ເມື່ອບໍ່​ດົນ​ມານີ້ ທີ່ຫ້ອງປະຊຸມກອງບັນຊາການທະຫານເມືອງເງິນ ແຂວງໄຊຍະບູລີ ໄດ້ຈັດພິທີປະກາດການຈັດຕັ້ງ ຂອງກອງບັນຊາການທະຫານເມືອງເງິນ, ເປັນກຽດເຂົ້າຮ່ວມມີ ສະຫາຍ ພັອ ດາວນ້ອຍ ບຸດບົວທອງ ຄະນະປະຈຳພັກແຂວງ ຫົວໜ້າການເມືອງ ກອງບັນຊາການທະຫານແຂວງໄຊຍະບູລີ ມີສະຫາຍ ນາງ ສີຈົມ ບຸນມານະທຳ ຮອງເລຂາຄະນະບໍລິຫານງານພັກເມືອງເງິນ, ແຂກຖືກເຊີນ, ນາຍ ແລະ ພົນທະຫານເຂົ້າຮ່ວມ.

      ສະຫາຍ ພັທ ແສງອຸໄທ ວຸດທິວົງ ຮອງຫົວໜ້າຫ້ອງການເມືອງ ກອງບັນຊາການທະຫານ ແຂວງໄຊຍະບູລີ ໄດ້ຂຶ້ນຜ່ານຄຳສັ່ງ ຍົກຍ້າຍພະນັກງານ ຂອງກອງບັນຊາການທະຫານແຂວງໄຊຍະບູລີ ສະບັບເລກທີ 450 /ກປຊ ລົງວັນທີ 29 ມິຖຸນາ 2021 ວ່າດ້ວຍ ການຍົກຍ້າຍກຳລັງທີ່ຂຶ້ນກັບກອງບັນຊາການທະຫານເມືອງ, ກອງບັນຊາການທະຫານແຂວງ. ຍົກຍ້າຍ ສະຫາຍ ພັທ ບຸນມີ ໄຊສັນຕິ ຄະນະປະຈຳພັກເມືອງ ຫົວໜ້າການເມືອງ ກອງບັນຊາການທະຫານເມືອງເງິນ ໄປຮັບໜ້າທີ່ໃໝ່ຢູ່ຫ້ອງການເມືອງ ກອງບັນຊາການທະຫານແຂວງໄຊຍະບູລີ, ຜ່ານຂໍ້ຕົກລົງຊົ່ວຄາວ ຂອງກອງບັນຊາການທະຫານແຂວງໄຊຍະບູລີ ສະບັບເລກທີ 240/ກປຊ ລົງວັນທີ 29 ມິຖຸນາ 2021 ວ່າດ້ວຍ ການແຕ່ງຕັ້ງ ຫົວໜ້າການເມືອງກອງບັນຊາການທະຫານເມືອງເງິນ ໄດ້ແຕ່ງຕັ້ງ ສະຫາຍ ພັທ ຈັນທອງ ໄຊສົງຄາມ ຂຶ້ນເປັນຫົວໜ້າການເມືອງ  ກອງບັນຊາການທະຫານເມືອງເງິນ ແລະ ຜ່ານຂໍ້ຕົກລົງຂອງຫົວໜ້າກອງບັນຊາການທະຫານ ແຂວງໄຊຍະບູລີ ສະບັບເລກທີ 229/ ກປຊ ລົງວັນທີ 24 ມິຖຸນາ 2021 ວ່າດ້ວຍການແຕ່ງຕັ້ງບັນດາຫົວໜ້າຂະແໜງການທີ່ຂຶ້ນກັບກອງບັນຊາການທະຫານເມືອງເງິນອີກດ້ວຍ.

      ສະຫາຍ ພັອ ດາວນ້ອຍ ບຸດບົວທອງ ໄດ້ເນັ້ນໜັກໃຫ້ບັນດາສະຫາຍ ຄະນະພັກ, ຄະນະບັນຊາ ແລະ ບັນດາສະຫາຍທີ່ໄດ້ຮັບໜ້າທີ່ໃໝ່ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ ທີ່ໄດ້ຮັບມອບໝາຍຈາກການຈັດຕັ້ງຂັ້ນເທິງ ເອົາໃຈໃສ່ປະຕິບັດໜ້າທີ່ວິຊາສະເພາະໃຫ້ສູງຂຶ້ນ, ມີຄວາມຈົ່ງຮັກພັກດີຕໍ່ພັກ-ລັດ ຕໍ່ການຈັດຕັ້ງ ແລະ ຕໍ່ປະຊາຊົນບັນດາເຜົ່າ ເພີ່ມທະວີຄວາມສາມັກຄີເປັນປຶກແຜ່ນ ຫັນເອົາວຽກງານການເມືອງແນວຄິດ ສອດຫ້ອຍເຂົ້າໃນທຸກຂົງເຂດວຽກງານ ແລະ ພ້ອມກັນຈັດຕັ້ງປະຕິບັດວິຊາສະເພາະໃຫ້ໄດ້ຮັບຜົນສຳເລັດຕາມລະດັບຄາດໝາຍ ເຮັດໃຫ້ເມືອງຮັກສາໄດ້ສະຖຽນລະພາບທາງດ້ານການເມືອງ ສັງຄົມມີຄວາມສະຫງົບເປັນລະບຽບຮຽບຮ້ອຍດີ.

(ຂ່າວ: ສູລິຍາ ແສງເດືອນ)