ຫົວ​ຂໍ້ : ວິກິດອາກາດທຳລາຍ GDP ໂລກຫຼາຍກວ່າ 50%

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 29/01/2020 09:14:06 ຈຳ​ນວນ​ຜູ້​ເຂົ້າ​ຢ້ຽມ​ຊົມ 298 ຄັ້ງ

ຮຽບຮຽງ​ໂດຍ: ວິໄລ​ພອນ ເພັດ​ໄພບູນ

  ວິ​ກິດ​ສະພາບ​ອາກາດ​ທີ່​ຮຸນ​ແຮງ​ຂຶ້ນ ໄດ້​ສ້າງ​ຄວາມ​ເສຍ​ຫາຍ​ໃຫ້​ກັບ​ສະ​ພາບ​ທໍາ​ມະ​ຊາດ​ທີ່​ເປັນ​ອັນຕະລາຍ​ຕໍ່​ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ຂອງ​ໂລກ​ຫຼາຍ​ກວ່າ​ເຄິ່ງ​ໜຶ່ງ.
  ເວັ​ບ​ໄຊ​ຊີ​ເອັນ​ບີ​ຊີ ໄດ້​ລາຍ​ງານ​ວ່າ: ໃນ​ວາລະ​ກອງ​ປະຊຸມ​ປະຈຳ​ປີ​ຂອງ​ເວທີ​ປາ​ໄສ​ເສດຖະກິດ​ໂລກ (WEF) ຢູ່​ນະຄອນ​ດາ​ໂວສ ປະເທດ​ສະ​ວິດ​ໃນ​ທ້າຍ​ເດືອນ​ມັງກອນ​ນີ້. ຕາມ​ບົດ​ລາຍ​ງານ WEF ວ່າ​ດ້ວຍ​ຫົວຂໍ້; “ເສດຖະກິດ​ທຳ​ມະ​ຊາດ​ໃໝ່” ພົບ​ວ່າ: ໃນ​ປີ 2019 ເປັນ​ປີ​ທີ່​ມະຫາ​ສະໝຸດ​ໂລກ​ຮ້ອນ​ທີ່​ສຸດ​ເປັນ​ປະຫວັດສາດ, ອຸນຫະພູມ​ສະເລ່ຍ​ຂອງ​ໂລກ​ສູງ​ສຸດ​ເປັນ​ປີ​ທີ 2 ແລະ ເກີດ​ໄຟ​ປ່າ​ຫຼາຍ​ພື້ນ​ທີ່​ນັບ​ຕັ້ງແຕ່ ອາ​ເມ​ຣິ​ກາ ໄປ​ຈົນ​ເຖິງ​ປ່າ​ອາ​ເມ​ຊອນ ແລະ ອົສ​ຕຣາ​ລີ ສ້າງ​ຄວາມ​ເສຍ​ຫາຍ​ໃຫ້​ກັບ​ເສດ​ຖະ​ກິດ ໂລກຫຼາຍ​ກວ່າ​ເຄິ່ງ​ໜຶ່ງ. ເນື່ອງ​ຈາກ​ຜົນ​ຜະລິດ​ເຫຼົ່າ​ນີ້ ຄິດ​ເປັນ​ມູນ​ຄ່າ​ທາງ​ເສດຖະກິດ​ບັນລຸ 44 ລ້ານໆ​ໂດ​ລາ ຕ້ອງ​ອາໄສ​ທຳ​ມະ​ຊາດ​ໃນ​ລະດັບ​ປານ​ກາງ ຫຼື ລະດັບ​ສູງ​ກວ່າ ຈຶ່ງ​ເກີດ​ຄວາມ​ສ່ຽງ​ຖ້າ​ຫາກ​ທຳ​ມະ​ຊາດ​ເສຍ​ຫາຍ.
  ບົດ​ລາຍ​ງານ​ລະບຸ​ວ່າ: ການ​ກໍ່ສ້າງ​ຄິດ​ເປັນ​ມູນ​ຄ່າ 4 ລ້ານໆ​ໂດ​ລາ, ການ​ກະເສດ 2,5 ລ້ານໆ​ໂດ​ລາ ແລະ ອາຫານ​ເຄື່ອງ​ດື່ມ 1,4 ລ້ານໆ​ໂດ​ລາ ຊຶ່ງ​ເປັນ 3 ອຸດສາຫະກຳ​ໃຫຍ່​ທີ່​ອາໄສ​ທຳ​ມະ​ຊາດ​ຫຼາຍ​ທີ່​ສຸດ ເມື່ອ​ໂຮມ​ເຂົ້າກັນ​ມູນ​ຄ່າ​ຂອງ​ທຸລະ​ກິດ​ເຫຼົ່າ​ນີ້​ໃຫຍ່​ກວ່າ​ເສດຖະກິດ​ເຢຍ​ລະ​ມັນ ປະມານ 2 ເທົ່າ. ທັງ 3 ອຸດສາຫະກຳ ເຖິງ​ວ່າ​ບໍ່​ໄດ້​ອາໄສ​ທຳ​ມະ​ຊາດ​ທາງ​ກົງ​ເຊັ່ນ: ໃຊ້​ຊັບພະຍາກອນ​ຈາກ​ປ່າ ແລະ ມະຫາ​ສະໝຸດ ແຕ່​ກໍ​ອາໄສ​ທາງ​ອ້ອມ​ຄື: ລະບົບ​ນິເວດ​ຂອງ​ອຸດ​ສາ​ຫະ​ກໍາ​ຕ້ອງ​ໃຊ້​ດິນ​ດີ, ນໍ້າ​ສະອາດ, ການ​ຖ່າຍ​ລະອອງ​ເກສອນ ແລະ ສະພາບ​ອາກາດ​ທີ່​ແນ່​ນອນ. ດັ່ງນັ້ນ, ຖ້າ​ທຳ​ມະ​ຊາດ​ເສຍ​ຫາຍ ຄວາມ​ສາມາດ​ຂອງ​ອຸດ ສາຫະກຳ​ເຫຼົ່າ​ນີ້ ຈະ​ຕ້ອງ​ປ່ຽນ​ແປງ.
 ບົດ​ລາຍ​ງານ​ໄດ້​ແຍກ​ໃຫ້​ເຫັນ​ຢ່າງ​ຊັດ​ເຈນ​ວ່າ: ອຸດ​ສາ​ຫະ​ກໍາ​ທີ່​ອາໄສ​ທຳ​ມະ​ຊາດ​ສູງ ສ້າງ​ລາຍ​ໄດ້​ກວມ 15% ຂອງ GDP ໂລກ, ຄິດ​ເປັນ​ມູນ​ຄ່າ​ບັນລຸ 13 ລ້ານໆ​ໂດ​ລາ. ສ່ວນ​ອຸດສາຫະກຳ​ທີ່​ອາໄສ​ທຳ​ມະ​ຊາດ​ປານ​ກາງ ສ້າງ​ລາຍ​ໄດ້​ປະມານ 37% ຂອງ GDP ໂລກ, ຄິດ​ເປັນ​ມູນ​ຄ່າ​ບັນລຸ 31 ລ້ານໆ​ໂດ​ລາ.
ທ່ານ ໂຄ​ມິ​ນິກ ວາ​ເກ​ຣ ກຳມະການ​ຜູ້​ຈັດການ WEF ກ່າວ​ວ່າ: ພວກ​ເຮົາ​ຈຳເປັນ​ຕ້ອງ​ກຳນົດ​ຄວາມ​ສຳພັນ ລະຫວ່າງ ມະນຸດ​ກັບ​ທຳ​ມະ​ຊາດ​ຄືນໃໝ່, ຈະ​ຕ້ອງ​ບໍ່​ເບິ່ງ​ໄປ​ໃນ​ທາງ​ທີ່​ວ່າ ທໍາ​ມະ​ຊາດ​ເສຍ​ຫາຍ ແມ່ນ​ເກີດ​ຈາກ​ກິດຈະກຳ​ທາງ​ເສດຖະກິດ​ຈະ​ບໍ່​ແມ່ນ​ເລື່ອງ​ພາຍ​ນອກ​ອີກ​ຕໍ່​ໄປ. ບົດ​ລາຍ​ງານ​ສະບັບ​ນີ້ ໄດ້​ຊີ້​ໃຫ້​ເຫັນ​ວ່າ: ທໍາ​ມະ​ຊາດ​ເສຍ​ຫາຍ ໄດ້​ສົ່ງ​ຜົນ​ກະທົບ​ຕໍ່​ທຸລະ​ກິດ​ທຸກ​ພາກສ່ວນ ແລະ ຍັງ​ເປັນຄວາມ​ສ່ຽງ​ຕໍ່​ຄວາມ​ໝັ້ນຄົງ​ທາງ​ດ້ານ​ເສດຖະກິດ​ໃນ​ອະນາຄົດ​ຂອງ​ພວກ​ເຮົາ​ອີກ​ດ້ວຍ.
  ອົງການ​ສະຫະ​ປະຊາ ຊາດ (ສປຊ) ຍອມຮັບ​ວ່າ: ການ​ປ່ຽນແປງ​ຂອງ​ສະພາບ​ດິນ​ຟ້າ​ອາກາດ ເປັນ​ບັນຫາ​ສຳຄັນ​ໃນ​ຍຸກ​ສະໄໝ​ນີ້, ເມື່ອ​ບໍ່​ດົນ​ມາ​ນີ້ ສປຊ ໄດ້​ເອີ້ນ​ວິ​ກິດ​ສະພາບ​ອາກາດ​ວ່າ; “ຄວາມ​ທ້າ​ທາຍ​ໃຫຍ່​ທີ່​ສຸດ​ຕໍ່​ການ​ພັດທະນາ​ແບບ​ຍືນ​ຍົງ”. ບົດ​ລາຍ​ງານ​ສະບັບ​ກ່ອນ​ຂອງ WEF ໄດ້​ເປີດເຜີຍ​ວ່າ: ການ​ປ່ຽນແປງ​ຂອງ​ສະພາບ​ດິນ​ຟ້າ​ອາກາດ ຈະ​ສົ່ງ​ຜົນ​ກະທົບ​ຕໍ່​ຊຸມ​ຊົນ, ສັງຄົມ, ບໍລິສັດ​ເອກະ​ຊົນ ຕະຫຼອດ​ຈົນ​ຮອດ​ໜ່ວຍ​ງານ​ລັດຖະບານ, ເປັນ​ການ​ສ້າງ​ບັນຫາ​ໃຫ້​ແກ່​ບໍລິສັດ​ຂະໜາດ​ໃຫຍ່​ທີ່​ສຸດ​ຂອງ​ໂລກ​ຈໍາ​ນວນ​ຫຼາຍ​ກວ່າ 200 ແຫ່ງ ຊຶ່ງ​ຕ້ອງ​ລົງທຶນ​ເປັນ​ເງິນ 1 ລ້ານໆ​ໂດ​ລາ ໃນ​ໄລຍະ 5 ປີ​ຂ້າງ​ໜ້າ. ຖ້າ​ຫາກ​ບໍ່​ມີ​ການ​ດຳເນີນ​ການ​ຢ່າງໃດ​ໜຶ່ງ ເພື່ອ​ແກ້​ບັນຫາ​ໂລກ​ຮ້ອນ​ຢ່າງ​ເຫັນ​ຜົນ. ນອກຈາກ​ນີ້, WEF ຍັງ​ລະບຸ​ວ່າ: ສໍາ​ລັບ​ປະເທດ​ທີ່​ກຳລັງ​ພັດທະນາ, ໃນ​ແຕ່​ລະ​ປີ​ຕ້ອງ​ໃຊ້​ງົບປະມານ 300.000 ລ້ານ​ໂດ​ລາ ເພື່ອ​ຮັບ​ມື​ກັບ​ຜົນ​ກະທົບ​ທີ່​ເກີດ​ຈາກ​ສະພາບ​ອາກາດ​ປ່ຽນ​ແປງ. ພາຍ​ໃນ​ທ້າຍ​ສະຕະວັດ​ນີ້, ບັນຫາ​ສະພາບ​ອາກາດ​ທີ່​ປ່ຽນແປງ ຈະ​ສ້າງ​ຄວາມ​ເສຍ​ຫາຍ​ໃຫ້​ແກ່​ເສດຖະກິດ​ຂອງ​ອາ​ເມ​ຣິ​ກາ ປະມານ 10% ແລະ ສະຫະພາບ​ເອີ​ຣົບ ຕັ້ງ​ເປົ້າ​ໝາຍ​ຫຼຸດ​ກາກ​ບອນ​ໄດ​ອອກ​ໄຊ ໃຫ້​ເຫຼືອ 0% ພາຍ​ໃນ​ປີ 2050 ຈຳເປັນ​ຕ້ອງ​ໃຊ້​ງົບປະມານ 1 ລ້ານໆ​ໂດ​ລາ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110