ຫົວ​ຂໍ້ : ກະຊວງປ້ອງກັນປະເທດ ລະນຶກວັນສ້າງຕັ້ງ ກອງທັບ ປະຊາຊົນລາວ

ເຜີຍ​ແຜ່​ໂດຍ​: siththiphone rasphone ເວ​ລາ: 21/01/2020 09:48:59 ຈຳ​ນວນ​ຜູ້​ເຂົ້າ​ຢ້ຽມ​ຊົມ 426 ຄັ້ງ

     ກະຊວງ​ປ້ອງ​ກັນ​ປະເທດ ໄດ້​ຈັດ​ພິທີ​ໂຮມ​ຊຸມນຸມ​ລະນຶກ​ວັນ​ສ້າງຕັ້ງ​ກອງທັບ ປະຊາຊົນ​ລາວ  ຄົບຮອບ 71 ປີ  (20 ມັງກອນ  1949-20 ມັງກອນ 2020)    ເມື່ອ​ວັນ​ທີ 20 ມັງກອນນີ້  ທີ່​ ກະຊວງ​ດັ່ງກ່າວ ໂດຍ​ໃຫ້ກຽດ ເຂົ້າ​ຮ່ວມຂອງ​ສະຫາຍ ພົນເອກ ຈັນ​ສະໝອນ  ຈັນ​ຍາ​ລາດ ກຳ ມະການ​ກົມ​ການເມືອງ​ສູນ ​ກາງ​ພັກ ລັດຖະມົນຕີ​ກະຊວງປ້ອງ​ກັນ​ປະເທດ, ມີ​ບັນດາ​ສະຫາຍ​ຄະນະນຳ​ກະຊວງ, ພະນັກງານ​ອາວຸໂສ​ປະຕິວັດ, ນາຍ ແລະ ພົນທະຫານ​ເຂົ້າ​ຮ່ວມ.
    ສະຫາຍ ພົນ​ເອກ ຈັນ​ສະ​​ໝອນ ຈັນ​ຍາ​ລາດ ກ່າວ​ປາ​ໄສ​ບາງ​ຕອນ​ວ່າ: ການ​ກໍາ​ເນີ​ດ​ເກີດ​ຂຶ້ນ​ຂອງ​ກອງທັບ​ປະຊາຊົນ​ລາວ​ຢູ່​ເຂດ​ທີ່​ໝັ້ນ ຕາແສງ​ລາວ​ຮຸ່ງ  ເມືອງ​ຊຽງ​ຄໍ້ ແຂວງ​ຫົວພັນ ໂດຍ​ແມ່ນ ປະທານ ໄກສອນ ພົມວິຫານ ໄດ້​ປະກາດ​ສ້າງຕັ້ງ​ກອງທັບ​ລາວ​ອິດ​ສະ​ຫຼະ (ຊຶ່ງ​ແມ່ນ​ກອງທັບ​ປະຊາ​ຊົນ​ລາວ​ໃນປັດຈຸບັນ) ຂຶ້ນ​ຢ່າງ​ເປັນ​ທາງ​ການ ໃນ​ວັນ​ທີ 20 ມັງກອນ 1949 ເປັນ​ຂີດ​​ໝາຍ ແຫ່ງ​ການ​ເຕີບ​ໃຫຍ່​ຂະຫຍາຍຕົວ​

     ຂອງ​ບັນດາ​ກອງ​ກໍາ​ລັງ​ປະກອບ​ອາວຸດ​ປະຕິ​ວັດ. ເປັນ​ການ​ສືບ​ທອດ​ມູນເຊື້ອ​ອົງອາດ​ກ້າແກ່ນ​ຂອງ​ບັນ​ພະ​ບູ​ລຸ​ດ​ຂອງ​ຊາດ​ລາວ​ເຮົາ. ກອງທັບ​ຂອງ​ພວກ​ເຮົາ​ໃນ​ເບື້ອງ​ຕົ້ນ​ເຖິງ​ຈະ​ເປັນ​ພຽງ​ກອງ​ໂຄສະນາ​ປະກອບ​ອາວຸດ ທີ່​ສ້າງຕັ້ງ​ຂຶ້ນ​ຢູ່​ໃນ​ທ້ອງ ຖິ່ນ​ຕ່າງໆ ແລະ ​ມີ​ກໍາ​ລັງ​ພົນ​ບໍ່​ຫຼາຍ. ການ​ປະກອບອາ​ວຸດ​-​ຍຸດ​ໂທ​ປະກອນ​ປະຖົມປະ​ຖານ. ແຕ່​ກໍເປັນ​ກອງ​ກໍາ​ລັງ​ປະກອບ​ອາວຸດ​ທີ່​ກໍາ​ເນີດ ແລະ ເຕີບ​ໃຫຍ່​ຈາກ​ຂະບວນ​ການ​ປະຕິວັດ ຂອງ​ປະຊາຊົນ​ລາວ​ບັນດາ​ເຜົ່າ. ເປັນ​ກໍາ​ລັງ​ທີ່ຢູ່​ພາຍ​ໃຕ້​ການ​ນໍາ​ພາ​ອັນ​ສະ​ຫຼາດ​ສ່ອງ​ໃສ​ຂອງ​ພັກ​ປະຊາຊົນ​ປະຕິວັດລາວ, ຍ້ອນ​ແນວ​ນັ້ນ​ເລີ່ມ​ແຕ່​ຫົວທີ​ຈຶ່ງ​ເປັນ​ກໍາ​ລັງ​ປະກອບ​ອາວຸດ​ຂອງ​ປະຊາຊົນ ແລະ ມີ​ຄຸນ​ທາດ​ປະຕິວັດ​ຈະ ແຈ້ງ, ຕະຫຼອດ​ໄລຍະ​ການ​ຕໍ່ສູ້ ເພື່ອ​ຄວາມ​ເປັນ​ເອກະລາດ​ແຫ່ງ​ຊາດ, ກອງທັບ​ປະຊາຊົນ​ລາວ​ທັງ​ເຄື່ອນ​ໄຫວ​ສູ້​ຮົບ. ທັງ​ຝຶກແອບ​ຮຽນ​-​ກໍ່​ສ້າງ​ກໍາ​ລັງ, ຂົນຂວາຍປະຊາ​ຊົນ ກໍ່ສ້າງ​ຮາກ​ຖານ, ພ້ອມ​ກັບ​ປະຊາຊົນ​ລາວ​ບັນດາເຜົ່າອອກແຮງ​ສ້າງ ສາພັດທະນາ​ເຂດ​ປົດ​ປ່ອຍ​ໃຫ້​ເຂັ້ມແຂງ​ໜັກ​ແໜ້ນ ໃນ​ທຸກດ້ານ ພ້ອມ​ທັງ​ສ້າງ​ຮາກ​ຖານ​ຢູ່​ເຂດ​ແນວ​ຫຼັງ​ຂອງ​ສັດຕູ. ເຄື່ອນ​ໄຫວ​ເປີດ​ບັ້ນ​ບຸກ​ຕີ​ສັດຕູ​ຢ່າງ​ຕໍ່​ເນື່ອງ​ດ້ວຍຄວາມ​ກ້າແກ່ນ, ສາມາດ​ຍາດ​ໄດ້​ໄຊຊະນະ​ອັນ​ດັງ​ກ້ອງ​ກັງວານ, ທັບ​ມ້າງ​ກົນອຸບາຍ ແລະ ຍຸດທະສາດ​ການ​ຮຸກ​ຮານຂອງ​ສັດຕູ​ເທື່ອ​ລະ​ກ້າວ. ດ້ວຍ​ການ​ບຸກໂຈມຕີ​ຢ່າງ​ຕໍ່​ເນື່ອງ ແລະ ການ​ລຸກ​ຮື້​ຂຶ້ນ​ຢ່າງ​ແຂງແຮງ ພາຍ​ໃຕ້​ການ​ນໍາ​ພາ​ອັນ​ເດັດຂາດ ແລະ ສະຫຼາດ​ສ່ອງ​ໃສ​ຂອງ​ພັກ, ກອງທັບ​ປະຊາ ຊົນ​ລາວທີ່​ໄດ້​ປະສານ​ສົມທົບ​ແໜ້ນ​ກັບ​ກໍາ​ລັງ​ປະຕິວັດ  ແລະ ປະຊາຊົນ​ບັນດາເຜົ່າ​ສາມາດ​ໂຄ່ນ​ລົ້ມ​ລະບອບ​ສັກ​ດີ​ນາ ແລະ ຂັບໄລ່​ພວກ​ລ່າເມືອງຂຶ້ນ ​ອອກ​ຈາກ​ປະເທດ​ເຮົາ, ຢຶດ ອໍາ​ນາດການ​ປົກຄອງ​ທັງໝົດ ​ມາສູ່​ມື​ປະຊາຊົນ, ເຮັດ​ສໍາ​ເລັດ​ພາລະກິດ​ປົດ​ປ່ອຍ​ຊາດ​ຢ່າງສະຫງ່າ​ງາມ, ສັນຍາລັກກໍ​ແມ່ນ​ການ​ສະຖາປະນາ ສປປ ລາວ ໃນ​ວັນ​ທີ 2 ທັນວາ 1975, ເປີດ​ສັງກາດ​ໃໝ່, ສ້າງຕັ້ງ​ລະ ບອບ​ໃໝ່​ປະຊາທິປະໄຕປະຊາ ຊົນ ພາຍ​ໃຕ້​ການ​ນໍາ​ພາ​ຂອງ​ພັກ​ປະຊາຊົນ​ປະຕິວັດ​ລາວ ກອງທັບ​ເຮົາ​ກໍ​ໄດ້​ຕັ້ງໜ້າ​ປະ ກອບ​ສ່ວນ​ສ້າງ​ກໍາ​ລັງ​ແຮງ​ສັງ​ລວມ​ຂອງ​ທົ່ວ​ປວງ​ຊົນ​ ໃນ​ວຽກ​ງານ​ປ້ອງ​ກັນ​ຊາດ​ປ້ອງ​ກັນ​ຄວາມ​ສະຫງົບ,  ເອົາໃຈໃສ່​ຕໍ່​ການ​ຫັນ​ລົງ​ຮາກ​ຖານ, ຊ່ວຍ ເຫຼືອ​ປະຊາຊົນ ໃນ​ການ​ປັບ​ປຸງ​ອໍາ​ນາດ​ການ​ປົກຄອງ, ປັບປຸງ​ຊີວິດ​ການ​ເປັນ​ຢູ່​ຂອງ​ປະຊາ​ຊົນ,   ກໍ່ສ້າງ​ຮາກ​ຖານ​ການເມືອງ​ປະກອບສ່ວນ​ຢ່າງ​ໃຫຍ່​ຫຼວງ​ເຂົ້າ​ໃນ​ການ​ພັດທະນາ​ເສດ​ຖະ​ກິດ​-​ສັງຄົມ​ຂອງ​ຊາດ, ສໍາ​ລັບ​ປີ 2019 ຜ່ານ​ມາ ກອງທັບ​ເຮົາ​ກໍສາມາດ​ຍາດ​ໄດ້​ຜົນ​ສໍາ​ເລັດ​ໃນຫຼາຍ​ດ້ານ​ທີ່​ເປັນ​ໜ້າ​ຊື່ນ​ຊົມ ໂດຍ​ໄດ້​ສຸມ​ໃສ່​ຈັດ​ຕັ້ງ​ ປະຕິບັດ​ບັນດາ​ມະຕິ, ຄໍາ​ສັ່ງ ຂອງ​ກົມ​ການເມືອງ​ສູນ​ກາງ​ພັກ,  ສຸມ​ໃສ່​ວຽກ​ງານ​ກໍ່ສ້າງ​ຮາກ​ຖານ​ການເມືອງ, ສ້າງ​ບ້ານ​-​ກຸ່ມ​ບ້ານ​ພັດທະນາ​ຢ່າງ​ຕັ້ງໜ້າ​ດ້ວຍ​ມາດ​ຕະການ​ລົງ​ກໍ່ສ້າງ​ຮາກ​ຖານ​​ຕາມ 4 ເນື້ອ​ໃນ 4 ຄາດໝາຍ ຕິດ​ພັນ​ກັບ​ວຽກ​ງານ 3 ສ້າງ​ ໂດຍ​ສົມທົບ 3 ດ້ານ​ການເມືອງ, ເສດຖະກິດ ແລະ ການ​ທະຫານ ເຮັດ​ໃຫ້​ທົ່ວ​ສັງຄົມ​ມີ​ຄວາມ​ສະຫງົບ​ປອດ​ໄພ,  ຊີວິດ​ການ​ເປັນ​ຢູ່​ຂອງ​ປະ ຊາຊົນ​ໄດ້​ຮັບ​ການ​ປົວແປງ​ດີ​ຂຶ້ນ​ເປັນ​ກ້າວໆ.
(ຂ່າວ: ສຳ​ນານ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110