ຫົວ​ຂໍ້ : ລັດຖະມົນຕີກະຊວງການຕ່າງປະເທດ ຕ້ອນຮັບທູດຕີມໍເລສເຕ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 24/01/2020 08:57:26 ຈຳ​ນວນ​ຜູ້​ເຂົ້າ​ຢ້ຽມ​ຊົມ 753 ຄັ້ງ

      ໃນ​ວັນ​ທີ 23 ມັງກອນນີ້ ທີ່ໂຮງແຮມລາວ​ພ​ລາຊາ, ທ່ານ ສະເຫຼີມ​ໄຊ ກົມ​ມະ​ສິດ  ລັດຖະມົນຕີ​ກະຊວງ​ການ​ຕ່າງປະເທດ ແຫ່ງ ສປປ ລາວ ໄດ້​ຕ້ອນຮັບ​ການ​ເຂົ້າ​ຢ້ຽມ​ອຳ​ລາ​ຂອງ​ທ່ານ ນາງ ມາ​ເຣຍ ນາ​ຕາ​ເຣຍ ກຸ​ເຕີ​ເຣສ ວີ​ກັສ ຄາ​ລາ​ສ​ກາ​ລາວ (MariaNatalia Gutterres Viegas Carrascalao) ເອກ​ອັກ​ຄະ​ລັດ​ຖະ ທູດ ແຫ່ງ ສາທາລະນະ​ລັດ ປະຊາທິປະໄຕ ຕີ​ມໍ​-​ເລ​ສ​ເຕ ປະຈຳ ສປປ ລາວ, ໃນ​ໂອກາດ​ທີ່​ສຳເລັດ​ໜ້າທີ່​ການ​ທູດ​ ຢູ່  ສປປ ລາວ.
      ໃນ​ໂອກາດ​ນີ້, ທ່ານ​ລັດ ຖະມົນຕີ ໄດ້​ສະແດງ​ຄວາມ​ຊົມເຊີຍ​ແລະ ຕີ​ລາຄາ​ສູງ ຕໍ່​ຜົນສຳເລັດ​ໃນ​ການ​ປະຕິບັດ​ໜ້າທີ່​ຂອງ​ທ່ານ​ທູດ​ຕະຫຼອດ​ໄລຍະ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ  ຊຶ່ງ​ເປັນ​ການ​ປະກອບສ່ວນ​ອັນ​ສໍາ​ຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ລະຫວ່າງ​ສອງ​ປະເທດ ກໍ​ຄື​ປະຊາຊົນ​ສອງ​ຊາດ​ໃຫ້​ມີ​ຄວາມ​ແໜ້ນ​ແຟ້ນ​ຍິ່ງໆ​ຂຶ້ນ. ພ້ອມ​ນີ້, ທ່ານ​ລັດຖະມົນຕີ ກໍ​ໄດ້​ສະແດງ​ຄວາມ​ຂອບໃຈ​ມາຍັງ ​ລັດຖະບານ ແລະ ປະຊາຊົນ ຕີ​ມໍ​-​ເລ​ສ​ເຕ​ ທີ່​ໄດ້​ໃຫ້ການ​ຊ່ວຍເຫຼືອ ສປປ ລາວ ໃນ​ໄລຍະ​ຜ່ານ​ມາ ໂດຍ​ສະເພາະ ຕໍ່​ເຫດການ​ໄພພິບັດ​ທາງ​ທຳ​ມະ​ຊາດ​ຢູ່​ແຂວງ​ອັດ​ຕະ​ປື​ໃນ​ປີ 2018  ຊຶ່ງ​ໄດ້​ໃຫ້ການ​ຊ່ວຍເຫຼືອ​ເປັນ​ເງິນ ຈໍາ​ນວນ 750.000 ໂດ​ລາ.
      ໃນ​ຕອນ​ທ້າຍ, ທ່ານ​ລັດຖະມົນຕີ​ໄດ້​ອວຍພອນ​ໃຫ້​ທ່ານ​ທູດ ປະສົບ​ຜົນ​ສໍາ​ເລັດ​ໃນ​ການ​ປະຕິບັດ​ໜ້າທີ່​ອັນ​ໃໝ່ ແລະ​ເດີນທາງ​ກັບ​ຄືນ​ປະເທດ​ດ້ວຍ​ຄວາມ​ສະຫວັດດີ​ພາບ.ໃນ​ຂະນະ​ດຽວ​ກັນ, ທ່ານ​ທູດກໍ​ໄດ້​ສະແດງ​ຄວາມ​ຂອບໃຈ​ເປັນ​ຢ່າງ​ສູງ​ມາ​ຍັງ​ລັດຖະບານ ແລະ ປະຊາຊົນ​ລາວ ກໍ​ຄື​ກະຊວງ​ການ​ຕ່າງປະເທດ ແຫ່ງ ສປປ ລາວ ທີ່​ໄດ້​ໃຫ້ການ​ຮ່ວມ​ມື, ສະໜັບສະໜູນ​ຊ່ວຍເຫຼືອ​ແລະ ອໍາ​ນວຍ​ຄວາມ​ສະດວກ​ເປັນ​ຢ່າງ​ດີ ຕະຫຼອດ​ໄລຍະ​ການ​ປະຕິບັດ​ໜ້າທີ່​ການ​ທູດ ຢູ່ ສປປ​ລາວ ໃນ​ຄັ້ງ​ນີ້ ຈົນ​ໄດ້​ຮັບ​ຜົນ​ສໍາ​ເລັດ​ອັນ​ຈົບງາມ ແລະ ຈະ​ສືບຕໍ່ ໃຫ້ການ​ຮ່ວມ​ມື​ໃນ​ທຸກ​ດ້ານ ເພື່ອ​ປະກອບສ່ວນ​ເຂົ້າ​ໃນ​ການ​ຮັດ​ແໜ້ນ​ແລະ ເສີມ​ຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື ລະຫວ່າງ​ສອງ​ປະເທດ ຕີ​ມໍ​-​ເລ​ສ​ເຕ- ສປປ ລາວ ໃຫ້​ຈະເລີນ​ງອກ​ງາມ​ຍິ່ງໆ​ຂຶ້ນ. 
(ຂ່າວ+ພາບ: ກົມ​ການ​ຂ່າວກະ​ຊວງ​ການ​ຕ່າງ​ປະ​ເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110