ລະບົບການເມືອງໄດ້ຮັບການປັບປຸງ ບູລະນະໃຫ້ເຂັ້ມແຂງ

ເຜີຍ​ແຜ່​ໂດຍ​: siththiphone rasphone ເວ​ລາ: 24/01/2020 14:27:58 ຈຳ​ນວນ​​ຢ້ຽມ​ຊົມ 643 ຄັ້ງ

24.09.2019 8:22     

   ໜຶ່ງໃນບັນດາຜົນສຳເລັດແຫ່ງການຈັດຕັ້ງ ປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກແມ່ນລະບົບການເມືອງຂອງລະບອບປະຊາທິປະໄຕ ປະຊາຊົນ ໄດ້ຮັບການປັບປຸງບູລະນະໃຫ້ມີຄວາມໜັກແໜ້ນ, ເຂັ້ມແຂງ. ພັກເຮົາໄດ້ເພີ່ມທະວີການນຳພາ-ຊີ້ນຳຢ່າງຈົດຈໍ່ຕໍ່ ການປັບປຸງລະບົບການເມືອງຢູ່ຂັ້ນສູນກາງ ກໍຄືຂັ້ນທ້ອງຖິ່ນ ແລະ ຮາກຖານຕາມທິດ 3 ສ້າງໂດຍຫັນບັນດາກະຊວງ, ອົງການຂັ້ນສູນກາງໃຫ້ເຮັດພາລະບົດບາດຄຸ້ມຄອງມະຫາພາກເປັນຕົ້ນຕໍ ແລະ ແບ່ງສິດ, ແບ່ງຂັ້ນຄຸ້ມຄອງໃຫ້ແກ່ທ້ອງຖິ່ນ ຮາກຖານຫຼາຍຂຶ້ນ. ພັກເຮົາຖືວ່າ ວຽກງານ 3 ສ້າງແມ່ນຍຸດທະສາດສຳຄັນສະເພາະໜ້າ ແລະ ຍາວນານຂອງພັກໃນການສ້າງຄວາມໝັ້ນຄົງ ແລະ ຍືນຍົງໃຫ້ແກ່ລະບອບປະຊາທິປະໄຕປະຊາຊົນ, ແມ່ນການປະຕິວັດອັນເລິກເຊິ່ງເຖິງຖອງໃນເງື່ອນໄຂໃໝ່ຂອງປະເທດເຮົາ ຕາມເສັ້ນທາງເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທຳ ແລະ ສີວິໄລ. ເອົາໃຈໃສ່ຕິດຕາມກວດກາການເຄື່ອນໄຫວຂອງອົງການອຳນາດລັດຂັ້ນຕ່າງໆໃນການປະຕິບັດລັດຖະທຳມະນູນ, ກົດໝາຍ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ມະຕິຕົກລົງຂອງສະພາແຫ່ງຊາດໃຫ້ມີຄວາມສັກສິດ ແລະ ມີປະສິດທິຜົນສູງ.
    ລັດຖະບານ ກໍຄືອົງການປົກຄອງທ້ອງຖິ່ນໄດ້ເອົາໃຈໃສ່ປະຕິບັດພາລະບົດບາດຄຸ້ມຄອງມະຫາພາກ, ຄຸ້ມຄອງລັດ ຄຸ້ມຄອງເສດຖະກິດ-ສັງຄົມຕາມກົດໝາຍ; ໄດ້ເອົາໃຈໃສ່ແກ້ໄຂຂັ້ນຂອດຂອງການບໍລິຫານວຽກງານໃຫ້ກະທັດຮັດກວ່າເກົ່າ, ຮັບປະກັນໃຫ້ປະຊາຊົນສາມາດຊົມໃຊ້ການບໍລິການຂອງລັດດີຂຶ້ນເທື່ອລະກ້າວ; ໄດ້ສຸມໃສ່ແບ່ງຂັ້ນຄຸ້ມຄອງ ແລະ ດັດແປງກົນໄກການປະສານງານລະຫວ່າງຂະແໜງການສູນກາງດ້ວຍກັນ ແລະ ລະຫວ່າງສູນກາງກັບທ້ອງຖິ່ນໃຫ້ຈະແຈ້ງ ແລະ ກົມກຽວຂຶ້ນຕື່ມ.
    ຂົງເຂດວຽກງານຕຸລາການ, ໄອຍະການປະຊາຊົນ ແລະ ຍຸຕິທຳ ໄດ້ເອົາໃຈໃສ່ປະຕິບັດພາລະບົດບາດ, ໜ້າທີ່ໃນການປົກປ້ອງກົດໝາຍ, ເຮັດໃຫ້ສັງຄົມມີຄວາມຍຸຕິທຳ; ໄດ້ເອົາໃຈໃສ່ປັບປຸງການຈັດຕັ້ງ, ກໍ່ສ້າງພະນັກງານຢ່າງຫຼວງຫຼາຍ ແລະ ຍົກລະດັບຄຸນນະພາບຖັນແຖວບຸກຄະລາກອນໃນຂົງເຂດດັ່ງກ່າວຢ່າງຕັ້ງໜ້າ ເຮັດໃຫ້ການພິຈາລະນະແກ້ໄຂຄະດີຕ່າງໆມີຄວາມວ່ອງໄວ, ພາວະວິໄສ, ຖືກຕ້ອງ ແລະ ເປັນທຳຫຼາຍຂຶ້ນກວ່າເກົ່າ.
    ອົງການກວດສອບແຫ່ງລັດ ໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນຕາມພາລະບົດບາດ, ດຳເນີນການກວດສອບການຄຸ້ມຄອງ ແລະ ນຳໃຊ້ງົບປະມານ-ການເງິນພາກລັດ ແລະ ຊັບສົມບັດຂອງລັດ, ເຮັດໃຫ້ບັນດາຫົວໜ່ວຍງົບປະມານ-ການເງິນພາກລັດ ແລະ ຊັບສົມບັດຂອງລັດ, ເຮັດໃຫ້ບັນດາຫົວໜ່ວຍງົບປະມານມີຄວາມເຂັ້ມງວດໃນການເຄົາລົບກົດໝາຍ ແລະ ລະບຽບການຕ່າງໆດີຂຶ້ນກວ່າເກົ່າ.
    ອົງການແນວລາວສ້າງຊາດແຕ່ລະຂັ້ນໄດ້ມີຄວາມພະຍາຍາມຈັດຕັ້ງປະຕິບັດວຽກງານແນວໂຮມຂອງພັກໃນໄລຍະໃໝ່ຢ່າງເປັນເຈົ້າການ, ປະກອບສ່ວນສຳຄັນໃນການເຕົ້າໂຮມຄວາມສາມັກຄີ, ເປັນໃຈກາງເຕົ້າໂຮມຄຳຄິດຄຳເຫັນຂອງສັງຄົມທີ່ມີຕໍ່ແນວທາງນະໂຍບາຍ ກໍຄືວຽກງານຕ່າງໆຂອງພັກ-ລັດ. ພ້ອມກັນນັ້ນກໍໄດ້ເປັນເຈົ້າການປຸກລະດົມບັນດາຊັ້ນຄົນຕ່າງໆໃນສັງຄົມ ລວມທັງພີ່ນ້ອງເຊື້ອຊາດລາວຢູ່ຕ່າງປະເທດເຂົ້າຮ່ວມຈັດຕັ້ງປະຕິບັດແນວທາງນະໂຍບາຍຂອງພັກ ແລະ ລັດ, ປະກອບສ່ວນສະຕິປັນຍາ ແລະ ທຶນຮອນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດຢ່າງເປັນຂະບວນການກວ້າງຂວາງ, ເຮັດໃຫ້ຄວາມສາມັກຄີປອງດອງພາຍໃນຊາດລາວເຮົາມີຄວາມເປັນປຶກແຜ່ນ, ໝັ້ນໜຽວ ເປັນໜຶ່ງດຽວໃນວົງຄະນາຍາດແຫ່ງຊາດລາວ.
    ອົງການຈັດຕັ້ງມະຫາຊົນແຕ່ລະຂັ້ນ ໄດ້ເອົາໃຈໃສ່ຈັດ ຕັ້ງຜັນຂະຫຍາຍແນວທາງນະ ໂຍບາຍຂອງພັກກໍຄືມະຕິຂອງ ກອງປະຊຸມໃຫຍ່ຂອງຕົນເຂົ້າສູ່ ຂະບວນການຕົວຈິງຫຼາຍຂຶ້ນ ກວ່າເກົ່າ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110