ພິທີມອບ-ຮັບໜ້າທີ່ ຫົວໜ້າຫ້ອງວ່າການປົກຄອງ ເມືອງອຸທຸມພອນ ແຂວງສະຫວັນນະເຂດ ລະຫວ່າງຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 24 ພຶດສະພາຜ່ານມາ ທີ່ຫ້ອງປະຊຸມຫ້ອງວ່າການປົກຄອງເມືອງດັ່ງກ່າວ ໂດຍການເຂົ້າຮ່ວມເປັນປະທານຂອງ ທ່ານ ອຸ່ນແກ້ວ ວົງສາຄອນ ຄະນະປະຈໍາພັກເມືອງ ຫົວໜ້າຄະນະຈັດຕັ້ງເມືອງ.

      ໃນພິທີ, ໄດ້ຜ່ານຂໍ້ຕົກລົງຂອງທ່ານເຈົ້າເມືອງອຸທຸມພອນ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ໂດຍໄດ້ອະນຸມັດຍົກຍ້າຍ ທ່ານ ສີວິໄລ ສຸລິໂຍ ຫົວໜ້າຫ້ອງວ່າການປົກຄອງເມືອງ (ຜູ້ເກົ່າ) ໄປປະຈໍາການຢູ່ຫ້ອງການໂຄສະນາອົບຮົມເມືອງ ແລະ ຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງພະນັກງານ ຊຶ່ງໃນນີ້ໄດ້ຕົກລົງແຕ່ງຕັ້ງທ່ານ ນາງ ແຫວນວົງ ນາມວົງສາ ຮອງຫົວໜ້າຫ້ອງການສຶກສາທິການ-ກິລາເມືອງ ເປັນຫົວໜ້າຫ້ອງວ່າການປົກຄອງເມືອງອຸທຸມພອນຜູ້ໃໝ່.

      ຈາກນັ້ນ, ກໍໄດ້ມີການເຊັນມອບ-ຮັບໜ້າທີ່ວຽກງານຊຶ່ງກັນ ແລະ ກັນລະຫວ່າງ ທ່ານ ສີວິໄລ ສຸລິໂຍ ແລະທ່ານ ນາງ ແຫວນວົງ ນາມວົງສາ ໂດຍຊ້ອງໜ້າທ່ານ ອຸ່ນແກ້ວ ວົງສາຄອນ ແລະ ຕາງໜ້າຫ້ອງການ, ກົມກອງອ້ອມຂ້າງເມືອງເຂົ້າຮ່ວມເປັນສັກຂີພິຍານນໍາ. (ຂ່າວ-ພາບ: ອຸທຸມພອນ)