ຫົວ​ຂໍ້ : ການນຳຫວຽດນາມ ໄວ້ອາໄລ ເຖິງປະທານ ໂຮ່ຈິມິນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 27/01/2020 09:06:39 ຈຳ​ນວນ​ຜູ້​ເຂົ້າ​ຢ້ຽມ​ຊົມ 307 ຄັ້ງ

     ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ເນື່ອງ​ໃນ​ໂອກາດ​ລະດູບານໃໝ່ ປີ 2020 ໝູນວຽນ​ມາ ແລະ ມຸ້ງ​ໄປ​ສູ່​ການ​ສະເຫຼີມສະຫຼອງ​ວັນ​ສ້າງຕັ້ງ​ພັກ​ກອມ​ມູ​ນິດ​ຫວຽດນາມ ຄົບຮອບ 90 ປີ, ວັນ​ທີ 22 ມັງ ກອນ​ຜ່ານ​ມາ, ທ່ານ ຫ​ງວຽນ​ຊວັນ​ຟຸກ ນາຍົກລັດຖະມົນຕີ​ຫວຽດນາມ ໄດ້​ໄປ​ຈູດ​ທູບ​ທຽນ​ບູຊາ​ໄວ້ອາໄລ ເຖິງປະທານ​ໂຮ່​ຈິ​ມິນ ຢູ່​ເຮືອນ​ເລກ​ທີ 67 ເຂດ​ອະນຸສອນ​ສະຖານ ປະທານ​ໂຮ່​ຈິມິນ ໃນ​ບໍລິເວນ​ທໍາ​ນຽບ​ປະທານ​ປະ​ເທດ.
     ຂ່າວ​ລະບຸ​ວ່າ: ໃນ​ໂອກາດ​ປີ​ໃໝ່​ນີ້, ທ່ານ ຫ​ງວຽນ​ຝູ​ຈ້ອງ ປະທານ​ປະເທດ​ຫວຽດນາມ, ໄດ້​ຫວນ​ຄືນ​ບັນດາ​ຜົນງານ​ທີ່​ພົ້ນ​ເດັ່ນ​ໃນ​ການ​ພັດທະນາ​ເສດຖະກິດ - ສັງຄົມ ປີ 2019 ຄື: ເສດຖະກິດ​ສືບຕໍ່​ມີ​ການ​  ເຕີບ​ໂຕ​ຢ່າງ​ໄວ, ບັນລຸ​ໄດ້​ 7%, ນອນ​ຢູ່​ໃນ​ກຸ່ມ​ບັນດາ​ປະເທດ​ທີ່​ມີ​ລະດັບ​ການ​ເຕີບ​ໂຕ​ສູງ​ທີ່​ສຸດ​ໃນ​ພາກ​ພື້ນ ແລະ ໃນ​ໂລກ. ເນັ້ນ​ໜັກ​ເຖິງ ປີ 2020 ແມ່ນ​ປີ ທີ່​ມີ​ຄວາມ​ໝາຍ​ສຳຄັນ​ ພິເສດ, ແມ່ນ​ປີ​ທີ່​ມີ​ຫຼາຍເຫດ ການ ​ດ້ານ​ການເມືອງ​ທີ່​ຍິ່ງ​ໃຫຍ່​ສຳລັບ​ປະເທດ​ຊາດ, ທ່ານ ຫ​ງວຽນ​ຝູ​ຈ້ອງ ຮຽກຮ້ອງ​ໃຫ້​ທົ່ວ​ພັກ, ທົ່ວ​ປວງ​ຊົນ​ທັງ​ຊາດ, ທົ່ວ​ກອງທັບ ເສີມ​ຂະຫຍາຍ​ຄວາມ​ສາມາດ​ບົ່ມ​ຊ້ອນ, ທ່າ​ໄດ້​ປ່ຽບ, ແຫຼ່ງ​ກຳລັງ, ສືບຕໍ່​ປັບປຸງ, ເພີ່ມ​ທະວີ​ພື້ນຖານ​ເສດຖະກິດ​ມະຫາ​ພາກ, ຄຸ້ມ​ຄອງ​ໄພ​ເງິນ​ເຟິ້, ຍົກ​ສູງ​ກຳລັງ​ພາຍ​ໃນ ແລະ ລັກສະນະ​ເປັນ​ເຈົ້າ​ຕົນ​ເອງ​ຂອງ ພື້ນຖານ​ເສດ​ຖະ​ກິດ. 
     ຂ່າວ​ລະບຸ​ວ່າ: ທ່ານ ຫ​ງວຽນ​ຊວັນ​ຟຸກ ໄດ້​ຕີ​ລາຄາ​ສູງ​ບັນດາ​ການ​ນໍາ, ພະນັກງານ, ພະລາ​ກອນ​ເຮັດ​ວຽກ​ຢູ່​ອະນຸ ສອນ​ສະຖານປະທານ​ໂຮ່​ຈິ​ມິນ ໃນ​ທໍາ​ນຽບ​ປະທານ​ປະ ເທດ ທີ່​ບັນລຸ​ໄດ້ຜົນ​ງານ​ຫຼາຍ ​ຢ່າງ​ນັບ​ແຕ່​ການເຄື່ອນໄຫວ​ອະ ນຸລັກ, ຮັກສາ ຕະຫຼອດ​ຮອດ​ການ​ຄົ້ນຄວ້າ​ວິທະຍາສາດ ເພື່ອ​ປະຕິບັດ​ວຽກ​ງານ​ແນະ​ນໍາ​ກ່ຽວ​ກັບ​ຊີວິດ, ພາລະກິດ ແລະ ແບບຢ່າງ​ຄຸນສົມບັດ​ຂອງ​ປະທານ​ໂຮ່​ຈິ​ມິນ. 
     ກ່າວ​ເຂົ້າ​ສູ່​ປິ​ໃໝ່ 2020, ທ່ານນາຍົກລັດຖະມົນຕີ​ຫວຽດ ນາມ ສະເໜີ​ໃຫ້​ສືບຕໍ່​ເສີມຂະ ຫຍາຍ​ບັນດາ​ຜົນງານ​ທີ່​ບັນ ລຸ​ໄດ້​ໃນ​ຕະຫຼອດ​ໄລຍະ​ກວ່າ 50 ປີ ຜ່ານ​ມາ. ຄຽງ​ຄູ່​ກັນ​ນັ້ນ, ຕ້ອງ​ພະຍາຍາມ​ປະຕິ​ບັດ​ສໍາ​ເລັດ​ບັນດາ​ໜ້າທີ່​ໄດ້​ຮັບ​ການ​ມອບ​ໝາຍ​ໃຫ້​ເປັນ​ຢ່າງ​ດີ, ເພື່ອ​ໃຫ້​ສົມ​ກັບ​ເປັນ​ສະຖານທີ່​ແດງ ກ່ຽວ​ກັບ​ການ​ສຶກສາ​ດ້ານ​ການເມືອງ, ແນວ​ຄິດ, ຄຸນສົມບັດ, ນໍ້າ​ໃຈ​ຮັກ​ຊາດ ແລະ ມູນເຊື້ອ​ປະຕິວັດ​ໃຫ້​ແກ່​ປະຊາຊົນ​ທຸກ​ຊັ້ນ​ວັນນະ ພ້ອມ​ທັງ​ແມ່ນ​ບ່ອນ​ເຕົ້າໂຮມ​ຄວາມ​ໄວ້​ເນື້ອ​ເຊື່ອ​ໃຈ, ຄວາມ​ຮັກ​ແພງ​ຂອງ​ທົ່ວ​ພັກ, ທົ່ວ​ປວງ​ຊົນ ແລະ ທົ່ວ​ກອງທັບ​ທີ່​ມີ​ຕໍ່ ປະທານ​ໂຮ່​ຈິ​ມິນ ຜູ້​ນໍາ​ທີ່​ຍິ່ງ​ໃຫຍ່​ຂອງ​ຫວຽດນາມ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110