ວິທະຍຸກະຈາຍສຽງຫວຽດນາມລາຍງານວ່າ: ຣັດເຊຍ ມີຄວາມປາຖະໜາ ຢາກຟື້ນຟູສາຍພົວພັນຄູ່ຮ່ວມມືຍຸດທະສາດຮອບດ້ານກັບ ເອີີຣົບ.

ໃນບົດຂຽນຂອງໜັງສືພິມລາຍອາທິດຂອງ ເຢຍລະມັນລົງໃນເວັບໄຊຂອງວັງ Kremlin ເນື່ອງໃນໂອກາດສະເຫຼີມສະຫຼອງວັນເລີ່ມດຳເນີນສົງຄາມປ້ອງກັນປະເທດ ຄັ້ງຍິ່ງໃຫຍ່ ຄົບຮອບ 80 ປີ (1941 – 2021), ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ ໄດ້ເນັ້ນໜັກວ່າ: ຣັດເຊຍ ມີຄວາມປາຖະໜາ ຢາກຟື້ນຟູສາຍພົວພັນຄູ່ຮ່ວມມືຍຸດທະສາດຮອບດ້ານກັບ ເອີີຣົບ. ທ່ານ ປູຕິນ ຊີ້ອອກວ່າ: ສອງຝ່າຍມີຜົນປະໂຫຍດລວມຫຼາຍຢ່າງ ໂດຍສະເພາະ ບັນຫາຄວາມໝັ້ນຄົງ, ສະຖຽນລະພາບຍຸດທະສາດ, ສຸຂະພິບານ ແລະ ການສຶກສາ, ການຫັນເປັນດີຈີຕອນ, ພະລັງງານ, ວັດທະນະທຳ, ວິທະຍາສາດ ແລະ ເຕັກໂນໂລຊີ, ແກ້ໄຂບັນດາບັນຫາກ່ຽວກັບດິນຟ້າອາກາດ ແລະ ສິ່ງແວດລ້ອມ.