ໜັງສືພິມ ປະຊາຊົນ

ຮສສ ສະຫຼຸບຜົນງານປະຈຳປີ

ເຜີຍແຜ່ໂດຍ: siththiphone rasphone ເວລາ: 28/01/2020 08:47:28 ຈຳນວນຢ້ຽມຊົມ 883 ຄັ້ງ

ກອງປະຊຸມວິຊາການແຮງງານ ແລະ ສະຫວັດດີການສັງຄົມ ທົ່ວປະເທດ ປະຈໍາປີ 2019 ໄດ້ເປີດຂຶ້ນໃນລະ ຫວ່າງວັນທີ 27-28 ມັງກອນ ນີ້ທີ່ນະຄອນຫຼວງວຽງຈັນ ພາຍໃຕ້ ການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ຊຶ່ງມີພະນັກງານອ້ອມຂ້າງກະຊວງເຂົ້າຮ່ວມ.
ທ່ານ ຄຳແພງ ໄຊສົມແພງ ກ່າວວ່າ: ກອງປະຊຸມວິຊາການແຮງງານ ແລະ ສະຫວັດດີການສັງຄົມ ທົ່ວປະເທດ ປະຈຳປີ 2019 ຄັ້ງນີ້ ແມ່ນໄດ້ພ້ອມຮັບຟັງການສະຫຼຸບຕີລາຄາການຈັດຕັ້ງປະຕິບັດວຽກແຮງງານ ແລະ ສະຫວັດດີການສັງຄົມ ປີ 2019 ແລະ ທິດທາງແຜນການ ປີ 2020 ຊຶ່ງເປັນປີມ້ວນທ້າຍຂອງແຜນ 5 ປີ ຂອງ ຮສສ ແລະ ກຳລັງຄົ້ນຄ້ວາສ້າງຮ່າງແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ V ໄລຍະປີ 2021-2025 ລວມທັງການສະເໜີບົດວິຊາການຕ່າງໆ ເພື່ອສ້າງຄວາມຮັບຮູ້ເຂົ້້າໃຈ ໃຫ້ກວ້າງຂວາງກວ່າເກົ່າ ແລະ ວາງມາດຕະການຕ່າງໆ ໃນການ ຈັດຕັ້ງປະຕິບັດບັນດາຄາດໝາຍວຽກແຮງງານ ແລະ ສະຫວັດດີການສັງຄົມ ຕາມທີ່ໄດ້ກຳນົດໄວ້ ໃຫ້ມີປະສິດທິຜົນດີຂຶ້ນ. ພ້ອມນັ້ນກອງປະຊຸມຍັງໄດ້ເປີດໂອກາດໃຫ້ ຜູ້ແທນກອງປະຊຸມຄົ້ນຄ້ວາປະກອບຄຳເຫັນ ໃສ່ເນື້ອໃນເອກກະສານ ທີ່ໄດ້ນຳສະເໜີຕໍ່ກອງປະຊຸມ ເພື່ອໃຫ້ມີຄວາມເປັນເອກະພາບໃນດ້ານຄວາມຮັບຮູ້ ດ້ານວິຊາການໃຫ້ຫຼາຍຂຶ້ນ, ພ້ອມກັນຊອກໃຫ້ເຫັນທາງອອກ, ມີວິທີການ ແລະ ມາດຕະການ ໃນການແກ້ໄຂບັນຫາ ທີ່ຍັງເປັນຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ເພື່ອສ້າງຄວາມເຂັ້ມແຂງໃນການຈັດຕັ້ງປະຕິບັດບັນດາຄາດໝາຍສູ້ຊົນ ຕາມທີ່ໄດ້ກຳນົດໄວ້ໃນທິດທາງແຜນການປີ 2020 ໃຫ້ບັນລຸຜົນສຳເລັດຕາມແຜນທີ່ວາງໄວ້. (ຂ່າວ: ຕຸໄລເພັດ)