ໜັງສືພິມ ປະຊາຊົນ

ສ.ເກົາຫຼີ - ຍີ່ປຸ່ນ ມຸ້ງໜ້າລົງທຶນເຂົ້າກຳປູເຈຍ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 30/01/2020 09:03:05 ຈຳນວນຢ້ຽມຊົມ 463 ຄັ້ງ

ຮຽບຮຽງໂດຍ: ວິໄລພອນ

ອຸດສາຫະກຳເປັນຊ່ອງທາງສ້າງລາຍໄດ້ໃຫ້ກັບປະ ເທດທີ່ກຳລັງພັດທະນາ ແຕ່ການກະເສດ ກໍເປັນຮາກຖານຄວາມແຂງແຮງ, ກໍາປູເຈຍ ເປັນອີກປະເທດໜຶ່ງທີ່ພັດທະນາອຸດສາຫະກຳໄປພ້ອມໆກັບ ການກະເສດ.
ເວັບໄຊພະນົມເປັນໂພສ ລາຍງານວ່າ: ສະມາຄົມທຸລະ ກິດນຳ້ຍີ່ປຸ່ນ ເປັນໜ່ວຍງານ ການຮ່ວມມືລະຫວ່າງພາກລັດ ແລະ ເອກະຊົນ ໃນເມືອງຄິຕະກິວຊູ ມີເປົ້າໝາຍສົ່ງເສີມການເຮັດທຸລະກິດນຳ້ໃນຕ່າງ ປະເທດໄດ້ນຳພາຕົວແທນ 15 ບໍລິສັດເຂົ້າພົບທ່ານ ຊາມ ປະສິດ ລັດຖະມົນຕີ ກະຊວງອຸດສາຫະກຳ ແລະ ຫັດຖະກຳ ຂອງກຳປູເຈຍ ພ້ອມທັງແຈ້ງ ຈຸດປະສົງໃຫ້ແກ່ທ່ານລັດຖະ ມົນຕີຮູ້ວ່າ: ສະມາຊິກທັງ 15 ບໍລິສັດ ລ້ວນແຕ່ມີປະສົບການທີ່ດີທາງດ້ານນຳ້ສະອາດ ແລະ ຕ້ອງການເຂົ້າມາລົງທຶນໃນ ກຳປູເຈຍ.
ທ່ານ ຊາມ ປະສິດ ກ່າວດ້ວຍຄວາມຍິນດີ ແລະ ຢືນຢັນວ່າ: ລັດຖະບານກໍາປູເຈຍ ຈະອຳນວຍ ຄວາມສະດວກ ແລະ ຈະຍົກເວັ້ນພາສີ ຖ້າຫາກເຂົ້າມາລົງທຶນ ໂດຍກ່າວວ່າ: ທາງດ້ານກະຊວງອຸດສາຫະກຳ ແລະ ຫັດຖະກຳ ໄດ້ໃຫ້ຄວາມສຳຄັນກັບການຈັດຫານຳ້ສະ ອາດ ທັງໃນເມືອງໃຫຍ່ ຊານ ເມືອງ ແລະ ເຂດຊົນນະບົດ ໂດຍສົ່ງເສີມໃຫ້ພາກເອກະຊົນເຂົ້າມາລົງທຶນຜະລິດນຳ້ສະອາດ.
ອີງຕາມຂໍ້ມູນຈາກສະພາເພື່ອການພັດທະນາຂອງກຳປູເຈຍ ລະບຸວ່າ: ການລົງທຶນໂດຍກົງຈາກ ຕ່າງປະເທດ (FDI) ຂອງຍີ່ປຸ່ນ ທີ່ມີຕໍ່ກຳປູເຈຍ ນັບຕັ້ງແຕ່ປີ 1994 ເຖິງໄຕມາດທຳອິດຂອງປີ 2019 ບັນລຸມູນຄ່າ 2,5 ພັນລ້ານໂດລາ. ສ່ວນໃຫຍ່ລົງທຶນຜະລິດເຄື່ອງໃຊ້ໄຟຟ້າ, ເຄື່ອງເອເລັກໂຕຣນິກ, ຍານພາຫະນະ, ເຄື່ອງມືແປຮູບ ທາງການກະເສດ ແລະ ໂຮງ ງານແປຮູບອາຫານ ລວມເຖິງການສ້າງໂຮງແຮມ, ໂຮງໝໍ ແລະ ຮ້ານຄ້າ. ຂະນະດຽວກັນ, ສະຫະກອນຊຸມຊົນຊົນນະບົດຂອງ ສ.ເກົາຫຼີ (KRC) ເລີ່ມ ກໍ່ສ້າງສູນຜະລິດພືດຜັກປອດສານພິດຢູ່ແຂວງສີຣີຂອງກຳປູເຈຍ ເພື່ອສົ່ງເສີມການປູກຜັກ ແລະ ໃຊ້ເປັນຕົວຢ່າງເຮັດໂຄງການແບບດຽວກັນໃນຂອບເຂດທົ່ວປະເທດ ຊຶ່ງຈະຊ່ວຍຫຼຸດການນຳເຂົ້າພືດຜັກຂອງ ກຳປູເຈຍ ລົງໄດ້.
ໃນເວລາພົບປະກັບ ທ່ານ ເຫວງ ສາຄອນ ລັດຖະມົນຕີກະຊວງການກະສິກໍາ-ປ່າໄມ້ ແລະ ການປະມົງຂອງກໍາປູເຈຍ, ທ່ານ ປັກ ຄິມວຸກ ຜູ້ ອຳນວຍການ KRC ກ່າວວ່າ: ສູນສາທິດຜະລິດພືດຜັກປອດສານພິດຈະສໍາເລັດພາຍໃນປີນີ້ ຊຶ່ງ KRC ຕ້ອງການໃຊ້ສູນນີ້ປູກໝາກເລັ່ນ ແລະ ພືດຜັກຊະນິດຕ່າງໆເນື່ອງຈາກອາກາດ ແລະ ດິນຢູ່ແຂວງສີຣີເໝາະສົມແກ່ການປູກພືດດັ່ງກ່າວ. ທ່ານ ປັກ ຄິມວຸກ ກ່າວວ່າ: ກໍາປູເຈຍ ມີສັກກະຍະພາບທາງການກະເສດສູງ ແຕ່ຍັງບໍ່ສາມາດເຮັດໄດ້ເຕັມສັກກະຍະພາບ ຊຶ່ງເປັນສາເຫດເຮັດໃຫ້ຂາດແຄນພືດຜັກຈົນຕ້ອງນຳເຂົ້າ. ໂຄງການນີ້ຕ້ອງການເພີ່ມການປູກໝາກເລັ່ນ ແລະ ພືດຜັກຊະນິດຕ່າງໆ ເພື່ອສະໜອງໃຫ້ຜູ້ບໍລິໂພກພາຍໃນປະເທດ ແລະ ຫຼຸດການນຳເຂົ້າ. ສູນນີ້ຈະຊ່ວຍສ້າງງານສ້າງລາຍໄດ້ໃຫ້ແກ່ປະຊາຊົນ ໂດຍ KRC ໄດ້ສຶກສາຄົ້ນຄວ້າຢ່າງລະອຽດວ່າ: ແຂວງສີຣີ ມີສັກກະຍະພາບເປັນສູນກາງການຜະລິດທາງການກະເສດໄດ້ ໂດຍອີງຕາມເປົ້າໝາຍແມ່ນ ສູນດັ່ງກ່າວ ຈະເລີ່ມປູກພືດຜັກໄວທີ່ສຸດພາຍໃນປີນີ້.
ທ່ານ ສະໄຣ ວຸດທີ ໂຄສົກກະຊວງກະສິກໍາ-ປ່າໄມ້ ແລະ ການປະມົງກໍາປູເຈຍ ເປີດເຜີຍວ່າ: ລັດຖະບານກຳປູເຈຍ ໄດ້ເຮັດໂຄງການລິເລີ່ມສົ່ງເສີມການປູກຜັກ ແລະ ໂຄງການອື່ນໆອີກດ້ວຍ. ໃນນັ້ນເປັນການກະຕຸ້ນໃຫ້ຊາວກະສິກອນ ປະຕິບັດຕາມລະບົບການຜະ ລິດທີ່ຖືກຕ້ອງໃນຟາມ (GAP) ທ່ານ ກ່າວຕື່ມວ່າ: ກະຊວງກະສິກໍາ-ປ່າໄມ້ ແລະ ການປະມົງ ກໍາລັງສົ່ງເສີມການປູກຜັັກຢ່າງປອດໄພ, ຝຶກອົບຮົມຊາວກະສິກອນ ໃຫ້ປະຕິບັດຕາມ GAP ແລະ ກະຕຸ້ນຊາວກະສິກອນ ເຂົ້າສູ່ໂຄງການກະສິກໍາ ປະຕິບັດສັນຍາ ລວມທັງປະຊາສຳພັນຜະລິດຕະພັນທ້ອງຖິ່ນ ເພື່ອເພີ່ມຄວາມຕ້ອງການພາຍໃນປະເທດ.
ອີງຕາມຂໍ້ມູນຈາກສູນນະໂຍບາຍສຶກສາເປີດເຜີຍວ່າ: ກໍາປູເຈຍ ນຳເຂົ້າຜັກ, ໝາກໄມ້ສູງເຖິງ 40% ຄິດເປັນມູນຄ່າປະມານ 200 ລ້ານໂດລາ ຕໍ່ປີ ຊຶ່ງສ່ວນໃຫຍ່ແມ່ນນຳ ເຂົ້າມາຈາກຫວຽດນາມ. ສ່ວນການຜະລິດຢາງພາລາຂອງກຳປູເຈຍ, ກະຊວງກະສິກໍາ-ປ່າໄມ້ ແລະ ການປະມົງ ໄດ້ອອກ ຖະແຫຼງການ ຫຼ້າສຸດ ວ່າ: ປີ 2019 ກຳປູເຈຍ ອອກຢາງພາລາແຫ້ງ 282.071 ໂຕນ, ເພີ່ມຂຶ້ນ 30%, ຈາກ 217.501 ໂຕນ ເມື່ອປີ 2018. ລາຍໄດ້ຈາກການສົ່ງອອກຢາງພາລາ ໃນປີ 2019 ບັນລຸປະມານ 377 ລ້ານໂດລາ ເພີ່ມຂຶ້ນ 31,8%, ຈາກ 286 ລ້ານໂດລາ ໃນປີ 2018.
ລາຄາຢາງພາລາແຫ້ງໃນປີ 2019 ສະເລ່ຍ 1.336 ໂດລາຕໍ່ໂຕນ ສູງກວ່າປີ 2018 ປະມານ 19 ໂດລາ. ຢາງພາລາຂອງກໍາປູເຈຍ ສ່ວນໃຫຍ່ແມ່ນສົ່ງອອກໄປຍັງ ປະເທດມາເລເຊຍ, ຫວຽດນາມ, ສິງກະໂປ ແລະ ຈີນ. ທົ່ວປະເທດມີເນື້ອທີ່ປູກຢາງພາລາ ປະມານ 2,5 ລ້ານໄລ່, ໃນຈໍານວນນີ້ 1,5 ລ້ານໄລ່ ຫຼື 61% ຂອງເນື້ອທີ່ຢາງພາລາທັງໝົດ ແມ່ນສາ ມາດກີດໄດ້ແລ້ວ.