ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍຄະນະໄດ້ລົງເຄື່ອນ ໄຫວຢ້ຽມຢາມ ແລະ ຊຸກຍູ້ວຽກງານຢູ່ໂຮງງານຕັດ ຫຍິບທຣີໂອ ຢູ່ບ້ານສີເກີດ ເມືອງນາຊາຍທອງ ແລະ ໂຮງງານຕັດຫຍິບຕຣີມາກ ຢູ່ບ້ານນາແຮ່ ເມືອງສີໂຄດຕະບອງ ນະຄອນຫຼວງວຽງຈັນ ໃນ​ວັນ​ທີ 16 ມິ​ຖຸ​ນາ 2021.

ທ່ານ  ຊົມພູ ອຸດົມພອນ ຕາງໜ້າອຳນວຍການບໍລິສັດທຣີໂອ (ລາວ) ເອັກສປອດ ຈຳກັດລາຍ​ງານວ່າ: ບໍລິສັດທຣີໂອ​ (ລາວ) ເອັກສປອດ ຈຳກັດ ໄດ້ຮັບການສ້າງຕັ້ງຂຶ້ນໃນປີ 1995 ເປັນການລົງທຶນຂອງຕ່າງໆ ເທດ 100% ປັດຈຸບັນບໍລິສັດມີພະນັກງານ -​ກຳ​ມະ​ກອນ ທັງໝົດ 2.789 ຄົນ, ວິຊາການຕ່າງປະເທດ 16 ຄົນ ການຜະລິດຕົ້ນຕໍແມ່ນເຄື່ອງນຸ່ງຫົ່ມທຸກຊະນິດ ຊຶ່ງສາມາດຜະລິດໄດ້ 2 ແສນກວ່າຜືນ/ເດືອນ ມູນຄ່າການສົ່ງອອກຄິດເປັນເງິນກີບປະມານ 27,​5 ຕື້ກີບຂຶ້ນໄປ. ສ່ວນວຽກງານການຕ້ານ ແລະ​ ສະກັດກັ້ນການແຜ່ລະບາດຂອງພະຍາດໂຄວິດ-19 ບໍລິສັດໄດ້ປະຕິບັດຕາມຄຳສັ່ງ​ ຂອງຄະນະສະເພາະກິດວາງ​ ອອກຢ່າງ​ເຂັ້ມ​ງວດ ໂດຍໄດ້ຕັ້ງຄະນະສະເພາະກິດ​ ຂຶ້ນ 11 ທ່ານ ເພື່ອຕິດຕາມຄົນເຂົ້າ-ອອກ ຢ່າງເຂັ້ມງວດເປັນປົກກະຕິ, ມີການວັດແທກອຸນຫະພູມກ່ອນເຂົ້າເຮັດວຽກ, ໃຊ້ເຈວລ້າງມື, ສະບູ, ຜ້າອັດປາກ-ດັງ, ຮັກສາໄລຍະຫ່າງ ປັດຈຸບັນພະນັກງານໄດ້​ຮັບ​ການສັກວັກ​ຊິນກັນໂຄວິດ-19 ຄົບ 2 ເຂັມແລ້ວ 598 ຄົນ, ສັກເຂັມທີ 1 ມີ 133 ຄົນ ແລະ ຈະຮັບການ​ສັກອີກ 1.633 ຄົນ.

ໃນໂອກາດດັ່ງກ່າວທ່ານ ນາງ ປານີ ຢາທໍ່ຕູ້ ​ໄດ້ເນັ້ນໃຫ້ບໍລິສັດເພີ່ມ​ທະ​ວີ ຄວາມເອົາໃຈໃສ່ຕໍ່ປະຕິບັດມາດຕະການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງເຂັ້ມງວດເປັນຕົ້ນ ການຮັກສາໄລຍະຫ່າງ ເນື່ອງຈາກວ່າ ຜູ້ຕິດເຊື້ອບໍ່ສະແດງອາການ ສະນັ້ນ, ການຮັກສາໄລຍະຫ່າງເປັນສິ່ງສຳຄັນບໍ່ຄວນຖືເບົາ, ວັດແທກອຸນຫະພູມ, ໃຊ້ຜ້າອັດປາກ-ດັງ, ໃຊ້ເຈວລ້າງມື ແລະ ຍັງໄດ້ຮຽກຮ້ອງໃຫ້ພາກສ່ວນ ກ່ຽວຂ້ອງໃຫ້ການກະຕຸກຊຸກຍູ້ ຕອບສະໜອງຄວາມຕ້ອງການ ອັນຮີບດ່ວນໃຫ້ທັນເວລາ.

ຈາກນັ້ນ, ທ່ານ ນາງ ປານີ ຢາທໍ່ຕູ້ ພ້ອມດ້ວຍຄະນະໄດ້ໄປ​ຢ້ຽມ ​ຢາມໂຮງງານຕັດຫຍິບຕຣີມາກ ຈຳກັດ ຢູ່ບ້ານນາແຮ່ ເມືອງສີໂຄດຕະບອງ ນະຄອນຫຼວງວຽງຈັນ ຊຶ່ງທ່ານ ນງ ມຸກດາ ແກ້ວສຸດທິພົນ ຜູ້ຈັດການຝ່າຍບໍລິຫານໄດ້ລາຍ ງານໂດຍຫຍໍ້ກ່ຽວກັບຄວາມ ເປັນມາຂອງບໍລິສັດວ່າ: ບໍລິສັດຕຣີມາກ ໄດ້ຮັບການສ້າງຕັ້ງຂຶ້ນໃນວັນທີ 4 ກຸມພາ 1994 ເປັນການລົງທຶນຂອງຕ່າງໆ ເທດ 100% ຊຶ່ງປັດຈຸບັນມີພະນັກງານທັງໝົດ 705 ຄົນ, ຍິງ 596 ຄົນ, ຄົນຕ່າງປະເທດ 27 ຄົນ ບໍລິສັດດັ່ງກ່າວຕັດຫຍິບເສື້ອຜ້າສົ່ງອອກຕ່າງປະເທດ. ສ່ວນມາດຕະການຕ້ານແລະສະກັດກັ້ນການແຜ່ລະບາດຂອງພະຍາດໂຄວິດ-19 ປັດຈຸບັນພະນັກງານໄດ້ຮັບວັກ​ຊິນແລ້ວ 96% ແຕ່ລະວັນແມ່ນໄດ້ວັດແທກອຸນຫະພູມກ່ອນເຂົ້າເຮັດວຽກ, ໃຊ້ຜ້າອັດປາກ-ດັງ, ໃຊ້ສະບູ, ເຈວລ້າງມື ແລະ ຮັກສາໄລຍະຫ່າງຕາມຄະນະສະເພາະກິດວາງອອກຢ່າງເຂັ້ມງວດ.

ໃນໂອກາດນີ້ ທ່ານ ນ. ປານີ ຢາທໍ່ຕູ້ ກໍໄດ້ສະແດງຄວາມຊົມເຊີຍຕໍ່​ ໝາກຜົນຂອງການຜະລິດທີ່ບໍລິສັດຍາດມາໄດ້ພ້ອມທັງໃຫ້ທິດຊີ້ນຳໃນການປະ​ຕິ​ບັດ​ມາດ​ຕະ​ ການ​ປ້ອງ​ກັນພະຍາດໂຄວິດ-19 ຢ່າງເຂັ້ມງວດເພື່ອເຮັດໃຫ້ບໍລິ ສັດມີຄວາມສະຫງົບປອດໄພ​ ຫ່າງໄກຈາກພະຍາດໂຄວິດ-19.

ຂ່າວ-ພາບ: ຫ​ປ​ທ