ໜັງສືພິມ ປະຊາຊົນ

ຈີນ ເສີມຂະຫຍາຍດ້ານລະບຽບການ ເພື່ອເອົາຊະນະພະຍາດ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 29/01/2020 14:18:49 ຈຳນວນຢ້ຽມຊົມ 538 ຄັ້ງ

ຂ່າວສານຊີອາໄອລາຍງານວ່າ: ວັນທີ 27 ມັງກອນນີ້ ໂດຍໄດ້ຮັບການມອບໝາຍຈາກທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ທ່ານ ຫຼີເຄີ້ສຽງ ກຳມະການປະຈຳກົມການເມືອງສູນກາງພັກ, ນາຍົກ ລັດຖະມົນຕີຈີນ, ຫົວໜ້າໜ່ວຍງານຮັບຜິດຊອບວຽກງານຮັບມືກັບການແຜ່ລະບາດຂອງພະ ຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ສູນກາງຈີນ ໄດ້ເດີນທາງເຖິງນະຄອນອູຮັ້ນ ແຂວງຫູເປີຍ ເພື່ອກວດກາ ແລະ ຊີ້ນຳວຽກງານປ້ອງກັນ, ຄວບຄຸມການແຜ່ລະບາດຂອງພະຍາດ, ພ້ອມທັງຢື້ຢາມຖາມຂ່າວຜູ້ເປັນພະຍາດ ແລະ ພະ ນັກງານການແພດທີ່ປະຕິບັດໜ້າທີ່ຢູ່ແຖວໜ້າ.
ວັນທີ 26 ມັງກອນຜ່ານມາ, ຫ້ອງການຖະແຫຼງຂ່າວຂອງລັດຖະບານຈີນ ໄດ້ຈັດກອງປະຊຸມຖະແຫຼງຂ່າວ ໂດຍເນັ້ນໜັກວ່າ: ພາຍໃຕ້ການນຳພາຂອງຄະນະຮັບຜິດຊອບການຮັບມືກັບການແຜ່ລະບາດພະຍາດຂອງສູນກາງຈີນ, ຈະຖືວຽກງານປ້ອງກັນ ແລະ ຄວບຄຸມພະຍາດເປັນວຽກງານ ສຳຄັນທີ່ສຸດ, ພະຍາຍາມຢ່າງ ສຸດຂີດເພື່ອເຮັດວຽກປ້ອງກັນ ແລະ ຄວບຄຸມພະຍາດໃຫ້ດີ. ຂະນະດຽວກັນ, ຄະນະປະ ຈຳກົມການເມືອງສູນກາງພັກ ກອມມູນິດຈີນ ໄດ້ຈັດກອງປະ ຊຸມ, ຕົກລົງສ້າງຕັ້ງຄະນະຮັບ ຜິດຊອບການຮັບມືກັບການແຜ່ລະບາດພະຍາດ ແລະ ສົ່ງໜ່ວຍຊີ້ນຳໄປແຂວງຫູເປີຍແລະ ເຂດອື່ນໆ ທີ່ມີການແຜ່ລະບາດພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ຢ່າງຮ້າຍແຮງ. ນີ້ເປັນຂີດໝາຍສະເດງໃຫ້ເຫັນວ່າ: ການປ້ອງກັນ ແລະ ຄວບຄຸມພະຍາດໄດ້ຍົກສູງຂຶ້ນຮອດລະດັບສູງສຸດແລ້ວ ຊຶ່ງໄດ້ສະແດງໃຫ້ ເຫັນຄວາມຕັດສິນໃຈເດັດຂາດ ຂອງຈີນ ໃນການປ້ອງກັນ ຄວາມປອດໄພດ້ານຊີວິດ ແລະ ສຸຂະພາບຂອງປະຊາຊົນ, ມີຄວາມຮັບ ຜິດຊອບສູງໃນການປົກປົກຮັກສາຄວາມປອດໄພດ້ານສາ ທາລະນະສຸກຂອງໂລກ, ໄດ້ສະແດງໃຫ້ເຫັນທ່າແຮງດ້ານລະບຽບການຂອງຈີນອີກດ້ວຍ.
ຂ່າວລະບຸວ່າ: ໂດຍປະເຊີນໜ້າກັບສະພາບການແຜ່ລະບາດຂອງພະຍາດອັກເສບປອດທີ່ເກີດຂຶ້ນຢູ່ນະຄອນອູຮັ້ນ ແຂວງຫູເປີຍ ຢ່າງກະທັນຫັນ, ຈີນ ໄດ້ປະຕິບັດມາດຕະການປ້ອງກັນ ແລະ ຄວບຄຸມຢ່າງວ່ອງໄວ, ມີປະສິດທິພາບສູງ, ເປີດເຜີຍ ແລະ ໂປ່ງໃສ ຊຶ່ງໄດ້ຮັບການຢືນຢັນຈາກປະຊາຄົມໂລກ. ຫວ່າງມໍ່ໆມານີ້, ສື່ມວນຊົນຕ່າງໆຂອງໂລກໄດ້ສຸມໃສ່ຂ່າວກ່ຽວກັບນະຄອນອູຮັ້ນ ໄດ້ສ້າງສຳເລັດໂຮງໝໍຊົ່ວຄາວໃນເວລາພຽງ 6 ວັນ. ບໍລິສັດວິທະຍຸກະຈາຍສຽງອັງກິດ ຫຼື BBC ໄດ້ພິມບົດຄວາມທີ່ພາດຫົວຂໍ້ວ່າ “ເປັນຫຍັງຈີນສາມາດສ້າງສຳເລັດໂຮງໝໍແຫ່ງໜຶ່ງພາຍໃນເວລາພຽງ 6 ວັນ” ໂດຍໄດ້ກ່າວວ່າ “ຍ້ອນວ່າລັດຖະບານ ຈີນສາມາດຜ່ານຜ່າຄວາມຈຳກັດທີ່ ເກີດຂຶ້ນ ແລະ ສາມາດສຸມກຳ ລັງ ເພື່ອລະດົມຊັບພະຍາກອນສັງຄົມທຸກສິ່ງທຸກຢ່າງ”.
ປັດຈຸບັນ, ທົ່ວປະເທດຈີນ ມີ 30 ແຂວງ ໄດ້ປະກາດປະຕິ ບັດການຕອບສະໜອງຕໍ່ດ້ານ ສາທາລະນະສຸກທີ່ເກີດຂຶ້ນກະທັນຫັນໃນລະດັບສູງສຸດ, ກວມເອົາປະຊາກອນຫຼາຍກວ່າ 1,3 ຕື້ຄົນ. ຫຼາຍແຫ່ງໄດ້ສົ່ງໜ່ວຍງານປິ່ນປົວໄປແຂວງຫູເປີຍ, ປະຊາຊົນຈີນ 1,4 ຕື້ຄົນ ພວມສຸມກຳລັງອັນມະຫາສານເພື່ອຕໍ່ຕ້ານການແຜ່ລະບາດຂອງພະຍາດຢ່າງເດັດຂາດ.
ຂ່າວລະບຸວ່າ: ຄະນະກຳມະການອະນາໄມ ແລະ ສຸຂະພາບແຫ່ງຊາດຈີນ ໄດ້ຮັບການລາຍງານຜູ້ເປັນພະຍາດດັ່ງກ່າວຈາກ 30 ແຂວງ, ເຂດປົກຄອງຕົນເອງ, ນະຄອນ ໃນທົ່ວປະເທດລວມທັງໝົດມີ 2.744 ຄົນ, ຜູ້ມີອາການໜັກ 461 ຄົນ, ມີ 80 ຄົນເສຍຊີວິດ, ຜູ້ທີ່ຫາຍເຊົາ ແລະ ອອກໂຮງໝໍມີ 51 ຄົນ, ຜູ້ທີ່ຖືກສົງໄສຕິດເຊື້ອພະຍາດມີ 5.794 ຄົນ. ປັດຈຸບັນ, ໄດ້ຕິດຕາມຜູ້ທີ່ເຄີຍສຳຜັດກັບຜູ້ເປັນພະຍາດຢ່າງໃກ້ຊິດມີ 32.799 ຄົນ, ໄດ້ຍົກເລີກການຕິດຕາມສັງເກດທາງການແພດ 583 ຄົນ ໃນມື້ດຽວກັນ ແລະ ຍັງມີ 30.453 ຄົນພວມຖືກຕິດຕາມສັງເກດທາງການແພດ.