ຫົວ​ຂໍ້ : ອົງການອະນາໄມໂລກຊົມເຊີຍຈີນ ເດັດຂາດຕ້ານພະຍາດລະບາດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 30/01/2020 09:05:16 ຈຳ​ນວນ​ຜູ້​ເຂົ້າ​ຢ້ຽມ​ຊົມ 267 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ວັນ​ທີ 28 ມັງກອນ​ຜ່ານ​ມາ, ທ່ານ ຫວາງ​ຢີ້ ລັດຖະມົນຕີ​ກະຊວງ​ການ​ຕ່າງປະເທດ​ຈີນ ໄດ້​ພົບ​ປະ​ກັບ​ທ່ານ ເທັດ​ຣົສ ອັດ​ຮະ​ໂນມ ເກ​ເບ​ຣ​ເຢ​ຊຸສ ຜູ້ອຳນວຍການ​ໃຫຍ່​ອົງການ​ອະນາໄມ​ໂລກ (WHO) ຢູ່​ນະ ຄອນຫຼວງ​ປັກ​ກິ່ງ.
  ຂ່າວ​ລະບຸ​ວ່າ: ໃນ​ເວລາ​ພົບ​ປະ, ທ່ານ ເທັດ​ຣົສ ກ່າວ​ວ່າ, ພາຍຫຼັງ​ເກີດ​ການ​ລະບາດ​ຂອງ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່​ຢູ່​ນະຄອນ​ອູ​ຮັ້ນ ແຂວງ​ຫູ​ເປີ​ຍ​ຂອງ​ຈີນ, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ແລະ ລັດຖະບານ​ຈີນ ໄດ້​ເອົາໃຈໃສ່​ຢ່າງ​ສູງ​ຕໍ່​ການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ, ພ້ອມ​ທັງ​ປະຕິບັດ​ມາດ​ຕະການ​ຕ່າງໆ​ຢ່າງ​ເຂັ້ມ​ງວດ ເພື່ອ​ສະກັດ​ກັ້ນ​ການ​ແຜ່​ລະບາດ​ຂອງ​ພະ​ຍາດ. ຄວາມ​ເຂັ້ມແຂງ​ດ້ານ​ລະບຽບ​ການ ແລະ ການ​ໃຊ້​ມາດ​ຕະການ​ຢ່າງ​ມີ​ປະສິດ​ທິ​ຜົນ​ຂອງ​ຈີນ​ແມ່ນ​ພົບ​ເຫັນ​ໜ້ອຍ​ໃນ​ທົ່ວ​ໂລກ ແລະ ເປັນ​ໜ້າ​ເຄົາລົບ​ນັບ​ຖື. ອົງການ​ອະນາໄມ​ໂລກ ແລະ ປະຊາ​ຄົມ​ໂລກ ຊົມເຊີຍ​ຢ່າງ​ສູງ​ຕໍ່​ລັດຖະບານ​ຈີນ ທີ່​ປະຕິບັດ​ມາດ​ຕະການ​ຢ່າງ​ເຂັ້ມ​ງວດ, ຂອບໃຈ​ຈີນ ທີ່​ພະຍາຍາມ​ຢ່າງ​ຫຼວງຫຼາຍ ເພື່ອ​ສະກັດ​ກັ້ນ​ບໍ່​ໃຫ້​ພະຍາດ​ແຜ່​ລະບາດ​ກວ້າງ​ອອກ. ອົງການ​ອະນາໄມ​ໂລກ ຫວັງ​ວ່າ: ຈະ​ໄດ້​ເພີ່ມ​ທະວີ​ການ​ຮ່ວມ​ມື​ກັບ​ຈີນ, ຍິນດີ​ສະໜອງ​ການ​ຊ່ວຍເຫຼືອ​ທຸກ​ສິ່ງ​ທຸກ​ຢ່າງ​ທີ່​ຈຳເປັນ​ຕາມ​ຄວາມ​ຕ້ອງການ​ຂອງ​ຈີນ.
ທ່ານ ເທັດ​ຣົສ ກ່າວ​ຕື່ມ​ວ່າ: ພວກ​ຂ້າພະເຈົ້າ​ໄດ້​ເຫັນ​ບາງ​ປະເທດ​ສະແດງ​ວ່າ: ຈະ​ຍົກຍ້າຍ​ພົນ​ລະເມືອງ​ຂອງ​ຕົນ​ອອກ​ຈາກ​ຈີນ, ແຕ່​ອົງການ​ອະ ນາໄມ​ໂລກ​ເຫັນ​ວ່າ; ເລື່ອງ​ນີ້​ແມ່ນ​ບໍ່​ມີ​ຄວາມ​ຈຳ​ເປັນ. ພາຍ​ໃຕ້​ສະພາບ​ການ​ໃນ​ປັດຈຸບັນ​ຄວນ​ຮັກສາ​ຄວາມ​ທຸ່ນ​ທ່ຽງ, ບໍ່​ຄວນ​ມີ​ປະຕິກິລິຍາ​ເກີນ​ຄວນ. ອົງການ​ອະນາໄມ​ໂລກ ມີ​ຄວາມ​ໝັ້ນ​ໃຈ​ຢ່າງ​ເຕັມ​ປ່ຽມ​ຕໍ່​ຄວາມ​ສາມາດ​ຂອງ​ລັດຖະບານ​ຈີນ ໃນ​ການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະ​ຍາດ.
  ທ່ານ ຫວາງ​ຢີ້ ກ່າວ​ວ່າ: ຈີນ ຍິນດີ​ສືບຕໍ່​ເພີ່ມ​ທະວີ​ການ​ຮ່ວມ​ມື​ກັບ​ປະຊາ​ຄົມ​ໂລກ ໂດຍ ​ສະເພາະ​ແມ່ນ​ອົງການ​ອະນາ ໄມ​ໂລກ ດ້ວຍ​ຫຼັກການ​ທີ່​ເປີດ ເຜີຍ ແລະ ໂປ່​ງ​ໃສ, ຍິນດີ​ສືບຕໍ່​ ພະຍາຍາມ​ເພື່ອ​ພາລະກິດ​ສາ ທາລະນະ​ສຸກ​ຂອງ​ໂລກ.
ຂະນະ​ດຽວ​ກັນ​ນັ້ນ, ທ່ານ ອັນໂຕ​ນີ​ໂອ ກູ​ເຕີ​ເຣສ ເລຂາ ທິການ​ໃຫຍ່​ອົງການ​ສະຫະ​ປະຊາຊາດ (ສປຊ) ກ່າວ​ວ່າ: ໃນ​ຂະນະ​ທີ່​ສຳຄັນ​ຢ່າງ​ຍິ່ງ​ນີ້, ອົງການ ສປຊ ເດັດດ່ຽວ​ຢືນ​ຄຽງ​ບ່າ​ຄຽງ​ໄຫຼ່​ກັບ​ລັດຖະບານ ແລະ ປະຊາຊົນ​ຈີນ. ອົງການ ສປຊ ຍ້ອງຍໍ​ຊົມເຊີຍ​ຄວາມ​ພະຍາຍາມ​ຂອງ​ຈີນ, ມີ​ຄວາມ​ໝັ້ນ​ໃຈ​ຢ່າງ​ເຕັມທີ່​ຕໍ່​ຄວາມ​ສາມາດ​ຂອງ​ຈີນ ໃນ​ການ​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ພະຍາດ, ຍິນດີ​ສະໜອງ​ການ​ສະໜັບສະໜູນ ແລະ ການ​ຊ່ວຍເຫຼືອ​ທຸກ​ສິ່ງ​ທຸກ​ຢ່າງ​ຕາມ​ຄວາມ​ສາມາດ​ຂອງ​ຕົນ.
  ຂ່າວ​ລາຍ​ງານ​ວ່າ: ຄະນະ​ກຳມະການ​ອະນາໄມ ແລະ ສຸຂະພາບ​ແຫ່ງ​ຊາດ​ຈີນ ໄດ້​ຈັດ​ກອງ​ປະຊຸມ​ຖະແຫຼງ​ຂ່າວ. ທ່ານ ນາງ ຈ່ຽວ​ຢາ​ຮຸ່ຍ ຮອງ​ຫົວໜ້າ​ກົມ​ນະໂຍບາຍ ແລະ ຄຸ້ມ​ຄອງ​ການ​ແພດ​ຂອງ​ຄະນະ​ກຳມະການ​ດັ່ງກ່າວ ກ່າວວ່າ: ໜ່ວຍ​ງານ​ປິ່ນປົວ​ແຫ່ງ​ຕ່າງໆ ​ຂອງ​ຈີນ ພວມ​ຊ່ວຍເຫຼືອ ​ແຂວງ​ຫູ​ເປີ​ຍ​ຕໍ່ຕ້ານ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່. ວັນ​ທີ 28 ມັງກອນ​, ໜ່ວຍ​ງານ​ປິ່ນປົວ 30 ໜ່ວຍມີ​ພະນັກງານ​ທັງ​ໝົດ 4.130 ຄົນ, ໄດ້​ເດີນທາງ​ຮອດ​ແຂວງ​ຫູ​ເປີຍ, ປັດຈຸບັນ​ພວມ​ເລັ່ງ​ລັດ​ປະຕິບັດ​ໜ້າ​ທີີ່​ຂອງ​ຕົນ ແລະ ຍັງ​ມີ​ໜ່ວຍ​ງານ​ປິ່ນປົວ 13 ໜ່ວຍ​ງານ ຈະ​ເດີນທາງ​ຮອດ​ຫູ​ເປີຍ, ຄາດ​ວ່າ: ຈະ​ມີ​ພະນັກງານ​ການ​ແພດ​ຂອງ​ຈີນ 6 ພັນ​ຄົນ ຊ່ວຍເຫຼືອ​ແຂວງ​ຫູ​ເປີຍ ເພື່ອ​ຕໍ່ຕ້ານ​ພະຍາດ​ອັກເສບ​ປອດ​ສາຍ​ພັນ​ໃໝ່.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110