ຫົວ​ຂໍ້ : ພາກລັດ - ທຸລະກິດ ຫາທາງແກ້ໄຂ ການຕິດຕັ້ງໄຟຟ້າໃຫ້ໄວຂຶ້ນ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/01/2020 09:27:18 ຈຳ​ນວນ​ຜູ້​ເຂົ້າ​ຢ້ຽມ​ຊົມ 315 ຄັ້ງ

ເຖິງ​ວ່າ​ພາກສ່ວນ​ກ່ຽວ ຂ້ອງ​ຈະ​ປັບ​ຫຼຸດ​ຂັ້ນ​ຕອນ​ຂອງ​ການ​ບໍລິການ​ກໍ່ສ້າງ ແລະ ຕິດ​ຕັ້ງ​ໄຟຟ້າ​ຈາກ 6 ຂັ້ນ​ຕອນ​ໃນ​ເມື່ອ​ກ່ອນ ມາ​ເປັນ 3 ຂັ້ນ​ຕອນ​ໃນ​ປັດຈຸບັນ ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ການ​ດຳເນີນ​ທຸລະ​ກິດ​ຢູ່ ສປປ ລາວ ແຕ່​ການ​ປະຕິບັດຕົວ​ຈິງ ຍັງ​ພົບ​ຄວາມ​ຫຍຸ້ງຍາກ ຊັກ​ຊ້າ​ແກ່  ຍາວ​ເວລາ, ໃນ​ຂະນະ​ທີ່ ລັດຖະ ມົນຕີ​ກະຊວງ​ພະລັງງານ ແລະ ບໍ່​ແຮ່ ເນັ້ນ​ໃຫ້​ພາກ​ລັດ ແລະ ພາກ​ທຸລະ​ກິດ​ປຶກສາ​ຫາລື​ຊອກ​ຫາ​ສາເຫດ ເພື່ອ​ດຶງ​ຕົວ​ຊີ້​ວັດ​                ທີ 3 ລົງ​ໃຫ້​ເຫຼືອ 2 ໂຕ​ເລກ​ໃຫ້​ ໄດ້​ໃນ​ອະນາຄົດ​ອັນ​ໃກ້​ນີ້.
ກອງ​ປະຊຸມ​ຖອດ​ຖອນ​ບົດຮຽນ​ການ​ຄຸ້ມ​ຄອງ ແລະ ດຳເນີນ​ທຸລະ​ກິດ​ບໍລິການ​ກໍ່ສ້າງ ແລະ ຕິດ​ຕັ້ງ​ໄຟຟ້າ​ປະຈຳ​ປີ 2019, ວຽກ​ງານ​ການຈັດຕັ້ງ​ປະຕິບັດ​ຄຳ​ສັ່ງ​ເລກ​ທີ 02/ນຍ ວ່າ​ດ້ວຍ​ການ​ປັບປຸງ​ລະບຽບ​ການ ແລະ ກົນ​ໄກ​ການ​ປະສານ​ງານ​ໃນ​ການ​ດຳເນີນ​ທຸລະ​ກິດ ໄດ້​ຈັດ​ຂຶ້ນ​ໃນ​ວັນ​ທີ 28 ມັງກອນ​ນີ້ ທີ່​ລັດ​ວິ​ສາ​ຫະ​ກິດ​ໄຟຟ້າ           ​ລາວ ໂດຍ​ມີ ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່, ມີ​ພາກ​ລັດ ແລະ ພາກ​ທຸລະ​ກິດ​ເຂົ້າ​ຮ່ວມ.
ທ່ານ ຄຳ​ມະນີ ອິນ​ທິ​ລາດ ກ່າວ​ວ່າ: ໃນ​ໄລຍະ​ຜ່ານ​ມາ ການ​ບໍລິການ​ກໍ່ສ້າງ ແລະ ຕິດ​ຕັ້ງ​ໄຟຟ້າ ຍັງ​ມີ​ຈຸດ​ອ່ອນ ແລະ ມີ​ຂໍ້​ບົກ​ຜ່ອງ​ຫຼາຍ ຊຶ່ງ​ກອງ​ປະຊຸມ​ຄັ້ງ​ນີ້, ພວກ​ເຮົາ​​ໄດ້​ພ້ອມ​ກັນ​ປຶກສາ​ຫາລື​ກ່ຽວ​ກັບ​ການ​ຜັນ​ຂະ​ຫຍາ​ຍຄໍາ​ສັ່ງ​ເລກ​ທີ 02/ນຍ ວ່າ​ດ້ວຍ​ການ ປັບປຸງ​ລະບຽບ​ການ ແລະ ກົນ​ໄກ​ປະສານ ງານ​ໃນ​ການ​ດໍາ​ເນີນ​ທຸລະ​ກິດ​ຢູ່ ສປປ ລາວ ໂດຍ​ສຸມ​ໃສ່​ຄົ້ນ ຄວ້າ, ປະ​ກອບ​ຄໍາ​ເຫັນ ແລະ ປຶກສາ​ຫາລື​ກັນ​ໃຫ້ ລະອຽດ, ຊັດ​ເຈນ, ກົງ​ໄປ​ກົງ​ມາ , ພະຍາຍາມ​ຊອກ​ໃຫ້​ເຫັນ​ສາເຫດ ແລະ ກໍາ​ນົດ​ມາດ​ຕະການ​ປະຕິບັດ ໃຫ້​ເດັດຂາດ ແລະ ມີ​ປະສິດ​ທິ​ຜົນ.
ຂອດ​ການ​ໃຫ້​ບໍລິການ​ຕິດ​ຕັ້ງ​ໄຟຟ້າ ບໍ່​ວ່າ​ຈະ​ເປັນ​ຜູ້​ປະກອບ​ການ, ຜູ້​ໃຊ້​ບໍລິການ ແລະ ຜູ້​ຊົມໃຊ້​ທົ່ວ​ໄປ ລ້ວນ​ແຕ່​ຂັດຂ້ອງ​ຈົ່ມ​ວ່າ, ວິພາກ​ວິ​ຈານ​ວ່າ​ມີ​ຄວາມ​ຊັກ​ຊ້າ, ມີ​ຫຼາຍ​ຂັ້ນ​ຫຼາຍ​ຂອດ.
ກອງ​ປະຊຸມ​ປີ​ທີ່​ຜ່ານ​ມາ, ພວກ​ເຮົາ​ໄດ້​ເວົ້າ​ເຖິງ​ການ​ປັບ ປຸງ ຂັ້ນ​ຕອນ​ໃນ​ການ​ຂໍ​ຕິດ​ຕັ້ງ ນໍາ​ໃຊ້ກະແສ​ໄຟຟ້າ​ຢູ່ ສປປ ລາວ ມີ​ເຖິງ 6 ຂັ້ນ​ຕອນ ໃຊ້​ເວລາ​ທັງ​ໝົດ 134 ວັນ ໂດຍ​ເລີ່ມ                                                             ​ຈາກ: (1). ການ​ຍື່ນ​ໜັງສື​ສະເ​ໜີ​                                           ການ​ຂໍ​ນໍາ​ໃຊ້​ໄຟຟ້າ ແລະ ລໍຖ້າ ​ການ​ລົງ​ກວດກາ​ທາງ​ດ້ານ​ເຕັກ ນິກ 37 ວັນ. (2). ລົງ​ກວດກາ​ ທາງ​ດ້ານ​ເຕັກນິກ ເພື່ອ​ກະກຽມ ​ຕິດ​ຕັ້ງ 1 ວັນ. (3). ລໍຖ້າ​ເພື່ອ​ກະກຽມ​ຕິດ​ຕັ້ງ ແລະ ຮັບຮອງ​ການ​ອອກ​ແບບ​ດ້ານ​ເຕັກນິກ ແລະ ແຜນການ​ຕິດ​ຕັ້ງ 30 ວັນ.(4).ລໍຖ້າ​ການ​ຕິດ​ຕັ້ງ​ໄຟຟ້າ​ຈາກ​ຜູ້​ຮັບ​ເໝົາ​ຈົນ​ສໍາ​ເລັດ 60 ວັນ. (5). ລໍຖ້າ​ໝໍ້ນັບໄຟ 1 ວັນ. (6).ລໍຖ້າ​ຜົນ​ການ​ກວດ​ສອບ​ທາງ​ດ້ານ​ເຕັກນິກ​ພາຍຫຼັງ​ທີ່​ຕິດ​ຕັ້ງ​ແລ້ວ ກ່ອນ​ອະນຸຍາດ​ເປີດ​ນໍາ​ໃຊ້​ກະແສໄຟຟ້າ ເ​ເມ່ນ 7 ວັນ.
ສະພາບ​ຄວາມ​ຊັກ​ຊ້າ​ດັ່ງກ່າວ ໄດ້​ກໍ່ໃຫ້ເກີດ​ຄວາມ​ຫຍຸ້ງຍາກ, ກາຍເປັນ​ອຸປະສັກ​ໃຫ້​ແກ່​ການຜະລິດ, ການ​ລົງ ທຶນ, ການ​ດໍາ​ເນີນ​ທຸລະ​ກິດ ແລະ ການ​ຊົມໃຊ້​ທົ່ວ​ໄປ​ຢູ່​ໃນ​ສັງຄົມ, ເຮັດ​ໃຫ້​ເກີດ​ມີ​ຫາງ ສຽງ​ຂັດຂ້ອງ ຈົ່ມ​ວ່າ​ຂອງ​ຜູ້​ໃຊ້​ບໍລິການ ແລະ ກະທົບ​ເຖິງບົດ ບາດ​ການ​ຄຸ້ມ​ຄອງ​ຂອງ​ລັດ​ພວກ​ເຮົາເປັນຢ່າງ​ຍິ່ງ. ເຖິງ​ວ່າ​ໃນ​ໄລຍະ​ຜ່ານ​ມາ, ລັດ​ວິ​ສາ​ຫະ​ກິດ​ໄຟຟ້າ​ລາວ ແລະ ພາກສ່ວນ​ກ່ຽວຂ້ອງ ຈະ​ໄດ້ ປັບປຸງແບບ ແຜນ​ວິທີ​ການ​ໃຫ້ການ​ບໍລິການ​ໃຫ້​ສັ້ນ​ລົງ ຈາກ 6 ຂັ້ນ​ຕອນ​ມາ​ເປັນ 3 ຂັ້ນ​ຕອນ, ຈາກ 134 ວັນ ມາ​ເປັນ 60 ວັນ, ແຕ່​ກໍ​ຍັງ​ເຫັນ​ວ່າ ການຈັດຕັ້ງ​ປະຕິບັດ​ຊັກ​ຊ້າ.
ຍ້ອນ​ສະພາບ​ຄື​ແນວ​ນັ້ນ, ກະຊວງ​ພະລັງງານ ແລະ ບໍ່​ແຮ່ ໄດ້​ເອົາໃຈໃສ່​ຊີ້​ນໍາ ໃຫ້ລັດ​ວິ​ສາ​ຫະກິດ​ໄຟຟ້າ​ລາວ ອອກ​ຂໍ້​ກໍາ​ນົດ ວ່າ​ດ້ວຍ​ການປັບປຸງ​ຂັ້ນ​ຕອນ​ການ​ບໍລິການ​ຕິດ​ຕັ້ງ​ໄຟຟ້າ, ການ​ກໍ່ສ້າງ​ຕາ​ຂ່າຍໄຟ ຟ້າ ແລະ ຕິດ​ຕັ້ງ​ໝໍ້​ແປງ​ໄຟຟ້າ ຊຶ່ງ​ຂໍ້​ກໍາ​ນົດ​ດັ່ງກ່າວ ແມ່ນ​ໃຫ້​ ຫຼຸດ​ຂັ້ນ​ຕອນ​ການ​ຕິດ​ຕັ້ງ​ໝໍ້ນັບ ໄຟ, ກໍ່ສ້າງ​ຕາ​ຂ່າຍ​ໄຟຟ້າໃນ​ລະດັບແຮງ​ດັນ 22/0,4 kV ໃນ​ທົ່ວ​ປະເທດ ຄື: ໄດ້​ຫຼຸດ​ຂັ້ນ​ຕອນ​ການ​ຕິດ​ຕັ້ງ​ໄຟຟ້າ ຈາກ 6 ຂັ້ນ​ຕອນ​ໃຫ້​ເຫຼືອ​ພຽງ 3 ຂັ້ນ​ຕອນເຊັ່ນ:
- ກໍລະນີ: ສະເໜີ​ຕິດ​ຕັ້ງ​ໝໍ້ນັບໄຟ ໂດຍ​ບໍ່​ມີ​ການ​ກໍ່ສ້າງ​ຕາ​ຂ່າຍ ແມ່ນ​ບໍ່​ເກີນ 7 ວັນ​ລັດ​ຖະການ; 
- ກໍລະນີ: ສະເ​ໜີ​ຕິດ​ຕັ້ງ​ໝໍ້ນັບໄຟ ທີ່​ມີ​ການ​ຕິດ​ຕັ້ງ​ໝໍ້​ແປງ ແມ່ນ​ບໍ່​ເກີນ 15 ວັນ​ລັດ​ຖະ​ການ; 
- ກໍລະນີ: ສະເໜີ​ຕິດ​ຕັ້ງ​ໝໍ້ນັບໄຟ ທີ່​ມີ​ການ​ກໍ່ສ້າງ​ຕາ​ຂ່າຍ​ແຮງ​ກາງ 22 KV, ລວງ​ຍາວ​ບໍ່​ເກີນ 2 km, ຕິດ​ຕັ້ງ​ໝໍ້​ແປງ ແລະ ກໍ່ສ້າງ​ຕາ​ຂ່າຍ​ແຮງ​ຕ່ຳ 0,4 kV ລວງ​ຍາວ​ບໍ່​ເກີນ 500m, ໃຊ້ ເວລາ​ລວມ​ບໍ່​ເກີນ 35 ວັນ​ລັດ​ຖະ​ການ.
ນອກ​ນັ້ນ, ຍັງ​ໄດ້​ເອົາໃຈ ໃສ່ ປັບປຸງບາງ​ຂອດ​ບໍລິການ​ຈໍາ​ນວນ​​ໜຶ່ງ ເພື່ອ​ເຮັດ​ໃຫ້ການ​ບໍລິການ​ວ່ອງໄວ​ຂຶ້ນ. ໃນ​ຂະ ນະ​ດຽວ​ກັນ ກໍ​ໄດ້​ການ​ປັບ​ຫຼຸດ​ຂອດ​ຂັ້ນ​ໃນ​ກິດ​ຈະ​ກໍາ​ອື່ນໆ ກ່ຽວ​ກັບ​ການ​ບໍລິການ​ດ້ານ​ໄຟຟ້າ ຢ່າງ​ເປັນ​ຮູບ​ປະ​ທໍາ ແລະ ຕິດຕາມກວດກາ​ມາດ​ຕະ​ຖານ​-​ການ​ບໍລິການຂອງ​ບໍລິສັດ ທີ່​ໃຫ້ການບໍລິການ​ຕິດ​ຕັ້ງ​ໄຟຟ້າ​ຢ່າງ​ເຂັ້ມ​ງວດ, ຫາກ​ພົບ​ເຫັນ​ການ​ບໍລິການ​ຊັກ​ຊ້າ ບໍ່​ໄດ້​ມາດຕະຖານ ຈະ​ດໍາ​ເນີນ ມາດ​ຕະການ​ກ່າວ​ເຕືອນ ແລະ ປະຕິບັດ​ວິໄນ ໂດຍ​ຍົກເລີກ​ໃບ​ອະນຸ​ຍາດ​ດໍາ​ເນີນ​ກິດຈະການ​ຂອງ ບໍລິສັດ​ດັ່ງ​ກ່າວ.
ທ່ານ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່​ຍັງ​ຮຽກ ຮ້ອງ​ມາ​ຍັງ​ຜູ້​ເຂົ້າ​ຮ່ວມ​ຈົ່ງ​ເອົາ ໃຈໃສ່​ຄົ້ນຄວ້າ, ແລກປ່ຽນ​ຄວາມ​ເຫັນ​ນໍາ​ກັນ​ໃຫ້​ລະອຽດ, ກົງ​ໄປ​ກົງ​ມາ​ໂດຍ​ສະເພາະ ກ່ຽວ​ກັບການ​ໃຫ້ການ​ບໍລິການ​ກ່ຽວ​ກັບໄຟ​ຟ້າ, ຕ້ອງ​ຊອກ​ໃຫ້​ເຫັນ “ສາເຫດ” ວ່າ​ແມ່ນ​ຍ້ອນ​ຫຍັງ? ແລະ ພ້ອມ​ກັນ​ຕັ້ງ​ບັນຫາ​ວ່າ “ເຮົາ​ຊິ​ແກ້​ໄຂ​ແນວໃດ” ເພື່ອ​ໃຫ້​ສະພາບ​ການ​ດໍາ​ເນີນ​ທຸລະ​ກິດ​ການ ບໍລິການ ຕາມ​ຄໍາ​ສັ່ງ​ເລກ​ທີ 02/ນຍ ໂດຍ​ສະເພາະ​ແມ່ນ​ການ​ດໍາ​ເນີນ​ທຸລະ​ກິດ​ບໍລິການ​ດ້ານ​ໄຟຟ້າ ໃຫ້​ດີ​ຂຶ້ນ, ດຶງ​ຕົວ​ຊີ້​ວັດ​ທີ 3 ໃຫ້​ຕໍ່າ​ລົງ​ມາ, ຈົນ​ສາມາດ​ບຸກ​ທະລຸ ໃຫ້​ໄດ້​ອັນ​ດັບ 2 ໂຕ​ເລກ ຕາມ​ຄາດ ໝາຍ​ທີ່​ວາງ​ໄວ້ ໃນ​ອະນາຄົດ​ອັນ​ໃກ້​ນີ້, ເພື່ອ​ສ້າງ​ເງື່ອນໄຂ​ໃຫ້ການ​ເຂົ້າ​ເຖິງ​ການ​ບໍລິການ​ດ້ານ​ພະລັງງານ ໄຟຟ້າ​ໃຫ້​ມີ​ຄຸນ​ນະ​ພາບ​ທີ່​ສູງ​ຂຶ້ນ.
   (ຂ່າວ​-​ພາບ: ສຸກ​ສະຫວັນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110