ຫົວ​ຂໍ້ : ຈີນ ຈັດກອງປະຊຸມຮັບມືກັບພະຍາດອັກເສບປອດ

ເຜີຍ​ແຜ່​ໂດຍ​: siththiphone rasphone ເວ​ລາ: 31/01/2020 14:54:55 ຈຳ​ນວນ​ຜູ້​ເຂົ້າ​ຢ້ຽມ​ຊົມ 437 ຄັ້ງ

 

   ຂ່າວສານຊີອາໄອລາຍງານວ່າ: ທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໄດ້ເປັນປະທານ ຈັດກອງປະຊຸມຮັບມື້ກັບສະຖານະການການແຜ່ລະບາດຂອງເຊື້ອໄວຣັດຈຸລະໂຣກສາຍພັນໃໝ່ ໃນວັນທີ 29 ມັງກອນຜ່ານມາ. ກອງປະຊຸມໄດ້ລະບຸວ່າ: ປັດຈຸບັນ ຈີນ ໄດ້ເພີ່ມກໍາລັງປ້ອງກັນທີ່ດີ ແຕ່ສະຖານະການຍັງແຜ່ລະບາດເພີ່ມຫຼາຍຂຶ້ນ, ລັດຖະບານຈີນ ຕ້ອງໃຊ້ມາດຕະການຢ່າງລະອຽດຮອບຄອບເພື່ອຄວບຄຸມການແຜ່ລະບາດຂອງພະຍາດ.

   ກອງປະຊຸມເນັ້ນວ່າ: ຕ້ອງສົ່ງເສີມວຽກງານປ້ອງກັນການຕິດເຊື້ອຢູ່ນະຄອນອູຮັ້ນ ແຂວງຫູເປີຍ, ຮັກສາຜູ້ປ່ວຍຢ່າງສຸດຄວາມສາມາດ, ພະຍາຍາມຫຼຸດອັດຕາການເສຍຊີວິດ, ເປີດເຜີຍຂໍ້ມູນການ ເຮັດວຽກ ຢ່າງໂປ່ງໃສ ແລະ ທັນການ, ເລັ່ງລັດການວິໃຈວັກຊິນ, ພະຍາຍາມຮັບປະກັນວັດຖຸ ແລະ ອຸປະກອນ ປ້ອງ ກັນທາງການແພດ, ລວມເຖິງວັດຖຸທີ່ຈໍາເປັນ ໃນຊີວິດປະຈໍາວັນ ໂດຍໃຊ້ມາດຕະ ການຕ່າງໆ ເຮັດໃຫ້ລາຄາສິນຄ້າມີສະຖຽນລະພາບ.

ກອງປະຊຸມຊີ້ອອກວ່າ: ຕ້ອງຮັບປະກັນການແຜ່ລະບຽດຂອງເຊື້ອໄວຣັດຈຸລະໂຣກສາຍພັນໃໝ່ ຫຼັງຈາກປະຊາຊົນກັບເຂົ້າສູ່ການເຮັດວຽກ ແລະ ແກ້ໄຂບັນຫານັກທ່ອງທ່ຽວຈີນ ທີ່ຕິດຄ້າງຢູ່ຕ່າງປະເທດ.

ຄະນະກຳມະການອະນາໄມ ແລະ ສຸຂະພາບແຫ່ງຊາດຈີນ ເປີດເຜີຍວ່າ, ວັນທີ 29 ມັງກອນຜ່ານມາ, ມີ 31 ແຂວງ, ເຂດປົກຄອງຕົນເອງ, ກຳແພງນະຄອນ ໃນທົ່ວປະເທດຈີນ ໄດ້ລາຍງານຜູ້ເປັນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່, ມີ 7.711 ຄົນ, ຜູ້ມີອາການໜັກ 1.370 ຄົນ, ມີ 170 ຄົນເສຍຊີວິດ, ຜູ້ທີ່ຫາຍຂາດ ແລະ ອອກໂຮງໝໍມີ 124 ຄົນ, ຜູ້ທີ່ຖືກສົງໄສຕິດເຊື້ອພະຍາດ 12.167 ຄົນ.

   ປັດຈຸບັນ, ໄດ້ຕິດຕາມຜູ້ທີ່ເຄີຍສຳຜັດກັບຜູ້ເປັນພະຍາດຢ່າງໃກ້ຊິດມີ 88.693 ຄົນ, ໄດ້ຍົກເລີກການຕິດຕາມສັງເກດທາງການແພດ 2364 ຄົນ ແລະ ຍັງມີ 81.947 ຄົນພວມຖືກຕິດຕາມສັງເກດທາງການແພດ.

   ເວັບໄຊກະຊວງການເງິນຈີນໄດ້ເປີດເຜີຍວ່າ: ອີງຕາມການຕັດສິນນະໂຍບາຍ ແລະ ການຈັດວາງຂອງສູນກາງພັກ ແລະ ລັດຖະບານ, ພາກສ່ວນການເງິນຂັ້ນຕ່າງໆຂອງຈີນ ໄດ້ຕັ້ງໜ້າສະໜັບສະໜູນການປ້ອງກັນ ແລະ ຄວບຄຸມການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ຢ່າງຕັ້ງໜ້າ.

   ລັດຖະບານ ແລະ ອຳນາດການປົກຄອງຂັ້ນຕ່າງໆຂອງຈີນ ໄດ້ໃຊ້ງົບປະມານ 27,3 ຕື້ຢວນ ເພື່ອປ້ອງກັນ ແລະ ຄວບຄຸມການແຜ່ລະບາດຂອງພະຍາດ. ໜ່ວຍງານຮັບຜິດຊອບນຳພາວຽກງານການຮັບມືກັບການແຜ່ລະບາດຂອງພະຍາດອັກເສບປອດສາຍພັນໃໝ່ຂອງກະຊວງການເງິນຈີນ ໄດ້ຈັດກອງປະຊຸມຄັ້ງທີ 4 ໂດຍຊີ້ແຈງວ່າ: ຕ້ອງຕິດຕາມສະພາບການແຜ່ລະບາດຂອງພະຍາດຢ່າງໃກ້ຊິດ, ເພີ່ມທະວີການຄົ້ນຄວ້າມາດຕະການສະໜັບສະໜູນທາງການເງິນຕື່ມອີກ, ປັບປຸງມາດຕະການການເງິນ ແລະ ສ່ວຍສາອາກອນຕໍ່ການປ້ອງກັນ ແລະ ຄວບຄຸມພະຍາດໃຫ້ສົມບູນກວ່າເກົ່າຢ່າງທັນການ ແລະ ເພີ່ມທະວີການຮັບປະກັນດ້ານການເງິນ; ພາກສ່ວນການເງິນຂັ້ນຕ່າງໆ ຕ້ອງຈັດຕັ້ງປະຕິບັດຄຳຊີ້ນຳຂອງໜ່ວຍງານຮັບຜິດຊອບນຳພາວຽກງານການຮັບມືກັບການແຜ່ລະບາດຂອງພະຍາດອັກເສບປອດສາຍພັນໃໝ່ຂອງສູນກາງຢ່າງຈິງຈັງ,ແທ້ດຈິງ, ສັບຊ້ອນເງິນທຶນຢ່າງສົມເຫດສົມຜົນ ເພື່ອຮັບປະກັນການປ້ອງກັນ ແລະ ຄວບຄຸມການແຜ່ລະບາດຂອງພະຍາດ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110