ຮຽບຮຽງ: ລຸ້ງ​ດາວ ບຸນ​ມີ 
(ເນື່ອງ​ໃນ​ໂອກາດ​ວັນຊາດ​ອິນ​ເດຍ 26/1/1788-26/1/2020)

     ອິນ​ເດຍ ເປັນ​ອີກ​ປະເທດ​ໜຶ່ງ ທີ່​ກຳລັງ​ປະສົບ​ກັບ​ສະພາບ​ເສດຖະກິດ​ບໍ່​ຂະຫຍາຍຕົວ​ຢ່າງ​ຕໍ່​ເນື່ອງ ໂດຍ​ອັດຕາ​ການ​ເຕີບ​ໂຕ​ໃນ​ໄຕ​ມາດ​ທີ 2 ຂອງ​ປີ 2019 ຢູ່​ທີ່ 5,0% ເຕີບ​ໂຕ​ຕໍ່າ​ທີ່​ສຸດ​ໃນ​ຮອບ 6 ປີ. ໃນ​ຂະນະ​ທີ່​ອັດຕາ​ວ່າງ​ງານ​ຂະຫຍາຍຕົວ​ສູງ​ສຸດ​ໃນ​ຮອບ 45 ປີ, ສົ່ງ​ຜົນ​ໃຫ້​ລັດຖະບານ​ຊອກ​ຫາ​ມາດ​ຕະການ​ກະ​ຕຸ້ນ​ເສດຖະກິດ ໜຶ່ງ​ໃນ​ນັ້ນ ແມ່ນ​ການ​ອາ​ໄສ​ຄວາມ​ສາມາດ​ໃນ​ການ​ແຂ່ງຂັນ​ຂອງ​ພາກ​ເອກະ​ຊົນ ໂດຍ​ການ​ຫຼຸດ​ອັດຕາ​ພາ​ສີ.
     ສໍາ​ນັກ​ຂ່າວສານ​ບີ​ບີ​ຊີ ລາຍ​ງານ​ວ່າ: ທ່ານ ນິ​ມາລາ ສີ​ທາ​ຣາ​ມານ ລັດຖະມົນຕີ​ກະຊວງ​ການ​ເງິນ​ຂອງ​ອິນ​ເດຍ ປະກາດ​ຫຼຸດ​ອັດຕາ​ພາສີ​ລາຍ​ໄດ້​ນິຕິບຸກຄົນ​ຈາກ 30% ລົງ​ມາ 22% ແລະ ເມື່ອ​ລວມ​ພາສີ​ອື່ນໆ ເຮັດ​ໃຫ້​ພາກ​ທຸລະ​ກິດ​ຈະ​ຕ້ອງ​ເສຍ​ພາສີ 25,2% ຈາກ​ເມື່ອ​ກ່ອນ​ຕ້ອງ​ເສຍ 34,9% ໂດຍ​ຈະ​ເລີ່ມ​ມີ​ຜົນ​ບັງຄັບ​ໃຊ້​ໃນ​ປີ​ງົບປະມານ 2019 ຊຶ່ງ​ເລີ່ມ​ໃນ​ວັນ​ທີ 1 ເມສາ​ທີ່​ຜ່ານ​ມາ.  ສຳລັບ​ອຸດ​ສາຫະ​ກຳ ການ​ຜະລິດ​ທີ່​ລົງທຶນ ແລະ ຈົດ​ທະບຽນ​ໃໝ່ ຫຼັງ​ຈາກ​ວັນ​ທີ 1 ຕຸລາ​ທີ່​ຜ່ານ​ມາ ຈະ​ໄດ້​ຮັບ​ສິດທິ​ພິເສດ​ດ້ານ​ພາສີ 17%, ມີ​ເງື່ອນໄຂ​ຕ້ອງ​ເລີ່ມ​ດຳເນີນ​ຜະລິດ​ພາຍ​ໃນ​ເດືອນ​ມີນາ ປີ 2023. ມາດ​ຕະການ​ປັບ​ຫຼຸດ​ອັດຕາ​ພາສີ​ດັ່ງກ່າວ ເປັນ​ສ່ວນ​ໜຶ່ງ​ຂອງ​ແຜນການ​ກະ​ຕຸ້ນ​ເສດຖະກິດ​ພາຍ​ໃນ​ປະເທດ​ຂອງ​ນາຍົກລັດຖະມົນຕີ ທ່ານ ນາ​ເຣນ​ດຣາ ໂມ​ດີ ທີ່​ເອີ້ນ​ວ່າ; “ແຜນການ Make in India” ໂດຍ​ເນັ້ນ​ໃສ່​ການ​ດຶງ​ດູດ​ນັກ​ລົງທຶນ​ຈາກ​ພາຍ​ນອກ. ການ​ປັບ​ຫຼຸດ​ອັດຕາ​ພາສີ​ນິຕິ​ບຸກຄົນ ຖື​ເປັນ​ບາດກ້າວ​ປະຫວັດສາດ ຊຶ່ງ​ຈະ​ມີ​ຜົນ​ດີ​ຢ່າງ​ຫຼວງຫຼາຍ​ຕໍ່​ແຜນການ  Make In India ໃນ​ການ​ດຶງ​ດູດ​ນັກ​ລົງທຶນ​ຈາກ​ພາກ​ເອກະ​ຊົນ​ທົ່ວ​ໂລກ ເພີ່ມ​ຄວາມ​ສາມາດ​ໃນ​ການ​ແຂ່ງຂັນ​ຂອງ​ພາກ​ເອກະ​ຊົນ, ສ້າງ​ຕຳແໜ່ງ​ງານ ແລະ ສ້າງ​ຜົນ​ປະໂຫຍດ​ໃຫ້​ກັບ​ປະຊາຊົນ​ອິນ​ເດຍ 1.300 ລ້ານ​ຄົນ, ທ່ານ ໂມ​ດີ ກ່າວ​ໃນ Twitter ສ່ວນ​ຕົວ.
ໃນ​ຂະນະ​ທີ່​ຂ່າວສານ​ຣອຍ​ເຕີ ລາຍ​ງານ​ວ່າ: ການ​ເດີນທາງ​ຢ້ຽມຢາມ​ອາ​ເມ​ຣິ​ກາ ຄັ້ງ​ຫຼ້າ​ສຸດ​ຂອງ ທ່ານ ໂມ​ດີ ໄດ້​ພົບ​ປະ​ກັບ​ຊາວ​ອາ​ເມ​ຣິ​ກາ ເຊື້ອສາຍ​ອິນ​ເດຍ ລວມ​ເຖິງ​ນັກທຸລະກິດ​ເອກະ​ຊົນ​ລາຍ​ໃຫຍ່​ຂອງ​ອາ​ເມ​ຣິ​ກາ​ເຊັ່ນ: JP Morgan Chase  ຜູ້​ໃຫ້​ບໍລິການ​ດ້ານ​ການ​ເງິນ ແລະ ການ​ລົງທຶນ, Lockheed Martin, ຜູ້​ຜະລິດ​ເຮືອບິນ​ອະ​ວະ​ກາດ ແລະ ການ​ປ້ອງ​ກັນ​ປະເທດ, MasterCard ບໍລິສັດ​ໃຫ້​ບໍລິການ​ລະບົບ​ຊຳລະ​ເງິນ ແລະ Walmart  ບໍລິສັດລາຍ ​ໃຫຍ່​ຂາຍຍ່ອຍ ໂດຍ​ໄດ້​ສົນທະ ນາ​ແລກປ່ຽນ​ເພື່ອ​ເພີ່ມ​ໂອກາດ​ໃນ​ການ​ລົງທຶນ​ໃນ​ອິນ​ເດ​ຍ.
     ທ່ານ ມູ​ເກສ ອາ​ຄິ ປະທານກອງ​ປະຊຸມ​ຫຸ້ນ​ສ່ວນ​ຍຸດທະສາດ ອາ​ເມ​ຣິ​ກາ - ອິນ​ເດຍ ລະບຸ​ວ່າ: ການ​ຫຼຸດ​ພາສີ​ຄັ້ງ​ນີ້ ຈະ​ເຮັດ​ໃຫ້​ບໍລິສັດ​ຂອງ​ອິນ​ເດຍ ມີ​ຄວາມ​ສາມາດ​ໃນ​ການ​ແຂ່ງຂັນ​ລະດັບ​ໂລກ. ຂະນະ​ດຽວ​ກັນ​ກໍ​ເຮັດ​ໃຫ້ ອິນ​ເດຍ ກາຍເປັນ​ທາງ​ເລືອກ​ທີ່​ໜ້າ​ສົນໃຈ​ໃຫ້​ກັບ​ບໍລິສັດ​ຕ່າງ ປະເທດ ໄດ້​ເຂົ້າ​ມາ​ຂະຫຍາຍ​ຖານ​ການ​ຜະລິດ​ໃນ​ອິນ​ເດ​ຍ​ຫຼາຍ​ຂຶ້ນ. ອັດຕາ​ພາສີ​ທີ່​ຕໍ່າ​ລົງ​ຈະ​ເຮັດ​ໃຫ້​ອິນ​ເດຍ ມີ​ຄວາມ​ສາມາດ​ໃນ​ການ​ແຂ່ງຂັນ​ສູງ​ກວ່າ​ປະເທດ​ເພື່ອນ​ບ້ານ​ເຊັ່ນ: ບັງ​ກລາ​ເດັດ ແລະ ອາດ​ກ້າວ​ຂຶ້ນ​ມາ​ເປັນ​ທາງ​ເລືອກ​ທີ່​ດີ​ ທຽບ​ເທົ່າ​ກັບ​ຫວຽດນາມ ແລະ ໄທ. ສຳລັບ​ນັກທຸລະກິດ​ຕ່າງ​ຊາດ ທີ່​ຕ້ອງການ​ຫາ​ສະຖານ ທີ່​ການ​ຜະລິດ​ແຫ່ງ​ໃໝ່ ເພື່ອ​ຫຼີກ​ລ່ຽງ​ຜົນ​ກະທົບ​ຈາກ​ສົງຄາມ​ການ​ຄ້າ ລະຫວ່າງ ຈີນ ກັບ ອາ​ເມ​ຣິ​ກາ.
     ນອກຈາກ​ນັ້ນ, ຄວາມ​ສຳພັນ​ທີ່​ດີ ລະຫວ່າງ ອາ​ເມ​ຣິ​ກາ ແລະ ອິນ​ເດຍ ສະແດງ​ໃຫ້​ເຫັນ​ໃນ​ການ​ພົບ​ປະ ລະຫວ່າງ ທ່ານ ໂດ​ໂນ ທຣຳ ປະທານາທິບໍດີ ອາ​ເມ​ຣິ​ກາ ກັບ ທ່ານ ໂມ​ດີ ນາຍົກລັດຖະມົນຕີ ອິນ​ເດຍ ທີ່​ເມືອງ​ຮີ​ວສ​ຕັນ​ປະເທດ​ອາ​ເມ​ຣິ​ກາ ຍັງ​ຊ່ວຍ​ໃຫ້​ບໍລິສັດ​ຕ່າງ​ຊາດ​ເຫັນ​ໂອກາດ​ການ​ລົງທຶນ​ໃນ ອິນ​ເດ​ຍ​ຫຼາຍ​ຂຶ້ນ. 
     ສປປ ລາວ ແລະ ສາທາ ລະນະ​ລັດ ອິນ​ເດຍ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 2 ກຸມພາ ປີ 1956.