ຫົວ​ຂໍ້ : 2019 ຖວທ ອັດຕະປື ຍັງບໍ່ສາມາດບັນລຸຄາດໝາຍສູ້ຊົນທີ່ທ້ອງຖິ່ນຮັບຮອງໄວ້

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 27/01/2020 09:20:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 423 ຄັ້ງ

ທ່ານ ນາງ ບຸນນານ ບຸນນະແສງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງອັດຕະປື ໄດ້ຊີ້ແຈ້ງ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນ ຊຸດທີ I ຊຶ່ງຈັດຂຶ້ນໃນລະຫວ່າງ ວັນທີ 21-24 ມັງກອນຜ່ານມາວ່າ: ກ່ຽວກັບໂຕເລກທີ່ຂະແໜງການຂອງຕົນຈັດຕັ້ງປະຕິບັດບໍ່ສາມາດບັນລຸຕາມແຜນງານສູ້ຊົນ ຕາມ ມະຕິ ເລກທີ 09 ທີ່ສະພາປະ ຊາຊົນແຂວງຮັບຮອງໃນປີ 2019 ຜ່ານມານັ້ນ ຍ້ອນມີ ຫຼາຍສາເຫດ. ສຳລັບປີ 2019 ພະແນກ ຖວທ ຕາມແຜນທີ່ສະພາປະຊາຊົນຮັບຮອງນັ້ນ ຂະແໜງວັດທະນະທຳ ແມ່ນໄດ້ມີຄາດໝາຍສ້າງຄອບຄົວວັດທະນະທຳໃຫ້ໄດ້ 1.500 ຄອບຄົວ, ສາມາດປະຕິບັດໄດ້ ແຕ່ 488 ຄອບຄົວ ແລະ ສ້າງ ບ້ານວັດທະນະທຳ ຕາມແຜນ 10 ບ້ານ, ປະຕິບັດໄດ້ 6 ບ້ານ ແລະ ຄາດໝາຍສ້າງບ້ານວັດ ທະນະທຳຕົວແບບໃຫ້ໄດ້ 1 ບ້ານ, ຜ່ານການຈັດຕັ້ງຕົວຈິງ ບໍ່ສາມາດບັນລຸຜົນສຳເລັດ, ວຽກງານຖະແຫຼງຂ່າວ-ສື່ມວນຊົນ ແມ່ນການຂະຫຍາຍຄື້ນສຽງວິທະຍຸໃຫ້ກວມ 100% ຂອງພື້ນທີ່ທົ່ວແຂວງ ຈັດຕັ້ງປະຕິບັດຕົວຈິງ ສາມາດປະຕິບັດໄດ້ 85% ຂອງພື້ນທີ່, ວຽກງານ ການທ່ອງທ່ຽວຄາດໝາຍສູ້ຊົນ ແມ່ນດຶງດູດນັກທ່ອງທ່ຽວເຂົ້າ ມາແຂວງໃຫ້ໄດ້ 164.000 ຄົນ ສາມາດປະຕິບັດໄດ້ 164.369 ຄົນ ເທົ່າກັບ 100% ຂອງແຜນການ, ຄາດໝາຍພັດທະນາແຫຼ່ງທ່ອງທ່ຽວ ທາງດ້ານທຳມະຊາດ, ປະຫວັດສາດ ແລະ ວັດທະນະທຳ ໃຫ້ໄດ້ 5 ແຫ່ງ, ສາມາດປະຕິບັດໄດ້ 3 ແຫ່ງເຊັ່ນ: ສວນຫຼັກເມືອງ, ອະ ນຸສາວະລີພະເຈົ້າໄຊຍະເຊດຖາທິລາດ ແລະ ສວນອະນິດພະ ສົງມໍລະດົກວັດທະນະທຳວັດທາດພະໄຊ ເມືອງໄຊເສດຖາ.

ທ່ານ ໄດ້ໃຫ້ຮູ້ຕື່ມວ່າ: ສາ ເຫດຕົ້ນຕໍ ທີ່ບັນດາແຜນຄາດ ໝາຍບໍ່ໄດ້ຮັບຜົນສຳເລັດທາງ ດ້ານວັດທະນະທຳ ແມ່ນໄດ້ຖືເອົາຄຸນນະພາບເປັນຫຼັກຕາມ 19 ມາດຖານ ທີ່ທຸກຂະແໜງ ການຕ້ອງໄດ້ມີສ່ວນຮ່ວມໂດຍ ບໍ່ໄດ້ແລ່ນນຳປະລິມານ ຖ້າບໍ່ໄດ້ຄົບມາດຖານແລ້ວ ແມ່ນບໍ່ສາມາດປະກາດໄດ້, ວຽກງານຖະແຫຼງຂ່າວ ສິ່ງທີ່ບໍ່ສາມາດຈັດຕັ້ງປະຕິບັດໄດ້ ເພາະເປັນວຽກທີ່ຕ້ອງໄດ້ນຳໃຊ້ງົບປະມານມະຫາສານ ຈຶ່ງເປັນສາເຫດເຮັດ ໃຫ້ການຂະຫຍາຍຄື້ນວິທະຍຸທີ່ມີໃນໄລຍະຜ່ານມາສາມາດບຸກທະລຸ ໄດ້ພຽງ 85% ຍ້ອນການປະ ກອບສ່ວນຈາກອົງການທີ່ຊ່ວຍໄພພິບັດທີ່ເມືອງສະໜາມໄຊ. ປັດຈຸບັນຍັງເຫຼືອຢູ່ເມືອງ ຊານໄຊ ຊຶ່ງຂະແໜງການກ່ຽວຂ້ອງກຳລັງສ້າງແຜນການຈັດຕັ້ງປະຕິບັດ ລວມມີງົບປະມານເຂົ້າໃນການຂະຫຍາຍສູງເຖິງ 1 ຕື້ກວ່າກີບ ເພື່ອຈະຂະຫຍາຍຢູ່ໃນເຂດຊາຍແດນ ລາວ-ຫວຽດ ນາມ ອັນນີ້ ຄືບັນຫາງົບປະມານ ຂອງແຂວງມີຈຳກັດຈຶ່ງບໍ່ສາ ມາດປະຕິບັດໄດ້ .

ວຽກງານທ່ອງທ່ຽວ ສິ່ງທີ່ບໍ່ສາມາດບັນລຸໄດ້ ເນື່ອງຈາກ ໄດ້ມີແຮງສັດທາຂອງຜູ້ປະ ກອບການນິຕິບຸກຄົນ, ຊັ້ນຄົນ ແລະ ປະຊາຊົນບັນດາເຜົ່າ ແລະ ການລົງທຶນຂອງລັດ ທີ່ໄດ້ ລະດົມທຶນຮອນເຂົ້າໃນການພັດທະນາແຫຼ່ງທ່ອງທ່ຽວ 3 ແຫ່ງ ໃນຕົວຈິງແມ່ນຍັງຂາດ ເຂີນທາງດ້ານງົບປະມານອັນຈຳເປັນເພື່ອຈະບັນຈຸເຂົ້າໃນບັນດາໂຄງການທີ່ໄດ້ສ້າງແຜນໄວ້, ຜູ້ປະກອບການດ້ານການບໍລິການດ້ານການທ່ອງທ່ຽວຂອງແຂວງອັດຕະປື ຍັງເປັນຜູ້ປະກອບການຂາດວິໄສທັດຄວາມຮູ້ພື້ນຖານໃນການວາງແຜນການພັດທະນາ ແລະ ຍັງບໍ່ທັນໄດ້ເຂົ້າເຖິງມາດຕະຖານຂອງສາກົນໄດ້, ຄວາມອາດສາ ມາດດຶງດູດການລົງທຶນຂອງ ພາກລັດ-ເອກະຊົນພາຍໃນ ແລະ ຕ່າງປະເທດເຂົ້າມາພັດ ທະນາແຫຼ່ງທ່ອງທ່ຽວຂອງ ແຂວງອັດຕະປື ຍັງມີຈຳກັດບັນ ຫານີ້ ຈຶ່ງເຮັດໃຫ້ບໍ່ທັນສາມາດ ພັດທະນາແຫຼ່ງທ່ອງທ່ຽວໄດ້ ຕາມລະດັບຄາດໝາຍທີ່ສະພາ ຮັບຮອງໄດ້.

ດັ່່ງນັ້ນ, ໃນແຜນຈັດຕັ້ງປະຕິບັດປີ 2020 ໃຫ້ມີປະສິດທິຜົນ 1) ຈະໄດ້ສືບຕໍ່ປະຕິບັດກົນໄກປະສານງານ, 2) ຈະຕ້ອງໄດ້ຈັດສັນງົບປະມານເຂົ້າຕາມມະຕິທີ່ສະພາຮັບຮອງ ໝາຍຄວາມວ່າ ງົບປະມານທີ່ຈຳກັດຢູ່ແລ້ວ ພວກເຮົາຕ້ອງໄດ້ສຸມໃສ່ວຽກທີ່ສະພາໄດ້ຮັບ ຮອງໃນກອງປະຊຸມ ສ່ວນວຽກອື່ນໆຈຳເປັນຕ້ອງໄດ້ສະລໍຕົວ ໄວ້ກ່ອນ, 3) ຕ້ອງໄດ້ມີຄວາມ ເດັດດ່ຽວ, ເດັດຂາດໃນການນຳ ໃຊ້ບຸກຄະລາກອນເຂົ້າໃນການ ຈັດ ຕັ້ງປະຕິບັດບັນດາແຕ່ລະແຜນວຽກ ແລະ ສິ່ງສຳຄັນບັນ ດາບຸກຄະລາກອນຕ້ອງມີຄວາມຈິງຈັງໃນການຈັດຕັ້ງປະຕິບັດຢ່າງເດັດຂາດ. (ຂ່າວ: ສາຍນ້ຳ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110