ໜັງສືພິມ ປະຊາຊົນ

ສານປະຊາຊົນແຂວງເຊກອງ ທາບທາມບຸກຄະລາກອນຮອບທີ II

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 17/07/2021 10:33:47 ຈຳນວນຢ້ຽມຊົມ 3083 ຄັ້ງ

ເມື່ອບໍ່ດົນມານີ້, ສານປະຊາຊົນແຂວງເຊກອງໄດ້ຈັດກອງປະຊຸມທາບທາມຮ່າງບົດລາຍງານການເມືອງ, ບົດສຳຫຼວດການນຳພາລວມຂອງຄະນະໜ່ວຍພັກ ແລະ ທາບທາມບຸກຄະລາກອນຮອບທີ II ກ່ອນການດຳເນີນກອງປະຊຸມໃຫຍ່ຄັ້ງທີ IV ຂອງໜ່ວຍພັກຮາກຖານສານປະຊາຊົນແຂວງ ໂດຍການເປັນປະທານຂອງທ່ານ ສົມຈິດ ວໍລະວົງ ກຳມະການພັກແຂວງ ເລຂາໜ່ວຍພັກ ປະທານສານປະຊາຊົນແຂວງ; ມີຮອງເລຂາ-ຄະນະໜ່ວຍພັກ, ສະມາຊິກພັກ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມທ່ານ ສົມຈິດ ວໍລະວົງ ໄດ້ຜ່ານຮ່າງລາຍງານໂດຍຫຍໍ້ກ່ຽວກັບການກະກຽມເນື້ອໃນບົດລາຍງານການເມືອງ, ບົດສຳຫຼວດການນຳພາລວມຂອງຄະນະໜ່ວຍພັກສານປະຊາຊົນແຂວງ ຊຸດທີ III ໂດຍສະເພາະແມ່ນເນື້ອໃນທີ່ໄດ້ປັບປຸງຕາມການປະກອບຄຳເຫັນຂອງຜູ້ແທນໃນການທາບທາມຮອບທີ I ໃຫ້ມີຄວາມຮັດກຸມ, ຄົບຖ້ວນ, ຖືກຕ້ອງຕາມຄວາມເປັນຈິງ, ປັບປຸງບາງເນື້ອໃນຮ່າງລາຍງານການເມືອງທີ່ສຳຄັນ. ທັງນີ້, ກໍເພື່ອສ່ອງແສງເຖິງວິໃສທັດ, ຍຸດທະສາດ, ທິດທາງ ແລະ ຮັບໃຊ້ໜ້າທີ່ໃນການພັດທະນາເສດຖະກິດ-ສັງຄົມ ຊຶ່ງບົດລາຍງານດັ່ງກ່າວ ຈະໄດ້ຕີລາຄາຜົນສຳເລັດແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ຂອງໜ່ວຍພັກຮາກຖານສານປະຊາຊົນແຂວງໃນໄລຍະ 5 ປີ (2016-2020) ແລະ ກຳນົດທິດທາງແຜນການນຳພາ-ຊີ້ນຳໃນ 5 ປີຕໍ່ໜ້າ. ຈາກນັ້ນ, ກໍໄດ້ມີການຄົ້ນຄວ້າປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ ແລະ ບົດສຳຫຼວດການນຳພາລວມຂອງຄະນະໜ່ວຍພັກຄັ້ງທີ III ຕື່ມອີກ.

ໃນຕອນທ້າຍທ່ານ ເພັດສະຫວັນ ເຍືອນບຸນ ຮອງຫົວໜ້າຂະແໜງປ້ອງກັນພັກ-ພະນັກງານ ແລະ ກົດລະບຽບພັກ ຄະນະຈັດຕັ້ງແຂວງ ໄດ້ຜ່ານມາດຖານເງື່ອນໄຂຜູ້ສະໝັກເຂົ້າໃນໂຄງປະກອບຄະນະໜ່ວຍພັກສານປະຊາຊົນແຂວງຄັ້ງທີ IV ເພື່ອຄັດເລືອກໃຫ້ໄດ້ບຸກຄະລາກອນທີ່ມີເງື່ອນໄຂ, ມີຄວາມຮູ້ຄວາມສາມາດ, ມີປະສົບການ ແລະ ສາມາດນຳພາ-ຊີ້ນຳ ກໍຄືການພັດທະນາວຽກງານສານປະຊາຊົນໃຫ້ນັບມື້ດີຂຶ້ນເປັນກ້າວໆ ແລະ ກໍໄດ້ດຳເນີນການປ່ອນບັດທາບທາມບຸກຄະລາກອນຮອບທີ II ເພື່ອກຽມເຂົ້າສູ່ການດຳເນີນກອງປະຊຸມໃຫຍ່ຄັ້ງທີ IV ຂອງໜ່ວຍພັກຮາກຖານສານປະຊາຊົນແຂວງທີ່ຈະເປີດຂຶ້ນໃນມໍ່ໆນີ້.