ກົມຈັດຕັ້ງ-ພະນັກງານ ອົງການໄອຍະການປະຊາຊົນສູງສຸດ (ອອ​ປ​ສ) ໄດ້ລົງເຄື່ອນໄຫວເຮັດວຽກກ່ຽວກັບແຜນກໍານົດພະນັກງານນໍາພາ-ຄຸ້ມຄອງ​ຂອງອົງການໄອຍະການປະຊາຊົນແຂວງ​ ແລະ​ ເຂດແຂວງບໍລິຄໍາໄຊ,​ ໃນລະຫວ່າງວັນທີ​ 2-3​ ສິງຫາ​​ນີ້ ທີ່ຫ້ອງ​ປະ​ຊຸມ​ແຂວງ​, ເຂົ້າຮ່ວມມີ ທ່ານ ນາງ​ ແຕງທອງ​ ພັນປະດິດ​ ຄະນະພັກ​ ຮອງຫົວໜ້າຈັດຕັ້ງແຂວງ,​ ທ່ານ​ ຄໍານຸທອນ​ ສູນວິເລີດ​ ຮອງຫົວໜ້າກົມຈັດຕັ້ງ-ພະນັກງານ​ ອອ​ປ​ສ, ​ມີຫົວໜ້າ-ຮອງຫົວໜ້າອົງການໄອຍະການປະຊາຊົນເຂດ ພ້ອມດ້ວຍພະນັກງານ ລັດຖະກອນເຂົ້າຮ່ວມ.

   ໃນກອງປະຊຸມ​, ທ່ານ ນາງ​ ຈັນເພັງ ແສນຈັນດາ ຮອງຫົວໜ້າອົງການໄອຍະການປະຊາຊົນແຂວງ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດແຜນກໍານົດພະນັກງານນໍາພາ-ຄຸ້ມຄອງ​ຂອງອົງການໄອຍະການປະຊາຊົນແຂວງ,​ ຮັບຟັງການເຜີຍແຜ່ມະຕິກົມການເມືອງສູນກາງພັກ ເລກທີ​ 032/ກມສພ ລົງວັນທີ 3 ມັງກອນ​ 2018 ໂດຍທ່ານຫົວໜ້າອົງການໄອຍະການປະຊາຊົນແຂວງ. ຈາກນັ້ນ, ຄະນະຈັດຕັ້ງແຂວງໄດ້ຂຶ້ນຜ່ານຄໍາແນະນໍາຂອງຈັດຕັ້ງສູນກາງພັກ ເລກທີ​ 292/ຄຈສພ ລົງວັນທີ​ 26/04/2018.​ ຈາກນັ້ນ, ຕາງໜ້າກົມຈັດຕັ້ງພະນັກງານອົງການໄອຍະການປະຊາຊົນສູງສຸດໄດ້ຂຶ້ນຜ່ານກ່ຽວກັບມາດຖານເງື່ອນໄຂຂອງບຸກຄະລາກອນເປັນຕົ້ນດ້ານຄຸນທາດການເມືອງ,​ ຄຸນສົມບັດສິນທໍາປະຕິວັດ,​ ຄວາມຮູ້ຄວາມສາມາດ,​ ແບບແຜນການນໍາພາ ແລະ ​ວິທີເຮັດວຽກອື່ນໆ. ພ້ອມດຽວກັນຄະນະຮັບຜິດຊອບກອງປະຊຸມຂັ້ນແຂວງ ແລະ​ ສູນກາງໄດ້ດໍາເນີນຂັ້ນຕອນການຢາຍບັດທາບທາມ ຮອບທີ 1,​ ດໍາເນີນການທາບທາມຮອບ 2 ແລະ ​ຮອບ 3 ພ້ອມທັງສະຫຼຸບສັງລວມຄະແນນ ເພື່ອລາຍງານຕໍ່ຄະນະພັກ ຄະນະນໍາ ອົງການໄອຍະການປະຊາຊົນສູງສຸດຕາມລໍາດັບ.