ຫົວ​ຂໍ້ : ເຄົາລົບກົດບັດ ສປຊ ເພື່ອຮັກສາສັນຕິພາບ ແລະ ຄວາມໝັ້ນຄົງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 22/01/2020 09:47:21 ຈຳ​ນວນ​ຜູ້​ເຂົ້າ​ຢ້ຽມ​ຊົມ 316 ຄັ້ງ

ຮຽບຮຽງ​ໂດຍ: ສີ​ວັນ
      ການ​ເຄົາລົບ ແລະ ປະຕິ ບັດກົດ​ບັດສະຫະ​ປະຊາຊາດ (ສປຊ) ແມ່ນ​ປັດໄຈ​ແກ່ນ ສານ​ໃນ​ການ​ຮັກສາ​ສັນຕິພາບ, ຄວາມ​ໝັ້ນຄົງ​ສາກົນ, ສະກັດ​ກັ້ນ​ບໍ່​ປະ​ໃຫ້​ເກີດ​ສົງຄາມ​ໂລກ​ຄັ້ງ​ໃໝ່. ນີ້​ເປັນ​ຄັ້ງ​ທຳອິດ​ທີ່​ສະພາ​ຄວາມ​ໝັ້ນຄົງ​ໄດ້​ຮັບ ຮອງ​ເອົາ​ຖະແຫຼງການ​ສະ  ເພາະ​ກ່ຽວ​ກັບ​ກົດ​ບັດ​ສະຫະ​ປະຊາ​ຊາດ. ໃນ​ກອງ​ຊຸມ​ເປີດ​ຂອງ​ສະພາ​ຄວາມ​ໝັ້ນຄົງ ສປຊ ໂດຍ​ການ​ເປັນ​ປະທານ​ຂອງ ທ່ານ ຟ້າ​ມ​ບິ່ງ​ມິງ ລັດຖະມົນຕີ​ການ​ຕ່າງປະເທດ​ຫວຽດນາມ ທີ່​ດໍາ​ເນີນ​ຢູ່​ນະຄອນ​ນິວ​ຢອກ ປະເທດ​ອາ​ເມ​ຣິ​ກາ ເມື່ອ​ອາທິດ​ຜ່ານ​ມາ ຊຶ່ງ​ເປັນ​ຂີດ​ໝາຍ​ສຳ​ຄັນ. ພາຍຫຼັງ ຫວຽດນາມ ໄດ້​ຮັບ​ໜ້າທີ່​ເປັນ​ກຳມະການ​ບໍ່​ຖາວອນ​ສະພາ​ຄວາມ​ໝັ້ນຄົງ​ສະຫະ​ປະຊາ​ຊາດ. 
      ຕາມ​ແຫຼ່ງ​ຂ່າວສານ ຫວຽດ ນາມ, 75 ປີ​ກ່ອນ​ໜ້າ​ນີ້, ຈາກ​ຄວາມ​ມຸ່ງ​ມາດ​ປາຖະໜາຢ່າງ​ ແຮງ​ກ້າ​ຂອງ​ບັນດາ​ປະ ຊາຊາດ​ໃນ​ໂລກ “ຫຼີກ​ລ້ຽງ​ເພື່ອ​ໃຫ້​ຄົນ​​ຮຸ້ນ​ຕ່າງໆ​ໃນ​ອະນາຄົດ​ຫຼຸດ​ພົ້ນ​ອອກ​ຈາກ​ໄພ​ເກີດ​ສົງ ຄາມ”, ບັນດາ​ຜູ້​ກໍ່​ຕັ້ງ​ສະຫະ​ປະຊາຊາດ ໄດ້​ສ້າງ​ກົດ​ບັດ​ດ້ວຍ​ບັນດາ​ຫຼັກ ການ​ພື້ນຖານ​ກ່ຽວ​ກັບ​ການ​ຕ້ານ​ສົງຄາມ​ຮຸກ​ຮານ, ສະເໝີ​ພາບ, ເຄົາລົບ​ເອກະລາດ, ອະທິປະ ໄຕ, ຜືນ​ແຜ່ນດິນ​ອັນ​ຄົບ​ຖ້ວນ, ບໍ່​ນຳ​ໃຊ້​ອາວຸດ ຫຼື ນາບ​ຂູ່​ນຳໃຊ້​ ອາວຸດ, ບໍ່​ແຊກ​ແຊງ​ເຂົ້າ​ວຽກ ງານ​ພາຍ​ໃນ​ຂອງ​ປະເທດ​ອື່ນ, ແກ້​ໄຂ​ບັນດາ​ການ​ຂັດ​ແຍ້ງ​ກັນ​ໂດຍ​ສັນຕິ​ວິ​ທີ. 
ບັນດາ​ຫຼັກການ​ພື້ນຖານ​ດັ່ງກ່າວ, ໄດ້​ກາຍເປັນ​ພື້ນຖານ​ຂອງ​ກົດໝາຍ​ສາກົນ​ທີ່​ທັນ​ສະ ໄໝ​ປັບປຸງ​ການ​ພົວພັນ​ຮ່ວມ​ມື ແລະ ມິດຕະພາບ ລະຫວ່າງ ບັນດາ​ປະເທດ, ຊຸກຍູ້​ການສ້າງ ແລະ ພັດທະນາລະບົບກົດ ໝາຍ​ສາກົນ​ຢ່າງຮອບດ້ານ, ຈາກ​ການ​ຫຼຸດຜ່ອນ​ກຳລັງ​ອາ ວຸດ ແລະ ຊຸກຍູ້​ສິດທິ​ມະນຸດ, ຕະຫຼອດ​ຮອດ​ດ້ານ​ເສດຖະກິດ, ການ​ຄ້າ, ການ​ປ່ຽນແປງ​ຂອງ​ດິນ​ຟ້າ​ອາ​ກາດ.
ໃນ​ໂອກາດ​ດຽວ​ກັນນີ້, ທ່ານ ຟ້າ​ມ​ບິ່ງ​ມິງ ຢັ້ນ​ຢືນວ່າ: ປະຫວັດສາດ​ແຫ່ງ​ການພັດ ທະນາ​ຂອງ​ສະຫະ​ປະຊາຊາດ ແມ່ນ​ພິຍານ​ຫຼັກ​ຖານ​ຢ່າງ​ມີ​ຊີວິດ​ຊີວາ​ທີ່​ສຸດ​ໃຫ້​ແກ່​ຄວາມ​ໝາຍ​ສຳຄັນ​ຂອງ​ກົດ​ບັດ. ການ​ເຄົາລົບ ແລະ ປະຕິບັດ​ກົດ​ບັດ ສປຊ ແມ່ນ​ປັດໄຈ​ແກ່ນສານ​ໃນ​ການ​ຮັກສາ​ສັນຕິພາບ, ຄວາມ​ໝັ້ນຄົງ​ສາກົນ, ສະກັດ​ກັ້ນ​ບໍ່​ປະ​ໃຫ້​ເກີດ​ສົງຄາມ​ໂລກ​ຄັ້ງ ໃໝ່, ຊຸກຍູ້​ການ​ເຈລະຈາ, ການ​ປະນິປະນອມ ເພື່ອ​ຊອກ​ຫາ​ມາດ​ຕະການ​ແກ້​ໄຂ​ໂດຍ​ສັນຕິ​ວິທີ ໃຫ້​ແກ່​ການ​ປະ​ທະ​ກັນ​ທີ່​ເກີດ​ຂຶ້ນ​ຢູ່​ບັນດາ​ພາກ​ພື້ນ​ໃນ​ໂລກ. ທ່ານ ຟ້າ​ມ​ບິ່ງ​ມິງ ໃຫ້​ທັດສະນະ​ວ່າ: ເລື່ອງ​ບໍ່​ເຄົາລົບ ແລະ  ບໍ່​ປະຕິບັດ​ຕາມ​ບັນດາ​ຫຼັກການ​ຂອງ​ກົດ​ບັດ ສປຊ ແລະ ກົດໝາຍ​ສາກົນ ພວມ​ນາບ​ຂູ່​ເຖິງ​ສັນຕິພາບ, ຄວາມ​ໝັ້ນຄົງ​ຂອງ​ແຕ່​ລະ​ປະເທດ, ພາກ​ພື້ນ ແລະ ສາກົນ​ຢ່າງ​ຮ້າຍ​ແຮງ, ພ້ອມ​ກັນ​ນັ້ນ ກໍ​ສົ່ງ​ໃຫ້ ສປຊ ຢືນ​ຢູ່​ຕໍ່ໜ້າ​ບັນດາ​ສິ່ງ​ທ້າ​ທາຍ​ຍາກ​ທີ່​ຈະ​ຜ່ານ​ຜ່າ​ໄປ​ໄດ້.
      ປັດຈຸບັນ, ໂລກ​ພວມ​ມີ​ການ​ປ່ຽນແປງ, ບັນດາ​ສິ່ງ​ທ້າ​ທາຍ​ມີ​ລັກສະນະ​ທົ່ວ​ໂລກ ນັບ​ມື້​ປະກົດ​ຕົວ​ຂຶ້ນ ແລະ ໄດ້​ສົ່ງ​ຜົນ​ກະທົບ​ຊຶ່ງ​ກັນ ແລະ ກັນ, ບໍ່​ມີ​ປະເທດ​ໃດ​ສາມາດ​ແກ້​ໄຂ​ພຽງ​ລໍາ​ພັງ​ຝ່າຍ​ດຽວ​ໄດ້. ໃນ​ສະພາບ​ການ​ດັ່ງກ່າວ, ກົດ​ບັດ ສປຊ ຍິ່ງ​ນັບ​ມື້​ນັບ​ມີ​ການ​ເສີມ​ຂະຫຍາຍ​ຄຸນ​ຄ່າ. ຈຳເປັນ​ຕ້ອງ​ມີ​ການ​ກະທຳ​ເພື່ອ​ໃຫ້ ສປຊ ກາຍເປັນ​ບ່ອນສ່ອງ​ແສງ​ຜົນ​ປະໂຫຍດ​ລວມ​ຂອງ​ທຸກໆ​ປະເທດ​ສະມາຊິກ, ຊຸກຍູ້​ລັດທິ​ຫຼາຍ​ຝ່າຍ ແລະ ການ​ພົວພັນ​ຮ່ວມ​ມື​ສະເໝີພາບ ອີງໃສ່​ກົດ​ບັດ ສປຊ ແລະ ກົດໝາຍ​ສາ​ກົນ. ນີ້​ແມ່ນ​ວິທີ​ໜຶ່ງ​ດຽວ​ເພື່ອ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ສາກົນ, ຊຸກຍູ້​ການ​ພັດທະນາ​ແບບ​ຍືນ​ຍົງ, ຕ້ານ​ການ​ປ່ຽນແປງ​ຂອງ​ດິນ​ຟ້າ​ອາກາດ, ແກ້​ໄຂ​ຜົນ​ຮ້າຍ​ຢ້ອນ​ຫຼັງ​ຈາກ​ສົງຄາມ, ການ​ຟື້ນ​ຟູ​ພາຍຫຼັງ​ເກີດ​ການ​ປະ​ທະ​ກັນ ເພື່ອ​ໂລກ​ແຫ່ງ​ສັນຕິພາບ, ມີ​ຄວາມ​ຍຸຕິ​ທຳ ແລະ ດີງາມ​ກວ່າ.
 ບັນດາ​ປະເທດ​ທີ່​ເປັນ​ເຈົ້າ​ການ ແລະ ສຳຄັນ​ທີ່​ສຸດ​ຂອງ​ການ​ພົວພັນ​ສາກົນ​ທັນ​ສະໄໝ, ມີ​ຄວາມ​ຮັບຜິດຊອບ​ແຖວ​ໜ້າ​ໃນ​ການ​ຊຸກຍູ້ ແລະ ຮັບປະກັນ​ການ​ເຄົາລົບ​ກົດ​ບັດ ສປຊ ແລະ ກົດໝາຍ​ສາກົນ​ໃນ​ທຸກ​ຂັ້ນ. ຫວຽດນາມ ກໍຖື​ວ່າ: ໃນ​ຖານະ​ແມ່ນ​ອົງການ​ກົດ​ບັດ ມອບ​ຄວາມ​ຮັບຜິດຊອບ​ຕົ້ນຕໍ​ໃນ​ການ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ສາກົນ, ສະພາ​ຄວາມ​ໝັ້ນຄົງ ແລະ ບັນດາ​ປະເທດ​ສະມາຊິກ​ຂອງ​ສະພາ​ຄວາມ​ໝັ້ນຄົງ ຕ້ອງ​ນຳ​ໜ້າ​ໃນ​ຄວາມ​ພະຍາຍາມ​ຮັບປະກັນ​ການ​ເຄົາລົບ​ບັນດາ​ທິດ​ນຳ, ຈຸດປະສົງ​ຂອງ​ກົດ​ບັດ.
      ທ່ານ ຟ້າ​ມ​ບິ່ງ​ມິງ ໄດ້ມີ 3 ຂໍ້​ສະ​ເໜີ​ສໍາ​ຄັນ​ຄື: ໜຶ່ງ; ບັນດາ​ປະເທດ​ຄວນ​ປັບປຸງ​ຄຳ​ໝັ້ນ​ສັນຍາ​ສຳລັບ​ລັດທິ​ຫຼາຍ​ຝ່າຍ ໂດຍ​ແມ່ນ ສປຊ ເປັນໃຈ​ກາງ, ປະເທດ​ຕ່າງໆ ຄວນ​ນຳ​ໃຊ້​ບັນ ດາ​ກົນ​ໄກ, ເຄື່ອງມື​ໂດຍ ສປຊ ໄດ້​ວາງ​ອອກ, ໂດຍສະເພາະ​ ແມ່ນ​ໃນ​ການ​ສະກັດ​ກັ້ນ​ການ​ປະ​ທະ​ກັນ ແລະ ແກ້​ໄຂ​ບັນດາ​ການ​ຂັດ​ແຍ້ງ​ສາກົນ​ໂດຍ​ສັນຕິ​ວິ​ທີ. ສອງ; ບັນດາ​ປະເທດ ຄວນ ພະຍາຍາມ​ຮ່ວມ​ມື ເພື່ອ​ແນໃສ່​ເພີ່ມ​ທະວີ​ປະສິດ​ທິ​ຜົນ ແລະ ບົດບາດ​ຂອງ​ບັນດາ​ອົງ ການ​ຈັດ​ຕັ້ງ​ພາກ​ພື້ນ​ຢ່າງ​ມີ​ປະສິດ​ທິ​ຜົນ, ພິເສດ​ແມ່ນ​ໃນ​ການ​ສົມທົບ​ກັບ ສປຊ ແລະ ສະພາ​ຄວາມ​ໝັ້ນຄົງ ສປຊ ເພື່ອ​ແນໃສ່​ຮັກສາ​ສັນຕິພາບ ແລະ ຄວາມ​ໝັ້ນຄົງ​ຢູ່​ແຕ່​ລະ​ພາກ​ພື້ນ​ໃນ​ໂລກ, ພ້ອມ​ກັນ​ນັ້ນ ປະກອບສ່ວນ​ຮັບປະກັນ​ສັນຕິພາບ, ຄວາມ​ໝັ້ນຄົງ​ສາ​ກົນ. ໃນ​ສະພາບ​ຕົວ​ຈິງ​ຢູ່​ພາກ​ພື້ນ​ອາຊີ​ຕາເວັນ​ອອກ​ສ່ຽງ​ໃຕ້ ໄດ້​ຊີ້​ໃຫ້​ເຫັນ​ວ່າ: ປະຊາ​ຄົມ​ອາ​ຊຽນ ດ້ວຍ​ກອບ​ນິຕິ​ກຳ​ແມ່ນ​ກົດ​ບັດ​ອາ​ຊຽນ, ໄດ້​ນໍາ​ເອົາ​ແນວ​ຄວາມ​ຄິດ ແລະ ອາລົມ​ຈິດ​ຈາກ​ກົດ​ບັດ​ສະຫະ​ປະຊາຊາດ, ໄດ້​ກາຍເປັນ​ປະຊາ​ຄົມ​ມີ​ຄວາມ​ສະໜິດ​ຕິດ​ພັນ, ເປີດ​ກວ້າງ​ການ​ຮ່ວມ​ມື, ຢືນຢັນ​ທີ່​ຕັ້ງ​ໃນ​ໂຄງ​ປະກອບ​ຄວາມ​ໝັ້ນຄົງ​ພາກ​ພື້ນ ກໍ​ຄື​ບົດບາດ​ເປັນໃຈ​ກາງ​ໃນ​ການ​ແກ້​ໄຂ​ບັນດາ​ບັນຫາ​ຂອງ​ພາກ​ພື້ນ, ຮັກສາ​ສັນຕິພາບ, ຄວາມ​ໝັ້ນຄົງ, ສະຖຽນ​ລະ​ພາບ​ຂອງ​ພາກ​ພື້ນ ແລະ ສາ​ກົນ. ສາມ; ບັນດາ​ປະເທດ​ຄວນ​ຮັບປະກັນ​ການ​ເຄົາລົບ​ບັນດາ​ຫຼັກການ​ພື້ນຖານ​ຂອງ​ກົດໝາຍ​ສາກົນ ແລະ ກົດ​ບັດ ສປຊ ແລະ ຮັບປະກັນ​ການ​ວາງ​ແຜນ​ກຳນົດ ແລະ ຜັນ​ຂະຫຍາຍ​ບັນດາ​ຍຸດທະສາດ, ນະໂຍບາຍ​ພັດທະນາ, ຄວາມ​ໝັ້ນຄົງ, ການ​ປ້ອງ​ກັນ​ຊາດ ແລະ ການ​ຕ່າງປະເທດ ຕ້ອງ​ເໝາະ​ສົມ​ກັບ​ບັນດາ​ພື້ນຖານ, ຫຼັກການ​ພື້ນຖານ​ຂອງ​ກົດໝາຍ​ສາກົນ ແລະ ກົດ​ບັດ​ສະຫະ​ປະຊາຊາດ, ຈາກ​ນັ້ນ​ສ້າງ​ເປັນ​ວັດທະນະທຳ​ເຄົາລົບ ແລະ ປະຕິບັດ​ຕາມ​ກົດ​ບັດ​ສະຫະ​ປະຊາ​ຊາດ. ນີ້​ແມ່ນ​ວິທີ​ໜຶ່ງ​ດຽວ ເພື່ອ​ສ້າງ​ພື້ນຖານ​ສັນຕິພາບ​ແບບ​ຍືນ​ຍົງ.
      ໂດຍ​ມີ​ສະຕິ​ຮັບ​ຮູ້​ບັນດາ​ຄຸນຄ່າ​ຂອງ​ກົດ​ບັດ ສປຊ, ຫວຽດນາມ ສະໜັບສະໜູນ​ບັນດາ​ທິດ​ນຳ, ຈຸດປະສົງ​ຂອງ ສປຊ ຢ່າງ​ແຮງ​ໂດຍ​ເນັ້ນ​ວ່າ: ຈະ​ປະຕິບັດ​ຕາມ​ບັນດາ​ຫຼັກການ​ພື້ນຖານ​ຂອງ​ກົດ​ບັດ ສປຊ ໂດຍ ​ແມ່ນ​ປະເທດ​ໄດ້​ຜ່ານ​ຄວາມ ​ເສຍ​ຫາຍ, ເຈັບ​ປວດຈາກ​ສົງ ຄາມ ແລະ ພວມ​ພະ​ຍາມ​ປ່ຽນ ແປງ​ໃໝ່, ພັດທະນາ, ເຊື່ອມ​ໂຍງ​ເຂົ້າ​ກັບ​ສາ​ກົນ. ຫວຽດນາມ ມີ​ຄວາມ​ເຂົ້າໃຈ​ຢ່າງ​ເລິກເຊິ່ງ​ກ່ຽວ​ກັບ​ຄຸນຄ່າ ແລະ ຄວາມ​ໝາຍ​ຂອງ​ການ​ປະຕິບັດ​ກົດ​ບັດ ສປຊ, ຖື​ນັ້ນ​ແມ່ນ​ວິທີ​ສຳຄັນ​ແຖວໜ້າ ເພື່ອ​ເສີມ​ສ້າງ​ພື້ນຖານ​ສັນຕິພາບ​ແບບ​ຍືນ​ຍົງ, ນຳ​ມາ​ຊຶ່ງ​ຄວາມ​ວັດທະນາ​ຖາວອນ​ໃຫ້​ແກ່​ມວນ​ມະນຸດ ແລະ ສ້າງ​ຄວາມ​ເປັນ​ລະບຽບ​ຮຽບຮ້ອຍ​ຂອງ​ໂລກ ໂດຍ​ອີງໃສ່​ກົດໝາຍ​ກັບ​ບັນດາ​ການ​ພົວພັນ​ສາກົນ ທີ່​ມີ​ຄວາມ​ຍຸຕິ​ທຳ, ສະເໝີ​ພາບ ແລະ ມິດຕະພາບ ລະຫວ່າງ ບັນດາ​ປະ​ເທດ.
ໃນ​ຖານະ​ກຳມະການ​ບໍ່​ຖາວອນ​ສະພາ​ຄວາມ​ໝັ້ນຄົງ ສປຊ, ແມ່ນ​ສະມາຊິກ​ທີ່​ຕັ້ງໜ້າ ແລະ ມີ​ຄວາມ​ຮັບ​ຜິດ​ຊອບ​ຂອງ ສປຊ ບົນ​ຈິດໃຈ “ຄູ່​ຮ່ວມມື​ ເພື່ອ​ສັນຕິພາບ​ແບບ​ຍືນ​ຍົງ”, ຫວຽດນາມ ຈະ​ພະຍາຍາມ​ປະ ກອບສ່ວນ​ເຂົ້າ​ໃນ​ບັນດາການ ເຄື່ອນໄຫວຂອງ ສປຊ ແລະ ປະຊາ​ຄົມ​ສາກົນ ໃນ​ການ​ຮັບ ປະກັນ​ການ​ປະຕິບັດ​ບັນດາ​ທິດ​ນຳ, ຈຸດປະສົງ​ຂອງ​ກົດບັດ​ ຢ່າງ​ມີ​ປະສິດ​ທິ​ຜົນ, ເພື່ອ​ສັນຕິພາບ, ຄວາມ​ໝັ້ນຄົງ ແລະ ການ​ພັດ ທະນາ​ແບບ​ຍືນ​ຍົງ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110