ຫົວ​ຂໍ້ : ອົສຕຣາລີ ຈະກາຍເປັນປະເທດສົ່ງອອກ ແກັສທຳມະຊາດ ອັນດັບ 1 ຂອງໂລກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 27/01/2020 09:02:03 ຈຳ​ນວນ​ຜູ້​ເຂົ້າ​ຢ້ຽມ​ຊົມ 272 ຄັ້ງ

(ເນື່ອງ​ໃນ​ໂອກາດ​ວັນຊາດ ອົສ​ຕຣາ​ລີ 26/1/1788-26/1/2020)

 ຮຽບຮຽງ​ໂດຍ: ລຸ້ງ​ດາວ ບຸນ​ມີ

     ໃນ​ຂະນະ​ທີ່​ທົ່ວ​ໂລກ​ກຳ ລັງ​ພະຍາຍາມ​ຫຼຸດ​ການນຳ ໃຊ້​ພະລັງງານ​ຈາກ​ນຳ້ມັນ ແລະ ຖ່ານ​ຫີນ (ແ​ກັສ​ທຳ​ມະ​ ຊາດແຫຼວ ຫຼື LNG) ຖືວ່າ​ ເປັນໜຶ່ງ​ໃນ​ພະລັງງານ​ທີ່ກຳ ລັງ​ມີ​ບົດບາດ​ຫຼາຍ​ຂຶ້ນ​ໃນ​ທົ່ວ ​ໂລກ ແລະ ມີ​ການ​ຄາດ​ຄະເນ​ຈາກ​ອົງການ​ບໍລິຫານ​ຂໍ້​ມູນ​ຂ່າວສານ​ພະລັງງານ​ຂອງ​ສະ ຫະລັດ (EIA) ກ່າວ​ວ່າ: ອົສ​ຕຣາ​ລີ ມີ​ໂອກາດ​ທີ່​ຈະ​ກ້າວ​ຂຶ້ນ​ມາ​ເປັນ​ຜູ້​ສົ່ງ​ອອກ​ແ​ກັສ​ທຳ​ມະ​ຊາດ​ແຫຼວ ຫຼື LNG ລາຍ​ໃຫຍ່​ທີ່​ສຸດ​ຂອງ​ໂລກ ຢ່າງ​ຖາວອນ​ແທນ​ປະເທດ ກາ​ຕາ ໃນ​ປີ 2020.
    ແຫຼ່ງ​ຂ່າວ​ລາຍ​ງານ​ໂດຍ​ອີງ​ຕາມ​ຖະແຫຼງການ​ຂອງ​ລັດຖະບານ ອົສ​ຕຣາ​ລີ ລະບຸ​ວ່າ: ໃນ​ໄລຍະ 5 ເດືອນ​ທໍາ​ອິດ​ຂອງ​ປີ 2019 ອົສ​ຕຣາ​ລີ ມີ​ການ​ສົ່ງ​ອອກ​ແ​ກັສ LNG ສະເລ່ຍ​ປະມານ 11.400 ລ້ານ​ແມັດ​ກ້ອນ​ຕໍ່​ມື້ (Cubic foot), ທຽບໃສ່​ປີ 2011 ການ​ສົ່ງ​ອອກ​ບັນ​ລຸ 2.600 ລ້ານ​ແມັດ​ກ້ອນ​ຕໍ່​ມື້. ສົ່ງ​ຜົນ​ໃຫ້​ປະລິມານ​ການ​ສົ່ງ​ອອກ​ແ​ກັສ LNG ຂອງ​ອົສ​ຕຣາ​ລີ ໄດ້​ລື່ນ​ກາຍ ປະເທດ​ກາ​ຕາ ທີ່​ເປັນ​ຄູ່​ແຂ່ງ​ສໍາ​ຄັນໃນ​ຖານະ​ທີ່​ເປັນ​ຜູ້​ສົ່ງ​ອອກ​ອັນ​ດັບ​ໜຶ່ງ​ຂອງ​ໂລກ. ຂະນະ​ທີ່​ປະລິມານ​ການ​ສົ່ງ​ອອກແ​ກັສ LNG ຂອງ ປະເທດ​ກາ​ຕາ ຕາມ​ມາ​ເປັນ​ອັນ​ດັບ​ທີ 2, ບັນລຸ 10.100 ລ້ານ​ແມັດ​ກ້ອນ​ຕໍ່​ມື້ ແລະ ອາ​ເມ​ຣິ​ກາ ເປັນ​ອັນ​ດັບ​ທີ 3 ດ້ວຍ​ປະລິມານ​ການ​ສົ່ງ​ອອກ​ບັນລຸ 8.900 ລ້ານ​ແມັດ​ກ້ອນ​ຕໍ່​ມື້.
     ຖະແຫຼງການ​ຂອງ​ລັດ ຖະບານ ອົສ​ຕຣາ​ລີ ລະບຸ​ວ່າ: ມີ​ຄວາມ​ເປັນ​ໄປ​ໄດ້​ສູງ​ທີ່ ອົສ​ຕຣາ​ລີ ຈະ​ສາມາດ​ຮັກສາ​ຕຳແໜ່ງ​ຜູ້​ຜະລິດ ແລະ  ສົ່ງ​ອອກ​ທີ່​ໃຫຍ່​ທີ່​ສຸດ​ຂອງ​ໂລກ ໄດ້​ຢ່າງ​ຖາວອນ ໂດຍ​ລັດຖະບານ ໄດ້​ຕັ້ງ​ງົບປະມານ​ຫຼາຍ​ກວ່າ 5 ຕື້​ໂດ​ລາ ເພື່ອ​ສະໜັບສະໜູນ​ການ​ເພີ່ມ​ຂີດ​ຄວາມ​ສາມາດ​ໃນ​ການ​ຜະລິດ LNG ສຳລັບ​ການ​ພັດທະນາ​ໂຄງການ​ໃນ​ລະຫວ່າງ ປີ 2019-2023 ແລະ ຕັ້ງ​ເປົ້າ​ໝາຍ​ຂະຫຍາຍ​ໂຄງການ​ຜະລິດ LNG ເປັນ 10 ແຫ່ງ​ພາຍ​ໃນ​ປີ 2020, ຈາກ​ປັດຈຸບັນ​ມີ 8 ແຫ່ງ. ເດືອນ​ມິຖຸນາ ປີຜ່ານມາ, ອົສ​ຕຣາລີ ໄດ້​ເປີດໂຄງການ Prelude ກ່ຽວ​ກັບ​ການ​ຜະລິດ LNG ລອຍ​ນໍ້າ​ແຫ່ງ​ທີ 8 ຂອງ​ບໍລິສັດ Royal Dutch Shell ໃນ​ແຫຼ່ງ​ອາຍ​ແ​ກັສ​ທຳ​ມະ​ຊາດ ທາງ​ທິດຕາເວັນອອກ​ສ່ຽງ​ເໜືອ​ຂອງ​ເມືອງ​ບຣູມ ໃນ​ລັດ Western Australia.
ແຫຼ່ງ​ຂ່າວ​ລະບຸ​ວ່າ: ໂຄງ ການ Prelude ຖື​ເປັນ​ອີກ​ໜຶ່ງ​ໂຄງການ LNG ຂະໜາດ​ໃຫຍ່​ທີ່​ສຸດ​ຂອງ​ອົສ​ຕຣາ​ລີ ໂດຍ​ມີ​ຄວາມ​ອາດ​ສາມາດຮອງ​ຮັບ​ຖັງ​ເກັບ LNG ເທົ່າ​ກັບ​ຂະໜາດ​ຂອງ​ສະ​ລອຍ​ນໍ້າ​ຂະໜາດ​ມາດຕະຖານ​ທີ່​ໃຊ້​ໃນ​ການ​ແຂ່ງຂັນ​ໂອ​ລິ​ມ​ປິກ​ເຖິງ 175 ແຫ່ງ. ໃນ​ຂະນະ​ທີ່​ໂຄງການ LNG ແຫ່ງ​ອື່ນໆ​ເຊັ່ນ: Wheatstone, Ichthys ແລະ Darwin ກໍ​ເພີ່ມ​ກຳລັງ​ການ​ຜະ ລິດ LNG ແຕ່​ເດືອນ​ກັນຍາ​ປີ​ຜ່ານ​ມາ.
ນັກ​ວິເຄາະ​ຂອງ​ອົງການ​ບໍລິຫານ​ຂໍ້​ມູນ​ຂ່າວສານ​ພະ ລັງງານ​ຂອງ​ສະຫະລັດ (EIA) ກ່າວ​ວ່າ: ປະເທດ​ກາ​ຕາ ອາດ​ສູນ​ເສຍ​ຕຳແໜ່ງ​ຜູ້​ສົ່ງ​ອອກ LNG ລາຍ​ໃຫຍ່​ທີ່​ສຸດ​ຂອງ​ໂລກ ໃຫ້​ກັບ ອົສ​ຕຣາ​ລີ ໃນ​ປີ 2020 ແລະ ອາດ​ຈະ​ສູນ​ເສຍ​ຕໍາ​ແໜ່ງ ​ນີ້​ຢ່າງ​ຖາວອນ ເມື່ອ​ເບິ່ງ​ຈາກ​ແຜນ​ພັດທະນາ​ຢ່າງ​ເປັນ​ທາງ​ການ​ຂອງ​ອົສ​ຕຣາ​ລີ ທັງ​ຍັງ​ມີ​ເປົ້າ​ໝາຍ​ທີ່​ຈະ​ເພີ່ມ​ກຳລັງ​ການ​ຜະລິດ​ໃຫ້​ໄດ້ 110 ລ້ານ​ໂຕນ​ຕໍ່​ປີ ພາຍ​ໃນ​ປີ 2024, ເພີ່ມ​ຈາກ 77 ລ້ານ​ໂຕນ​ຕໍ່​ປີ ໃນ​ປີ 2018.
     ທ່ານ ນິ​ໂຄ​ລັສ ບຣາວ ຜູ້​ອໍາ​ນວຍ​ການ​ຄົ້ນ​ຄ້​ວາ​ອາຍ​ແ​ກັສ ແລະ LNG ຂອງ Wood Mackenzie ບໍລິສັດ​ທີ່​ໃຫ້​ຄຳ​ປຶກສາ ແລະ ຄົ້ນຄວ້າ​ດ້ານ​ພະລັງງານ​ໃນ​ລອນ​ດອນ ກ່າວ​ວ່າ: ການ​ເພີ່ມ​ກຳລັງ​ການ​ຜະ ລິດ ແລະ ຄວາມ​ຕ້ອງການທີ່​ ເໜັງ​ຕີງ​ຈາກ​ລູກ​ຄ້າ ໂດຍສະ ເພາະ​ໃນ​ປະເທດ​ຍີ່ປຸ່ນ, ຈີນ ແລະ ສ.ເກົາຫຼີ ສົ່ງຜົນ​ໃຫ້​ລາ ຄາ ​ຊື້​-​ຂາຍ​ແ​ກັສ ຫຼຸດ​ລົງ​ຢ່າງ ​ຫຼວງຫຼາຍ ນັບ​ຕັ້ງແຕ່​ທ້າຍ​ປີ 2018 ເປັນຕົ້ນ​ມາ. ໃນ​ຂະນະ​ທີ່​ຄວາມ​ກັງວົນ​ກ່ຽວ​ກັບ​ການ​ຂະຫຍາຍຕົວ​ຂອງ​ເສດຖະກິດ​ໂລກ​ທີ່​ຊ້າ​ລົງ ແລະ ສົງຄາມ​ການ​ຄ້າ ຈະ​ກົດ​ດັນ​ໃຫ້​ລາຄາ LNG ມີ​ການ​ເໜັງ​ຕີງ​ຫຼາຍ​ຂຶ້ນ. ໃນ​ປີຜ່ານມາ​ປະ​ເຊີນ​ກັບ​ສະຖານະ​ການ​ລາຄາ LNG ທີ່​ຕໍ່າ​ລົງ​ເລື້ອຍໆ ແລະ ລາຄາ​ອາດ​ຈະ​ປັບ​ຫຼຸດ​ລົງ​ອີກ​ໃນ​ປີ​ນີ້, ເນື່ອງ​ຈາກ​ການ​ສະໜອງ​ທີ່​ເພີ່ມ​ຂຶ້ນ​ໃນ​ຫຼາຍ​ປະ​ເທດ. ທ່ານ ບຣາວ ກ່າວ​ຕື່ມ​ວ່າ: ການ​ສະໜອງ​ເພີ່ມ​ເຂົ້າ​ມາ ບໍ່​ໄດ້​ມີ​ແຕ່ ອົສ​ຕຣາ​ລີ ເທົ່າ​ນັ້ນ ແຕ່ ສະຫະລັດ ກໍມີ​ເປົ້າ​ໝາຍ​ຈະ​ເພີ່ມ​ການ​ຜະລິດ​ເຊັ່ນ​ກັນ ໂດຍ​ຈະ​ເພີ່ມ​ການ​ຜະ​ລິດ​ແ​ກັສ ຈາກ​ໂຄງການ ດາ​ເມ​ຣອນ ທີ່ຢູ່​ໃນ​ເກາະ​ເອວ​ບາ ລວມ​ເຖິງ​ໃນ​ໂຄງການ ຟຣີ​ພອດ ໃນ​ລັດ​ເທັກ​ຊັດ.
     ສຳລັບ ປະເທດ​ກາ​ຕາ, ກະຊວງ​ພະລັງງານ​ປະກາດ​ໃນ​ຕົ້ນ​ເດືອນ​ສິງຫາ​ປີຜ່ານມາ​ວ່າ: ລັດຖະບານ​ໄດ້​ອະນຸມັດ​ໃຫ້​ເພີ່ມ​ກໍາ​ລັງ​ການ​ຜະ​ລິດ​ແ​ກັສ LNG ອີກ 43% ພາຍ​ໃນ​ປີ 2024, ເພື່ອ​ໃຫ້​ສາມາດ​ແຂ່ງຂັນ​ໄດ້​ກັບ​ປະເທດ​ຜູ້​ສົ່ງ​ອອກ​ລາຍ​ອື່ນໆ ຈາກ​ປີ 2018 ທີ່ກຳລັງ​ການ​ຜະ​ລິດ​ແ​ກັສ LNG ຂອງ​ກາ​ຕາ​ຢູ່​ທີ່​ປະມານ 80 ລ້ານ​ໂຕນ​ຕໍ່​ປີ.
     ທ່ານ ຊາ​ອັດ ເຊີ​ຣິ​ດາ ອັນ​-​ຄາ​ບີ ປະທານ​ຜູ້​ບໍລິຫານ​ຂອງ Qatar Petroleum ຍອມຮັບ​ວ່າ  ຂໍ້​ຂັດ​ແຍ່ງ ລະຫວ່າງ ກາ​ຕາ ກັບ ຊາ​ອຸ​ດິດ ອາ​ຣາ​ບີ ລວມ​ເຖິງ​ປະເທດ​ອາ​ຣັບ​ອື່ນໆ​ເຊັ່ນ: ອີ​ຢິບ, ບາ​ເຣນ, ເຢ​ເມນ, ລີ​ບີ ແລະ ສະຫະລັດ ອາ​ຣັບ​ເອ​ມິ​ເຣດ ອາດ​ຈະ​ເປັນ​ອຸປະສັກ​ຕໍ່​ເສັ້ນທາງ​ການ​ສົ່ງ​ອອກ LNG ຂອງ​ກາ​ຕາ ໃຫ້​ໄດ້​ຕາມ​ເປົ້າ​ໝາຍ ລວມ​ເຖິງ​ເຮັດ​ໃຫ້​ຕົ້ນ​ທຶນ​ການ​ຂົນສົ່ງ​ສູງ​ຂຶ້ນ. ປະທານ Qatar Petroleum ກ່າວ​ວ່າ: ປັດຈຸບັນ, ຄວາມ​ຕ້ອງການ​ໃນ​ປະເທດ​ອາຊີ ຖື​ວ່າ​ແຂງ​ແກ່ນ​ທີ່​ສຸດ, ຈີນ ຍັງ​ຄົງ​ເປັນ​ປະເທດ ນຳ​ເຂົ້າ​ລາຍ​ໃຫຍ່​ທີ່​ສຸດ ແລະ ຍັງ​ມີ​ປະເທດ​ອື່ນໆ ທີ່​ໜ້າ​ສົນໃຈ​ເຊັ່ນ: ຍີ່ປຸ່ນ, ສ.ເກົາຫຼີ, ອິນ​ໂດ​ເນ​ເຊຍ ແລະ ຫວຽດນາມ.
     ໃນ​ຂະນະ​ທີ່ ບຣູມ​ເບີກ ລາຍ​ງານ​ໂດຍ​ອ້າງ​ເຖິງ​ການ​ຄົ້ນ​ຄ້​ວາ​ຂອງ ແມດ​ຄິນ​ຊີ ບໍລິສັດ​ທີ່​ປຶກສາ​ດ້ານ​ການ​ບໍລິຫານ​ຊັ້ນ​ນຳ​ຂອງ​ໂລກ ກ່າວ​ວ່າ:  ຄວາມ​ຕ້ອງການ​ໃຊ້​ແ​ກັສ LNG ຂອງ​ໂລກ ຈະ​ບັນລຸ​ເຖິງ 384 ລ້ານ​ໂຕນ ໃນ​ປີ 2020, ຈາກ​ປີ 2018 ປະລິມານ​ການ​ຊົມໃຊ້​ທົ່ວ​ໂລກ ຢູ່​ທີ່ 319 ລ້ານ​ໂຕນ ແລະ ຄາດ​ວ່າ: ໃນ​ອີກ 2-3 ປີ ຕໍ່ໜ້າ ຈະ​ເກີດ​ຄວາມ​ສົມ​ດຸນ​ລະຫວ່າງ​ຄວາມ​ຕ້ອງການ ແລະ ການ​ສະໜອງ ຊຶ່ງ​ຄາດ​ວ່າ: ການ​ແຂ່ງຂັນ​ທີ່​ຮຸນ​ແຮງ​ຫຼາຍ​ຂຶ້ນ ຈະ​ສົ່ງ​ຜົນ​ໃຫ້​ຄວາມ​ຕ້ອງການ​ໃຊ້​ໃນ​ທົ່ວ​ໂລກ ເພີ່ມ​ຂຶ້ນ​ຕາມ​ມາ​ຈາກ​ລາ​ຄາ​ແ​ກັສ​ທີ່​ຕໍ່າ​ລົງ.
     ສປປ ລາວ ແລະ ອົ​ສ​ຕຣາ​ລີ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 16 ມັງກອນ ປີ 1952.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110