແຫ່ງ​ຂົວ​ຕໍ່​ສັນຕິພາບ ດ້ວຍ​ການ​ເລືອກ​ເອົາ​ຫວຽດນາມ ເປັນ​ບ່ອນ​ຈັດ​ຕັ້ງ​ເຫດການ​ທາງ​ການ​ທູດ​ສຳຄັນ​ແຖວ​ໜ້າ​ໂລກ​ເຊັ່ນ: ກອງ​ປະຊຸມ​ສຸດ​ຍອດ ລະຫວ່າງ ຜູ້​ນໍາ ສປປ.ເກົາຫຼີ - ອາ​ເມ​ຣິ​ກາ ຊຶ່ງ​ໄດ້​ດຳເນີນ​ໃນ​ທ້າຍ​ເດືອນ​ກຸມພາ 2019. ນີ້​ສະແດງ​ໃຫ້​ໂລກ ມີ​ຄວາມ​ເຊື່ອ​ໝັ້ນ​ຕໍ່​ຫວຽດນາມ, ເຊື່ອ​ໝັ້ນ​ຕໍ່​ອະນາຄົດ​ແຫ່ງ​ການ​ພັດທະນາ​ຂອງ​ຫວຽດນາມ. ເພາະວ່າ ຫວຽດນາມ ເປັນ​ປະເທດ​ໝັ້ນຄົງ​ເຂັ້ມແຂງ, ວັດທະນາ​ຖາວອນ ແລະ ເອກະລາດ ສາມາດ​ເຮັດ​ໄດ້​ດ້ວຍ​ຖານະ​ເປັນ​ການ​ນຳ​ໃນ​ພາກ​ພື້ນ.