ຫົວ​ຂໍ້ : ກະຊວງການຕ່າງປະເທດຖະແຫຼງຂ່າວ ກ່ຽວກັບເຊື້ອຈຸລະໂຣກສາຍພັນໃໝ່

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/01/2020 09:30:54 ຈຳ​ນວນ​ຜູ້​ເຂົ້າ​ຢ້ຽມ​ຊົມ 390 ຄັ້ງ

ໃນ​ວັນ​ທີ 28 ມັງ​ກອນນີ້ ທີ່​ກະ​ຊວງ​ການ​ຕ່າ​ງ​ປະ​ເທດ, ທ່ານ ທອງ​ສະ​ຫວັນ ພົມ​ວິ​ຫານ ຮອງ​ລັດ​ຖະ​ມົນ​ຕີ​ກະ​ຊວງ​ການ​ ຕ່າງ​ປະ​ເທດ ໄດ້​ຖະ​ແຫຼງຂ່າວ​ ກ່ຽວ​ກັບການ​ລະ​ບາດຂອງ​ ພະ​ຍາດ​ອັກ​ເສບ​ປອດທີ່​ເກີດ ຈາກເຊື້ອ​ຈຸ​ລະ​ໂຣກ​ສາຍພັນ ໃໝ່ (Novel Corona Virus) ວ່າ: ກະຊວງ​ການ​ຕ່າງປະເທດ ແຫ່ງ ສປປ ລາວ ແລະ ບັນດາ​ ສໍານັກ​ງານຜູ້ຕາງໜ້າ​ແຫ່ງ  ສປປ ລາວ ປະຈໍາຢູ່​ຕ່າງປະ ເທດ ໄດ້​ຕິດຕາມ​ສະພາບການລະ ບາດພະຍາດ​ອັກເສບ​ປອດ ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ຢູ່ຕ່າງປະເທດ​ຢ່າງ​ໃກ້ຊິດ ແລະ ໄດ້​ປະສານ​ງານ​ກັບ​ບັນດາ​ ພາກສ່ວນ​ທີ່​ກ່ຽວຂ້ອງ ຂອງ​ປະເທດ​ທີ່​ມີ​ການ​ລະບາດ​ດັ່ງກ່າວ ເພື່ອ​ອໍາ​ນວຍ​ຄວາມ​ສະດວກ​ ແລະ ​ຊ່ວຍເຫຼືອ​ພົນລະເມືອງ​ລາວ, ນັກ​ທ່ອງ​ທ່ຽວ, ນັກທຸລະກິດ ແລະ ນັກ​ສຶກສາ​ລາວ ທີ່​ດໍາ​ລົງ​ຊີວິດ ແລະ ສຶກສາ​ຮໍ່າ​ຮຽນ ຢູ່​ບັນດາ​ປະເທດ ທີ່​ມີ​ການລະບາດພະຍາດ​ດັ່ງກ່າວ, ພ້ອມ​ທັງ​ໄດ້​ລາຍ​ງານ​ສະພາບ​ການ​ຢ່າງ​ເປັນ​ປະ​ຈໍາ.
ກະຊວງ​ການ​ຕ່າງປະເທດ ລາວ ໄດ້​ເປັນ​ເຈົ້າ​ການ​ປະສານ​ງານ ແລະ ແລກປ່ຽນ​ຂໍ້​ມູນ​ຂ່າວສານ ກັບ​ບັນດາ​ປະເທດ​ຕ່າງໆ ໃນ​ພາກ​ພື້ນ ກໍ​ຄື​ສາກົນ ແລະ ອົງການ​ອະນາໄມ​ໂລກ ຢ່າງ​ໃກ້ຊິດ ເພື່ອ​ຕິດຕາມ​ທ່າ​ອ່ຽງ ຂອງ​ການລະບາດພະຍາດ​ດັ່ງກ່າວ ແລະ​ຍາດ​ແຍ່ງ​ການ​ຊ່ວຍເຫຼືອ ໂດຍ​ສະເພາະ ການ​ສົ່ງ​ຄະນະ​ຊ່ຽວຊານ ດ້ານ​ການ​ແພດ ພ້ອມ​ດ້ວຍ​ອຸປະກອນ ເຄື່ອງມື, ຢາ​ປົວພະ​ຍາດ ແລະ ວັກ​ຊິນ​ປ້ອງ​ກັນ ໃນ​ກໍລະນີທີ່​ມີ​ການ​ລະບາດ​ເກີດ​ຂຶ້ນ.  ທ່ານ ທອງ​ສະຫວັນ ພົມວິຫານ ກ່າວ​ຕື່ມ​ວ່າ:   ພົນລະເມືອງ​ລາວ​ຢູ່​ຕ່າງປະເທດ​ໃຫ້​ເອົາໃຈ​ ໃສ່ຕິດຕາມ​ສະພາບ​ການລະ ບາດພະຍາດ​ດັ່ງກ່າວ​ຢ່າງ​ເປັນ​ປົກກະຕິຜ່ານ​ແຫຼ່ງ​ຂ່າວ​ຂໍ້​ມູນ​ທາງ​ການ​ຂອງ​ກະຊວງ​ສາທາລະນະ​ສຸກ, ກະຊວງ​ການ​ຕ່າງປະເທດ​ແຫ່ງ​ ສປປ ລາວ ແລະ ອົງການ​ອະນາໄມ​ໂລກ. ສະນັ້ນ, ກະຊວງ​ການ​ຕ່າງປະເທດ ຈຶ່ງ​ຂໍ​ແຈ້ງ​ເຕືອນ​ໃຫ້​ພົນລະເມືອງ​ລາວ ຫຼີກ​ລ່ຽງ​ການ​ເດີນທາງ​ໄປ​ຍັງ​ບັນດາ​ເຂດ​ທີ່​ມີ​ການ​ລະບາດ​ດັ່ງກ່າວ​, ຖ້າ​ຫາກ​ວ່າ ພົນລະເມືອງ​ລາວ​ຢູ່​ຕ່າງປະເທດ​ຕ້ອງການ​ຄວາມ​ຊ່ວຍເຫຼືອ ກະລຸນາ​ຕິດຕໍ່​ບັນ​ດາ​ສໍາ​ນັກ​ງານ​ຜູ້ຕາງໜ້າ​ແຫ່ງ​ ສປປ ລາວ ປະ​ຈໍາ​ຢູ່​ຕ່າງປະ ເທດ ຫຼື ກະຊວງ​ການ​ຕ່າງ​ປະ​ເທດ (www.mofa.gov.la) ໄດ້​ຕະຫຼອດ​ເວ​ລາ.
(ຂ່າວ+ພາບ: ແສງ​ຈັນ) 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110