ໃນວັນທີ 27 ພຶດສະພາຜ່ານມາ ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມຄະນະ ໄດ້ລົງຢ້ຽມຢາມ ແລະ ໃຫ້ກໍາລັງໃຈພະນັກງານທີ່ປະຈໍາການ ຢູ່ຈຸດກວດຄັດກອງຄົນເຂົ້າ-ອອກແຂວງ ເພື່ອປ້ອງກັນພະຍາດໂຄວິດ-19 ຈຸດຂົວເຊນໍ້ານ້ອຍ (ເຂດເຊື່ອມຕໍ່ລະຫວ່າງແຂວງອັດຕະປື-ແຂວງເຊກອງ),  ຈຸດຫຼັກ 56 (ເຂດເຊື່ອມຕໍ່ລະຫວ່າງແຂວງອັດຕະປື - ແຂວງຈໍາປາສັກ) ແລະ ຢ້ຽມຢາມໃຫ້ກໍາລັງໃຈພະນັກງານທີ່ປະຈໍາການຢູ່ສູນກັກກັນໂຮງຮຽນປະຖົມເຊກອງ ເມືອງສາມັກຄີໄຊ ແຂວງອັດຕະປື.

      ໃນການລົງແຕ່ລະຈຸດ ທ່ານເຈົ້າແຂວງ ພ້ອມຄະນະ ກໍໄດ້ຮັບຟັງການລາຍງານຫຍໍ້ ກ່ຽວກັບສະພາບການປະຕິບັດໜ້າທີ່ຂອງພະນັກງານໃນໄລຍະຜ່ານມາ ເປັນຕົ້ນ ຂໍ້ສະດວກ, ຂໍ້ຫຍຸ້ງຍາກ ແລະ ບັນດາຂໍ້ສະເໜີຕ່າງໆຕໍ່ການຈັດຕັ້ງຂັ້ນເທິງ. ພ້ອມກັນນີ້ທ່ານຍັງໄດ້ມີຄໍາເຫັນໂອ້ລົມ ແລະ ຊີ້ນໍາ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄວາມເອົາໃຈໃສ່ປະຕິບັດໜ້າທີ່ວຽກງານທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ ເພື່ອຊ່ວຍກັນສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19 ໃຫ້ມີໄຊ. ພ້ອມກັນນັ້ນ ກໍໃຫ້ສືບຕໍ່ປະຕິບັດບັນດາມາດຕະການຕ່າງໆ ກ່ຽວກັບການເພີ່ມທະວີມາດຕະການສະກັດກັ້ນ, ຄວບຄຸມ ແລະ ຕ້ານພະຍາດໂຄວິດ-19 ຢ່າງເຂັ້ມງວດ ເພື່ອບໍ່ໃຫ້ພະຍາດດັ່ງກ່າວ ລະບາດຢູ່ໃນແຂວງພວກເຮົາ. (ຂ່າວ-ພາບ: ໂບ້ ນັກຂ່າວຫ້ອງວ່າການແຂວງອັດຕະປື)