ຫົວ​ຂໍ້ : ການລົງທຶນດ້ານໂພຊະນາການ ເພື່ອສ້າງຊັບພະຍາກອນ ມະນຸດໃຫ້ມີຄຸນນະພາບ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 22/01/2020 09:23:33 ຈຳ​ນວນ​ຜູ້​ເຂົ້າ​ຢ້ຽມ​ຊົມ 371 ຄັ້ງ

ກອງ​ປະຊຸມ​ແຫ່ງ​ຊາດດ້ານ ​ໂພຊະ​ນາ​ການ ຄັ້ງ​ທີ V ແລະ ກອງ​ປະຊຸມ​ຄະນະ​ກຳມະການ​ແຫ່ງ​ຊາດດ້ານໂພຊະ​ນາການ ປະຈຳ​ປີ 2019 ໄດ້ຈັດຂຶ້ນ​ໃນ​ວັນ​ທີ  10  ທັນວານີ້  ທີ່​ຫໍ​ປະ ຊຸມ​ແຫ່ງຊາດ  ໂດຍການ​ເປັນ​ປະທານຂອງທ່ານ  ສອນ​ໄຊ   ສີ​ພັນ​ດອນ  ຮອງ​ນາຍົກລັດຖະ ມົນຕີ ລັດຖະມົນຕີ​ກະຊວງ​ແຜນ ການ ແລະ ການ​ລົງທຶນ ປະທານ​ຄະນະ​ກຳມະການ​ແຫ່ງ​ຊາດ​ດ້ານ​ໂພຊະ​ນາ​ການ,  ມີ​ພາກ ສ່ວນ​ກ່ຽວຂ້ອງ​ເຂົ້າ​ຮ່ວມ.
ກອງ​ປະຊຸມ​ຄັ້ງ​ນີ້​ແມ່ນໄດ້​ ຮັບ​ການ​ສະໜັບສະໜູນ​ຈາກ ສະຫະພາບ​ເອີ​ຣົບ ແລະ ອົງການ​ອຸຍ​ນີເຊັບ,  ຈຸດປະສົງ​ຂອງ​ກອງ​ປະຊຸມ, ແມ່ນ​ຈະ​ນໍາສະເໜີ​ ຄວາມ​ຄືບ​ໜ້າ​ກ່ຽວ​ກັບ​ຍຸດທະ ສາດ  ແລະ  ແຜນ​ດໍາເນີນງານ ​ດ້ານ​ໂພຊະນາ​ການ​ແຫ່ງຊາດ  ຊຶ່ງ​ເປັນ​ສ່ວນ​ໜຶ່ງ​ຂອງ​ການ​ປຶກ ສາ​ຫາລື​ປະຈຳ​ປີ ເພື່ອ​ຕິດຕາມ​ຄວາມ​ຄືບ​ໜ້າ ແລະ ກຳນົດ​ຂໍ້​ບົກ​ຜ່ອງ  ໃນ​ການ​ຮັບປະກັນ​ດ້ານ​ໂພຊະ​ນາ​ການ​ທີ່​ດີ​ຂອງ​ເດັກນ້ອຍ ຢູ່ ສປປ ລາວ.
ອີງ​ຕາມ​ຜົນ​ສໍາ​ຫຼວດດັດ​ສະ​ນີ​ໝາຍ​ສັງຄົມ​ລາວ ຄັ້ງ​ທີ II ປີ 2001, ສັດສ່ວນ​ຂອງເດັກ ​ເຕ້ຍ​ໄດ້​ຫຼຸດ​ລົງ​ຈາກ 44% ​ໃນ LSIS-I ລົງ​ມາ​ເປັນ 33% (LSIS-II, 2017).
ທ່ານ  ສອນ​ໄຊ ສີ​ພັນ​ດອນ ໄດ້​ກ່າວ​ວ່າ: ຫຼັກ​ຖານ​ທາງ​ດ້ານ​ວິທະຍາສາດ​ທີ່​ໄດ້​ຖືກ​ເຜີຍແຜ່​ໃນ​ກອງ​ປະຊຸມ​ລະດັບ​ພາກ​ພຶ້ນ ແລະ ສາກົນວ່າ “ການ​ລົງທຶນ​ໃສ່​ດ້ານ​ໂພຊະ​ນາ​ການແມ່ນ ການ​ພັດທະນາ​ທຶນ​ມະນຸດຢ່າງ​ມີ​ຄຸນນະພາບ ແລະ ຍືນ​ຍົງ”. ໃນ ສປປ ລາວ  ເຖິງ​ຈະ​ແກ້ໄຂບັນ ຫາ​ໂພຊະ​ນາ​ການ​ໄດ້​ໃນ​ລະດັບ​ໜຶ່ງ ແຕ່​ປັດຈຸ​ບັນ​ກໍ​ຍັງ​ມີເດັກທີ່​ຈະ​ເປັນ​ອະນາຄົດ​ຂອງ​ຊາດ 1 ໃນ 3 ຄົນ ຫຼື ຈໍາ​ນວນ​ປະມານ​ເກືອບ 3 ແສນຄົນ ມີພັດທະ ນາ​ການ​ດ້ານຮ່າງກາຍ  ແລະ ມັນສະໝອງ​ຊັກ​ຊ້າ​ບໍ່​ໄດ້​ມາດ ຕະຖານມີ​ຄວາມ​ສະຫຼຽວສະ ​ຫຼາດ​ຈໍາ​ກັດ   ຍ້ອນຜົນ​ສະທ້ອນ​ຈາກ​ການ​ຂາດ​ສານ​ອາ​ຫານ​ຊໍາ​ເຮື້ອ​ແບບ​ລວງ​ສູງ​ບໍ່​ໄດ້​ມາດ ຖານ,  ການ​ຂາດ​ອາຫານ​ກະ ທັນຫັນ ແລະ ການ​ຂາດ​ວິຕາມິນ​ແຮ່​ທາດ  ຊຶ່ງ​ມາ​ຈາກ​ຫຼາຍ​ສາ ເຫດ ລວມ​ທັງບໍ່ມີ​ຄວາມ​ໝັ້ນ ຄົງ​ໃນ​ການຜະລິດ​ສະບຽງ​ອາ ຫານ  ເນື່ອງ​ຈາກສະພາບດິນ​ ຟ້າ​ອາກາດ​ປ່ຽນແປງໄພ​ທຳ​ມະ​ຊາດ​ນໍ້າ​ຖ້ວມ ຫຼື ໄພ​ແລ້ງ, ປະຊາຊົນ​ມີ​ພຶດຕິ​ກຳ​ການ​ບໍລິ ໂພກ​ອາຫານ​ທີ່​ບໍ່​ຫຼາກ​ຫຼາຍ​ພຽງ​ພໍ.  ນອກ​ນັ້ນ ມີ​ການ​ກິນ​ດື່ມ​ທີ່​ບໍ່​ເໝາະ​ສົມ ເປັນຕົ້ນມີ​ລົດ​ເຄັມ, ຫວານ ແລະ ເກີດບັນ ຫາໂພຊະ​ນາ​ການ​ເກີນ  ແລະ ຕຸ້ຍທັງ​ໃນ​ເດັກ  ແລະ  ຜູ້​ໃຫຍ່ ເພີ່​ມ​ຂຶ້ນ  ຊຶ່ງ​ຈະ​ນໍາ​ພາໃຫ້​ເກີດ ພະຍາດເບົາຫວານ,  ຫົວໃຈ, ຄວາມດັນເລືອດສູງ  ແລະ  ມະ​ເຮັງລໍາ​ໃສ້ ເຮັດໃຫ້ສູນເສຍຊັບ​ສິນ ແລະ ຊີ​ວິດ.  ດັ່ງນັ້ນ, ພວກ ​ເຮົາ​ຍັງ​ມີພາລະກິດ​ທີ່​ໜັກໜ່ວງ ເພື່ອ​ຈະໃຫ້ການລົງທຶນດ້ານ ໂພຊະ​ນາ​ການພັດທະນາທຶນ​ ມະນຸດ​ທີ່​ມີ​ຄຸນນະພາບ  ແລະ ຍືນ​ຍົງໃຫ້​ປະກົດ​ເປັນຈິງຮັບປະ ກັນ​ໃຫ້​ລູກ​ຫຼານກໍ​ຄື​ປະຊາຊົນ​ລາວມີ​ໂພຊະ​ນາ​ການ​ທີ່​ດີຂຶ້ນ ເພື່ອ​ເປັນກຳລັງ​ແຮງ ໃນ​ການ ປົກປັກຮັກ ສາ ແລະ ສ້າງສາພັດ ທະນາ​ປະເທດ​ຊາດ​ ໃນ​ຕໍ່​ໄປ​ຂ້າງ​ໜ້າ.
ດັ່ງນັ້ນ, ​ໃນ​ກອງ​ປະຊຸມ​ຄັ້ງ​ນີ້ ຂ້າພະເຈົ້າ ຢາກ​ຂໍ​ແນະ​ນໍາ​ໃຫ້ມີ​ການ​ລາຍ​ງານ ພ້ອມ​ທັງສົນທະນາ ແລກປ່ຽນ​ປຶກສາ ດັ່ງ​ລຸ່ມ​ນີ້: 
1. ການຈັດຕັ້ງ​ປະຕິບັດ​ໃນ 10 ມາດ​ຕະການແກ້​ໄຂໂພ ຊະ​ນາ​ການ​ໂດຍ​ກົງທີ່​ຕິດ​ພັນ​ກັບຂະແໜງສາທາລະນະ​ສຸກ ໄດ້​ມີ​ແຂວງ, ເມືອງ, ບ້ານ​ໃດທີ່​ໄດ້​ມີ​ຜົນສຳເລັດ​ພົ້ນ​ເດັ່ນ​ບັນລຸ​ຄາດໝາຍອັດຕາການ​ປົກ​ຄຸມ​ການແຈກຢາຍອາຫານ​ການ​ແພດວິຕາມິນແຮ່​ທາດການ​ປິ່ນປົວ​ການ​ຂາດ​ອາຫານຮ້າຍ​ແຮງ​ໄດ້​ແນວໃດ ແລະ ສາມາດ​ເສີມ​ຂະຫຍາຍ​ຖອດ​ຖອນ​ບົດ ຮຽນ​ໄປ​ເຂດ​ອື່ນ.
2. ການຈັດຕັ້ງ​ປະຕິບັດ​ໃນ 4 ມາດ​ຕະການແກ້​ໄຂ​ໂພ ຊະ​ນາ​ການ​ທາງ​ອ້ອມ​ທີ່​ຕິດ​ພັນ​ກັບການ​ຄໍ້າ​ປະກັນ​ສະບຽງ​ອາຫານ​ໂພຊະ​ນາ​ການຂອງ​ຂະແໜງ​ກະສິກຳ ແລະ ປ່າໄມ້- ພັດທະນາ​ຊົນນະບົດໄດ້​ມີ ແຂວງ, ເມືອງ, ບ້ານໃດ​ແດ່ທີ່​ ໄດ້​ມີ​ການ​ຜະລິດ​ສະບຽງ​ອາ ຫານ, ການ​ປູກ, ການ​ລ້ຽງທີ່ພົ້ນ​ເດັ່ນກາຍເປັນ​ຜະລິດ​ຕະ​ພັນ​ເອກະລັກ, ໄດ້​ສ້າງ​ໜຶ່ງ​ຜະລິດ​ຕະ​ພັນໜຶ່ງ​ບ້ານ ຫຼື ໜຶ່ງ​ເມືອງ  ເປັນ​ຕົວ​ແບບມີ​ຄອບຄົວ ແລະ ບ້ານ​ທີ່​ໄດ້​ຄໍ້າ​ປະກັນ​ສະບຽງ​ອາ ຫານ ແລະ ຫຼຸດ​ພົ້ນ​ຄວາມທຸກ​ຍາກຫຼາຍ​ປານໃດ  ຊຶ່ງວຽກງານ ​ນີ້​ແມ່ນສຳຄັນ​ຫຼາຍ ເພາະຈະ ​ເປັນການ​ແກ້​ໄຂ​ບັນຫາ​ໂພຊະ​ນາ​ການແບບ​ຍືນ​ຍົງ  ແລະ ສາ ມາດ​ເສີມ​ຂະຫຍາຍ​ຖອດ​ຖອນ ບົດຮຽນໄປ​ທ້ອງຖິ່ນ​ອື່ນ.
3. ການຈັດຕັ້ງ​ປະຕິບັດ​ໃນ 4 ມາດ​ຕະການແກ້​ໄຂ​ໂພ ຊະ​ນາ​ການທີ່​ຕິດ​ພັນກັບການ ​ສຶກສາໄດ້​ມີໂຮງຮຽນ​ໃນແຂວງ, ເມືອງ,  ບ້ານ​ໃດທີ່​ໄດ້​ມີ​ຜົນສຳ ເລັດ​ລັກສະນະ​ພົ້ນ​ເດັ່ນເປັນ​ຕົວ​ແບບ ແລະ  ສາມາດ​ເສີມຂະ ຫຍາຍ​ຖອດ​ຖອນ​ບົດຮຽນ​ໄປ​ທ້ອງຖິ່ນ​ອື່ນ.
4. ການຈັດຕັ້ງ​ປະຕິບັດ​ໃນ 4 ມາດ​ຕະການທີ່​ຕິດພັນ ກັບຫຼາຍ​ພາກສ່ວນໄດ້​ມີແຂວງ, ເມືອງ  ແລະ  ບ້ານໃດ​ທີ່​ມີ​ຜົນສຳ ເລັດ ໃນດ້ານການປະສານງານ ການ​ຄຸ້ມ​ຄອງ​ບໍລິຫານການ​ມີ​ແຜນການໜຶ່ງ​ດຽວ ແລະ ຈັດ​ຕັ້ງ​ປະຕິບັດ​ໄປ​ລວງ​ດຽວ​ກັນ, ມີ​ແຂວງ​ໃດ​ທີ່ຄະນະ​ໂພຊະ​ນາ​ ການ​ຂັ້ນ​ແຂວງ, ເມືອງມີ​ການ ເຄື່ອນໄຫວທີ່ເຂັ້ມແຂງ  ແລະ ສາມາດ​ຖອດ​ຖອນ​ບົດຮຽນ​ໃຫ້​ແຂວງ​ອື່ນ.
5. ດ້ານ​ການ​ພົວພັນ​ປະ ສານ​ງານ​ກັບພາກ​ສາກົນຄູ່​ຮ່ວມ​ພັດທະນາເອກະ​ຊົນ ອົງ ການ​ສັງຄົມ ແລະ ຊຸມ​ຊົນ​ເປັນ ​ແນວໃດ  ຊຶ່ງ​ສາມາດ​ເສີມ​ຂະ ຫຍາຍ​ຖອດ​ຖອນ​ບົດຮຽນ​ໃນ​ປີ​ຕໍ່​ໄປ.
6. ຈະ​ແກ້​ໄຂ​ບັນດາ​ສິ່ງ​ທ້າ​ທາຍ ແລະ ມີ​ແຜນ​ບຸລິມະສິດ ໃນ​ການ​ກຳນົດ​ຈຸດ​ສຸມ​ການ​ຈັດ​ສັນ ແລະ ຄຸ້ມ​ຄອງ​ງົບປະມານ​ຂອງລັດຖະບານທີ່​ມີຢູ່​ຢ່າງ​ຈໍາ​ກັດ ແລະ ການ​ນໍາ​ໃຊ້​ທຶນການ​ຊ່ວຍເຫຼືອ ແລະ ກູ້​ຢືມ​ຈາກ​ສາ ກົນໃຫ້​ມີ​ປະສິດທິພາບ  ເພື່ອ​ ເກີດ​ປະໂຫຍດ​ສູງ​ສຸດມີ​ຜົນສຳ ເລັດ​ຫຼາຍ​ຂຶ້ນ  ໃນ​ການ​ແກ້​ໄຂ ບັນຫາ​ໂພຊະ​ນາ​ການ ຢູ່ ສປປ ລາວ ໃນ​ປີ 2020 ແລະ ປີ​ຕໍ່​ໄປ 
 ທ່ານ ອົກ​ຕາ​ວຽນ ບີ​ໂວນ Octavian Bivol  ຜູ້​ຕາງໜ້າ ອົງການອຸຍນີ​ເ​ຊັບໄດ້​ອະທິບາຍ​ວ່າ: “ມື້ນີ້​ແມ່ນ​ຂີດ​ໝາຍ​ສຳຄັນ​ອີກ​ອັນ​ໜຶ່ງ​ໃນ​ເສັ້ນທາງ​ສືບຕໍ່​ລຶບລ້າງ​ການ​ຂາດ​ສານ​ອາຫານ​ທຸກ​ຮູບ​ແບບ ​ໃນ ສປປ ລາວ. ການ​ສົນທະນາ​ສ່ວນ​ໃຫຍ່​ແມ່ນ​ເນັ້ນ​ໃສ່​ການ​ຊອກ​ຫາ​ວິ​ທິ​ທາງ​ໃດ​ໃນ​ການ​ລົງທຶນ​ໃສ່​ວຽກ​ງານ​ໂພຊະ​ນາ​ການທີ່​ພົວພັນ​ເຖິງ ເພື່ອ​ສ້າງຊັບພະຍາກອນ​ມະ​ນຸດ. ເດັກນ້ອຍ ແລະ ໄວ​ໜຸ່ມ ແມ່ນກຳລັງ​ຫຼັກ​ຂອງ​ການ​ພັດ ທະນາ​ມະນຸດ, ສັງຄົມ, ເສດຖະ ກິດ ແລະ ປະເທດ​ຊາດ.
 (ຂ່າວ: ບຸນ​ຕອມ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110