ຢຶດໝັ້ນແນວທາງປ່ຽນແປງໃໝ່ ຮອບດ້ານ ແລະ ມີຫຼັກການ

ເຜີຍ​ແຜ່​ໂດຍ​: siththiphone rasphone ເວ​ລາ: 24/01/2020 14:28:54 ຈຳ​ນວນ​​ຢ້ຽມ​ຊົມ 717 ຄັ້ງ

30.09.2019 10:50     

   ຮຽບຮຽງໂດຍ: ມິງໂກ ໜຶ່ງໃນບັນດາຄຳຂວັນ ທີ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ວາງອອກແມ່ນ ຢຶດໝັ້ນແນວທາງ ປ່ຽນແປງໃໝ່ຮອບດ້ານ ແລະ ມີຫຼັກການ ໂດຍມີເນື້ອໃນຄວາມໝາຍສຳຄັນວ່າ:
ແນວທາງປ່ຽນແປງໃໝ່ຂອງພັກເຮົາ ແມ່ນແນວທາງປະຕິວັດພື້ນຖານແຫ່ງການສ້າງລະບອບປະຊາທິປະໄຕ ປະຊາຊົນ ເພື່ອກ້າວສູ່ສັງຄົມນິຍົມ ໂດຍອີງໃສ່ຫຼັກມູນພື້ນຖານຂອງທິດສະດີມາກ-ເລນິນ ອີງໃສ່ສະພາວະຄວາມເປັນຈິງຂອງປະເທດຊາດ ແລະ ບົດຮຽນແຫ່ງການນຳພາ ພາລະກິດປະຕິວັດໄລຍະຜ່ານມາ ສົມທົບກັບບົດຮຽນການນຳພາຂອງພັກອ້າຍນ້ອງ ແລະ ບົດຮຽນແຫ່ງການສ້າງສາພັດທະນາຂອງປະເທດຕ່າງໆ.
ແນວທາງປ່ຽນແປງໃໝ່ຂອງພັກເຮົາ ແມ່ນການສືບຕໍ່ ຜັນຂະຫຍາຍອັນທີ່ດີທີ່ຖືກຕ້ອງ, ດັດແປງແກ້ໄຂອັນທີ່ບໍ່ສອດຄ່ອງ ແລະ ເພີ່ມເຕີມອັນທີ່ບໍ່ຄົບຖ້ວນສົມບູນໃຫ້ເປັນແນວທາງທີ່ນັບມື້ຄົບຖ້ວນ ເລິກເຊິ່ງ ຮອບດ້ານມີຫຼັກການ ແລະ ແທດເໝາະກັບຈຸດພິເສດຂອງການປະຕິວັດໃນໄລຍະໃໝ່ຢູ່ປະເທດເຮົາ ກໍຄືທ່າອ່ຽງລວມຂອງຍຸກສະໄໝ.
   ຈຸດປະສົງຕົ້ນຕໍຂອງແນວ ທາງປ່ຽນແປງໃໝ່ຂອງພັກເຮົາ ແມ່ນແນໃສ່ປົກປັກຮັກສາ ແລະ ສ້າງສາພັດທະນາປະເທດຂອງ ພວກເຮົາໃຫ້ມີຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີ ປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.
ເພື່ອຮັບປະກັນໃຫ້ພາລະກິດປ່ຽນແປງໃໝ່ຂອງພັກ ດຳເນີນໄປຖືກທິດ, ບັນລຸຕາມຈຸດປະສົງ ແລະ ອຸດົມການທີ່ພັກ ກຳນົດໄວ້, ພັກໄດ້ວາງ 6 ຫຼັກການຂອງການປ່ຽນແປງໃໝ່ອອກດັ່ງນີ້:
- ຫຼັກການທີໜຶ່ງ: ຢຶດໝັ້ນ ຈຸດໝາຍສັງຄົມນິຍົມ, ກຳແໜ້ນລັກສະນະຂອງການປະຕິວັດ ຢູ່ ປະເທດເຮົາໃນໄລຍະໃໝ່.
- ຫຼັກການທີສອງ: ຢຶດໝັ້ນທິດສະດີມາກ-ເລນິນ ເປັນພື້ນ ຖານແນວຄິດຂອງພັກເຮົາ ແລະ ໝູນໃຊ້ຢ່າງປະດິດສ້າງສອດຄ່ອງກັບຈຸດພິເສດຂອງປະເທດເຮົາ.
- ຫຼັກການທີສາມ: ຢຶດໝັ້ນໃນການນຳພາຂອງພັກ ເພີ່ມທະວີຄວາມສາມັກຄີເອກະພາບພາຍໃນພັກ ບົນພື້ນຖານຫຼັກການລວມສູນປະຊາທິປະໄຕ ແລະ ແນວທາງຂອງພັກ.
- ຫຼັກການທີສີ່: ເຊີດຊູ ແລະ ເສີມຂະຫຍາຍປະຊາທິປະໄຕ ແລະ ສິດເປັນເຈົ້າຂອງປະຊາຊົນບັນດາເຜົ່າ, ສ້າງກ້ອນກຳລັງສາມັກຄີທົ່ວປວງຊົນ ແລະ ຄວາມເປັນປຶກແຜ່ນຂອງຊາດລາວເອກະພາບ.
- ຫຼັກການທີຫ້າ: ເພີ່ມທະວີກຳລັງແຮງ ແລະ ຄວາມສັກສິດຂອງລະບົບອຳນາດປະຊາທິປະໄຕປະຊາຊົນ ອີງໃສ່ກຳລັງແຮງຂອງປະຊາຊົນ ເພື່ອປະຊາຊົນ, ຕ້ານປະກົດການພະຍາດອາດຍາສິດທຸກຮູບແບບ.
- ຫຼັກການທີຫົກ: ເຊີດຊູ ຈິດໃຈເອກະລາດເປັນເຈົ້າຕົນເອງ, ສົມທົບກຳລັງແຮງຂອງຊາດ ກັບກຳລັງແຮງຂອງຍຸກສະໄໝ.
   ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ຢືນຢັນຢຶດໝັ້ນແນວທາງປ່ຽນ ແປງໃໝ່ຮອບດ້ານ ແລະ ມີຫຼັກ ການເປັນການສະແດງອອກເຖິງມານະຈິດ ແລະ ຄວາມຈົງຮັກພັກດີຕໍ່ອຸດົມການອັນສູງສົ່ງຂອງພັກ ເພື່ອສູ້ຊົນນຳພາປວງຊົນລາວສ້າງສາພັດທະນາປະເທດຊາດ ໃຫ້ບັນລຸຕາມອຸດົມການດັ່ງກ່າວ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110