ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 9 ສະໄໝທີ X ໃຫ້ປະກົດຜົນເປັນຈິງ

ເຜີຍ​ແຜ່​ໂດຍ​: siththiphone rasphone ເວ​ລາ: 24/01/2020 14:32:52 ຈຳ​ນວນ​​ຢ້ຽມ​ຊົມ 707 ຄັ້ງ

31.10.2019 10:45     

    ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ X ໄດ້ຈັດຂຶ້ນ ໃນລະຫວ່າງວັນທີ 14-23 ຕຸລາ 2019 ທີ່ສຳນັກງານສູນກາງພັກ ໂດຍພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ.
    ກອງປະຊຸມຄັ້ງນີ້ໄດ້ຄົ້ນຄວ້າຕີລາຄາ, ປຶກສາຫາລື ແລະ ໃຫ້ທິດຊີ້ນຳ ບັນຫາສຳຄັນ ຈຳນວນໜຶ່ງ ໂດຍສະເພາະແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາປະຈຳປີ 2019 ແລະ ທິດທາງ, ແຜນການປະຈຳປີ 2020. ຕີລາຄາ ແລະ ໃຫ້ທິດຊີ້ນຳກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານຕ່າງປະເທດ ໃນໄລຍະຜ່ານມາ ແລະ ທິດທາງໃນຕໍ່ໜ້າ. ຄົ້ນຄວ້າໃຫ້ທິດຊີ້ນຳ ກ່ຽວກັບມະຕິວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໃນໄລຍະໃໝ່. ໃຫ້ທິດຊີ້ນຳກ່ຽວກັບ ຜົນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ໃນໄລຍະຜ່ານມາ ແລະ ທິດທາງວຽກຈຸດສຸມໃນຕໍ່ໜ້າ. ຄົ້ນຄວ້າປະກອບຄວາມເຫັນ ແລະ ໃຫ້ທິດຊີ້ນຳ ຕໍ່ຮ່າງລາຍງານການເມືອງສະບັບທີໜຶ່ງ ຫຼື ສະບັບເບື້ອງຕົ້ນຕໍ່ກອງປະຊຸມໃຫຍ່ ຄັ້ງທີ XI ຂອງພັກ. ດຳເນີນຊີວິດການເມືອງພາຍໃນ ຄະນະບໍລິຫານງານສູນກາງພັກ ປະຈຳປີ 2019.
    ກອງປະຊຸມມີຄວາມເປັນເອກະພາບຮັບຮອງເອົາວຽກງານ ແລະ ທິດທາງວຽກງານຈຸດສຸມໃນຕໍ່ໜ້າ ທີ່ແນໃສ່ສ້າງການຫັນປ່ຽນອັນແຂງແຮງໃນແຕ່ລະຂົງເຂດວຽກງານ, ສ້າງບັນດາປັດໄຈຕົວຈິງ ເພື່ອຄ້ຳປະກັນການສືບຕໍ່ສ້າງການຫັນປ່ຽນຢ່າງຕັ້ງໜ້າໃນການຈັດຕັ້ງ ປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ສ້າງຂະບວນການແຂງແຮງຕໍ່ເນື່ອງສະເຫຼີມສະຫຼອງວັນສຳຄັນຂອງພັກ-ຂອງຊາດ ກະກຽມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ ສ້າງການຫັນປ່ຽນໃໝ່ ເພື່ອກ້າວເຂົ້າສູ່ກອງປະຊຸມໃຫຍ່ ຄັ້ງທີ XI ຂອງພັກ. ນອກນີ້ ກອງປະຊຸມຍັງໄດ້ເນັ້ນໜັກເຖິງການສ້າງຄວາມເຂ້ົາໃຈເປັນເອກະພາບ ແລະ ເລິກເຊິ່ງກວ່າເກົ່າ ຕໍ່ຄວາມຮັບຜິດຊອບການເມືອງ ຂອງຄະນະບໍລິຫານງານສູນກາງພັກ, ແຕ່ລະສະຫາຍສູນກາງ ນັບທັງເລຂາຄະນະພັກກະຊວງ, ອົງການ, ແຂວງ ໃນການນຳພາ-ຊີ້ນຳຜັນຂະຫຍາຍມະຕິ, ຄຳສັ່ງ ລວມທັງບັນດານິຕິກຳຕ່າງໆຂອງສູນກາງພັກ ແລະ ລັດຖະບານວາງອອກ ພ້ອມທັງເປັນເຈົ້າການນຳພາ-ຊີ້ນຳ ແກ້ບັນຫາຕ່າງໆ ຢ່າງຈິງຈັງ, ຮັບປະກັນໝາກຜົນຕົວຈິງ.
    ເພື່ອຜັນຂະຫຍາຍຈັດຕັ້ງປະຕິບັດມະຕິກອງປະຊຸມດັ່ງກ່າວ ໃຫ້ປະກົດຜົນເປັນຈິງນັ້ນ ກອງປະຊຸມໄດ້ມອບໃຫ້ຄະນະພັກແຕ່ລະຂັ້ນ ຈົ່ງເປັນເຈົ້າການຈັດຕັ້ງເຊື່ອມຊຶມ, ກຳແໜ້ນ ແລະ ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ X ໃຫ້ເປັນຂະບວນ ຟົດຟື້ນ, ແຂງແຮງ, ຕໍ່ເນື່ອງ ແລະ ບັນລຸຜົນສຳເລັດ ພ້ອມນີ້, ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງ ປະກອບອາວຸດ ແລະ ປະຊາຊົນລາວທັງຊາດ ຈົ່ງເພີ່ມທະວີຄວາມສາມັກຄີເປັນປຶກແຜ່ນທົ່ວພັກ ແລະ ທົ່ວສັງຄົມ, ເຊີດຊູ ແລະ ເສີມຂະຫຍາຍຈິດໃຈຮັກຊາດ, ເອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຕິດພັນກັບການສູ້ຊົນ ເຮັດສຳເລັດໜ້າທີ່ໃນຄວາມຮັບຜິດຊອບຂອງຕົນ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110