ຫົວ​ຂໍ້ : 1 ປີ ແນວລາວສ້າງຊາດ ແຂວງຫົວພັນ ເສີມຂະຫຍາຍມູນເຊື້ອ ຄວາມສາມັກຄີປອງດອງໄດ້ດີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 21/01/2020 10:00:21 ຈຳ​ນວນ​ຜູ້​ເຂົ້າ​ຢ້ຽມ​ຊົມ 343 ຄັ້ງ

ທ່ານ ວີ​ເຕັ່ງ ຈື່​ໄມ​ເຕັ່ງ ຮອງ​ປະທານ​ແນວ​ລາວ​ສ້າງ​ຊາດ​ແຂວງ​ຫົວພັນ​ ໄດ້​ລາຍ​ງານ​ການເຄື່ອນໄຫວ ວຽກ​ງານ​ຂອງ​ຄະນະ​ກຳມະການ​ແນວ​ລາວ​ສ້າງ​ຊາດ​ແຂວງ​ຕໍ່​ກອງ​ປະຊຸມ​ຄົບ​ຄະນະ​ແນວ​ລາວ​ສ້າງ​ຊາດ ຄັ້ງ​ທີ 5 ສະໄໝ​ທີ VII ໃຫ້​ຮູ້​ວ່າ: ຜ່ານ​ມາຄະ​ນະ​ກຳມະການ​ແນວ​ລາວ​ສ້າງ​ຊາດ​ແຂວງ​ຫົວພັນ​ ໄດ້ເຊີດ​ຊູ​ນໍ້າ​ໃຈຄວາມ​ຮັບຜິດຊອບ​ສູງ​ຕໍ່ໜ້າ​ທີ່​ການເມືອງ​ຂອງ​ຕົນ, ຕໍ່​ວຽກ​ງານ​ລວມ​ຂອງ​ຊາດ​ໂດຍ​ສະເພາະ​ຕໍ່ ສິດຜົນປະໂຫຍດ​ຂອງ​ປະຊາຊົນ​ບັນດາເຜົ່າ, ເສີມ​ຂະຫຍາຍ​ປະຊາທິປະໄຕ, ຍົກ​ສູງ​ນໍ້າ​ໃຈຄວາມ​ຮັບ​ຜິດ ຊອບ, ຄວາມ​ເປັນ​ແບບຢ່າງ, ຕິດຕາມ​ກວດກາ​ເກັບ​ກຳ​ຄວາມ​ຂັດຂ້ອງ, ຄໍາ​ຮ້ອງ, ຄໍາ​ສະເໜີ​ຂອງ​ປະຊາຊົນ​ບັນດາເຜົ່າ, ເຂົ້າ​ຮ່ວມ​ໄກ​່ເກ່ຍ​ຂໍ້​ຂັດ​ແຍ່ງ​ຕ່າງໆ, ປຸກລະດົມ​ປະຊາຊົນ​ເຂົ້າ​ຮ່ວມ​ຂະບວນ​ການ​ແຂ່ງຂັນຮັກ​ຊາດ-​ພັດທະນາ​ຕິດ​ພັນ​ກັບ​ວຽກ​ງານ​ສ້າງ​ຄອບຄົວ, ປະຕິບັດ​ແຜນການ​ພົວພັນ ຮ່ວມ​ມື​ກັບ​ຕ່າງປະເທດ ທີ່​ມີ​ຊາຍ​ແດນ​ຕິດ​ຈອດ​ກັນ​ມີ​ການ​ພົວພັນ ເຮັດ​ໃຫ້​ຊາຍ​ແດນມີ​ຄວາມ​ສະ​ຫງົບ. ປັດຈຸ​ບັນ ແຂວງ​ຫົວພັນ​ມີ 9 ຊົນເຜົ່າ​ຄື: ເຜົ່າ​ລາວ, ເຜົ່າ​ໄຕ, ເຜົ່າ​ມົ້ງ, ເຜົ່າ​ກຶມ​ມຸ, ເຜົ່າ​ຟ້ອງ, ເຜົ່າ​ອີ​ວ​ມຽນ, ເຜົ່າ​ມ້ອຍ, ເຜົ່າ​ຊີງ​ມູນ ແລະ ເຜົ່າ​ຫໍ້ ຊຶ່ງ​ແຕ່​ລະ​ເຜົ່າ​ລ້ວນ​ແຕ່​ມີ​ຮີດຄອງ​ປະເພນີ​ຂອງ​ເຜົ່າ​ແຕກ​ຕ່າງ​ກັນ ແລະ ມີ​ມູນເຊື້ອ​ຄວາມສາມັກຄີ​ປອງ​ດອງ​ຊຶ່ງ​ກັນ ແລະ ກັນ.  ທົ່ວ​ແຂວງ​ສາມາດ​ສ້າງ​ບ້ານ​ສາມັກຄີ​ປອງ​ດອງ​ໄດ້ 615 ບ້ານ​ກວມ​ເອົາ 85% ຂອງ​ຈໍາ​ນ​ວນບ້ານ​ທົ່ວ​ແຂວງ. 
ສຳລັບ​ທິດ​ທາງ​ແຜນການ​ປີ 2020 ຄະນະ​ກຳມະການ​ແນວ​ລາວ​ສ້າງ​ຊາດ​ແຂວງ​ຫົວພັນ​ຈະສືບຕໍ່​ເພີ່ມ​ທະວີ​ຄວາມ​ສາມັກຄີ​ປອງ​ດອງ​ເປັນ​ປຶກ​ແຜ່ນ, ເປັນ​ເຈົ້າ​ການ​ສຶກສາ​ອົບຮົມ, ປຸກລະດົມ​ປະຊາຊົນ​ບັນດາເຜົ່າ​ເຂົ້າ​ຮ່ວມ​ຂະບວນ​ການ​ຕ່າງໆ​ຂອງ​ແຂວງ, ຫັນ​ລົງ​ຮາກ​ຖານ​ເພື່ອ​ສຶກສາ​ອົບ ຮົມ ແລະ ກຳ​ແໜ້ນ​ແນວ​ຄິດ​ຈິດໃຈ, ຄວາມ​ມຸ່ງ​ມາດ​ປາຖະ ໜາ, ຄວາມ​ຂັດຂ້ອງ​ໝອງ​ໃຈ​ຂອງ​ປະຊາຊົນ​ບັນດາເຜົ່າ​ຕ່າງໆ, ເສີມຂະຫຍາຍ​ບົດບາດ​ເປັນໃຈ​ກາງ​ປະສານ​ສົມທົບ​ພະແນກການ, ອົງການ​ພາຄີ ແລະ ພາກສ່ວນ​ກ່ຽວຂ້ອງ​ພ້ອມ​ກັນ​ເຄື່ອນ​ໄຫວ​ວຽກ​ງານ​ແນວ​ໂຮມ​ໃຫ້​ດີ, ເອົາໃຈໃສ່​ວຽກ​ງານ​ພົວພັນ​ການຕ່າງປະເທດ​ຕາມ​ແນວທາງ​ນະໂຍບາຍ​ຂອງ​ພັກ.
ກອງ​ປະຊຸມ​ດັ່ງກ່າວ, ໄດ້​ຈັດ​ຂຶ້ນ​ໃນ​ວັນ​ທີ 16 ມັງກອນ​ຜ່ານ​ມາ  ​ທີ່​ຫໍ​ວັດ​ທະ​ນະ​ທໍາ​ຂອງ ແຂວງ​ໂດຍເປັນ​ກຽດ​ເຂົ້າ​ຮ່ວມ​ຂອງທ່ານ ວັນ​ໄຊ ແພງ​ຊຸມ​ມາ ກຳມະການ​ສູນ​ກາງ​ພັກ ເລຂາ​ພັກ​ແຂວງ ເຈົ້າແຂວງໆ​ຫົວພັນ, ມີ​ຄະນະ​ກຳມະການ​ແນວ​ລາວ​ສ້າງ​ຊາດ​ທົ່ວ​ແຂວງ, ພາກສ່ວນ​ທີ່​ກ່ຽວຂ້ອງອ້ອມ​ຂ້າງ​ແຂວງ​ເຂົ້າ​ຮ່ວມ​ນໍາ.  
(ຂ່າວ: ນິດ​ຖະໜອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110