ພິທີປະກາດແຕ່ງຕັ້ງຄະນະກຳມະການ ປ້ອງກັນຊາດ-ປ້ອງກັນຄວາມສະຫງົບ ໄດ້ຈັດຂຶ້ນ ໃນວັນທີ 22 ມິຖຸນາຜ່ານ​ມານີ້ ທີ່ສະໂມສອນຂອງເມືອງປະທຸມພອນ ແຂວງຈຳປາສັກ ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ພົວ ສຸໄກ ພິມມະສານ ຄະນະປະຈຳພັກແຂວງຮອງປະທານ ຜູ້ປະຈຳການ ຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ.

ໃນພິທີ ສະຫາຍ ພັທ ວິໄລສອນ ນວນສີ ຮອງຫົວໜ້າຫ້ອງການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງຈຳປາສັກ ໄດ້ຂຶ້ນຜ່ານມະຕິ ຕົກລົງເລກທີ 04 /ປຊ-ປສ,ລົງວັນທີ 16/3/2021 ຊຶ່ງໄດ້ແຕ່ງຕັ້ງ ສະຫາຍ ວຽງສະໄໝ ສີລິພອນພັນ ກຳມະການພັກແຂວງ ເລຂາພັກເມືອງ ເຈົ້າເມືອງປະທຸມພອນ ເປັນຫົວໜ້າຄະນະກຳມະການ ປກຊ-ປກສ ເມືອງ, ສະຫາຍ ນາງ ຄຳມອນ ຊາມົນຕີ ຮອງເລຂາພັກເມືອງ ເປັນຮອງ, ສະຫາຍ ພັທ ຄຳແອ໋ງ ກຳມະການພັກເມືອງ ເປັນຮອງຫົວໜ້າ ທັງ​ເປັນຜູ້ປະຈຳການ, ສະຫາຍ ພັທ ບຸນຖອງ ວົງສະກຸນ ຄະນະປະຈໍາພັກເມືອງ ຫົວໜ້າກອງບັນຊາການ ປກສ ເມືອງ ເປັນຄະນະກຳມະການ, ສະຫາຍ ກົງແກ້ວ ລຸນມາລາ ກຳມະການພັກເມືອງ ຫົວໜ້າຫ້ອງວ່າການເມືອງ ເປັນຄະນະກຳມະການ.

ໃນ​ໂອ​ກາດນີ້, ສະຫາຍ ພົວ ສຸໄກ ພິມມະສານ ໄດ້ເນັ້ນໃຫ້ຄະນະພັກ, ຄະນະບັນຊາ ແລະ ບັນ​ດາສະຫາຍ ຜູ້ທີ່ໄດ້ຮັບການແຕ່ງຕັ້ງໃໝ່ ຈົ່ງພ້ອມກັນເພີ່ມທະວີຄວາມຮັບຜິດຊອບໃຫ້ສູງຂຶ້ນ, ມີຄວາມສາມັກຄີພາຍໃນພັກ, ມີແບບແຜນວິທີເຮັດວຽກເປັນໝູ່ຄະນະ, ສືບຕໍ່ເຮັດໜ້າທີ່ການເມືອງຂອງຕົນໃຫ້ຜົນສໍາເລັດຕາມການມອບໝາຍ.

(ຂ່າວ-ພາບ: ບຸນນອງ ຖວທ ເມືອງປະທຸມພອນ).