ຫົວ​ຂໍ້ : ທ່ານ ສີຈິ້ນຜິງ ເນັ້ນມີຄວາມໝັ້ນໃຈຈະຄວບຄຸມພະຍາດໄດ້

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 31/01/2020 09:28:59 ຈຳ​ນວນ​ຜູ້​ເຂົ້າ​ຢ້ຽມ​ຊົມ 502 ຄັ້ງ

  ຂ່າວສານ​ຊີ​ອາ​ໄອ​ລາຍ​ງານ​ວ່າ: ໃນ​ເວລາ​ພົບ​ປະ​ກັບ​ທ່ານ ທີ​ໂດ​ຣສ ອັດ​ຮາ​ນອມ ກີ​ບີ​ຣເຢ​ຊຸສ ຜູ້ອຳນວຍການ​ໃຫຍ່​ອົງການ​ອະນາໄມ​ໂລກ (WHO), ຢູ່​ນະຄອນຫຼວງ​ປັກ​ກິ່ງ ແຫ່ງ ສປ​ຈີນ, ໃນ​ວັນ​ທີ 28 ມັງກອນ​ຜ່ານ​ມາ, ທ່ານ ສີ​ຈິ້ນ​ຜິງ ປະທານ​ປະເທດ​ຈີນ ເນັ້ນ​ໜັກ​ວ່າ: ຈີນ​ມີ​ຄວາມ​ໝັ້ນ​ໃຈ​ຢ່າງ​ເຕັມ​ປ່ຽມ​ແລະ ມີ​ຄວາມ​ສາມາດ​ທີ່​ຈະ​ເອົາ​ຊະນະ​ໃນ​ບັ້ນ​ປ້ອງ​ກັນ ແລະ ຄວບ​ຄຸມພະ​ຍາດ​ໃນ​ຄັ້ງ​ນີ້. 
  ພ້ອມ​ກັນ​ນັ້ນ​ທ່ານ​ໄດ້​ຊີ້​ໃຫ້​ເຫັນ​ວ່າ: ຈີນ ໄດ້​ແຈ້ງ​ສະພາບ​ການ​ຕໍ່​ພາຍ​ນອກ​ຕາມ​ຫຼັກການ​ທີ່​ເປີດເຜີຍ, ໂປ່​ງ​ໃສ ແລະ ມີ​ຄວາມ​ຮັບຜິດຊອບ​ຕະຫຼອດ​ມາ, ຍິນດີ​ຮ່ວມ​ກັນ​ກັບ​ອົງການ​ອະນາໄມ​ໂລກ ກໍ​ຄື​ປະຊາ​ຄົມ​ໂລກ, ຮ່ວມ​ກັນ​ປົກ​ປັກ​ຮັກສາ​ຄວາມ​ປອດ​ໄພ​ສາທາລະນະ​ສຸກ​ຂອງ​ພາກ​ພື້ນ ກໍ​ຄື​ຂອງ​ໂລກ​ໃຫ້​ດີ.
  ຂະນະ​ດຽວ​ກັນ, ທ່ານ ທີ​ໂດ​ຣສ ກ່າວ​ວ່າ: ຈີນ ໃຊ້​ມາດ​ຕະການ​ຕອບ​ໂຕ້​ຢ່າງ​ວ່ອງໄວ ແລະ ດຳເນີນ​ໃນ​ບໍລິເວນ​ກວ້າງຂວາງ​ຢ່າງ​ແຂງແຮງ ຊຶ່ງ​ໄດ້​ສະແດງ​ໃຫ້​ເຫັນ​ຄວາມ​ໄວ ແລະ ຄວາມ​ກວ້າງ​ໃຫຍ່​ໃນການ​ ຕອບ​ໂຕ້​ຂອງ​ຈີນ, ອົງການ​ອະ ນາໄມ​ໂລກ ສະແດງ​ຄວາມຊົມ ເຊີຍ​ຢ່າງ​ສູງ​ຕໍ່​ເລື່ອງ​ນີ້. ນີ້​ແມ່ນ​ຄວາມ​ດີເລີດ​ດ້ານ​ລະບຽບຫຼັກ ການ​ຂອງ​ຈີນ, ບົດຮຽນ​ທີ່​ກ່ຽວ ຂ້ອງ​ມີ​ຄວາມ​ໝາຍ​ເປັນ​ສິ່ງ​ທີ່​ໜ້າ​ຖອດ​ຖອນ​ຮ່ຳຮຽນ​ສຳລັບ​ປະເທດ​ອື່ນໆ. ຂ້າພະເຈົ້າ​ເຊື່ອ​ວ່າ, ມາດ​ຕະການ​ທີ່​ຈີນ ປະຕິບັດ​ນັ້ນ ຈະ​ສາມາດ​ຄວບ​ຄຸມ​ການ​ແຜ່​ລະບາດ​ຂອງ​ພະຍາດ ແລະ ເອົາ​ຊະນະ​ໃນ​ທີ່​ສຸດ.
ອົງການ​ອະນາໄມ​ໂລກ ສະໜັບສະໜູນ​ຈີນ ໃນ​ການ​ໃຊ້​ມາດ​ຕະການ​ສະກັດ​ກັ້ນການ​ ແຜ່​ລະບາດ​ຂອງ​ພະຍາດ​ຢ່າງ​ເດັດຂາດ ແລະ ຢຶດ​ໝັ້ນ​ວິນິດ​ໄສ​ຕາມ​ວິທະຍາສາດ ແລະ ຄວາມ​ຈິງ, ຄັດຄ້ານ​ການ​ມີ​ປະຕິກິລິຍາ​ເກີນ​ຂອບ​ເຂດ ແລະ ກ່າວ​ຖ້ອຍ​ຄວາມ​ທີ່​ບໍ່​ມີ​ມູນ​ຄວາມ​ຈິງ. ອົງການ​ອະນາໄມ​ໂລກ ຊົມເຊີຍ​ຢ່າງ​ສູງ​ຕໍ່​ຈີນ ທີ່​ໄດ້​ເສີມ​ຂະຫຍາຍ​ບົດບາດ ແລະ ປະກອບສ່ວນ​ອັນ​ສຳຄັນ ເພື່ອ​ພາລະກິດ​ສາທາລະນະ​ສຸກ​ຂອງ​ໂລກ, ຍິນດີ​ສືບຕໍ່​ດຳເນີນ​ການ​ຮ່ວມ​ມື​ທາງ​ຍຸດທະສາດ​ກັບ​ຈີນ.
  ຂ່າວ​ລະບຸ​ວ່າ: ຄະນະ​ກຳມະການ​ອະນາໄມ ແລະ ສຸຂະພາບ​ແຫ່ງ​ຊາດ​ຈີນ​ໄດ້​ຮັບ​ການ​ລາຍ​ງານ​ຜູ້​ເປັນ​ພະຍາດ​ດັ່ງກ່າວ​ຈາກ 31 ແຂວງ, ເຂດ​ປົກຄອງ​ຕົນ​ເອງ, ກຳແພງ​ນະຄອນ ໃນ​ທົ່ວ​ປະເທດ​ມີ​ທັງ​ໝົດ 5.974 ຄົນ, ຜູ້​ມີ​ອາການ​ໜັກ 1.239 ຄົນ, ມີ 132 ຄົນ​ເສຍ​ຊີວິດ, ຜູ້​ທີ່​ຫາຍ​ຂາດ ແລະ ອອກ​ໂຮງໝໍ​ມີ 103 ຄົນ, ຜູ້​ທີ່​ຖືກ​ສົງໄສ​ຕິດເຊື້ອ​ພະຍາດ​ມີ 9.239 ຄົນ.
ປັດຈຸບັນ, ໄດ້​ຕິດຕາມ​ຜູ້​ທີ່​ເຄີຍ​ສຳຜັດ​ກັບ​ຜູ້​ເປັນ​ພະຍາດ​ຢ່າງ​ໃກ້ຊິດ​ມີ 65.537 ຄົນ, ໄດ້​ຍົກເລີກ​ການ​ຕິດຕາມ​ສັງເກດ​ທາງ​ການ​ແພດ 1.604 ຄົນ ແລະ ຍັງ​ມີ 59.990 ຄົນ​ພວມ​ຖືກ​ຕິດຕາມ​ສັງເກດ​ທາງ​ການ​ແພດ​ຢູ່.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110