ໜັງສືພິມ ປະຊາຊົນ

ນາຍົກອັງກິດ ລົງນາມໃນຂໍ້ຕົກລົງ Brexit

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 28/01/2020 09:04:29 ຈຳນວນຢ້ຽມຊົມ 457 ຄັ້ງ

ວິທະຍຸກະຈາຍສຽງຫວຽດ ນາມລາຍງານວ່າ: ການລົງນາມໃນສັນຍາ Brexit ຈະເປັນການເປີດໜ້າປະຫວັດສາດໃໝ່ຂອງອັງກິດ.
ຂ່າວລະບຸວ່າ: ທ້າຍອາ ທິດຜ່ານມາ, ທ່ານ ອູຊູລາ ວອນເດີເລເຢນ ປະທານຄະນະກຳມະການເອີຣົບ ແລະ ທ່ານ ໂບຣິສ ຈອນຊັນ ນາຍົກລັດ ຖະມົນຕີອັງກິດ ໄດ້ລົງນາມໃນຂໍ້ຕົກລົງວ່າດ້ວຍ ອັງກິດຖອນ ຕົວອອກຈາກສະຫະພາບເອີຣົບ (Brexit), ເປີດຊ່ອງທາງໃຫ້ລັດຖະສະພາເອີຣົບຮັບຮອງ ເອົາຂໍ້ຕົກລົງດັ່ງກ່າວ.
ພາຍຫຼັງພິທີລົງນາມ, ທ່ານ ຈອນຊັນ ໄດ້ຢືນຢັນວ່າ: ການລົງນາມໃນສັນຍາ Brexit, ສຸດທ້າຍກໍໄດ້ຮັບການປະຕິບັດ ບົນພື້ນຖານອີງໃສ່ການລົງປະຊາມະຕິປີ 2016 ແລະ ຊ່ວຍຢຸດຕິການໂຕ້ຖຽງກັນມາເປັນເວລາຫຼາຍປີ, ນີ້ແມ່ນຈຸດເວລາອັນດີງາມ. ທ່ານ ຈອນຊັນ ໃຫ້ຮູ້ຕື່ມວ່າ: ເຫດການດັ່ງກ່າວຈະເປັນການເປີດໜ້າປະຫວັດສາດໃໝ່ຂອງອັງກິດ. ທ່ານ ຈອນຊັນ ຄາດວ່າ: ວັນທີ 29 ມັງກອນນີ້, ເອກະສານກ່ຽວກັບ Brexit ຈະໄດ້ໃຫ້ສັດຕະຍາບັນທີ່ລັດຖະສະພາເອີຣົບ. ຫຼັງຈາກນັ້ນ, ໃນວັນທີ 30 ມັງກອນ, ວົງການນັກການທູດບັນດາປະເທດສະມາຊິກຂອງສະຫະພາບເອີຣົບ ຈະດຳເນີນການປ່ອນບັດກ່ຽວກັບມະຕິດັ່ງກ່າວ. ພາຍຫຼັງປະຕິບັດສຳເລັດບັນດາລະບຽບການທີ່ຈຳເປັນ, ອັງກິດ ຈະຖອນຕົວອອກຈາກສະຫະພາບເອີຣົບ ໃນວັນທີ 31 ມັງກອນ ປີ 2020.