ຫົວ​ຂໍ້ : ລາຍຮັບຕໍ່ຫົວຄົນ ຈີນ ບັນລຸ 10 ພັນກວ່າໂດລາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 22/01/2020 09:43:28 ຈຳ​ນວນ​ຜູ້​ເຂົ້າ​ຢ້ຽມ​ຊົມ 320 ຄັ້ງ

ຂ່າວສານ​ຊີ​ອາ​ໄອ​ລາຍ​ງານ​ວ່າ: ວັນ​ທີ 19 ມັງກອນ​ຜ່ານ​ມາ, ໃນ​ກອງ​ປະຊຸມ​ຖະແຫຼງ​ຂ່າວ​ທີ່​ຈັດ​ຂຶ້ນ​ຢູ່​ປັກ​ກິ່ງ, ທ່ານ ເມີ້ງ​ເຫວີຍ ໂຄສົກ​ຄະນະ​ກຳມະການ​ປະຕິ​ຮູບ ແລະ ການ​ພັດທະນາ​ແຫ່ງ​ຊາດ​ຈີນ ຊີ້​ໃຫ້​ເຫັນ​ວ່າ: ປີ 2019, ຍອດ​ລາຍ​ຮັບ​ສະເລ່ຍ​ຕໍ່​ຫົວ​ຄົນ​ຂອງ​ຈີນ (GDP) ບັນລຸ​ຫຼາຍ​ກວ່າ 10 ພັນ​ໂດ​ລາ, ເປັນ​ຂີດ​ໝາຍ​ສະແດງ​ໃຫ້​ເຫັນ​ວ່າ: ກຳລັງ​ແຮງ​ສັງ​ລວມ​ແຫ່ງ​ຊາດ​ຈີນ​ສູງ​ຂຶ້ນ, ກຳລັງ​ການ​ຜະລິດ​ໃນ​ສັງຄົມ​ເພີ່ມ​ຂຶ້ນ ແລະ ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຖືກ​ຍົກ​ສູງ​ຂຶ້ນ. 
ຂ່າວ​ລາຍ​ງານ​ຕື່ມ​ວ່າ: ການ​ບັນລຸ GDP ຂ້າງ​ເທິງ​ນັ້ນ ເປັນ​ຂີດ​ໝາຍ​ສະແດງ​ໃຫ້​ເຫັນ​ວ່າ: ຈີນ ໄດ້​ຢ່ວງ​ບາດກ້າວ​ອັນ​ໜັກ​ແໜ້ນ​ໄປ​ສູ່​ຖັນ​ແຖວ​ປະເທດ​ທີ່​ມີ​ລາຍ​ໄດ້​ສູງ. ນີ້​ແມ່ນ​ຜົນສຳເລັດ​ອັນ​ຍິ່ງ​ໃຫຍ່​ຂອງ​ຈີນ ໃນ​ການ​ຊຸກຍູ້​ການ​ສ້າງ​ສັງຄົມ​ທີ່​ອີ່ມ​ໜຳ​ສຳລານ​ຢ່າງ​ຮອບ​ດ້ານ. ໃນ​ຂະນະ​ດຽວ​ກັນ, ທ່ານ ເມີ້ງ​ເຫວີຍ​ກໍໄດ້​ກ່າວ​ວ່າ: GDP ສະເລ່ຍ​ຕໍ່​ຫົວ​ຄົນ​ຂອງ​ປະເທດ​ທີ່​ພັດທະນາ​ແລ້ວ​ແມ່ນ​ຫຼາຍ​ກວ່າ 30 ພັນ​ໂດ​ລາ, ຈີນ​ຍັງ​ແມ່ນ​ປະເທດ​ທີ່​ພວມ​ພັດທະນາ​ທີ່​ໃຫຍ່​ກວ່າ​ໝູ່​ໃນ​ໂລກ.
ທ່ານ ເມີ້ງ​ເຫວີຍ ກ່າວ​ຕື່ມ​ວ່າ: ເມື່ອ​ສັງເກດ​ຈາກ​ໂຕ​ເລກ​ໃນ​ເດືອນ​ທັນວາ​ປີຜ່ານມາ​ເຫັນ​ວ່າ: ການເຄື່ອນໄຫວ​ດ້ານ​ເສດຖະກິດ​ຂອງ​ຈີນ ໃນ​ປັດຈຸບັນ ໄດ້​ປະກົດ​ມີ​ການ​ປ່ຽນແປງ​ຢ່າງ​ຕັ້ງໜ້າ, ໃນ​ດ້ານ​ການ​ຜະລິດ, ການ​ບໍລິໂພກ, ການ​ຄາດ​ຄະເນ ແລະ ລາຄາ​ເປັນຕົ້ນ ລ້ວນ​ແຕ່​ມີ​ສະພາບ​ດີ​ຂຶ້ນ. ທ່ວງ​ທ່າ​ອັນ​ຕັ້ງໜ້າ​ເຫຼົ່າ​ນີ້ ແມ່ນ​ໝາກຜົນ​ຂອງ​ນະໂຍບາຍ​ຕ່າງໆ ແລະ ໄດ້​ຢືນຢັນ​ຢ່າງ​ເຕັມ​ສ່ວນວ່າ: ເສດຖະກິດ​ຈີນ ມີແຮງ​ຕ້ານທານ​ຢ່າງ​ເຂັ້ມແຂງ, ມີ​ກຳລັງ​ບົ່ມ​ຊ້ອນ​ອັນ​ມະຫາສານ ແລະ ສາມາດ​ຢືດ​ຫົດ​ໄດ້. ເຖິງ​ວ່າ​ສະພາບ​ການ, ສະຖານະ​ການ​ພາຍ​ໃນ ແລະ ຕ່າງປະເທດ ໃນ​ປັດຈຸບັນ, ຈະ​ສັບສົນ​ເຄັ່ງ​ຕຶງ, ມີ​ປັດ​ໄຈ​ທີ່​ບໍ່​ແນ່ນອນ​ຫຼາຍ​ກໍ່​ຕາມ, ແຕ່​ເມື່ອ​ສັງເກດ​ຈາກ​ທ່າ​ອ່ຽງ​ການ​ພັດທະນາ​ໃນ​ປີ 2020 ແລ້ວ​ເຫັນ​ວ່າ: ພື້ນຖານ​ທີ່​ເສດຖະກິດ​ຈີນ ຈະ​ຮັກສາ​ທ່ວງ​ທ່າ​ທີ່​ໝັ້ນ​ທ່ຽງ, ໜັກ​ແໜ້ນ, ຍັງ​ມີ​ເງື່ອນໄຂ​ທີ່​ເອື້ອ​ອຳນວຍ​ຫຼາຍ​ພໍ​ສົມ​ຄວນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110