ໜັງສືພິມ ປະຊາຊົນ

ແນວລາວສ້າງຊາດ ເມືອງໜອງບົກ ສຳເລັດກອງປະຊຸມໃຫຍ່ ຄັ້ງທີ VI

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 28/01/2020 09:27:27 ຈຳນວນຢ້ຽມຊົມ 984 ຄັ້ງ

ແນວລາວສ້າງຊາດເມືອງ ໜອງບົກແຂວງຄຳມ່ວນໄດ້ ໄດ້ສຳເລັດກອງປະຊຸມໃຫຍ່ຜູ້ແທນແນວລາວສ້າງຊາດ ຄັ້ງທີ 6 ຫວ່າງແລ້ວນີ້ ທີ່ສະໂມສອນໃຫຍ່ເມືອງດັ່ງກ່າວ ໂດຍເປັນກຽດເຂົ້າຮ່ວມມີທ່ານ ຈັນ ບຸບຜາລີວັນ ກໍາມະການພັກແຂວງ ປະທານແນວລາວສ້າງ ຊາດແຂວງ, ພະນັກງານອາວຸໂສບໍານານ, ຫົວໜ້າ, ຮອງຫົວ ໜ້າຫ້ອງການຕ່າງໆອ້ອມຂ້າງເມືອງເຂົ້າຮ່ວມ.
ກອງປະຊຸມໃຫຍ່ຄັ້ງນີ້, ທ່ານ ການິນ ອິນທະລາ ປະ ທານແນວລາວສ້າງຊາດເມືອງ ໜອງບົກ ໄດ້ຜ່ານບົດລາຍງານ ການເມືອງ ຜົນການຈັດຕັ້ງປະ ຕິບັດມະຕິກອງປະຊຸມໃຫຍ່ຄັ້ງ ທີ 5 ຜູ້ແທນແນວລາວສ້າງຊາດ ເມືອງໜອງບົກ ເປັນຕົ້ນແມ່ນ ບັນດາຜົນງານອັນພົ້ນເດັ່ນທີ່ຍາດມາໄດ້ ໃນໄລຍະ 5 ປີ ຜ່ານ ມາ ໄດ້ປະກອບສ່ວນສຳຄັນເຂົ້າ ໃນການສ້າງພື້ນຖານ ແລະ ທ່ວງທ່າໃໝ່ໃຫ້ແກ່ການສືບຕໍ່ ເຕົ້າໂຮມຄວາມສາມັກຄີປະຊາ ຊົນບັນດາເຜົ່າໃຫ້ເປັນປຶກແຜ່ນ ແໜ້ນໜາກໍຄືການຂະຫຍາຍ ຕົວທາງດ້ານເສດຖະກິດ-ສັງ ຄົມ ພາຍໃນເມືອງຂອງພວກເຮົາໄປຕາມທິດ ແລະ ຈຸດໝາຍທີ່ວາງໄວ້. ກອງປະຊຸມຍັງໄດ້ຮັບ ຟັງການປະກອບຄໍາຄິດຄໍາເຫັນຈາກຕາງໜ້າປະທານແນວລາວສ້າງຊາດເມືອງອ້ອມຂ້າງ ພ້ອມກັນນັ້ນກໍໄດ້ຜ່ານບົດສໍາຫຼວດກ່າວລາໜ້າທີ່ຂອງຄະນະກໍາມະການແນວລາວສ້າງຊາດເມືອງຊຸດເກົ່າ ພ້ອມທັງເປັນເອກະສັນຮັບຮອງເອົາໜ້າ ທີ່ວຽກງານຈຸດສຸມຕົ້ນຕໍແຕ່ປີ 2020- 2024 ໂດຍຈະເພີ່ມທະ ວີວຽກງານເຕົ້າໂຮມຄວາມສາ ມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ ແລະ ເພດ -ໄວທົ່ວປວງຊົນພາຍ ໃນເມືອງ ໃຫ້ໜັກແໜ້ນ. ຕັ້ງໜ້າໂຄສະ ນາ, ປຸກລະດົມທົ່ວປວງຊົນປະ ກອບສ່ວນເຂົ້າຮ່ວມຈັດຕັ້ງປະ ຕິບັດຂະບວນການແຂ່ງຂັນຮັກຊາດ ແລະ ພັດທະນາຕາມທິດ 3 ສ້າງ ຕິດພັນກັບຂະບວນການ ສ້າງຄອບຄົວ ແລະ ບ້ານສາມັກ ຄີປອງດອງຂອງແນວລາວສ້າງຊາດໃຫ້ເປັນຂະບວນຟົດຟື້ນ. ເອົາໃຈໃສ່ປັບປຸງແບບແຜນວິ ທີເຮັດວຽກຂອງຄະນະກໍາມະ ການແນວລາວສ້າງຊາດເມືອງ ໃຫ້ມີປະສິດທິຜົນ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່.
ກອງປະຊຸມໃຫຍ່ຜູ້ແທນແນວລາວສ້າງຊາດເມືອງ ໜອງບົກ ຄັ້ງທີ VI ນີ້ ໄດ້ເປັນເອກະ ສັນກັນຢ່າງສົມບູນຮັບຮອງເອົາການສະເໜີແຕ່ງຕັ້ງຄະນະກໍາມະການແນວລາວສ້າງຊາດຊຸດ ໃໝ່ ຈໍານວນ 69 ສະຫາຍ, ຍິງ 5 ສະຫາຍ, ພະສົງ 1 ອົງ, ໃນນັ້ນແຕ່ງຕັ້ງຄະນະປະຈໍາ 5 ທ່ານ, ຍິງ 1 ທ່ານ. ແຕ່ງຕັ້ງປະທານ, ຮອງປະທານແນວລາວສ້າງຊາດເມືອງ 3 ທ່ານ. ໃນນີ້, ທ່ານ ເດດອຸດົມ ລັດຖະຈັກ ເປັນ ປະທານ, ສະຫາຍ ສອນໄຊ ເພັດຊະຣາດ ແລະ ສະຫາຍ ສີພັນດອນ ສານຸວົງ ເປັນຮອງປະທານແນວລາວສ້າງຊາດເມືອງໜອງບົກ.
ຕອນທ້າຍພິທີ ໄດ້ຮັບຟັງການໂອ້ລົມຂອງທ່ານ ປະທານແນວລາວສ້າງຊາດແຂວງ ຊຶ່ງທ່ານກໍໄດ້ສະແດງຄວາມຍ້ອງຍໍຊົມເຊີຍ ມາຍັງຄະນະກໍາມະການແນວລາວສ້າງ ຊາດເມືອງຊຸດເກົ່າ ຕໍ່ກັບຜົນງານທີ່ຍາດມາໄດ້ ຕະຫຼອດໄລຍະ 5 ປີຜ່ານ ມາ ພ້ອມນັ້ນກໍຍັງຮຽກຮ້ອງມາຍັງ ຜູ້ເຂົ້າຮ່ວມກອງປະຊຸມໃຫ້ພ້ອມກັນເອົາໃຈໃສ່ເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ ພາຍໃນບ້ານຂອງຕົນໃຫ້ມີຄວາມສາມັກຄີປອງດອງກັນ ເປັນປຶກແຜ່ນແໜ້ນໜາ ຄຽງຄູ່ໄປກັບການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ.
(ຂ່າວ-ພາບ: ມະນີວອນ)