ຫົວ​ຂໍ້ : ຄະນະບໍລິຫານງານສູນກາງພັກ ປປ ລາວ ສົ່ງສານອວຍພອນວັນສ້າງຕັ້ງພັກກອມມູນິດຫວຽດນາມ

ເຜີຍ​ແຜ່​ໂດຍ​: siththiphone rasphone ເວ​ລາ: 03/02/2020 08:55:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 2047 ຄັ້ງ

    ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສົ່ງສານອວຍພອນເຖິງ ຄະນະບໍລິຫານງານສູນກາງພັກກອມມູນິດຫວຽດນາມ ທີ່ນະຄອນຫຼວງຮ່າໂນ້ຍ, ເນື້ອໃນສານລະບຸວ່າ:  ເນື່ອງໃນໂອກາດ ຄົບຮອບ 90 ປີ ແຫ່ງວັນສ້າງຕັ້ງພັກກອມມູນິດ ຫວຽດນາມ (3/2/1930 - 3/2/2020), ໃນນາມຄະນະບໍລິຫານງານສູນກາງພັກປະຊາຊົນ ປະຕິວັດລາວ ແລະ ປະຊາຊົນລາວບັນດາເຜົ່າໃນທົ່ວປະເທດ, ພວກຂ້າພະເຈົ້າ ຂໍສົ່ງພອນໄຊອັນປະເສີດ ແລະ ໄມຕີຈິດມິດຕະພາບ ອັນສະໜິດສະໜົມ ຖານສະຫາຍອ້າຍນ້ອງມາຍັງ ຄະນະບໍລິຫານງານສູນກາງພັກກອມມູນິດ ຫວຽດນາມ, ສະມາຊິກພັກ ແລະ ປະຊາຊົນ ຫວຽດນາມ ອ້າຍນ້ອງທຸກຖ້ວນໜ້າ.

    ການກໍາເນີດເກີດຂຶ້ນຂອງ ພັກກອມມູນິດຫວຽດນາມ ໃນວັນທີ 3 ກຸມພາ ປີ 1930 ໂດຍແມ່ນ ປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່ເປັນຜູ້ສ້າງຕັ້ງ ແລະ ຝຶກຝົນຫຼໍ່ຫຼອມນັ້ນ ແມ່ນບາດລ້ຽວປະ ຫວັດສາດທີ່ສໍາຄັນຂອງການປະຕິວັດຫວຽດນາມ, ຕະຫຼອດໄລຍະ 90 ປີທີ່ຜ່ານມາ, ພັກກອມມູນິດ ຫວຽດນາມ ໄດ້ຈັດຕັ້ງ ແລະ ນໍາພາທຸກໄຊຊະນະຂອງການປະຕິວັດຫວຽດນາມ ດ້ວຍການວາງແນວ ທາງທີ່ຖືກຕ້ອງ, ສະຫຼາດສ່ອງໃສ ແລະ ປະດິດສ້າງ, ເດັດດ່ຽວໜຽວແໜ້ນ ນໍາພາປະຊາຊົນ ຫວຽດນາມອ້າຍນ້ອງ ສ້າງວິລະກໍາອັນລໍ້າເລີດ ໃນພາລະກິດການຕໍ່ສູ້ກູ້ຊາດ ເພື່ອຄວາມເປັນເອກະລາດ ແຫ່ງຊາດ ແລະ ອິດສະຫຼະພາບຂອງຊາດ ຕ້ານກັບລັດທິລ່າເມືອງຂຶ້ນແບບເກົ່າ ແລະ ໃໝ່, ສ້າງຕັ້ງປະເທດເປັນປະເທດສັງຄົມນິຍົມ ແຫ່ງທໍາອິດໃນອາຊີອາຄະເນ ໃນປີ 1945 ແລະ ສືບຕໍ່ຍາດໄດ້ໄຊຊະນະທີ່ຍິ່ງໃຫຍ່, ຮອບດ້ານ, ກ້າວໄປເຖິງການປົດປ່ອຍປະເທດຊາດຢ່າງສົມບູນ, ທ້ອນໂຮມປະເທດຊາດໃນປີ 1975 ຢ່າງສະຫງ່າຜ່າເຜີຍ, ຕໍ່ມາ, ພັກກອມມູນິດຫວຽດນາມ ຜູ້ມີກຽດສະຫງ່າ ໄດ້ເປັນຜູ້ ລິເລີ່ມພາລະກິດການປ່ຽນແປງໃໝ່  ຊຶ່ງສາມາດສືບຕໍ່ຍາດໄດ້ຜົນສໍາເລັດອັນໃຫຍ່ຫຼວງ, ຮອບດ້ານ, ເປັນປະຫວັດການ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມ, ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວດ້ວຍຈັງຫວະໄວ ແລະ ຕໍ່ເນື່ອງ, ການປ້ອງກັນຊາດ - ປ້ອງກັນຄວາມສະຫງົບ ມີຄວາມເຂັ້ມແຂງ, ຊີວິດການເປັນຢູ່ຂອງປະຊາຊົນໄດ້ຮັບການ ປັບປຸງໃຫ້ດີຂຶ້ນເລື້ອຍໆ, ການພົວພັນຮ່ວມມືກັບຕ່າງປະເທດໄດ້ຮັບການເປີດກວ້າງ, ບົດບາດ ແລະ ອິດທິພົນຂອງ ພັກກອມມູນິດຫວຽດນາມ ແລະ ສາທາລະນະລັດ ສັງຄົມນິຍົມ ຫວຽດນາມ ນັບມື້ນັບ ສູງເດັ່ນຂຶ້ນໃນເວທີພາກພື້ນ ແລະ ສາກົນ.

   ພັກປະຊາຊົນ ປະຕິວັດລາວ ແລະ ປະຊາຊົນລາວບັນດາເຜົ່າ ຕີລາຄາສູງ ແລະ ຂໍສະແດງ ຄວາມອວຍພອນ ແລະ ຊົມເຊີຍຢ່າງສຸດອົກສຸດໃຈ ຕໍ່ບັນດາຜົນສໍາເລັດ ແລະ ໄຊຊະນະອັນໃຫຍ່ຫຼວງ ທີ່ປະຊາຊົນຫວຽດນາມ ອ້າຍນ້ອງຍາດມາໄດ້ ແລະ ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນ ສະຫຼາດສ່ອງໃສ ແລະ ຖືກຕ້ອງ, ເດັດດ່ຽວຂອງ ພັກກອມມູນິດຫວຽດນາມ ໂດຍມີ ສະຫາຍ ຫງວຽນ ຟູ ຈ້ອງ ເປັນຜູ້ນໍາໜ້ານັ້ນ, ປະຊາຊົນຫວຽດນາມຜູ້ພິລະອາດຫານ ຈະສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫຼວງກວ່າເກົ່າ ໃນການປະຕິບັດບັນດາມະຕິກອງປະຊຸມໃຫຍ່ ຄັ້ງທີ XII ຂອງພັກ ກອມມູນິດຫວຽດນາມ, ບັນລຸເປົ້າໝາຍເຮັດໃຫ້ປະຊາຊົນຮັ່ງມີ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທໍາ ແລະ ສີວິໄລ ແລະ ກ້າວໄປສູ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງ ພັກຢ່າງມີໄຊ.

   ພວກຂ້າພະເຈົ້າ ມີຄວາມເອກອ້າງທະນົງໃຈເປັນຢ່າງຍິ່ງ ທີ່ເຫັນວ່າ ໃນຖານະເປັນພັກທີ່ມີຕົ້ນ ກໍາເນີດຈາກ ພັກກອມມູນິດອິນດູຈີນ ຕະຫຼອດໄລຍະທີ່ຜ່ານມາ ການນໍາຮຸ່ນທໍາອິດຂອງສອງພັກພວກເຮົາ ໄດ້ມີການສ້າງຕັ້ງ, ຖະນຸຖະໜອມ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ແລະ ໄດ້ຮັບການທົດສອບນາໆປະການບົນແປວໄຟປະຕິວັດນັ້ນ ຊຶ່ງໄດ້ກາຍເປັນມໍລະດົກລວມອັນລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ, ເປັນໜຶ່ງໃນປັດໄຈຕັດສິນທຸກໄຊຊະນະຂອງແຕ່ລະປະເທດ  ແລະ  ພວມສືບຕໍ່ໄດ້ຮັບການເພີ່ມທະວີ ແລະ ເສີມຂະຫຍາຍທັງທາງກວ້າງ ແລະ ທາງເລິກ ໃນທຸກຂົງເຂດວຽກງານຢ່າງບໍ່ຢຸດຢັ້ງ,  ນໍາເອົາຜົນປະໂຫຍດຕົວຈິງ ມາໃຫ້ແກ່ປະຊາຊົນສອງຊາດພວກເຮົາ. ພັກ, ລັດ ແລະ ປະຊາຊົນລາວ ບັນດາເຜົ່າ ຈະເຮັດສຸດຄວາມສາມາດຂອງຕົນ ເພື່ອປົກປັກຮັກສາ ແລະ ເສີມຂະຫຍາຍສາຍພົວພັນດັ່ງກ່າວ ໃຫ້ແຕກດອກອອກຜົນຂຶ້ນໄປເລື້ອຍໆ ເພື່ອຜົນປະໂຫຍດຂອງປະຊາຊົນ ສອງປະເທດ ແລະ ເພື່ອສັນຕິພາບ, ມິດຕະພາບ ແລະ ການຮ່ວມມື ໃນພາກພື້ນ ແລະ ໃນໂລກ.

   ເນື່ອງໃນໂອກາດອັນສະຫງ່າລາສີນີ້, ພວກຂ້າພະເຈົ້າ ຕາງໜ້າໃຫ້ພັກ, ລັດ ແລະ ປະຊາຊົນລາວບັນດາເຜົ່າ ຂໍສະແດງຄວາມຮູ້ບຸນຄຸນຢ່າງເລິກເຊິ່ງ ແລະ ຄວາມຂອບອົກຂອບໃຈຢ່າງຈິງໃຈ ມາຍັງພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງລໍ້າຄ່າ, ມີປະສິດທິຜົນ ແລະ ທັນການ ບົນຈິດໃຈສະຫາຍອ້າຍນ້ອງ ທີ່ບໍລິສຸດຜຸດຜ່ອງແກ່ພາລະກິດການປະຕິວັດລາວ ຕະຫຼອດມາ.

   ຂໍອວຍພອນໃຫ້ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມ ມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນ ແລະ ສວຍສົດງົດງາມຕະຫຼອດໄປ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110