ຫົວ​ຂໍ້ : ປູກອ້ອຍ ແລະ ລ້ຽງສັດຂາຍ ສ້າງລາຍຮັບໄດ້ 140 ລ້ານກວ່າກີບ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 21/01/2020 09:46:21 ຈຳ​ນວນ​ຜູ້​ເຂົ້າ​ຢ້ຽມ​ຊົມ 6503 ຄັ້ງ

ຍ້ອນ​ຕົນ​ເອງ ແລະ ຄອບຄົວ​ມີ​ຄວາມ​ມັກ​ຮັກ​ໃນ​ອາຊີບ​ຊາວ​ສວນ ບວກ​ກັບ​ມີ​ເນື້ອທີ່​ດິນ​ໄຮ່ - ດິນ​ສວນ ທີ່​ມີ​ຄວາມ​ພຽງພໍ ແລະ ເຫັນ​ວ່າ​ເໝາະ​ສົມ​ໃນ​ການ​ປູກພືດ, ນັ້ນ​ກໍຄື ອ້ອຍ ຊຶ່ງ​ເປັນ​ພືດ​ອຸດ ສາຫະກຳ ທີ່​ມີ​ຄວາມ​ນິຍົມ​ກັນ​ປູກ​ໃນ​ປັດຈຸບັນ ແລະ ສາມາດ​ນຳພາ​ໃຫ້​ຄອບຄົວ​ໃຫ້​ມີ​ຢູ່​ມີ​ກິນ ທັງ​ສ້າງ​ລາຍ​ຮັບ​ໄດ້​ຫຼາຍ​ລ້ານ​ກີບ​ຕໍ່​ປີ.ຄື​ດັ່ງ​ຄອບຄົວ​ຂອງ​ທ່ານ ສະໝານ ຜາ​ວົງ ອາຍຸ 50 ປີ ປະຊາຊົນ​ບ້ານ ຍາງ​ໂພ​ສີ ນະຄອນ​ໄກສອນ​ພົມວິຫານ ແຂວງ​ສະຫວັນ​ນະ​ເຂດ ທີ່​ໄດ້​ຫັນ​ມາ​ປູກ​ອ້ອຍ​ເປັນ​ສິນຄ້າ​ຊຶ່ງ​ທ່ານ​ໄດ້​ໃຫ້​ສຳພາດ​ຕໍ່​ຜູ້​ສື່​ຂ່າວ​ສະຫະພັນ​ກຳມະບານ​ແຂວງ​ສະຫວັນ​ນະ​ເຂດ​ວ່າ: ແຕ່​ກ່ອນ​ຕົນ​ເອງ ແລະ ຄອບຄົວ ແມ່ນ​ໄດ້​ປະກອບ​ອາຊີບ​ເຮັດ​ນາ​ປູກ​ເຂົ້າ, ຕົກ​ມາ​ໃນ​ປີ 2016 ຈຶ່ງ​ໄດ້​ມີ​ແນວ​ຄວາມ​ຄິດ ທີ່​ຢາກ​ຈະ​ປູກ​ອ້ອຍ​ຂາຍ​ສົ່ງ​ເຂົ້າ​ໂຮງງານ ເຫັນ​ວ່າ​ຈະ​ເປັນ​ການ​ສ້າງ​ລາຍ​ຮັບ​ໄດ້​ດີກ​ວ່າ​ພືດ​ອື່ນໆ ໂດຍ​ເລີ່ມ​ລົງມື​ປູກ​ອ້ອຍ​ມາ​ໄດ້ 3 ປີ​ແລ້ວ, ຕອນ​ທຳອິດ​ແມ່ນ​ບໍ່​ໄດ້​ຮັບ​ໝາກຜົນ​ດີ​ເທົ່າ​ທີ່​ຄວນ ຕົກ​ມາ​ຮອດ​ສົກ​ປີ 2018-2019 ຜົນ​ໄດ້​ຮັບ​ຈາກ​ການ​ປູກ​ອ້ອຍ​ແມ່ນ​ເຫັນ​ວ່າ​ສ້າງ​ລາຍ​ຮັບ​ເຂົ້າ​ຄອບຄົວ​ໄດ້​ດີ​ສົມຄວນ ໃນ​ເນື້ອທີ່​ທັງ​ໝົດ​ແມ່ນ 5 ເຮັກຕາ​ກວ່າ ໂດຍ​ໃຊ້​ທຶນ​ຂອງ​ບໍລິສັດ​ນຳ້ຕານ ເປັນ​ຜູ້​ສະໜອງ​ທຶນ​ກ່ອນ ໃນ​ການ​ມາ​ບຸກເບີກ​ເນື້ອທີ່​ດິນ, ການ​ປູກ, ລວມ​ທັງ​ການ​ໃສ່​ຝຸ່ນ, ໃສ່​​ປຸ໋ຍ ແລະ ອື່ນໆ. ສຳລັບ​ອ້ອຍ​ທີ່​ນຳ​ມາ​ປູກ​ແມ່ນ​ມີ​ຢູ່ 2 ຊະນິດ ຄື: ອ້ອຍ​ອິນ​ຊີ ທາງ​ບໍລິສັດ​ຈະ​ເກັບ​ຊື້​ໃນ ລາຄາ 3 ແສນ​ກວ່າ​ກີບ​ຕໍ່​ໂຕນ ແລະ ອ້ອຍ​ຕໍ ລາຄາ 2 ແສນ​ກວ່າ​ກີບ​ຕໍ່​ໂຕນ. ການ​ບົວລະບັດ​ຮັກສາ​ກໍ່​ບໍ່​ໄດ້​ມີ​ຄວາມ​ຫຍຸ້ງຍາກ​ປານໃດ ເພາະ​ມີ​ວິຊາ​ການ​ຈາກ​ບໍລິສັດ​ນ້ຳຕານ​ມິດ​ລາວ ໄດ້​ລົງ​ມາ​ແນະນຳ​ໃນ​ດ້ານ​ວີ​ທິ​ການ​ຕ່າງໆ​ເປັນ​ປະ​ຈຳ. ໃນ​ແຕ່​ລະ​ປີ​ຈະ​ເລີ່ມ​ປູກ​ແຕ່​ຕົ້ນ​ເດືອນ 10 ໂດຍ​ອ້ອຍ​ຈະ​ເລີ່ມ​ຈະເລີນ​ເຕີບ​ໂຕ ໃນ​ໄລຍະ  13 ເດືອນ, ເມື່ອ​ຮອດ​ລະດູ​ການ​ເກັບ​ກ່ຽວ ກໍຈະ​ມີ​ລົດ​ເກັບ​ກູ້​ຈາກ​ບໍລິສັດ​ມາ​ເກັບ​ກູ້​ເອງ, ຕົນ​ເອງ​ກໍ່​ຈ້າງ​ແຮງ​ງານ​ມາ​ເກັບ​ກູ້​ຜົນ​ຜະລິດ​ຊ່ວຍ​ຈຳນວນ​ໜຶ່ງ​ນຳ. 
   ການ​ປູກ​ອ້ອຍ​ໃນ​ປີ​ທຳອິດ​ແມ່ນ​ສາມາດ​ຕັດ​ອ້ອຍ​ຂາຍ​ໄດ້​ທັງ​ໝົດ 450 ໂຕນ ເປັນ​ເງິນ​ຢູ່ 42 ລ້ານ​ກວ່າ​ກີບ, ຍ້ອນວ່າ​ ທາງ​ບໍລິສັດ​ເພິ່ນ​ໄດ້​ຕັດ​ຄ່າ​ບຸກເບີກ, ຄ່າ​ບຳລຸງ​ຮັກສາ, ຄ່າ​ປຸຍ ແລະ ອື່ນໆ. ຕົກ​ມາ​ຮອດ​ສົກ​ປີ 2018-2019 ເຫັນ​ວ່າ​ຍອດ​ຜົນ​ຜະລິດ​ມີ​ການ​ເພີ່ມ​ຂຶ້ນ​ເປັນ 500 ກວ່າ​ໂຕນ ຈຶ່ງ​ໄດ້​ມີ​ການ​ຂະຫຍາຍ​ເນື້ອທີ່​ອອກ​ອີກ 3 ເຮັກຕາ. ນອກຈາກ​ການ​ປູກ​ອ້ອຍ​ແລ້ວ ທ່ານ ສະໝານ ຍັງ​ໄດ້ ຂຸດ​ໜອງ​ລ້ຽງ​ປາ​ໄດ້ 2 ໜອງ, ລ້ຽງສັດ​ປະເພດ​ງົວ, ແບ້, ເປັດ​-​ໄກ່ ອີກ​ຈຳນວນ​ໜຶ່ງ ເພື່ອ​ໄວ້​ຂາຍ ຍອດ​ລວມ​ສະຫຼຸບ​ແລ້ວ ຄອບຄົວ​ມີ​ລາຍ​ຮັບ​ຈາກ​ການ​ປູກ​ອ້ອຍ ຂາຍ​ເປັນ​ສິນຄ້າ ສະເພາະ​ປີ 2019 ຜ່ານ​ມາ​ໄດ້​ເຖິງ 143 ລ້ານກີບ, ສາມາດ​ຊື້​ລົດ​ໄຖ​ແທັກ​ເຕີ້ 1 ຄັນ, ມີ​ໂຮງສີ​ເຂົ້າ 1 ເຄື່ອງ ແລະ ສົ່ງ​ລູກ​ຮຽນ. ທັງ​ນີ້, ກໍ່​ເພື່ອ​ເປັນ​ການ​ປະຕິບັດ​ແນວທາງ​ປ່ຽນແປງ​ໃໝ່​ຂອງ​ພັກ​ຢ່າງຮອບດ້ານ ເພື່ອ​ແນໃສ່​ໃຫ້​ປະຊາຊົນ​ໄດ້​ມີ​ການ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ໃນ​ປີ 2020.
(ຂ່າວ : ວຽງ​ສະໄໝ ຊົມ​ຊອບ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110