ປະກາດສ້າງຕັ້ງ ອົງການໄອຍະການປະຊາຊົນເຂດ III (ອຍກ ເຂດ III) ແຂວງສາລະວັນ ໄດ້ຈັດຂຶ້ນໃນວັນທີ 21 ກໍລະກົດຜ່ານມານີ້ ທີ່​ເມືອງ​ຕະ​ໂອ້ຍ ແຂວງ​ດັ່ງ​ກ່າວ ໂດຍການເຂົ້າຮ່ວມຂອງ ທ່ານ ສີເຮັ່ງ ຫອມສົມບັດ ຮອງເລຂາຄະນະບໍລິຫານພັກແຂວງ ປະທານສະພາແຂວງ ຜູ້ຊີ້ນໍາວຽກງານກົດໝາຍ, ທ່ານ ພຸດທະວົງ ບົວລະພາ ຫົວໜ້າຫ້ອງການ ອົງການໄອຍະການປະຊາຊົນສູງສຸດ (ອອປສ), ມີບັນດາຄະນະປະຈໍາພັກແຂວງ, ເມືອງເຂົ້າຮ່ວມ.

ໃນພິທີ ທ່ານ ຄໍານຸທອນ  ສູນວິເລີດ ຮອງຫົວໜ້າກົມຈັດຕັ້ງ-ພະນັກງານ ອອປສ ໄດ້ຜ່ານຂໍ້ຕົກລົງວ່າດ້ວຍການສ້າງຕັ້ງອົງການໄອຍະການປະຊາຊົນເຂດ III ແຂວງສາລະວັນ ຊຶ່ງຕັ້ງ​ຢູ່​ເມືອງ​ຕະ​ໂອ້ຍ ປະ​ກອບມີ 3 ເມືອງ​ທີ່ຂຶ້ນກັບຄື: ເມືອງຕະໂອ້ຍ, ເມືອງຕຸ້ມລານ ແລະ ເມືອງສະໝ້ວຍ, ຜ່ານຂໍ້ຕົກລົງວ່າດ້ວຍການຍົກຍ້າຍ ແລະ ແຕ່ງຕັ້ງຫົວໜ້າ ອຍກ ເຂດ III ​ຊຶ່ງເຫັນດີແຕ່ງຕັ້ງ ທ່ານ ດອກທອງວິໄລ ສິນທະລາ ເປັນຫົວໜ້າ ອຍກ ເຂດ III; ແຕ່ງຕັ້ງ ທ່ານ ພົງສະຫວັດ ແກ້ວດາລາແສງ ເປັນຮອງຫົວໜ້າ ແລະ ຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າຫ້ອງການ ອຍກ ເຂດ III  ​ຊຶ່ງແຕ່ງຕັ້ງ  ທ່ານ ຕຸນີ ວິລະສານ ເປັນຫົວໜ້າຫ້ອງການ;  ຂໍ້ຕົກລົງການແຕ່ງຕັ້ງພະນັກງານປະກອບເຂົ້າໃສ່ກົງຈັກການຈັດຕັ້ງ, ຮອງຫ້ອງການ ແລະ ໜ່ວຍງານວິຊາການ ອຍກ ເຂດ III ປະກອບມີ: ຫ້ອງການມີ 3 ທ່ານ; ໜ່ວຍງານວິຊາການມີ 7 ທ່ານ.

 ໃນພິທີ, ທ່ານ ພຸດທະວົງ ບົວລະພາ ໄດ້ໃຫ້ຄໍາໂອ້ລົມຕໍ່ຄະນະຊຸດໃໝ່ທີ່ໄດ້ຮັບໜ້າທີ່ ຊຶ່ງທ່ານໄດ້ສະ​ແດງ​ຄວາມຊົມເຊີຍຕໍ່ກັບຜູ້ທີ່ໄດ້ຮັບຕຳແໜ່ງ​ໃໝ່ ທີ່ໄດ້ມີຜົນງານໃນການປະຕິບັດວຽກງານຂອງຕົນ ໃນໄລຍະຜ່ານມາດ້ວຍຄວາມເອົາໃຈໃສ່ ຊຶ່ງການປັບປຸງກົງຈັກການຈັດຕັ້ງໃນຄັ້ງນີ້ ແມ່ນອີງໃສ່ 5 ດ້ານຕົ້ນຕໍຄື: ດ້ານການຈັດຕັ້ງໄດ້ມີການຄົ້ນຄວ້າຈາກຄະນະນຳຂັ້ນສູງ ຂອງອົງການໄອຍະການປະຊາຊົນສູງສຸດ, ດ້ານສະພາບແນວຄິດຂອງພະນັກງານ, ດ້ານຄວາມສາມັກຄີ, ດ້ານວິຊາສະເພາະ ແລະ ດ້ານແບບແຜນວິທີເຮັດວຽກ.

 ໃນໂອກາດດັ່ງກ່າວ, ກໍໄດ້ມອບເຄື່ອງຮັບໃຊ້ຫ້ອງການ ແລະ ງົບປະມານຮັບໃຊ້ເບື້ອງຕົ້ນຈໍານວນ 268 ລ້ານກີບ ໃຫ້ແກ່ອົງການໄອຍະການປະຊາຊົນເຂດ III ແຂວງສາລະວັນ.

(ຂ່າວ: ຍຸ​ພິນ​ທອງ, ພາບ: ສຸ​ພາ​ວະ​ດີ)