ກອງບັນຊາການທະຫານແຂວງສະຫວັນນະເຂດ ໄດ້ຈັດກອງປະຊຸມສະຫຼຸບວຽກງານປະຈຳ 6 ເດືອນຕົ້ນປີ ແລະ ວາງແຜນການ 6 ເດືອນທ້າຍປີ 2021 ຂຶ້ນເມື່ອບໍ່​ດົນ​ມານີ້ ທີ່ສະໂມສອນກອງບັນຊາດັ່ງ​ກ່າວ ພາຍໃຕ້ການເປັນປະທານຂອງທ່ານ ພົຈວ ສີ ທະວີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ ໂດຍໃຫ້ກຽດເຂົ້າຮ່ວມຂອງທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີຄະນະພັກ, ຄະນະຫ້ອງ, ຄະນະພະແນກການວິຊາການທີ່ກ່ຽວຂ້ອງເຂົ້າຮ່ວມ.     

ທ່ານ ພັທ ສົມພັນ ທຳມະວົງ ຮອງຫົວໜ້າຫ້ອງການກອງບັນຊາການແຂວງ ໄດ້ຂຶ້ນຜ່ານບົດສະຫຼຸບຮອບດ້ານໃນໄລຍະ 6 ເດືອນຕົ້ນປີ 2021 ຊຶ່ງໄດ້ຍົກໃຫ້ເຫັນສິ່ງທີ່ພົ້ນເດັ່ນໃນການເຄື່ອນໄຫວວຽກງານໃນໄລຍະຜ່ານມາ ຊຶ່ງຄະນະພັກ-ຄະນະບັນຊາແຕ່ລະຂັ້ນ ໄດ້ເອົາໃຈໃສ່ໃນວຽກງານການເມືອງນຳພາແນວຄິດຂອງພະນັກງານ-ນັກຮົບແຕ່ລະກົມກອງ ເຮັດໃຫ້ທົ່ວກົມກອງມີແນວຄິດຫຼັກໝັ້ນໜັກແໜ້ນ, ມີຄວາມອຸ່ນອ່ຽນທຸ່ນທ່ຽງຕໍ່ແນວທາງນະໂຍບາຍຂອງພັກ-ລັດໄດ້ດີ ພ້ອມນີ້, ຍັງໄດ້ເອົາໃຈໃສ່ແຕ່ງຕັ້ງພະນັກງານລົງກໍ່ສ້າງຮາກຖານການເມືອງແນວຄິດກັບປະຊາຊົນກຸ່ມບ້ານອ້ອມຂ້າງຢ່າງເປັນປົກກະຕິ, ດ້ານວຽກງານເຮັດໃຫ້ສະພາບມີຄວາມສະຫງົບ, ກຳແໜ້ນຕິດຕາມສະພາບຕ່າງໆ ໂດຍສະເພາະສະພາບການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຕາມຊາຍແດນ. ດັ່ງນັ້ນ, ຄະນະການນຳກອງບັນຊາການທະຫານແຂວງ ຈຶ່ງໄດ້ພ້ອມກັນຮ່ວມມືກັບພາກ​ສ່ວນກ່ຽວຂ້ອງ ແຕ່ງຕັ້ງວິຊາສະເພາະລົງສຶກສາອົບຮົມການເມືອງ-ແນວຄິດກັບຈຳພວກດັ່ງກ່າວ ເຮັດໃຫ້ມາຮອດ​ປັດຈຸບັນນີ້ ແມ່ນມີຄວາມສະຫງົບດີເປັນກ້າວໆ. ໃນ 6 ເດືອນຕົ້ນປີນີ້, ກອງບັນຊາການ ປກຊ ແຂວງ ກໍໄດ້ສືບຕໍ່ແກ້ໄຂສະພາບປະກົດການຫຍໍ້ທໍ້ໃນສັງຄົມເປັນຕົ້ນແມ່ນບັນຫາຢາເສບຕິດ ໃນນີ້ມີ 18 ກໍລະນີ, ກັກຕົວຜູ້ກະທຳຜິດໄດ້ 21 ຄົນ ພ້ອມຂອງກາງປະເພດຢາບ້າ 1.958.188 ເມັດ, ເຮໂລອິນ 43,2 ກິໂລ, ຢາໄອສ 512 ກິໂລ, ກັນຊາອັດແທ່ງ 768 ກິໂລ, ຢຶດລົດໃຫຍ່ 12 ຄັນ, ລົດຈັກ 17 ຄັນ, ເຮືອຈັກ 7 ລຳ, ໂທລະສັບ 3 ໜ່ວຍ, ກັກຢຶດລົດບັນທຸກໄມ້ເຖື່ອນໄດ້ 3 ຄັນ ພ້ອມໄມ້ຂອງກາງໄມ້ຈຳນວນ 10.807 ແມັດກ້ອນ, ໝູ 37 ໂຕ, ຊີ້ນໝູ 2.300 ກິໂລ ແລະ ອາຫານທະເລ 91 ກະສອບ.

ໃນ​ໂອ​ກາດ​ນີ, ທ່ານ ເຈົ້າແຂວງສະຫວັນນະເຂດ ໄດ້ສະແດງຄວາມຍ້ອງຍໍຊົມເຊີຍແຕ່ລະກົມກອງ ທີ່ສາມາດເຮັດສຳເລັດໜ້າທີ່ຕາມຂັ້ນເທິງວາງອອກໄດ້ເປັນຢ່າງດີ ພ້ອມທັງໄດ້ແນະນຳໃຫ້ຄະນະການນຳແຕ່ລະກົມກອງ ພ້ອມກັນປະຕິບັດລະບຽບວິໄນຂອງກອງທັບໃຫ້ໜັກແໜ້ນ, ມີຄວາມສາມັກຄີພາຍໃນ, ເຮັດວຽກເປັນໝູ່ຄະນະ ແລະ ໃຫ້ເອົາໃຈໃສ່ສຶກສາອົບຮົມວຽກງານການເມືອງ-ແນວຄິດໃຫ້ກັບພະນັກງານ-ນັກຮົບພາຍໃນກົມກອງເປັນປະຈຳ ເພື່ອເປັນການຕ້ານແນວຄິດຫຍໍ້ທໍ້ຕ່າງໆ. ຈາກນີ້, ກໍໃຫ້ສືບຕໍ່ປັບປຸງກໍ່ສ້າງກົມກອງຕາມ 4 ແຜນງານໃຫຍ່ 26 ໂຄງການຂອງກອງທັບວາງອອກໃຫ້ເກີດດອກອອກຜົນ.

(ຂ່າວ-ພາບ: ຈາກ​ແຂວງ​ສະ​ຫວັນ​ນະ​ເຂດ)