ຫົວ​ຂໍ້ : ອາລີອັນ ປະກັນໄພລາວ ນຳສະເໜີຜະລິດຕະພັນປະກັນໄພ ຊີວິດແບບໃໝ່

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 30/01/2020 09:21:09 ຈຳ​ນວນ​ຜູ້​ເຂົ້າ​ຢ້ຽມ​ຊົມ 270 ຄັ້ງ

   ບໍລິສັດ​ ອາລີ​ອັນ ປະກັນ​ໄພ​ລາວ ໄດ້​ຈັດ​ງານ​ຖະແຫຼງ​ຂ່າວ​ການປັບປຸງ​ການ​ບໍລິການ​ຢ່າງ​ຮອບດ້ານ ຂອງ​ບໍລິສັດ​ພ້ອມ​ທັງ​ແນະນຳ​ຜະລິດ​ຕະ​ພັນ​ປະກັນ​ຊີວິດ​ແບບ​ໃໝ່, ປະກັນ​ຊີວິດ​ອຸ່ນໃຈ​ ຫາຍຫ່ວງ ຂຶ້ນໃນວັນ​ທີ 27 ມັງກອນ​ຜ່ານ​ມາ ທີ່​ສໍາ​ນັກ​ງານ​ໃຫຍ່ ບໍລິສັດ​ດັ່ງກ່າວ ໂດຍ​ການ​ເຂົ້າ​ຮ່ວມ​ຂອງ​ທ່ານ ບຸນ​ເຫຼືອ ສິນ​ໄຊ​ວໍລະ​ວົງ ປະທານ​ສະພາ​ບໍລິຫານ ບໍລິສັດ ອາລີ​ອັນ​​ປະກັນ​ໄພ​ລາວ, ທ່ານ ນາງ ພິລາ​ນີ ພິດ​ສະ​ໄໜ ກໍາ​ມະ​ການ​ສະພາ​ບໍລິຫານ​ບໍລິສັດ​ອາລີ ອັນ ປະກັນ​ໄພລາວ, ທ່ານ ກີ ອາໂປ​ວີ ຜູ້​ອໍາ​ນວຍ ​ການ ແລະ ຮອງ​ຜູ້​ອໍາ​ນວຍ​ການ​ບໍລິສັດ ​ອາລີ ອັນປະກັນ​ໄພ​ລາວ ພ້ອມ​ແຂກ​ຖືກ​ເຊີນ ແລະ ພະນັກງານ​ເຂົ້າ​ຮ່ວມ.
   ພາຍ​ໃນ​ງານ​ໄດ້​ແນະນຳ​ຜະລິດ​ຕະ​ພັນ​ປະກັນ​ຊີວິດ​ແບບ​ໃໝ່, ປະກັນ​ຊີວິດ​ອຸ່ນໃຈ​ຫາຍ​ຫ່ວງ (AGL Life Protection Insurance) ຊຶ່ງ​ເປັນ​ຜະລິດ​ຕະ​ພັນ​ໃໝ່ ທີ່​ຖືກ​ພັດທະນາຂຶ້ນ​ເພື່ອ​ຮອງ​ຮັບ​ບຸກຄົນທົ່ວ​ໄປ​ແລະ ​ກຸ່ມ​ບໍລິສັດ ຫຼື ອົງ​ກອນ​ທີ່​ຕ້ອງການ​ຊື້​ປະກັນ​ຊີວິດ​ໃຫ້​ກັບ​ຕົນ​ເອງ ແລະ ພະນັກງານ​ຂອງ​ຕົນ ເນື່ອງ​ຈາກ​ວ່າ​ມີ​ລາຄາ​ບໍ່​ແພງ ແລະ ຄ່າ​ທໍາ​ນຽມ​ແບບ​ຄົງ​ທີ່​ບໍ່​ວ່າ​ທ່ານ​ລູກ​ຄ້າ​ຈະ​ອາຍຸ​ເທົ່າໃດ​ກໍ​ຕາມ ປະກັນຊີວິດ​ແບບ​ໃໝ່​ນີ້​ໃຫ້ການ​ຄຸ້ມ​ຄອງ​ກໍລະນີ​ເສຍ​ຊີວິດ ຫຼື ພິການ​ຖາວອນ​ຈາກ​ພະຍາດ 100% ແລະ ກໍລະນີ ເກີດ​ຈາກ​ອຸບັດ ເຫດ 200% ຂອງ​ວົງ​ເງິນ​ຄຸ້ມ​ຄອງ ນອກ​ນັ້ນ​ຜູ້​ເອົາ​ປະກັນ ແລະ ຄອບຄົວ​ຍັງ​ໄດ້​ຮັບເງິນອຸດ ​ໜູນ​ຈາກ​ປະກັນ​ໄພ​ແບບ​ລາຍ​ປີ​ຈໍາ​ນວນ 10%  ຫຼື  20% ຂອງ ​ວົງ​ເງິນ​ເອົາ​ປະກັນ​ໄພ​ທຸກ​ປີ​ ໂດຍບໍ່​ໄດ້​ເສຍ​ຄ່າ​ທໍາ​ນຽມ​ປະ ກັນ​ໄພ​ອີກ. 
   ພ້ອມ​ນັ້ນ​ ກໍ​ມີ​ການ​ແຈ້ງ​ເປີດ​ຫ້ອງ​ບໍລິການ​ຈ່າຍ​ສິນ ແທນ​ປະຕູ​ດຽວ ຊຶ່ງ​ການ​ຍົກ​ລະດັບ​ການ​ບໍ​ລິການດ້ານ​ສິນ​ທົດ​ແທນ​ປະກັນ​ໄພ ເພື່ອໃຫ້ ວ່ອງໄວ​ຂຶ້ນ ໂດຍ​ລວມ​ສູນ​ເອົາ​ການ​ຈ່າຍ​ສິນ​ທົດ​ແທນ​ທຸກ​ປະ ເພດປະກັນ​ໄພ​ເຊັ່ນ:  ປະກັນ​ໄພ​ລົດ, ປະກັນ​ໄພ​ສຸຂະພາບ ແລະ ປະກັນ​ໄພ​ຊັບ​ສິນ​ໄວ້​ບ່ອນ​ດຽວ, ນໍາ​ໃຊ້ລະບົບ​ດີ​ຈິ​ຕອນເຂົ້າ​ ຊ່ວຍ​ໃນ​ຂະບວນ​ການ​ເຮັດ​ວຽກ​ເລີ່ມ​ຕັ້ງແຕ່​ຂັ້ນ​ຕອນ​ທີ່​ລູກ​ຄ້າ​ໄດ້​ແຈ້ງ​ອຸບັດເຫດ ຈົນເຖິງ​ດໍາ​ເນີນ​ການ​ຈ່າຍ​ເງິນ​ຄືນ​ເຮັດ​ໃຫ້​ຂັ້ນ​ຕອນ​ການ​ພິຈາລະນາ​ສັ້ນ​ຂຶ້ນ, ລູກ​ຄ້າ​ສາມາດ​ຍື່ນ​ເອກະ ສານ​ສິນທົດ​ແທນ ແລະ ຮັບ​ເງິນ​ຄືນຢູ່​ຈຸດ​ດຽວ. ເພື່ອຍົກລະ ດັບການ​ບໍລິການໃຫ້ດີ​ຍິ່ງຂຶ້ນ ​ບໍລິ​ສັດຍັງໄດ້​ພັດທະ​ນາ​ເຄື່ອງ ມື​ດີຈີຕອນ ແລະ ແອັບ​ພິ​ເຄ​ເຊິນ​ອອກ​ມາ​ຮັບໃຊ້​ລູກ​ຄ້າຢ່າງ​ຫຼາກຫຼາຍ​ເປັນຕົ້ນ​ແມ່ນ AGL My Insurance App ຊຶ່ງ​ເປັນ​ແອັບ​ທີ່​ເຮັດ​ໃຫ້​ລູກ​ຄ້າ​ສາມາດ​ກວດສອບສັັ້ນຍາ​ປະກັນ​ໄພ ຂອງ​ຕົນ, ຊອກ​ຫາຕົວ​ແທນ​ຈໍາ​ໜ່າຍ, ກວດ​ສອບ ແລະ ຕິດຕາມ​ຂັ້ນ​ຕອນ​ການ​ຈ່າຍ​ສິນທົດ​ແທນ​ຂອງ​ຕົນ ໂດຍ​ບໍ່ຕ້ອງ​ເສຍເວລາ​ເຂົ້າ​ໄປ​ສອບ​ຖາມ​ທີ່​ສໍາ​ນັກ​ງານ, ປັດຈຸ​ບັນ​ລູກ​ຄ້າ​ສາມາດ​ຊື້​ປະກັນ​ໄພ ແລະ ຊໍາ​ລະ​ໄດ້​ຢ່າງ​ງ່າຍດາຍພຽງແຕ່​ ໂທ​ຫາ​ບໍລິສັດ ຫຼື ຕົວ​ແທນ ເພື່ອ​ເຮັດ​ສັນຍາ​ປະກັນ​ໄພ ແລ້ວ​ລູກ​ຄ້າ​ກໍ​ສາມາດຈ່າຍ​ຄ່າປະກັນ ໄພຜ່ານ​ແອັບ BCEL One ພຽງ​ ເທົ່າ​ນີ້​ສັນຍາ​ກໍ​ຈະ​ຖືກ​ຄຸ້ມ​ກັນ​ ທັນ​ທີ. ພ້ອມ​ນີ້ ທ່ານ ກີອາໂປວີ ຜູ້​ອໍານວຍ​ການ​ບໍລິສັດ​ອາລີ​ອັນ ປະກັນ​ໄພ​ລາວ ຍັງ​ໄດ້​ໃຫ້​ຮູ້​ຕື່ມ​ເຖິງ​ຜົນ​ສໍາ​ເລັດ​ອັນ​ຍິ່ງ​ໃຫຍ່ຂອງ​ບໍລິສັດ ຊຶ່ງ​ກໍ​ຄືການ​ ຊື້ ແລະ ເປັນ​ເຈົ້າ​ຂອງ​ຕຶກ​ອາ ຄານ​ເອ​ເອັນ​ແຊັດ ຫາ​ກໍ​ສໍາ​ເລັດ​ການ​ເຊັນ​ສັນຍາ​ຊື້​-​ຂາຍນັບ​ເປັນ​ບາດກ້າວ​ທີ່​ສະແດງ​ໃຫ້​ເຫັນ​ການ​ເຕີບ​ໃຫຍ່ ແລະ ​ໝັ້ນ​ຄົງ​ຂອງ​ບໍລິສັດ ແລະ ພ້ອມ​ທີ່​ຈະໃຫ້​ບໍລິການ​ແກ່​ສັງຄົມ​ລາວ​ຢ່າງ​ບໍ່​ຢຸດ​ຢັ້ງ ແລະ ໄດ້​ໃຫ້ ການ​ບໍລິການ​ດ້ານ​ປະກັນ​ໄພ​ແກ່​ສັງຄົມ​ລາວ​ມາ​ໄດ້ 30 ປີ.  (ຂ່າວ:ຍຸ​ພິນ​ທອງ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110