ວັນທີ 14 ມິຖຸນານີ້ ທີ່ສະໂມສອນໃຫຍ່ຂອງແຂວງຄຳມ່ວນ ໄດ້ຈັດກອງປະຊຸມຜັນຂະຫຍາຍເນື້ອໃນຈິດໃຈກອງປະຊຸມວຽກງານກວດກາທົ່ວປະເທດ 5 ປີ (2016-2020) ແລະ ປະຈໍາປີ 2020  ແລະ ສະຫຼຸບວຽກງານກວດກາທົ່ວແຂວງຄຳມ່ວນ  5 ປີ ແລະ ປະຈຳປີ 2020 ຂຶ້ນຢ່າງ​ເປັນ​ທາງ​ການ ໂດຍການເປັນກຽດເຂົ້າຮ່ວມຂອງ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ ມີບັນດາຮອງເລຂາ, ​ຄະນະ​ປະ​ຈໍາ​ພັກ​ແຂວງ, ກຳມະການ​ພັກ​ແຂວງ, ອົງການອ້ອມຂ້າງ, ​ປະທານຄະນະ​ກວດກາ​ພັກເມືອງ - ອົງການກວດກາລັດເມືອງ, ບັນດາສະຫາຍຮອງຄະນະກວດກາພັກແຂວງ - ອົງການກວດກາລັດແຂວງ ແລະ ບັນດາສະຫາຍພະນັກງານກວດກາອາຊີບໃນທົ່ວແຂວງເຂົ້າຮ່ວມ.

ພາຍຫຼັງເຈົ້າແຂວງຄຳມ່ວນໄດ້ກ່າວເປີດກອງປະຊຸມ, ສະຫາຍ ສີສຸກ ພິມມະສອນ ຮອງປະທານຄະນະກວດກາພັກແຂວງ ໄດ້ຂຶ້ນຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານຕິດຕາມກວດກາ ປະຈຳປີ 2020 ແລະ 5 ປີ (2016 – 2020) ແລະ ທິດທາງແຜນການປີ 2021 ຂອງຄະນະກວດກາພັກແຂວງ, ອົງການກວດກາລັດແຂວງ ຊຶ່ງໃນໄລຍະໜຶ່ງປີ ແລະ 5 ປີທີ່ຜ່ານມາຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນ ໄດ້ພ້ອມກັນຕັ້ງໜ້າບຸກບືນ ປະຕິບັດວຽກງານດ້ວຍຄວາມຮັບຜິດຊອບສູງ, ຖືສຳຄັນ ແລະ ເອົາໃຈໃສ່ຕິດຕາມ - ກວດກາເປົ້າໝາຍຕ່າງໆ, ຕັ້ງໜ້າສະກັດກັ້ນ ແລະ ແກ້ໄຂການສໍ້ລາດບັງຫຼວງ, ຄົ້ນຄວ້າ, ເຊື່ອມຊຶມນິຕິກຳຕ່າງໆ ກ່ຽວກັບວຽກງານກວດກາ, ໄດ້ພະຍາຍາມເອົາໃຈໃສ່ປັບປຸງການຈັດຕັ້ງ ແລະ ບຳລຸງກໍ່ສ້າງພະນັກງານກວດກາແຕ່ລະຂັ້ນ ສາມາດປະຕິບັດພາລະບົດບາດ ແລະ ໜ້າທີ່ຂອງຕົນດີຂຶ້ນເທື່ອລະກ້າວ. ສະເພາະປີ 2020 ດ້ານການກວດກາລັດ ແລະ ຕິດຕາມການຈັດຕັ້ງປະຕິບັດຜົນການກວດກາ ໄດ້ທັງໝົດ 117 ເປົ້າໝາຍ, ໃນນີ້ກວດກາບໍລິຫານລັດ 1 ເປົ້າໝາຍ, ກວດກາບັນດາໂຄງການລົງທຶນຂອງລັດທີ່ມີມູນຄ່າ 10 ຕື້ຂຶ້ນໄປຈຳນວນ 29 ໂຄງການ ແລະ 10 ຕື້ລົງມາ 20 ໂຄງການ, ສືບຕໍ່ຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີ 13 ໂຄງການ, ສືບຕໍ່ຕິດຕາມຜົນການກວດສອບ 54 ໂຄງການ, ຜ່ານການກວດກາບັນດາເປົ້າໝາຍດັ່ງກ່າວພົບຜົນເສຍຫາຍທັງໝົດ 170,43 ຕື້ກີບ, ໃນນີ້ໄດ້ຫັກລົບມູນຄ່າໂຄງການຈຳນວນ 115,33 ຕື້ກີບ ແລະ ຫັກລົບຈາກມູນຄ່າຂອງສັນຍາຈໍານວນ 54,87 ຕື້ກີບ. ໄດ້ສືບຕໍ່ປະຕິບັດຕາມດຳລັດວ່າດ້ວຍການແຈ້ງຊັບສິນ ແລະ ລາຍຮັບຂອງພະນັກງານ. ດ້ານວຽກງານຄົ້ນຄວ້າຄຳຮ້ອງ - ຄໍາສະເໜີໄດ້ທັງໝົດ 9 ສະບັບ. ນອກຈາກນີ້ຜູ້ເຂົ້າຮ່ວມກອງປະຊຸມຍັງໄດ້ຮັບຟັງບົດສະຫຼຸບຫຍໍ້ວຽກງານກວດກາທົ່ວປະເທດປະຈຳປີ 2020 ແລະ 5 ປີ ຂອງຄະນະກວດກາສູນກາງ   ພັກ, ອົງການກວດກາລັດຖະບານ, ບົດໂອ້ລົມຂອງ ສະຫາຍ ບຸນທອງ ຈິດມະນີ  ຕໍ່ກອງປະຊຸມວຽກງານກວດກາທົ່ວປະເທດ ປະຈຳປີ 2020 ແລະ 5 ປີ (2016 – 2020) ຊຶ່ງອ່ານຜ່ານໂດຍ ສະຫາຍ ຄຳສອນ ອ້ວນທະວີ ຄະນະປະຈຳພັກແຂວງ ປະທານຄະນະກວດກາພັກແຂວງ ປະທານອົງການກວດກາລັດແຂວງ, ພ້ອມນັ້ນຜູ້ແທນກອງປະຊຸມຈາກບັນດາພະແນກການໄດ້ຜັດປ່ຽນກັນຂຶ້ນປະກອບຄຳຄິດ - ຄຳເຫັນປຶກສາຫາລື ຕາມການເຈາະຈີ້ມຂອງປະທານກອງປະຊຸມ ເພື່ອຄວາມເປັນເອກະພາບຕໍ່ທິດທາງແຜນການວຽກງານ​ກວດກາ​ ປີ 2021 ແລະ ບັນຫາລວມ ໃນ 5 ປີຕໍ່ໜ້າ ແນໃສ່ເຮັດໃຫ້ວຽກງານຕິດຕາມ-ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃຫ້ມີການຫັນປ່ຽນຢ່າງແຂງແຮງ ແລະ ດີຂຶ້ນກວ່າເກົ່າ.

ໂອກາດກ່າວ​ເປີດກອງປະຊຸມ ສະຫາຍ ວັນໄຊ ພອງສະຫວັນ ຍັງໄດ້ຮຽກຮ້ອງ​ໃຫ້ຜູ້​ແທນ​ກອງ​ປະຊຸມ ຈົ່ງ​ພ້ອມ​ກັນ​ຍົກ​ສູງ​ຄວາມ​ຮັບຜິດຊອບ, ສຸມ​ສະຕິ​ປັນຍາ​ຂອງ​ຕົນ​ຄົ້ນຄວ້າ​ປະກອບ​ຄຳຄິດ - ຄຳ​ເຫັນ​ຢ່າງ​ກົງໄປກົງມາ, ພາວະ​ວິ​ໄສ, ຖືກຕ້ອງ ແລະ ສ່ອງ​ແສງ​ເຖິງ​ຄວາມ​ເປັນ​ຈິງ. ພ້ອມທັງຄົ້ນຄວ້າ ຊອກໃຫ້ເຫັນສາເຫດທີ່ພາໃຫ້ມີດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ພ້ອມ​ກັນ​ຄົ້ນຄວ້າໃຫ້ເປັນເອກະພາບກ່ຽວກັບທິດທາງ ແລະ ວິທີ​ການ​ແກ້​ໄຂ​ບັນຫາ​ຕ່າງໆ ​ໃນຕໍ່ໜ້າໃຫ້​ຖືກຕ້ອງ, ​ແທດ​ເໝາະ​ກັບ​ຕົວ​ຈິງດ້ວຍ​ຄວາມ​ຮັບຜິດ​ຊອບ​ສູງ, ​ເຮັດ​ໃຫ້​ກອງປະຊຸມ​ໃນ​ຄັ້ງນີ້ດຳ​ເນີນ​ໄປ​ດ້ວຍ​ບັນຍາ ກາດອັນ​ດີ ​ແລະ ມີ​ຜົນ​ສໍາ​ເລັດ​ຢ່າງ​ຈົບ​ງາມ. ຊຶ່ງກອງປະຊຸມດັ່ງກ່າວຈະໄດ້ດໍາເນີນໄປ 1 ວັັນເຄິ່ງ, ນັບແຕ່ວັນທີ 14 – 15 ມິຖຸນາ ຈຶ່ງສຳເລັດ. (ຂ່າວ-ພາບ: ມະນີວັນ)