ຫົວ​ຂໍ້ : ຊາວໜຸ່ມ ສະຖາບັນວິຈິດສິນແຂ່ງຂັນກິລາເປຕັງມິດຕະພາບ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 30/01/2020 09:48:22 ຈຳ​ນວນ​ຜູ້​ເຂົ້າ​ຢ້ຽມ​ຊົມ 794 ຄັ້ງ

 ຄະນະ​ຊາວ​ໜຸ່ມ​ໜ່ວຍ​ຮາກ​ຖານ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກະຊວງ​ຖະ​ແຫຼ່ງ​ຂ່າວ ວັດທະນະທຳ ແລະ ທ່ອງ​ທ່ຽວ (ຖວທ) ຈັດ​ແຂ່ງຂັນ​ກິລາ​ເປ​ຕັງ​ຊີງ​ລາງວັນ​ຮູບແຕ້ມ​ ຫົວ ໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ຄັ້ງ​ທີ 5 ສົກ​ສຶກສາ 2019-2020 ຂຶ້ນ​                                                             ເມື່ອ​ບໍ່​ດົນ​ຜ່ານ​ມາ ທີ່​ສະ​ຖາ​ບັນ​ດັ່ງ ກ່າວ ຊຶ່ງ​ມີ​ທ່ານ ໄມ​ສິງ ຈັນ​ບຸດ​ດີ ຫົວໜ້າ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ, ທ່ານ ບົວ​ໄລ ພານຸ​ວົງ ເລຂາ​ຄະນະ​ບໍລິຫານ​ງານ​ຊາວ​ໜຸ່ມ​ກະຊວງ ຖວທ ພ້ອມ​ດ້ວຍ​ນັກ​ກິລາ​ເຂົ້າ​ຮ່ວມ.
ທ່ານ ບຸນ​ເຕີມ ສີ​ບຸນ​ເຮືອງ ເລຂາ​ຊາວ​ໜຸ່ມ​ຮາກ​ຖານ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກ່າວ​ວ່າ: ເພື່ອ​ເປັນ​ສ້າງ​ຂະບວນ​ການ​ຕ້ອນຮັບ​ກອງ​ປະຊຸມ​ໃຫຍ່​ໜ່ວຍ​ພັກ​ສະ​ຖາ​ບັນ​ວິຈິດ​ສິນ​ແຫ່ງ​ຊາດ ກອງ​ປະຊຸມ​ໃຫຍ່​ຊາວ​ໜຸ່ມ ກະຊວງ ຖວທ ຄັ້ງ​ທີ VIII ສ້າງ​ຄວາມ​ສາມັກຄີ​ລະຫວ່າງ​ພະນັກງານ​ອ້ອມ​ຂ້າງ​ກະຊວງ ກໍ​ຄື​ພາກສ່ວນ​ພາຍ​ນອກ​ໃຫ້​ມີ​ຄວາມ​ຮັດ​ແໜ້ນ​ສາມັກຄີ​ກັນ​ຍິ່ງ​ຂຶ້ນ ທັງ​ເປັນ​ການ​ຊົມເຊີຍ​ວັນ​ສ້າງຕັ້ງ​ກອງທັບ​ປະຊາຊົນ​ປະຕິວັດ​ລາວ ຄົບຮອບ 71 ປີ ໃຫ້​ມີ​ຄວາມ​ໝາຍ​ສຳຄັນ ແລະ ບັນຍາກາດ​ຟົດ​ຟື້ນ.
ການ​ແຂ່ງຂັນ​ໃນ​ຄັ້ງ​ນີ້​ມີ​ທີ​ມ​ນັກ​ກິລາ​ເຂົ້າ​ຮ່ວມ​ທັງ​ໝົດ 45 ທີມ ໃນ​ນັ້ນ​ປະເພດ​ທີ​ມ​ອາວຸໂສ​ມີ 13 ທີມ ທີ​ມ​ຊາວ​ໜຸ່ມ​ຊາຍ 20 ທີມ ແລະ ທີ​ມ​ຊາວ​ໜຸ່ມ​ຍິງ 12 ທີມ ຊຶ່ງ​ການ​ແຂ່ງຂັນ​ໄດ້​ດຳເນີນ​ໄປ​ດ້ວຍ​ບັນຍາກາດ​ຟົດຟື້ນ ແລະ ຜ່ານ​ການ​ແຂ່ງຂັນ​ຜົນ​ປະກົດ​ວ່າ ທີ​ມ​ທີ່​ສາດ​ມາດ​ຍາດ​ໄດ້​ລາງວັນ​ຮູບແຕ້ມ​ຊະນະ​ເລີດ ປະເພດ​ທີ​ມ​ອາວຸໂສ ໄດ້ແກ່​ທີ​ມ​ຫໍ​ວັດທະນະທຳ​ແຫ່ງ​ຊາດ, ທີ​ມ​ຊາວ​ໜຸ່ມ​ຊາຍ​ຫໍ​ພິ​ພິ​ຕະ​ພັນ​ແຫ່ງ​ຊາດ ແລະ ທີ​ມ​ຊາວ​ໜຸ່ມ​ຍິງ ກົມ​ພິມ​ຈຳໜ່າຍ ໄດ້​ຮັບ​ຮູບແຕ້ມ ແລະ ເງິນ​ລາງວັນ​ພາກສ່ວນ​ລະ 8 ແສນ​ກີບ ສຳລັບ​ທີ​ມ​ຮອງ​ຊະນະ​ເລີດ​ອາວຸໂສ ສະໂມສອນ​ບ້ານ​ຊຽງ​ດາ ແລະ ທີ​ມ​ຊາຍ​-​ຍິງ​ໂຮງຮຽນ​ສິລະ​ປະ​ດົນຕີ​ແຫ່ງ​ຊາດ​ໄດ້​ຮັບ​ຮູບແຕ້ມ​ພ້ອມ​ດ້ວຍ​ເງິນ​ລາງ​ວັນ​ພາກສ່ວນ​ລະ 5 ແສນ​ກີບ ສ່ວນ​ອັນ​ດັບ​ທີ 3 ທີມ​ອາວຸໂສ ຂະແໜງ​ກິລາ​ມວນ​ຊົນ​ປະເພດ​ຊາຍ​ທີ​ມ​ສູນວັດທະນະທຳ​ເດັກ ແລະ ທີ​ມ​ປະເພດ​ຍິງ ທີ​ມ​ຫໍ​ວັດທະນະທຳ​ໄດ້​ຮັບ​ຮູບແຕ້ມ ແລະ ເງິນ​ລາງວັນ​ພາກສ່ວນ​ລະ 3 ແສນ​ກີບ ນອກ​ນັ້ນ​ແມ່ນ​ລາງວັນ​ຊົມເຊີຍ​ໃຫ້​ທີ​ມ​ທີ່ເຂົ້າ​ຮ່ວມ​ອີກ​ຈຳນວນ​ໜຶ່ງ
 (ຂ່າວ:ວົງ​ຈອນ​ກິລາ).
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110