ຫົວ​ຂໍ້ : ປີ 2019 ຫຼວງນຳ້ທາ ມີຜູ້ຖືກເຄາະຮ້າຍຈາກການ ຄ້າມະນຸດ 106 ຄົນ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 21/01/2020 10:04:00 ຈຳ​ນວນ​ຜູ້​ເຂົ້າ​ຢ້ຽມ​ຊົມ 409 ຄັ້ງ

    ຫຼາຍ​ປະເທດ ​ໃນ​ໂລກ ແລະ ພາກ​ພື້ນ​ຖື​ບັນຫາ​ການ​ຄ້າ​ມະນຸດ​ເປັນ​ອາ​ຊະ​ຍາ​ກຳ​ທີ່​ຮ້າຍ​ແຮງ​ທີ່​ສຸດ,ເພາະ​ລະເມີດ​ສິດທິ​ພື້ນຖານ​ຂອງ​ພົນລະເມືອງ ໄດ້​ສ້າງ​ຄວາມ​ເສຍ​ຫາຍ​ໂດຍ​ກົງ​ຕໍ່​ຊີວິດ, ສຸຂະພາບ, ຮ່າງກາຍ, ຈິດໃຈ​ກຽດ​ສັກ​ສີ​ຂອງ​ມະນຸດ,  ສປປ ລາວ ກໍເປັນ​ປະເທດ​ໜຶ່ງ​ທີ່​ໄດ້​ຮັບ​ຜົນ​ກະທົບ​ຈາກ​ການ​ຄ້າ​ມະນຸດ, ເວົ້າ​ລວມ, ເວົ້າ​ສະເພາະ​ຢູ່​ແຂວງ​ຫຼວງ​ນໍ້າ​ທາ ກໍ​ໄດ້​ຮັບ​ຜົນ​ກະທົບ​ເຊັ່ນ​ດຽວ​ກັນ ໂດຍ​ສະເພາະ​ແມ່ນ​ການ​ຕົວະ​ຍົວະ​ຫຼອກ​ລວງ​ໂດຍ​ມີ​ນາຍ​ໜ້າ ຫຼື ການ​ນຳ​ໃຊ້​ສື່​ສັງຄົມ​ອອນ​ລາຍ ເພື່ອ​ໂຄສະນາ​ຂົນຂວາຍ​ເອົາ​ແມ່ຍິງ​ລາວ​ໄປ​ອອກແຮງ​ງານ, ໄປ​ທ່ອງ​ທ່ຽວ, ໄປແຕ່ງ ດອງ​ກັບ​ຄົນ​ຕ່າງປະເທດ ດ້ວຍ​ຮູບ​ການ​ແຕ່ງດອງ, ໝັ້ນ​ໝາຍ​ວາງ​ຄ່າ​ດອງ​ແລ້ວ​ກໍແລ່ນເອ ກະສານ​ສັນຍາ​ໄປ​ຕ່າງ​ປະ​ເທດ. ນອກ​ນີ້, ການ​ເປີດ​ຮ້ານ​ບໍລິການ​ຕ່າງໆ​ຈຳນວນ​ໜຶ່ງ​ເປັນ​ສາກ​ບັງ​ໜ້າ​ເພື່ອ​ຄ້າ​ໂສເພນີ ແລະ ອືນໆ.
ທ່ານ  ພັຕ ສີ​ວຽງ ສົມ​ສີ​ພາ ຮອງ​ຫົວໜ້າ​ພະ​ແນ​ກ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ ປກສ ແຂວງ​ຫຼວງ​ນໍ້າ​ທາ ໄດ້​ໃຫ້​ສຳພາດ​ຕໍ່​ສື່​ມວນ​ຊົນ​ແຂວງ​ເມື່ອ​ບໍ່​ດົນ​ມາ​ນີ້​ວ່າ:  ປີ 2019 ຜ່ານ​ມາ ເຈົ້າ​ໜ້າທີ່​ພະ​ແນ​ກ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ ຮ່ວ​ມກັບ ສະຫະພັນ​ແມ່ຍິງ​ແຂວງ ໄດ້​ສຸມ​ໃສ່​ເຮັດ​ວຽກ​ງານ​ການ​ປົກ​ປ້ອງ ແລະ ຊ່ວຍ​ເຫຼືອ​ຜູ້ຖືກ​ເຄາະ​ຮ້າຍ ແລະ ກຸ່ມ​ສ່ຽງ​ຢ່າງ​ຕັ້ງໜ້າ. ຜ່ານ​ການ​ເຄື່ອ​ນ​ໄຫວ​ວຽກ​ງານ​ຕ້ານ​ການ​ຄ້າ​ມະນຸດ​ປີ 2019 ໄດ້​ມີ​ຜູ້​ຖືກ​ເຄາະ​ຮ້າຍ  ແລະ  ກຸ່ມ​​ສ່ຽງ​ມາ​ພັກ​ເຊົາ​ຢູ່​ສູນ​ພັກ​ເຊົາ​ຊົ່ວ​ຄາວ​ຈໍາ​ນວນ 106 ຄົນ  ຍິງ 106 ຄົນ. ໃນ​ນັ້ນ ອາ​ຍຸ​ຕໍ່າກວ່າ 18 ປີ​ມີ 6 ຄົນ, ຄົນ​ຕ່າງປະເທດ 7 ຄົນ. ໃນ​ນັ້ນ, (ແຕ່ງດອງ​ແອບ​ແຝງ 82 ຄົນ, ຖືກ​ບັງຄັບ​ໃຫ້​ຂາຍ​ບໍລິການ​ທາງ​ເພດ 3 ຄົນ, ເຂົ້າ​ເມືອງ​ຜິດ​ກົດໝາຍ 11 ຄົນ, ຖືກ​ຂູດ​ຮີດ​ແຮງ​ງານ 6 ຄົນ, ຖືກ​ຂູດ​ຮີດ​ທາງ​ເພດ 4 ຄົນ). ປັດຈຸບັນ​ໄດ້​ສົ່ງ​ຜູ້​ຖືກ​ເຄາະ​ຮ້າຍ​ກັບ​ຄືນ​ຖິ່ນ​ກໍາ​ເນີດ ແລະ ສົ່ງ​ໃຫ້​ຜູ້​ປົກຄອງ​ແລ້ວ 33 ຄົນ, ສົ່ງ​ໃຫ້​ສູນ​ເພື່ອ​ໃຫ້​ຄຳ​ປຶກສາ ແລະ ປົກ​ປ້ອງ​ແມ່ຍິງ-ເດັກນ້ອຍ​ສູນ​ກາງ​ສະຫະພັນ​ແມ່ຍິງ​ລາວ​  ຈໍາ​ນວນ 66 ຄົນ ແລະ ສົ່ງ​ຄົນ​ຕ່າງປະເທດ​ກັບ​ຄືນ​ປະເທດ  7 ຄົນ.  ທ່ານ ພັຕ ສີ​ວຽງ ສົມ​ສີ​ພາ ຍັງ​ໄດ້​ກ່າວ​ຕື່ມ​ວ່າ: ໃນ​ນາມ​ຕາງ​ໜ້າ​ພະ​ແນ​ກ​ສະກັດ​ກັ້ນ ແລະ ຕ້ານ​ການ​ຄ້າ​ມະນຸດ ຮຽກຮ້ອງ​ມາ​ຍັງ​ອົງການ​ຈັດ​ຕັ້ງ​ຕ່າງໆ ຕະຫຼອດ​ຮອດ ພໍ່, ແມ່ ປະຊົນ​ບັນດາເຜົ່າ​ຈົ່ງ​ມີ​ສະຕິ​ລະວັງ​ຕົວ​ຕໍ່​ກົນອຸບາຍ​ດັ່ງກ່າວ, ເປັນ​ຫູ​ເປັນຕາ​ຊ່ວຍ​ເຈົ້າ​ໜ້າທີ່, ເພື່ອ​ຊ່ວຍ​ການຈັດຕັ້ງ​ຂັ້ນ​ເທິງ ໃນ​ການ​ສະກັດ​ກັ້ນ​ບັນຫາ​ການ​ຄ້າ​ມະນຸດ​ທຸກໆ​ລະດັບ​ໃຫ້​ຫຼຸດ​ນ້ອຍ​ຖອຍ​ລົງ​ເທື່ອ​ລະ​ກ້າວ.
(ຂ່າວ​-​ພາບ:  ສົມ​ພອນ ຂຸນ​ດາ​ວົງ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110