ຫົວ​ຂໍ້ : ປີໃໝ່ ດານັງ ຕ້ອນຮັບແຂກທ່ອງທ່ຽວສາກົນ 1.250 ຄົນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 28/01/2020 09:02:53 ຈຳ​ນວນ​ຜູ້​ເຂົ້າ​ຢ້ຽມ​ຊົມ 346 ຄັ້ງ

  ວິທະຍຸ​ກະຈາຍສຽງ​ຫວຽດ ນາມ​ລາຍ​ງານ​ວ່າ: ວັນ​ທີ 26 ມັງກອນ​ຜ່ານ​ມາ (ກົງກັບ​ມື້​ທີ 2 ຂອງບຸນປີໃໝ່​ປະ​ຈໍາ​ຊາດ 2020), ຢູ່​ທ່າ​ກຳປັ່ນ​ຕຽນ​ຊາ,  ພະ​ແນ​ກ​ທ່ອງ​ທ່ຽວ​ນະຄອນ​ ດາ​ນັງ ທາງ​ພາກ​ກາງ​ຫວຽດນາມ ສົມທົບ​ກັບ​ສາຂາ​ບໍລິສັດ Destination Asia - ດາ​ນັງ ໄດ້​ຈັດ​ພິທີ​ຕ້ອນ​ຮັບ​ກຳປັ່ນ Westerdam ບັນທຸກ​ນັກ​ທ່ອງ​ທ່ຽວ​ສາກົນ 1.250 ຄົນ. ມາ​ຢ້ຽມຢາມ​ນະຄອນ​ດາ​ນັງ.
ຂ່າວ​ລະບຸ​ວ່າ: ນີ້​ແມ່ນ​ກຳປັ່ນ​ທ່ອງ​ທ່ຽວ​ສາກົນ​ຖ້ຽວ​ທຳອິດ​ທີ່​ເຂົ້າ​ທຽບ​ທ່າ​ດາ​ນັງ ໃນ​ໂອກາດ​ລະດູບານໃໝ່ ປີ 2020. ທ່ານ ຫ​ງວຽນ​ຊັ​ວນ​ບິນ ຮອງ​ຫົວໜ້າ​ພະ​ແນ​ກ​ທ່ອງ​ທ່ຽວ​ດາ​ນັງ ໃຫ້​ຮູ້​ວ່າ: ພິທີ​ຕ້ອນຮັບ​ບັນດາ​ແຂກ​ທ່ອງ​ທ່ຽວ​ສາກົນ​ມາດາ​ນັງ ໃນ​ໂອກາດ​ຕົ້ນ​ປີ​ໃໝ່​ປະ​ຈໍາ​ຊາດ​ຫວຽ​ດ​ນາມ ເພື່ອ​ແນໃສ່​ສ້າງ​ຄວາມ​ປະທັບ​ໃຈ​ອັນ​ດີງາມ, ໂຄສະນາ​ພາບ​ພົດ​ນະຄອນ​ດາ​ນັງ ທີ່​ຮັກແພງ​ແຂກ​ຄົນ. ໃນ​ປີ 2020, ຂະແໜງ​ທ່ອງ​ທ່ຽວ​ນະຄອນ​ດາ​ນັງ ຈະ​ເພີ່ມ​ທະວີ​ວຽກ​ງານ​ສົ່ງເສີມ, ໂຄສະນາ, ສົມທົບ​ກັບ​ບັນດາ​ບໍລິສັດ​ກຳປັ່ນ ແລະ ວິ​ສາ​ຫະ​ກິດ​ທ່ອງ​ທ່ຽວ ເພື່ອ​ໂຄສະນາ​ຈຸດ​ນັດ​ພົບ​ແມ່ນ​ນະຄອນ​ດາ​ນັງ, ປະກອບສ່ວນ​ຊຸກຍູ້​ຂະແໜງ​ທ່ອງ​ທ່ຽວ​ນະຄອນ​ດາ​ນັງ​ໃຫ້​ພັດ​ທະ​ນາ. ປີ 2020, ດາ​ນັງ ໄດ້​ວາງ​ຄາດໝາຍ​ຕ້ອນຮັບ​ນັກ​ທ່ອງ​ທ່ຽວ​ໃຫ້​ບັນລຸ 9,8 ລ້ານ​ເທື່ອ​ຄົນ ແລະ ນຳ​ຂະແໜງ​ທ່ອງ​ທ່ຽວ​ກາຍເປັນ​ຂະແໜງ​ປາຍ​ແຫຼມ​ຂອງ​ທ້ອງ​ຖິ່ນ.
  ຂະນະ​ດຽວ​ກັນ​ນັ້ນ, ໃນ​ມື້​ທໍາ​ອິດ​ປີ​ໃໝ່​ປະ​ຈໍາ​ຊາດ​ຫວຽດນາມ 2020, ຢູ່​ທ່າ​ກໍາ​ປັ່ນ​ຮັບແຂກ​ສາກົນ ຕ່ວນ​ເຈົາ ນະຄອນ​ຮາ​ລອງ ແຂວງ​ກວ້າງ​ນິງ, ມີ​ນັກ​ທ່ອງ​ທ່ຽວ​ທີ່​ມາ​ຈາກ​ຝຣັ່ງ, ຍີ່ປຸ່ນ ແລະ ໄຕ້​ຫວັນ (ຈີນ) ຈຳນວນ 60 ຄົນ ໄດ້​ມາ​ທ່ອງ​ທ່ຽວ​ແຂວງ​ກວາງ​ນິງ ໃນ​ໂອກາດ​ປີ​ໃໝ່ 2020, ລວມ​ແລ້ວ​ມີ​ນັກ​ທ່ອງ​ທ່ຽວ 10.000 ຄົນ​ແວ່​ທ່າ​ກໍາ​ປັ່ນ​ດັ່ງ​ກ່າວ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110