ປັບປຸງ ແລະ ຍົກສູງຄຸນນະພາບ ປະສິດທິຜົນ ວຽກງານແນວຄິດ ທິດສະດີຂອງພັກ

ເຜີຍ​ແຜ່​ໂດຍ​: siththiphone rasphone ເວ​ລາ: 24/01/2020 14:31:55 ຈຳ​ນວນ​​ຢ້ຽມ​ຊົມ 788 ຄັ້ງ

29.10.2019 9:43     

   ການປັບປຸງ ແລະ ຍົກສູງຄຸນນະພາບວຽກງານແນວຄິດ, ທິດສະດີແມ່ນບັນຫາສຳ ຄັນທີ່ມີລັກສະນະຍຸດທະສາດ ທັງແມ່ນໜ້າທີ່ອັນຮີບດ່ວນໃນຊຸມປີຕໍ່ໜ້າ ຊຶ່ງກ່ອນອື່ນໝົດແມ່ນແນໃສ່ກໍ່ສ້າງພາຍໃນພັກໃຫ້ມີຄວາມເຂັ້ມແຂງ, ໜັກແໜ້ນທາງດ້ານການເມືອງ-ແນວຄິດ, ຮັບປະກັນໃຫ້ທົ່ວພັກ ຍາມໃດກໍເປັນຕົວແທນແຫ່ງ ສະຕິປັນຍາ, ມານະຈິດປະຕິວັດ ແລະ ກຽດສັກສີ ພ້ອມກັນນັ້ນ ກໍກ້າວໄປເຖິງເຮັດໃຫ້ລັດທິມາກ-ເລນິນ, ແນວຄິດ ໄກສອນ ພົມວິຫານ ກາຍເປັນພື້ນຖານ ແຫ່ງແນວຄິດ ແລະ ການກະທຳຂອງປະຊາຊົນພົນລະເມືອງໃນທົ່ວງສັງຄົມ, ເຮັດໃຫ້ທົ່ວສັງຄົມມີຄວາມຮັບຮູ້ເຂົ້າໃຈ, ມີຄວາມເຊື່ອໝັ້ນ, ສະໜັບສະໜູນ ແລະ ຕື່ນຕົວປະຕິບັດຢ່າງຕັ້ງໜ້າຕໍ່ທຸກທັດສະນະ, ແນວທາງນະໂຍບາຍຂອງພັກ ແລະ ລັດ.
   ທິດທາງ, ໜ້າທີ່ຕົ້ນຕໍຂອງ ວຽກງານແນວຄິດ, ທິດສະດີໃນຊຸມປີຕໍ່ໜ້ານີ້ແມ່ນສືບຕໍ່ຍົກສູງ ຄວາມສາມາດໃນການຄົ້ນຄວ້າທິດສະດີ ແລະ ພຶດຕິກຳຂອງພັກ ເພື່ອສືບຕໍ່ບຸກທະລຸທາງດ້ານຈິນຕະນາການທິດສະດີ ແນໃສ່ສ້າງພື້ນຖານໃຫ້ແກ່ການຍົກສູງສະຕິປັນຍາ, ຄວາມສາມາດນຳພາຂອງພັກ ແລະ ຄວາມສາມາດຫັນທິດສະດີເປັນແນວທາງ, ແຜນນະໂຍບາຍຂອງພັກໃຫ້ສອດຄ່ອງກັບສະພາບແວດລ້ອມ ແລະ ເງື່ອນໄຂຕົວຈິງຂອງປະເທດເຮົາ, ຕີຖອຍລັດທິຄຳພີກົນຈັກ, ເພີ່ມທະວີ ແລະ ຍົກສູງຄຸນນະພາບວຽກງານໂຄສະນາສຶກສາອົບຮົມໃຫ້ຖັນແຖວພະນັກງານ, ສະມາຊິກພັກ ແລະ ປະຊາຊົນ ກ່ອນອື່ນຕ້ອງດຳເນີນການສະຫຼຸບຕີລາຄາວຽກງານຄົ້ນຄວ້າທິດສະດີ ແລະ ສະຫຼຸບພຶດຕິກຳ ແລະ ສະຫຼຸບ ພຶດຕິກຳ ເພື່ອສືບຕໍ່ປັບປຸງ ເພີ່ມເຕີມບັນດາເນື້ອໃນການຄົ້ນຄ້ວາຕົນຕໍ ໂດຍສະເພາະແມ່ນບັນຫາທີ່ພົວພັນເຖິງຄວາມສາມາດກຳແໜ້ນລັກສະນະຂອງການປະຕິວັດປະເທດເຮົາໃນໄລຍະໃໝ່ ຫຼື ການກຳນົດເສັ້ນທາງ ແລະ ບາດກ້າວແຫ່ງການສ້າງປະຖົມປັດໄຈ ເພື່ອກ້າວຂຶ້ນສັງຄົມນິຍົມຢູ່ປະເທດເຮົາ, ບັນຫາການຮັກສາ ແລະ ເສີມຂະຫຍາຍທາດແທ້, ລັກສະນະນຳໜ້າຂອງພັກໃນເງື່ອນໄຂພັກກຳອຳນາດ, ບັນຫາການພັດທະນາເສດຖະກິດຕະຫຼາດຕາມທິດສັງຄົມນິຍົມ, ການສ້າງຄວາມເຂັ້ມແຂງໃຫ້ແກ່ລັດປະຊາທິປະໄຕ ປະຊາຊົນທີ່ປົກຄອງດ້ວຍກົດໝາຍ, ບັນຫາການສ້າງສັງຄົມ ສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລໃຫ້ຄົບຖ້ວນ, ຈະແຈ້ງຂຶ້ນຕື່ມ, ຄົ້ນຄວ້າກຳແໜ້ນປະຫວັດສາດ-ມູນເຊື້ອ-ທາດແທ້ຂອງພັກ, ສັງລວມເອົາທັດສະນະແນວຄິດ, ຄຸນທາດການເມືອງ ແລະ ຄຸນສົມບັດສິນທຳປະຕິວັດຂອງປະທານ ໄກສອນ ພົມວິຫານ ແລະ ການນຳທ່ານອື່ນໆ ເພື່ອສ້າງພື້ນຖານແນວຄິດ, ທິດສະດີຂອງພັກເຮົາ ແລະ ເອົາເປັນ ພື້ນຖານສຳລັບການສິດສອນ, ສຶກສາອົບຮົມ ແລະ ຝຶກຝົນຫຼໍ່ ຫຼອມໃຫ້ແກ່ສະມາຊິກພັກ-ພະນັກງານ.
     ສືບຕໍ່ກວດກາ ແລະ ຊຸກຍູ້ການຈັດຕັ້ງປະຕິບັດບັນດາໂຄງການຄົ້ນຄວ້າທິດສະດີ ແລະ ພຶດຕິກຳຕາມຫົວຂໍ້ໃຫຍ່ລະດັບຊາດທີ່ໄດ້ຮັບຮອງເອົາແລ້ວໃຫ້ສຳເລັດຕາມຄາດໝາຍ, ຈັດວາງ, ສັບຊ້ອນບຸກຄະລາກອນ ໄປພ້ອມກັບການປັບປຸງການຈັດຕັ້ງຂອງພາກສ່ວນເຮັດວຽກງານຄົ້ນຄວ້າທິດສະດີ ແລະ ພຶດຕິກຳເປັນຕົ້ນແມ່ນສະຖາບັນວິທະຍາສາດສັງຄົມແຫ່ງຊາດ, ສະພາວິທະຍາສາດສັງຄົມແຫ່ງຊາດ, ບັນດາສະຖາບັນຄົ້ນຄວ້າຂອງກະຊວງ-ອົງການ, ສະພາວິທະຍາສາດຂອງສະຖາບັນການເມືອງ ແລະ ການປົກຄອງແຫ່ງຊາດ, ມະຫາວິທະຍາໄລແຫ່ງຊາດ, ປັບປຸງ, ຄຸ້ມຄອງ ແລະ ນຳໃຊ້ ງົບປະມານເຂົ້າໃນການຄົ້ນຄວ້າທິດສະດີ ແລະ ພຶດຕິກຳໃຫ້ມີປະສິດທິຜົນສູງກວ່າເກົ່າ.
ສືບຕໍ່ປ່ຽນແປງໃໝ່ດ້ານເນື້ອໃນ, ຮູບການ ແລະ ຍົກສູງຄຸນນະພາບວຽກງານແນວຄິດ, ຮ່ຳຮຽນທິດສະດີມາກ-ເລນິນ, ແນວທາງ, ທັດສະນະຂອງພັກ, ນະໂຍບາຍ ແລະ ກົດໝາຍ ຂອງລັດ ສຶກສາອົບຮົມມູນເຊື້ອຮັກຊາດ ແລະ ໂຄສະນາປຸກລະດົມປັດໄຈໃໝ່, ຕົວແບບທີ່ກ້າວໜ້າ, ບຸກຄົນແບບຢ່າງ, ວຽກດີ ຄົນເດັ່ນໃຫ້ພະນັກງານ, ສະມາຊິກພັກ ແລະ ປະຊາຊົນໄດ້ຮຽນຮູ້ ພ້ອມກັນນັ້ນ ກໍສ້າງຂໍ້ກຳນົດໃຫ້ສະຊິກພັກແຕ່ລະສະຫາຍມີຄວາມຮັບຜິດຊອບຕໍ່ວຽກງານແນວຄິດໂດຍກົງ ເພື່ອກຳແໜ້ນຕີລາຄາສະພາບແນວຄິດຂອງເຂົາເຈົ້າ ແລະ ມີວິທີ ແກ້ໄຂທັນເວລາ.
    ເຮັດໃຫ້ການສຶກສາອົບ ຮົມການເມືອງ-ແນວຄິດ ຕິດ ແໜ້ນ ແລະ ສອດຫ້ອຍໄປນຳ ທຸກວຽກງານຂອງພັກ ແລະ ລັດ ແນໃສ່ເຮັດໃຫ້ພະນັກງານ ໂດຍສະເພາະແມ່ນຜູ້ເປັນຫຼັກແຫຼ່ງ ກຳແໜ້ນແນວທາງກຳແໜ້ນແນວທາງນະໂຍບາຍ, ມີຫຼັກໝັ້ນທັດສະນະ ແລະ ຄຸນທາດການເມືອງທັງມີຄຸນສົມບັດສິນທຳປະຕິວັດ ແລະ ມີຄວາມຮັບຜິດຊອບສູງໃນການປະຕິບັດໜ້າທີ່ດ້ວຍຄວາມປອດໃສ, ມີທັດສະນະຄະຕິ ແລະ ໂລກະທັດວິທະຍາສາດ, ສາມາດ ຈຳແນກອັນຜິດ-ອັນຖືກ ທັງມີ ຄວາມເປັນເຈົ້າການປົກປ້ອງ ແນວທາງ ແລະ ອຸດົມການຂອງ ພັກ, ຕີຖອຍ ແລະ ຕອບຕ້ານສິ່ງຫຍໍ້ທໍ້ເສື່ອມຊາມຢູ່ໃນພັກ ແລະ ໃນສັງຄົມ. ປັບປຸງວຽກງານໂຄສະນາອົບຮົມຂອງພັກໃຫ້ມີຄຸນນະພາບ, ມີຊີວິດຊີວາ ແລະ ທົ່ວເຖິງເປົ້າໝາຍຕ່າງໆ, ປ່ຽນແປງໃໝ່ແບບວິທີກໍ່ສ້າງ ແລະ ຝຶກອົບຮົມຍົກລະດັບທິດສະດີການເມືອງໃຫ້ແກ່ພະນັກງານ, ສະມາຊິກພັກ ຢູ່ສະຖາບັນການເມືອງ ແລະ ການປົກຄອງແຫ່ງຊາດ ໂຮງຮຽນການເມືອງ-ການປົກຄອງຢູ່ທ້ອງຖິ່ນ, ຢູ່ລະບົບການສຶກສາຂອງລັດ ແລະ ເອກະຊົນ, ບັນດາສະຖາບັນການສຶກສາໃນກຳລັງປະກອບອາວຸດ, ປັບປຸງວຽກງານໂຄສະນາຖະແຫຼງຂ່າວ ແລະ ສື່ມວນຊົນໃຫ້ມີເນື້ອຫາສາລະ, ແນະນຳ ດ້ານແນວຄິດທີ່ແທດເໝາະ, ມີສີສັນທີ່ມີຊີວິດຊີວາ.
    ເພີ່ມທະວີຄວາມເອົາໃຈ ໃສ່ຕໍ່ການຍົກລະດັບຄວາມສາມາດຂອງບັນດາອົງການເຮັດວຽກງານແນວຄິດ ເປັນຕົ້ນແມ່ນການບຳລຸງສ້າງຍົກລະດັບຖັນແຖວພະນັກງານໂຄສະນາສຶກສາອົບຮົມ, ປາຖະກະຖາ ແລະ ຄູ-ອາຈານໃຫ້ມີຄຸນນະພາບໄປພ້ອມໆກັບການປັບປຸງກົງຈັກການຈັດຕັ້ງ, ປະກອບງົບປະມານ, ພາຫະນະ ແລະ ພື້ນຖານວັດຖຸເຕັກນິກໃຫ້ແທດເໝາະກັບຄວາມຮຽກຮ້ອງຕ້ອງການໃນໄລຍະໃໝ່ ແລະ ຄວາມອາດສາມາດສະໜອງຕົວຈິງ.
    ເພີ່ມທະວີຄວາມຮັບຜິດຊອບຕິດພັນກັບການຍົກສູງຄວາມສາມາດນຳພາຊີ້ນຳຂອງຄະນະພັກຕໍ່ວຽກງານແນວຄິດ, ທິດສະດີ ໂດຍສະເພາະແມ່ນຄວາມສາມາດໃນການຄົ້ນຄວ້າ, ກຳແໜ້ນ ແລະ ຫັນເປັນແຜນກຳນົດ, ແຜນການ ແລະ ໂຄງການຂອງຂັ້ນຕົນ ທັງຈັດຕັ້ງປະຕິບັດໃຫ້ເກີດຜົນຕົວຈິງ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110