ໜັງສືພິມ ປະຊາຊົນ

ສະພາປະຊາຊົນແຂວງສາລະວັນ ສຳເລັດກອງປະຊຸມ ສະໄໝສາມັນ ເທື່ອທີ 8

ເຜີຍແຜ່ໂດຍ: siththiphone rasphone ເວລາ: 28/01/2020 08:49:03 ຈຳນວນຢ້ຽມຊົມ 864 ຄັ້ງ

ໃນອາທິດທີ່ຜ່ານມານີ້ ສະພາປະຊາຊົນແຂວງສາລະວັນໄດ້ສຳເລັດກອງປະຊຸມສະໃໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ I ພາຍຫຼັງໄດ້ດຳເນີນມາເປັນເວລາ 3 ວັນ (ວັນທີ 22-24 ມັງກອນ) ທີ່ສະໂມສອນແຂວງ ໂດຍການເປັນປະທານຂອງ ທ່ານ ຄຳເຫຼັກ ອິນດາວົງ ກຳມະການພັກແຂວງ ປະທານສະພາປະຊາຊົນແຂວງ, ເປັນກຽດເຂົ້າຮ່ວມຂອງທ່ານ ສີສຸວັນ ວົງຈອມສີ ກໍາມະການສູນກາງພັກ ເລຂາພັກແຂວງ ເຈົ້າແຂວງໆສາລະວັນ, ທ່ານ ນາງ ສວນສະຫວັນ ວິຍະເກດ ກຳມະການສຳຮອງສູນກາງພັກ ຄະນະປະຈຳສະພາແຫ່ງຊາດ ເລຂາທິການສະພາແຫ່ງຊາດ, ມີບັນດາທ່ານສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14, ສະມາຊິກສະພາປະຊາຊົນແຂວງ, ບັນດາທ່ານຫົວໜ້າພະແນກການຕ່າງໆອ້ອມຂ້າງແຂວງ ແລະ ອົງການຈັດຕັ້ງຕ່າງໆເຂົ້າຮ່ວມ.
ກອງປະຊຸມຄັ້ງນີ້ ກໍໄດ້ຮັບຟັງການລາຍງານຂອງທ່ານເຈົ້າແຂວງໂດຍສັງເຂບກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນປະຈຳປີ 2019 ແລະທິດທາງແຜນການປະຈຳປີ 2020 ຂອງແຂວງ ແລະໄດ້ຮັບຟັງການຊີ້ແຈ້ງຈາກພະແນກການ, ອົງການຈຳນວນໜຶ່ງຊຶ່ງກອງປະຊຸມກໍໄດ້ສຸມທຸກສະຕິປັນຍາຢ່າງລວມສູນ, ຄົ້ນຄວ້າຖີຖ້ວນດ້ວຍຄວາມຮັບຜິດຊອບສູງ, ພ້ອມທັງໄດ້ລົງຄະແນນສຽງຮັບຮອງເອົາມະຕິກອງປະຊຸມຈຳນວນ 9 ສະບັບຄື: ໄດ້ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈຳປີ 2019 ແລະ ທິດທາງແຜນການປະຈຳປີ 2020 ຂອງແຂວງ, ໄດ້ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນງົບປະມານປະຈຳປີ 2019 ແລະທິດທາງແຜນການປະຈຳປີ 2020 ຂອງແຂວງ, ໄດ້ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວປະຈຳປີ 2019 ແລະທິດທາງປີ 2020, ຜົນການກວດສອບສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງປະຈຳປີ 2018 ຂອງອົງການກວດສອບປະຈຳພາກໃຕ້ ແລະ ຜົນຂອງການແກ້ໄຂຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງປະຈຳປີ 2017 ຂອງພະແນກກວດກາລັດແຂວງ, ໄດ້ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະແຜນການເຄື່ອນໄຫວວຽກງານປະຈຳປີ 2020 ຂອງອົງການໄອຍະການປະຊາຊົນແຂວງ ແລະສານປະຊາຊົນແຂວງ, ໄດ້ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການເຄື່ອນໄຫວວຽກງານປະຈຳປີ 2020 ຂອງສະພາປະຊາຊົນແຂວງ, ໄດ້ຮັບຮອງເອົາບົດລາຍງານຕິດຕາມກວດກາຂອງຄະນະປະຈຳສະພາປະຊາຊົນແຂວງກ່ຽວກັບການຈັດຕັ້ງປະຕິບັດນິຕິກຳລຸ່ມກົດໝາຍທີ່ຮັບຮອງຈາກສະພາປະຊາຊົນແຂວງ ແລະໄດ້ຮັບຮອງເອົາການປະເມີນຜົນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງທີ່ສະພາປະຊາຊົນແຂວງເລືອກຕັ້ງ ແລະ ໄດ້ຮັບຮອງເອົາການແຕ່ງຕັ້ງຈຳນວນ 29 ທ່ານ, ພ້ອມທັງໄດ້ຮັບຮອງເອົາການສະເໜີຍົກຍ້າຍ ແລະ ແຕ່ງຕັ້ງຫົວໜ້າພະແນກການຕາມການສະເໜີຂອງເຈົ້າແຂວງຈຳນວນ 3 ທ່ານ, ນອກຈາກນັ້ນກໍຍັງໄດ້ຮັບຮອງເອົານິຕິກໍາ, ຂໍ້ຕົກລົງວ່າດ້ວຍການປະເມີນລາຄາທີ່ດິນ 8 ຕົວເມືອງຂອງແຂວງສາລະວັນຕື່ມອີກ.
(ພາບ-ຂ່າວ: ສິດຕາ ເພັດວົງສາ)